ປະ​ທາ​ນາ​ທິ​ບໍ​ດີ ອາ​ເມ​ລິ​ກາ ເຊັນ​ຕໍ່​ກຳ​ນົດ​ເວ​ລາ​ໂຈະການ​ຈັດ​ວາງ​ອັດ​ຕາ​ພາ​ສີ​ສຳ​ລັບ ຈີນ ຕື່ມ​ອີກ 90 ວັນ

ທ່າກໍາປັ່ນຂົນສົ່ງສິນຄ້າຢູ່ແຂວງ ຈຽງຊູ, ຈີນ. ພາບ: THX/ສໍານັກຂ່າວສານຫວຽດນາມ

ວັນທີ 11 ສິງຫາ, ທ່ານ  Donald Trump ປະທານາທິບໍດີ ອາເມລິກາ ໄດ້ເຊັນລັດຖະດຳລັດວ່າດ້ວຍການຕໍ່ກໍານົດເວລາໂຈະການຈັດວາງອັດຕາພາສີສຳລັບ ຈີນ ຕື່ມອີກ 90 ວັນ, ສະກັດກັ້ນສະພາບພາສີສິນຄ້າສອງຝ່າຍເພີ່ມຂຶ້ນສູງເມື່ອບັນດາບໍລິສັດຂາຍຍ່ອຍ ອາເມລິກາ ພວມກະກຽມສິນຄ້າຮັບໃຊ້ໃຫ້ການຊື້ເຄື່ອງຂອງໃນຍາມທ້າຍປີ. ຂໍ້ຕົກລົງໂຈະການຈັດວາງອັດຕາພາສີໄດ້ໝົດຜົນສັກສິດໃນເວລາ 00 ໂມງ 01 ນາທີ ຂອງວັນທີ 12 ສິງຫາ ຕາມເວລາເຂດຕາເວັນອອກ ອາເມລິກາ (ກົງກັບ 11 ໂມງ 01 ນາທີ ຕາມເວລາ ຮ່າໂນ້ຍ) ນັ້ນ ຈະໄດ້ຕໍ່ເວລາຮອດກາງເດືອນພະຈິກ, ໂດຍຮັກສາອັດຕາພາສີຄືປັດຈຸບັນແມ່ນ 30% ສຳລັບສິນຄ້ານຳເຂົ້າຈາກ ຈີນ ແລະ 10% ສຳລັບສິນຄ້າຂອງ ອາເມລິກາ ທີ່ນຳເຂົ້າ ຈີນ, ແທນທີ່ຈະເພີ່ມຂຶ້ນດ້ວຍອັດຕາ 145% ແລະ 125% ຕາມລຳດັບ.

ທ່ານປະທານາທິບໍດີ Trump ກ່າວວ່າ ທ່ານຢາກຮັກສາ “ສາຍພົວພັນທີ່ດີ” ກັບ ທ່ານ ສີຈີນຜິງ ປະທານປະເທດ ຈີນ ແລະ “ຈະລໍຖ້າເບິ່ງວ່າ ສິ່ງໃດຈະເກີດຂຶ້ນ”. ບັນດານັກວິເຄາະຖືວ່າ ການກະທຳດັ່ງກ່າວບວກກັບປະຕິກິລິຍາຫຼຸດຜ່ອນຄວາມເຄັ່ງຕຶງຈຳນວນໜຶ່ງທີ່ໄດ້ດຳເນີນຫວ່າງມໍ່ໆມານີ້, ອາດຈະເປີດທາງໃຫ້ແກ່ການພົບປະລະຫວ່າງທ່ານ Trump ກັບທ່ານ ສີຈີນຜິງ ໃນລະດູໃບໄມ້ຫຼົ່ນນີ້.

ແຫຼ່ງຄັດຈາກ: vovworld.vn