ຄະນະຊີ້ນໍາ 515 ທະຫານເຂດ 4 ກວດກາວຽກງານຊອກຫາ, ທ້ອນໂຮມອັດຖິ ຢູ່ແຂວງຄໍາມ່ວນ
ກປ.ອອນໄລ - ຕອນບ່າຍວັນທີ 25 ມີນາ, ຄະນະປະຕິບັດງານ ຄະນະຊີ້ນໍາ 515 ນໍາໂດຍທ່ານພົນຈັດຕະວາ ຫງວຽນດຶກຮວ໊າ ຮອງຫົວໜ້າການເມືອງທະຫານເຂດ 4, ຫົວໜ້າຄະນະຊີ້ນໍາ 515 ທະຫານເຂດ 4 ເປັນຫົວໜ້າຄະນະ ໄດ້ໄປກວດກາວຽກງານສໍາຫຼວດ, ຊອກຫາ, ທ້ອນໂຮມອັດຖິທະຫານອາສາສະໝັກ ແລະນັກຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມ ຢູ່ບໍລິເວນແຂວງຄໍາມ່ວນ ລະດູແລ້ງປີ 2021-2022 ຂອງກອງທ້ອນໂຮມ 589, ກອງບັນຊາການທະຫານແຂວງກວ໋າງບິ່ງ.
ລະດູແລ້ງປີ 2021-2022, ວຽກງານສໍາຫຼວດ, ຊອກຫາ, ທ້ອນໂຮມອັດຖິທະຫານອາສາສະໝັກ ແລະນັກຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ແຂວງຄໍາມ່ວນ ແມ່ນປະສົບຄວາມຫຍຸ້ງຍາກ, ໂດຍສະເພາະແມ່ນສະພາບດິນຟ້າອາກາດຮ້າຍແຮງ, ບໍລິເວນເຄື່ອນໄຫວຂອງກອງທ້ອນໂຮມສ່ວນຫຼາຍແມ່ນບ່ອນບຸກຕີທໍາລາຍຈຸດສຸມໃນເມື່ອກ່ອນຂອງສັດຕູ, ຈໍານວນລູກລະເບີດ, ໝາກມິ່ນບໍ່ທັນແຕກທີ່ຕົກຄ້າງຫຼັງສົງຄາມຍັງມີຫຼາຍ, ຄວາມສ່ຽງດ້ານຄວາມປອດໄພໃນການຊອກຫາ, ທ້ອນໂຮມແມ່ນສູງ.
|
|
ກອງທ້ອນໂຮມ 589 ກອງບັນຊາການທະຫານແຂວງກວ໋າງບິ່ງ ຊອກຫາອັດຖິທະຫານອາສາສະໝັກ ແລະນັກຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມ ຢູ່ບໍລິເວນບ້ານນາຄອມທົ່ງ, ເມືອງເຊບັ້ງໄຟ, ແຂວງຄໍາມ່ວນ. ພາບ: ເລຖັ໊ງ. |
ໂດຍໄດ້ຮັບຄວາມເອົາໃຈໃສ່ຊີ້ນໍາ, ນໍາພາ, ສ້າງເງື່ອນໄຂຂອງກອງບັນຊາການທະຫານເຂດ, ຄະນະຊີ້ນໍາ 515 ຂອງທະຫານເຂດ, ຄະນະຊີ້ນໍາ 515 ຂອງແຂວງກວ໋າງບິ່ງ; ຄະນະພັກ, ອໍານາດການປົກຄອງທຸກຂັ້ນ, ກໍາລັງປະກອບອາວຸດ ແລະປະຊາຊົນແຂວງຄໍາມ່ວນ, ພະນັກງານ, ພາລະກອນກອງທ້ອນໂຮມ 589 ໄດ້ແກ້ໄຂຜ່ານຜ່າຄວາມຫຍຸ້ງຍາກ ເພື່ອປະຕິບັດສໍາເລັດໜ້າທີ່ໄດ້ຮັບມອບໝາຍ. ມາຮອດປັດຈຸບັນ, ກອງທ້ອນໂຮມ 589 ຊອກຫາ, ທ້ອນໂຮມໄດ້ 17 ອັດຖິ ຢູ່ແຂວງຄໍາມ່ວນ, ລື່ນກາຍຄາດໝາຍທີ່ວາງອອກ.
ໂດຍ: ໄຊຊະນະ