ຕາມແຜນການ, ແຕ່ວັນທີ 26-27 ພຶດສະພາ, ກອງປະຊຸມສຸດຍອດອາຊຽນຄັ້ງທີ 46 ແລະກອງປະຊຸມສຸດຍອດທີ່ກ່ຽວຂ້ອງ ຈະໄຂຂຶ້ນຢູ່ສູນປະຊຸມກົວລາລຳເປີ, ໂດຍມີການເຂົ້າຮ່ວມຂອງຜູ້ນຳບັນດາປະເທດອາຊຽນ, Timor-Leste, ບັນດາປະເທດສະພາການຮ່ວມມືເຂດອ່າວ (GCC) ແລະຈີນ. ດ້ວຍປະມານ 10 ກອງປະຊຸມ, ບັນດາການນຳຈະປຶກສາຫາລືຢ່າງເລິກເຊິ່ງກ່ຽວກັບທິດທາງ ແລະມາດຕະການເພີ່ມທະວີການຮ່ວມມືພາຍໃນກຸ່ມ, ເປີດກວ້າງການເຊື່ອມຕໍ່ກັບບັນດາຄູ່ຮ່ວມມື, ຍົກສູງການສ້າງຄວາມເຂັ້ມແຂງດ້ວຍຕົນເອງທາງດ້ານເສດຖະກິດ ແລະຊອກຫາກຳລັງໜູນຮ່ວມມືໃໝ່ໃນສະພາບການພາກພື້ນ ແລະສາກົນ ມີການຜັນແປຫຼາຍຢ່າງ.

leftcenterrightdel
ທ່ານ ໂດ໊ຮຸ່ງຫວຽດ ຮອງລັດຖະມົນຕີການຕ່າງປະເທດຫວຽດນາມ (ຜູ້ທີ 5, ຈາກຊ້າຍຫາຂວາ), ທ່ານ Datuk Seri Amran Mohamed Zin ເລຂາທິການໃຫຍ່ກະຊວງການຕ່າງປະເທດ (ຜູ້ທີ 6, ຈາກຊ້າຍຫາຂວາ), ໃນຖານະເປັນຫົວໜ້າກອງປະຊຸມເຈົ້າໜ້າທີ່ອາວຸໂສອາຊຽນ (SOM) ຂອງມາເລເຊຍ, ຖ່າຍຮູບກັບບັນດາການນຳ SOM ASEAN ແລະຜູ້ແທນ ກ່ອນທີ່ເປັນປະທານກອງປະຊຸມເຈົ້າໜ້າທີ່ອາວຸໂສອາຊຽນ (SOM) ທີ່ກອງປະຊຸມສຸດຍອດອາຊຽນ ຄັ້ງທີ 46. ພາບ: ສໍານັກຂ່າວສານຫວຽດນາມ.

ໜຶ່ງໃນບັນດາຈຸດພົ້ນເດັ່ນຂອງກອງປະຊຸມສຸດຍອດຄັ້ງນີ້ແມ່ນເລື່ອງການນໍາບັນດາປະເທດອາຊຽນ ລົງນາມຖະແຫຼງການກົວລາລຳເປີ ວ່າດ້ວຍ “ອາຊຽນ 2045: ອະນາຄົດຮ່ວມຂອງພວກເຮົາ” ແລະການຮັບຮອງເອົາວິໄສທັດປະຊາຄົມອາຊຽນ 2045 ພ້ອມກັບຍຸດທະສາດດ້ານການເມືອງ-ຄວາມໝັ້ນຄົງ, ເສດຖະກິດ, ວັດທະນະທຳ-ສັງຄົມ ແລະການເຊື່ອມຕໍ່. ນີ້ຈະແມ່ນເອກະສານກໍານົດທິດສັງລວມ ແລະຮອບດ້ານ, ສ້າງພື້ນຖານອັນໜັກແໜ້ນໃຫ້ແກ່ການເຊື່ອມຕໍ່ພາກພື້ນໃນສອງທົດສະວັດຕໍ່ໜ້າ. ຄຽງຂ້າງນັ້ນ, ເອກະສານຫຼາຍສະບັບພວມໄດ້ຮັບການຜັນຂະຫຍາຍຢ່າງຮີບດ່ວນ ເພື່ອຍື່ນສະເໜີໃຫ້ຜູ້ນຳບັນດາປະເທດອາຊຽນ ແລະຄູ່ຮ່ວມມື ພິຈາລະນາ, ຮັບຮອງເອົາ ແລະຮອງຮັບ.

ຕີລາຄາສູງວຽກງານກະກຽມຂອງປະເທດເຈົ້າພາບມາເລເຊຍ, ຫົວໜ້າ SOM ບັນດາປະເທດອາຊຽນ ຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນ, ຮັບປະກັນໃຫ້ກອງປະຊຸມ ດຳເນີນໄປຢ່າງສຳເລັດຜົນ, ບັນລຸໝາກຜົນແທດຈິງຫຼາຍຢ່າງ. ກໍທີ່ກອງປະຊຸມ, ທ່ານ ໂດ໊ຮຸ່ງຫວຽດ ໄດ້ພ້ອມກັບບັນດາປະເທດ ປຶກສາຫາລືຫຼາຍເນື້ອໃນສຳຄັນທີ່ກ່ຽວຂ້ອງເຖິງວິວັດການກໍ່ສ້າງປະຊາຄົມອາຊຽນ, ໜູນຊ່ວຍ Timor-Leste ກາຍເປັນສະມາຊິກອາຊຽນຢ່າງເປັນທາງການ, ຜັນຂະຫຍາຍການຮ່ວມມືລະອຽດລະຫວ່າງອາຊຽນ ກັບບັນດາຄູ່ຮ່ວມມື, ຍົກສູງປະສິດທິຜົນການເຄື່ອນໄຫວຂອງບັນດາກົນໄກ ໂດຍ ອາຊຽນ ຊັກນໍາ.

* ຕອນບ່າຍວັນດຽວກັນ, ໂດຍໄດ້ຮັບການມອບສິດຈາກທ່ານ ບຸ່ຍແທັງເຊີນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ,  ທ່ານ ໂດ໊ຮຸ່ງຫວຽດ ໄດ້ເຂົ້າຮ່ວມກອງປະຊຸມປຶກສາຫາລືບໍ່ເປັນທາງການ ເປີດກວ້າງ ກ່ຽວກັບການຜັນຂະຫຍາຍຄວາມເຫັນດີເຫັນພ້ອມ 5 ຂໍ້ ກ່ຽວກັບມຽນມາ ແລະຮັບຟັງບົດລາຍງານກ່ຽວກັບວຽກງານຂອງທູດພິເສດຂອງປະທານອາຊຽນ ກ່ຽວກັບມຽນມາ ໃນໄລຍະຜ່ານມາ. ທ່ານ ໂດ໊ຮຸ່ງຫວຽດ ໄດ້ຕີລາຄາສູງບັນດາຄວາມມານະພະຍາຍາມຂອງທູດພິເສດ ແລະປະທານອາຊຽນ 2025, ຢັ້ງຢືນວ່າ ຫວຽດນາມ ສົມທົບກັນຢ່າງແໜ້ນແຟ້ນກັບບັນດາປະເທດສະມາຊິກ ເພື່ອຜັນຂະຫຍາຍຄວາມເຫັນດີເຫັນພ້ອມ 5 ຂໍ້ ແລະສະເໜີບາງມາດຕະການຍົກສູງປະສິດທິຜົນການຜັນຂະຫຍາຍ ໃນໄລຍະຈະມາເຖິງ.

* ວັນທີ 25 ພຶດສະພາ, ທ່ານ ບຸ່ຍແທັງເຊີນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຈະນຳພາຄະນະຜູ້ແທນຫວຽດນາມ ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ (AMM), ກອງປະຊຸມສະພາປະຊາຄົມການເມືອງ - ຄວາມໝັ້ນຄົງອາຊຽນ (APSC), ກອງປະຊຸມສະພາປະສານງານອາຊຽນ (ACC) ແລະກອງປະຊຸມລັດຖະມົນຕີການຕ່າງປະເທດ ອາຊຽນ - GCC.

ໂດຍ: ໄຊຊະນະ