*ຕອນບ່າຍວັນດຽວກັນ, ທ່ານພົນໂທ ຈິ້ງວັນກວຽດ ໄດ້ມີການພົບປະເຈລະຈາກັບທ່ານພົນເອກ Álvaro Lopez Miera, ກຳມະການກົມການເມືອງພັກກອມມູນິດກູບາ, ລັດຖະມົນຕີກະຊວງບັນດາກໍາລັງປະກອບອາວຸດປະຕິວັດກູບາ. ທີ່ການພົບປະເຈລະຈາ, ທ່ານພົນໂທ Álvaro Lopez Miera ແລະທ່ານພົນໂທ ຈິ້ງວັນກວຽດ ຖືວ່າ ໃນຊຸມປີຕໍ່ໄປ, ສະພາບການໂລກຄາດວ່າຈະສືບຕໍ່ສັບສົນ ແລະຄາດຄະເນໄດ້ຍາກ, ເປັນຕົ້ນແມ່ນບັນຫາກ່ຽວຂ້ອງເຖິງອະທິປະໄຕ, ການປະທະກັນດ້ວຍກໍາລັງອາວຸດ, ການປ່ຽນແປງຂອງດິນຟ້າອາກາດ... ສິ່ງດັ່ງກ່າວໄດ້ວາງອອກວຽກງານຮ່ວມມືດ້ານປ້ອງກັນຊາດສອງປະເທດເວົ້າລວມ, ລະຫວ່າງກົມໃຫຍ່ການເມືອງກອງທັບປະຊາຊົນຫວຽດນາມ ແລະກົມການເມືອງບັນດາກໍາລັງປະກອບອາວຸດປະຕິວັດກູບາ ເວົ້າສະເພາະແມ່ນສືບຕໍ່ສົມທົບກັນຢ່າງແໜ້ນແຟ້ນ, ຊາບຊຶມຢ່າງເລິກເຊິ່ງ, ຜັນຂະຫຍາຍບັນດາຂໍ້ຕົກລົງທີ່ການນຳຂັ້ນສູງຂອງສອງພັກ, ສອງລັດ, ສອງກອງທັບຢ່າງຕັ້ງໜ້າ, ມີປະສິດທິຜົນ.
|
|
ທ່ານພົນໂທ Álvaro Lopez Miera ຕ້ອນຮັບທ່ານພົນໂທ ຈິ້ງວັນກວຽດ ກ່ອນທີ່ດໍາເນີນການພົບປະເຈລະຈາ. ພາບ: qdnd.vn |
ສອງຝ່າຍເຫັນດີເປັນເອກະສັນສືບຕໍ່ເພີ່ມທະວີ ແລະຮັກສາການເຄື່ອນໄຫວແລກປ່ຽນຄະນະຜູ້ແທນຂັ້ນສູງ ແລະການພົບປະແລກປ່ຽນຄະນະຜູ້ແທນລະຫວ່າງບັນດາອົງການ, ກົມກອງຂອງກົມໃຫຍ່ການເມືອງກອງທັບປະຊາຊົນຫວຽດນາມ ແລະ ກົມການເມືອງບັນດາກໍາລັງປະກອບອາວຸດປະຕິວັດກູບາ; ແລກປ່ຽນປະສົບການດ້ານວິຊາສະເພາະລະຫວ່າງບັນດາອົງການທີ່ຮັບຜິດຊອບວຽກງານພັກ, ວຽກງານການເມືອງໃນກອງທັບ; ພົບປະ, ແລກປ່ຽນບົດຮຽນປະສົບການລະຫວ່າງນາຍທະຫານໜຸ່ມຂອງສອງປະເທດ; ແລກປ່ຽນວັດທະນະທໍາສິລະປະ...
|
|
ທ່ານພົນໂທ ຈິ້ງວັນກວຽດ ກ່າວຄໍາເຫັນທີ່ການພົບປະເຈລະຈາ. ພາບ: qdnd.vn |
|
|
ທ່ານພົນໂທ Álvaro Lopez Miera ກ່າວຄໍາເຫັນທີ່ການພົບປະເຈລະຈາ. ພາບ: qdnd.vn |
ສອງຝ່າຍສືບຕໍ່ແບ່ງປັນຜົນການຄົ້ນຄວ້າຂອງວຽກງານການເມືອງ, ວຽກງານສຶກສາອົບຮົມດ້ານການເມືອງ, ແນວຄິດ ແລະວຽກງານກໍ່ສ້າງພັກ; ສືບຕໍ່ເອົາໃຈໃສ່ເຖິງການຮ່ວມມືດ້ານການບຳລຸງກໍ່ສ້າງຊັບພະຍາກອນມະນຸດ, ຜັນຂະຫຍາຍວຽກງານໂຄສະນາສຶກສາ ກ່ຽວກັບປະຫວັດສາດ, ຄວາມໝາຍ ແລະສາຍພົວພັນມິດຕະພາບແບບພິເສດລະຫວ່າງສອງສອງປະເທດ, ສອງກອງທັບຢ່າງມີປະສິດທິຜົນ, ກວ້າງຂວາງ ແລະເປັນປະຈໍາ.
* ຕອນບ່າຍວັນທີ 8 ຕຸລາ (ຕາມເວລາທ້ອງຖິ່ນ), ທ່ານພົນໂທ ຈິ້ງວັນກວຽດ ແລະ ຄະນະພະນັກງານການເມືອງຂັ້ນສູງກອງທັບປະຊາຊົນຫວຽດນາມ ໄດ້ເຂົ້າຢ້ຽມຄໍ່ານັບທ່ານ Miguel Diaz-Canel Bermúdez, ເລຂາທິການຜູ້ທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ກູບາ.
|
|
ທ່ານພົນໂທ ຈິ້ງວັນກວຽດ ແລະຄະນະພະນັກງານການເມືອງຂັ້ນສູງກອງທັບປະຊາຊົນຫວຽດນາມເຂົ້າຢ້ຽມຄໍ່ານັບທ່ານ Miguel Diaz-Canel Bermúdez. ພາບ: ກວາງຖັ໊ງ |
ທ່ານ Miguel Díaz-Canel Bermúdez ຊົມເຊີນທ່ານພົນໂທ ຈິ້ງວັນກວຽດ ພ້ອມດ້ວຍຄະນະພະນັກງານການເມືອງຂັ້ນສູງ ກອງທັບປະຊາຊົນຫວຽດນາມ; ພ້ອມທັງເນັ້ນໜັກວ່າ ພັກ, ລັດ ແລະ ປະຊາຊົນກູບາ ຖືເປັນສຳຄັນສາຍພົວພັນທີ່ເປັນມູນເຊື້ອ, ມິດຕະພາບແບບພິເສດ, ສັດຊື່ບໍລິສຸດກັບ ຫວຽດນາມ; ຈະສືບຕໍ່ສາມັກຄີພ້ອມກັບຫວຽດນາມ ໃນພາລະກິດສ້າງສາ ແລະພັດທະນາປະເທດຊາດ.
* ຕອນຄ່ຳວັນດຽວກັນ, ຢູ່ຫໍຮັບແຂກສະພາແຫ່ງລັດ, ກອງບັນຊາການບັນດາກຳລັງປະກອບອາວຸດປະຕິວັດກູບາ ໄດ້ຈັດພິທີປະດັບໄຊ Playa Giron ຂອງປະທານສະພາແຫ່ງລັດກູບາ ແລະດາບແບບສໍາເນົາຂອງວິລະຊົນແຫ່ງຊາດກູບາ Antonio Maceo ໃຫ້ແກ່ທ່ານພົນໂທ ຈິ້ງວັນກວຽດ ຍ້ອນມີຜົນງານໃນການປັບປຸງ ແລະເພີ່ມທະວີສາຍພົວພັນມິດຕະພາບທີ່ເປັນມູນເຊື້ອແບບພິເສດ ແລະການຮ່ວມມືລະຫວ່າງພັກ, ລັດ, ປະຊາຊົນ ແລະ ກອງທັບສອງປະເທດ ກູບາ-ຫວຽດນາມ.
|
|
ທ່ານພົນໂທ Álvaro Lopez Miera ປະດັບຫຼຽນໄຊ Playa Giron ຂອງປະທານສະພາແຫ່ງລັດກູບາ ໃຫ້ແກ່ທ່ານພົນໂທ ຈິ້ງວັນກວຽດ. ພາບ: qdnd.vn |
|
|
ທ່ານພົນໂທ ຈິ້ງວັນກວຽດ ກ່າວຄໍາເຫັນທີ່ພິທີປະດັບຫຼຽນໄຊ Playa Giron ແລະດາບແບບສໍາເນົາຂອງວິລະຊົນແຫ່ງຊາດກູບາ Antonio Maceo. |
ກ່າວຄຳເຫັນທີ່ພິທີ, ທ່ານພົນໂທ ຈິ້ງວັນກວຽດ ໃຫ້ຮູ້ວ່າ ເລື່ອງໄດ້ຮັບຫຼຽນໄຊ Playa Giron ແລະດາບແບບສໍາເນົາຂອງວິລະຊົນແຫ່ງຊາດກູບາ Antonio Maceo ແມ່ນລາງວັນອັນສູງສົ່ງຂອງພັກ, ລັດ, ປະຊາຊົນ ແລະບັນດາກຳລັງປະກອບອາວຸດປະຕິວັດກູບາ, ກໍຄືອາລົມຈິດອັນສະໜິດສະໜົມ ເຊິ່ງບັນດາສະຫາຍໄດ້ສະຫງວນໃຫ້ຂ້າພະເຈົ້າເອງ ແລະກອງທັບປະຊາຊົນຫວຽດນາມ...
ທ່ານພົນໂທ ຈິ້ງວັນກວຽດ ເຊື່ອໝັ້ນວ່າ ສາຍພົວພັນ ຫວຽດນາມ-ກູບາ ເວົ້າລວມ, ການພົວພັນດ້ານປ້ອງກັນຊາດ ເວົ້າສະເພາະ ຈະສືບຕໍ່ມີຄວາມສາມາດບົ່ມຊ້ອນຫຼາຍເພື່ອພັດທະນາຢ່າງຮອບດ້ານ, ແຂງແຮງກວ່າອີກ, ປະກອບສ່ວນຢ່າງຕັ້ງໜ້າເຂົ້າໃນພາລະກິດສ້າງສາ ແລະປົກປັກຮັກສາປະເທດຊາດຢູ່ແຕ່ລະປະເທດ, ກໍຄືປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນ ແລະໃນໂລກ.
ໂດຍ: ທູຈາງ