ກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ ສືບຕໍ່ຍູ້ແຮງການຮ່ວມມືຮອບດ້ານ
ກປ.ອອນໄລ - ເນື່ອງໃນໂອກາດຮ່ວມເດີນທາງພ້ອມກັບທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44, 45 ແລະບັນດາກອງປະຊຸມສຸດຍອດທີ່ກ່ຽວຂ້ອງຢູ່ນະຄອນຫຼວງວຽງຈັນ, ຕອນບ່າຍວັນທີ 9 ຕຸລາ, ທ່ານພົນໂທ ເຈິ່ນກວກຕໍ ຮອງລັດຖະມົນຕີກະຊວງຕໍາຫຼວດຫວຽດນາມ ໄດ້ນໍາໜ້າຄະນະຜູ້ແທນຂັ້ນສູງກະຊວງຕໍາຫຼວດຫວຽດນາມ ໄດ້ເຂົ້າຢ້ຽມຂໍ່ານັບທ່ານພົນເອກ ວິໄລ ຫຼ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ.
|
|
ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ |
ຕາງໜ້າຄະນະຜູ້ແທນ, ທ່ານພົນໂທ ເຈິ່ນກວກຕໍ ໄດ້ສົ່ງຄໍາຢື້ຢາມຖາມຂ່າວ ແລະຄວາມຂອບໃຈຢ່າງເລິກເຊິ່ງຂອງທ່ານພົນໂທ ເລືອງຕາມກວາງ ກໍາມະການກົມການເມືອງ, ລັດຖະມົນຕີກະຊວງຕໍາຫຼວດຫວຽດນາມ ມາຍັງທ່ານ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ທີ່ໄດ້ໃຫ້ການຕ້ອນຮັບຢ່າງສົບກຽດ ກໍ່ຄືສ້າງທຸກເງື່ອນໄຂສະດວກ ເພື່ອໃຫ້ຄະນະຜູ້ແທນກະຊວງຕໍາຫຼວດຫວຽດນາມ ເຂົ້າຮ່ວມກອງປະຊຸມລັດຖະມົນຕີອາຊຽນ ກ່ຽວກັບການປ້ອງກັນ, ຕ້ານອາດຊະຍະກໍາຂ້າມຊາດ ຄັ້ງທີ 18 ຜ່ານມາຢູ່ລາວ ສໍາເລັດຜົນ.
|
|
ທ່ານພົນເອກ ວິໄລ ຫຼ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ຕ້ອນຮັບທ່ານພົນໂທ ເຈິ່ນກວກຕໍ ຮອງລັດຖະມົນຕີກະຊວງຕໍາຫຼວດຫວຽດນາມ. ພາບ: ສໍານັກຂ່າວສານຫວຽດນາມ |
ທ່ານຮອງລັດຖະມົນຕີ ເຈິ່ນກວກຕໍ ຢືນຢັນວ່າ ຫວຽດນາມ ແລະລາວ ແມ່ນສອງປະເທດບ້ານໃກ້ເຮືອນຄຽງ, ການພົວພັນສະໜິດຕິດພັນລະຫວ່າງສອງຊາດໄດ້ຮັບການສ້າງຕັ້ງ ແລະຝຶກຝົນຫຼໍ່ຫຼອມມາຫຼາຍປີໃນປະຫວັດສາດແຫ່ງການສ້າງສາ ແລະປົກປັກຮັກສາປະເທດ. ທ່ານ ເຈິ່ນກວາຕໍ ກໍ່ເນັ້ນໜັກບົດບາດສຳຄັນພິເສດຂອງກະຊວງຕໍາຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ ໃນຂົງເຂດຮັບປະກັນຄວາມໝັ້ນຄົງແຫ່ງຊາດ ແລະຮັກສາຄວາມເປັນລະບຽບຮຽບຮ້ອຍຄວາມປອດໄພໃນທົ່ວສັງຄົມ.
ສ່ວນທ່ານພົນເອກ ວິໄລ ຫຼ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ຕີລາຄາສູງການຮ່ວມມືລະຫວ່າງສອງປະເທດເວົ້າລວມ ແລະກະຊວງປ້ອງກັນຄວາມສະຫງົບລາວ-ກະຊວງຕໍາຫຼວດຫວຽດນາມ ເວົ້າສະເພາະ, ພິເສດແມ່ນການໜູນຊ່ວຍອັນໃຫຍ່ຫຼວງຂອງກະຊວງຕໍາຫຼວດຫວຽດນາມ ໃນການຜັນຂະຫຍາຍບັນດາໂຄງການ ແລະການຮ່ວມມືບໍາລຸງສ້າງດ້ານການເມືອງໃຫ້ກໍາລັງຕໍາຫຼວດປະຊາຊົນລາວ ໃນໄລຍະຜ່ານມາ. ທ່ານ ວິໄລ ຫຼ້າຄຳຟອງ ສະເໜີກໍາລັງຕໍາຫຼວດຫວຽດນາມ ແລະກຳລັງປ້ອງກັນຄວາມສະຫງົບລາວ ສືບຕໍ່ຍູ້ແຮງການຮ່ວມມືຮອບດ້ານເພື່ອຕອບສະໜອງຄວາມຮຽກຮ້ອງຕ້ອງການ, ໜ້າທີ່ໃນສະພາບການໃໝ່, ເພື່ອຜົນປະໂຫຍດຂອງປະຊາຊົນສອງປະເທດ.
ໂດຍ: ໄຊນີດາ