ປະທານສະພາແຫ່ງຊາດຫວຽດນາມ ພົບປະກັບປະທານາທິບໍດີອິນເດຍ
ກປ.ອອນໄລ - ວັນທີ 19 ທັນວາ, ທີ່ທໍານຽບປະທານາທິບໍດີອິນເດຍ ຢູ່ນະຄອນຫຼວງ New Delhi, ທ່ານ ເວືອງດິ່ງເຫ້ວ ປະທານສະພາແຫ່ງຊາດຫວຽດນາມ ໄດ້ພົບປະກັບທ່ານ Ram Nath Kovind ປະທານາທິບໍດີອິນເດຍ.
ທີ່ການພົບປະ, ທ່ານປະທານາທິບໍດີ Ram Nath Kovind ສະແດງຄວາມປະທັບໃຈກ່ຽວກັບຜົນງານເຊິ່ງ ຫວຽດນາມ ບັນລຸໄດ້ໃນພາລະກິດແຫ່ງການສ້າງສາ ແລະພັດທະນາປະເທດຊາດ ກໍຄືຖານະບົດບາດ ແລະທີ່ຕັ້ງນັບມື້ນັບສູງຂຶ້ນຢູ່ພາກພື້ນ ແລະໃນໂລກ. ທ່ານ ເວືອງດິ່ງເຫ້ວ ຢັ້ງຢືນວ່າ ຫວຽດນາມ ຍາມໃດກໍຖືເປັນສໍາຄັນການພົວພັນມິດຕະພາບທີ່ເປັນມູນເຊື້ອມາແຕ່ດົນນານ ແລະຄູ່ຮ່ວມມືຍຸດທະສາດຮອບດ້ານກັບອິນເດຍ.
|
|
ທ່ານ ເວືອງດິ່ງເຫ້ວ ປະທານສະພາແຫ່ງຊາດຫວຽດນາມ ພົບປະກັບທ່ານປະທານາທິບໍດີອິນເດຍ Ram Nath Kovind. ພາບ: ສໍານັກຂ່າວສານຫວຽດນາມ. |
ການນໍາສອງທ່ານເຫັນດີເປັນເອກະພາບສືບຕໍ່ຮັກສາການຢ້ຽມຢາມ, ພົບປະຂັ້ນສູງ ແລະທຸກຂັ້ນ, ຈັດຕັ້ງການເຄື່ອນໄຫວທີ່ມີຄວາມໝາຍ, ແທດຈິງເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດໃນປີ 2022...
ທ່ານປະທານສະພາແຫ່ງຊາດ ເວືອງດິ່ງເຫ້ວ ສະເໜີວ່າ ໃນໄລຍະຈະມາເຖິງສອງປະເທດຄວນສົມທົບກັນຢ່າງແໜ້ນແຟ້ນ ແລະປະຕິບັດແຜນການດຳເນີນງານ 2021-2023 ຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານ ແລະວິໄສທັດຮ່ວມກ່ຽວກັບສັນຕິພາບ, ວັດທະນາຖາວອນ ແລະປະຊາຊົນທີ່ໄດ້ຮັບຮອງເອົາເມື່ອເດືອນທັນວາ ປີ 2020 ໃຫ້ເປັນຢ່າງດີ ເພື່ອເພີ່ມທະວີການພົວພັນອັນດີງາມໃນປັດຈຸບັນລະຫວ່າງສອງປະເທດ ຢ່າງບໍ່ຢຸດຢັ້ງກວ່າອີກ. ສອງຝ່າຍຢັ້ງຢືນວ່າຈະສືບຕໍ່ສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນຢູ່ເວທີປາໄສພາກພື້ນ ແລະສາກົນ. ຫວຽດນາມ ແລະອິນເດຍ ຈະສືບຕໍ່ ສະໜັບສະໜູນຄວາມມານະພະຍາຍາມຊຸກຍູ້ການແກ້ໄຂຄວາມບໍ່ລົງລອຍກັນໂດຍສັນຕິວິທີ, ສອດຄ່ອງກັບກົດໝາຍສາກົນ, ລວມມີສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ເພື່ອສັນຕິພາບ, ການຮ່ວມມື, ສະຖຽນລະພາບ, ພັດທະນາຢູ່ພາກພື້ນ ແລະໃນໂລກ.
ນີ້ແມ່ນການເຄື່ອນໄຫວສຸດທ້າຍ, ສິ້ນສຸດການຢ້ຽມຢາມ ສາທາລະນະລັດ ອິນເດຍ ຢ່າງເປັນທາງການ ແລະປະສົບຜົນສໍາເລັດຢ່າງຈົບງາມຂອງທ່ານປະທານສະພາແຫ່ງຊາດ ເວືອງດິ່ງເຫ້ວ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດຫວຽດນາມ.
ໂດຍ: ໄຊຊະນະ