ນາຍົກລັດຖະມົນຕີ ຟ້າມມີງຈິ໊ງ ພົບປະກັບປະທານາທິບໍດີ ບູຣຸນດີ

ທີ່ການພົບປະ, ທ່ານນາຍົກລັດຖະມົນຕີ ຟ້າມມີງຈິ໊ງ ເນັ້ນໜັກວ່າ ຫວຽດນາມ ຖືເປັນສຳຄັນການຊຸກຍູ້ການພົວພັນມິດຕະພາບ ແລະການຮ່ວມມືກັບບັນດາປະເທດອາຟະລິກາ, ໃນນັ້ນມີ ບູຣຸນດີ. ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະຂອບໃຈລັດຖະບານບູຣຸນດີ ທີ່ໄດ້ສະໜັບສະໜູນໂຄງການລົງທຶນຂະແໜງໂທລະຄົມມະນາຄົມຂອງວິສາຫະກິດຫວຽດນາມ ຢູ່ບູຣຸນດີ. ພ້ອມທັງສະເໜີ ບູຣຸນດີ ສ້າງເງື່ອນໄຂສະດວກໃຫ້ບັນດາວິສາຫະກິດຫວຽດນາມ ໄດ້ເຄື່ອນໄຫວຢູ່ ບູຣຸນດີ. ທ່ານນາຍົກລັດຖະມົນຕີ ສະເໜີໃຫ້ສອງຝ່າຍເພີ່ມທະວີການເຄື່ອນໄຫວແລກປ່ຽນຄະນະຜູ້ແທນ, ກົນໄກຮ່ວມມືລະຫວ່າງສອງຝ່າຍ, ເພີ່ມທະວີການແລກປ່ຽນການຄ້າ ແລະການຮ່ວມມືດ້ານກະສິກຳ.

ທ່ານ ຟ້າມມີງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Evariste Ndayishimiye ປະທານາທິບໍດີ ບູຣຸນດີ. ພາບ: ສໍານັກຂ່າວສານຫວຽດນາມ

ສ່ວນທ່ານປະທານາທິບໍດີ ບູຣຸນດີ Evariste Ndayishimiye ຢັ້ງຢືນວ່າ ບູຣຸນດີ ຖືເປັນສຳຄັນຕໍ່ການພັດທະນາການພົວພັນກັບຫວຽດນາມ, ເປັນຄູ່ຮ່ວມມືທີ່ມີຄວາມສາມາດບົ່ມຊ້ອນຫຼາຍຢ່າງຢູ່ພາກພື້ນອາຊີຕາເວັນອອກສ່ຽງໃຕ້ ແລະເຫັນດີເປັນເອກະພາບຕໍ່ກັບຂໍ້ສະເໜີຂອງທ່ານນາຍົກລັດຖະມົນຕີ ຟ້າມມີງຈິ໊ງ ກ່ຽວກັບການຊຸກຍູ້ການພົວພັນຮ່ວມມືລະຫວ່າງສອງປະເທດໃນໄລຍະຈະມາເຖິງ, ຖືການຮ່ວມມືດ້ານການຄ້າ-ການລົງທຶນເປັນຈຸດສຸມ.

ສອງຝ່າຍໄດ້ເຫັນດີເປັນເອກະພາບສືບຕໍ່ເພີ່ມທະວີການຮ່ວມມື ແລະສະໜັບສະໜູນເຊິ່ງກັນ ແລະກັນຢູ່ເວທີປາໄສຫຼາຍຝ່າຍ ກໍ່ຄືຊຸກຍູ້ການເປັນຂົວເຊື່ອມຕໍ່ຮ່ວມມືຂອງສອງປະເທດກັບອາຊຽນ, ສະຫະພາບອາຟະລິກາ (AU) ແລະລະຫວ່າງອາຊຽນ-AU. ທີ່ການພົບປະ, ການນຳສອງທ່ານ ໄດ້ແລກປ່ຽນຫຼາຍບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ.

ໂດຍ:​ ເຈິ່ນຮວ່ຽນ