ເສີມຂະຫຍາຍມູນເຊື້ອໜູນຊ່ວຍກັນລະຫວ່າງ ຫວຽດນາມ-ລາວ-ກໍາປູເຈຍ

ທ່ານ ຟ້າມມິງຈີ້ງ  ນາຍົກລັດຖະມົນຕີຫວຽດນາມ ພ້ອມກັບທ່ານ ສອນໄຊ ສີພັນດອນ ນາຍົກລັດຖະມົນຕີ ລາວ ແລະ ທ່ານ ຮຸນ ມາແນດ ນາຍົກລັດຖະມົນຕີ ກຳປູເຈຍ. ພາບ: ສໍານັກຂ່າວສານຫວຽດນາມ.

ທີ່ການເຮັດວຽກ, ສາມນາຍົກລັດຖະມົນຕີ ໄດ້ເຫັນດີຕີລາຄາວ່າ ຫຼາຍກົນໄກຮ່ວມມືສອງຝ່າຍ ແລະລະຫວ່າງສາມຝ່າຍ ຫວຽດນາມ - ລາວ - ກໍາປູເຈຍ ໄດ້ ແລະພວມເສີມຂະຫຍາຍຢ່າງມີປະສິດທິຜົນ, ປະກອບສ່ວນແທດຈິງເຂົ້າໃນການປັບປຸງ ແລະເພີ່ມພູນຄູນສ້າງໃຫ້ແກ່ການຮ່ວມມືລະຫວ່າງສາມປະເທດ. ຄວາມໄວ້ເນື້ອເຊື່ອໃຈ, ການແບ່ງປັນຍຸດທະສາດ ແມ່ນພື້ນຖານໃຫ້ແກ່ການຮ່ວມມືແບບຍືນຍົງ, ຍາວນານໃນທຸກຂົງເຂດ.

ທ່ານ ຟ້າມມິງຈີ້ງ  ນາຍົກລັດຖະມົນຕີຫວຽດນາມ ພ້ອມກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ ແລະ ທ່ານ ຮຸນ ມາແນດ ນາຍົກລັດຖະມົນຕີກຳປູເຈຍ. ພາບ: ສໍານັກຂ່າວສານຫວຽດນາມ.

ສາມຝ່າຍເຫັນດີຊຸກຍູ້ຜັນຂະຫຍາຍການຮ່ວມມືພັດທະນາເຂດຊາຍແດນ, ໃນນັ້ນສຸມໃສ່ເຊື່ອມຕໍ່ພື້ນຖານໂຄງລ່າງຄົມມະນາຄົມ, ພະລັງງານ, ການຄ້າ, ການຫັນເປັນດີຈີຕອນ, ຊັບພະຍາກອນມະນຸດ ແລະເສີມຂະຫຍາຍລະບົບດ່ານຊາຍແດນທາງບົກລະຫວ່າງສາມປະເທດຢ່າງມີປະສິດທິຜົນ, ເພື່ອອໍານວຍຄວາມສະດວກໃຫ້ແກ່ການຄ້າຊາຍແດນ, ພັດທະນາເສດຖະກິດ-ສັງຄົມຂອງບັນດາແຂວງຊາຍແດນ; ສົມທົບກັນຄົ້ນຄວ້າສ້າງຕັ້ງເຂດເສດຖະກິດຂ້າມຊາຍແດນ, ກວດກາຄືນ, ປັບປຸງ, ເພີ່ມເຕີມຂໍ້ຕົກລົງແນໃສ່ສ້າງຂອບນິຕິກໍາທີ່ປອດໂປ່ງ ເພື່ອມານະພະຍາຍາມຍົກວົງເງິນການຄ້າລະຫວ່າງ ຫວຽດນາມ - ລາວ ຂຶ້ນເປັນ 5 ຕື້ໂດລາສະຫະລັດ ແລະຫວຽດນາມ - ກໍາປູເຈຍ ຂຶ້ນເປັນ 20 ຕື້ໂດລາສະຫະລັດ; ຊຸກຍູ້ຂໍ້ລິເລີ່ມ “3 ປະເທດ, 1 ສະຖານທີ່” ແລະສົມທົບກັບໄທ ຜັນຂະຫຍາຍໂຄງການເຊື່ອມຕໍ່ຄົມມະນາຄົມລະຫວ່າງ 4 ປະເທດ.

ທ່ານ ຟ້າມມິງຈີ້ງ  ນາຍົກລັດຖະມົນຕີຫວຽດນາມ ພ້ອມກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ ແລະ ທ່ານ ຮຸນ ມາແນດ ນາຍົກລັດຖະມົນຕີກຳປູເຈຍ ຮັບປະທານອາຫານເຊົ້າ ແລະເຮັດວຽກຮ່ວມກັນ. ພາບ: ສໍານັກຂ່າວສານຫວຽດນາມ.

ສາມນາຍົກລັດຖະມົນຕີ ແບ່ງປັນນໍາກັນວ່າ ຄວາມໝັ້ນຄົງຂອງປະເທດນີ້ ກໍ່ແມ່ນຜົນປະໂຫຍດຂອງປະເທດອື່ນ; ໃຫ້ຄໍາໝັ້ນສັນຍາຮ່ວມມື, ຮັບປະກັນຮັກສາສະຖຽນລະພາບດ້ານການເມືອງ, ຄວາມໝັ້ນຄົງ, ຄວາມປອດໄພໃນສັງຄົມຢູ່ແຕ່ລະປະເທດ ແລະຮັກສາຄວາມເປັນລະບຽບຮຽບຮ້ອຍຢູ່ເຂດຊາຍແດນ; ຍູ້ແຮງການສະກັດກັ້ນ ແລະຕ້ານອາດຊະຍາກຳປະເພດຕ່າງໆ, ຕ້ານການເຂົ້າເມືອງຜິດກົດໝາຍ, ປົກປັກຮັກສາເສັ້ນຊາຍແດນມິດຕະພາບ, ສັນຕິພາບ, ສະຖຽນລະພາບ ແລະພັດທະນາ. ສາມນາຍົກລັດຖະມົນຕີ ເນັ້ນໜັກວ່າ ການຮັກສາ ແລະເສີມຂະຫຍາຍມູນເຊື້ອສາມັກຄີ, ໜູນຊ່ວຍເຊິ່ງກັນແລະກັນລະຫວ່າງຫວຽດນາມ, ລາວ ແລະກໍາປູເຈຍ ຍິ່ງກາຍເປັນສິ່ງທີ່ຈໍາເປັນ, ສໍາຄັນກວ່າເວລາໃດໝົດ, ແມ່ນໜຶ່ງໃນບັນດາປັດໄຈສໍາຄັນ ເພື່ອຊຸກຍູ້ການຮ່ວມມືຢ່າງໜັກແໜ້ນລະຫວ່າງສາມປະເທດ.

ສາມນາຍົກລັດຖະມົນຕີ ກໍ່ເຫັນດີປຶກສາຫາລືເຊິ່ງກັນ ແລະກັນ ກ່ຽວກັບບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ ແລະສະພາບການຢູ່ມຽນມາ; ບັນຫາທີ່ກ່ຽວຂ້ອງເຖິງການພົວພັນສອງຝ່າຍ ແລະລະຫວ່າງສາມຝ່າຍ; ປະສານສົມທົບກັນເພື່ອກະກຽມເຫດການສຳຄັນຕ່າງໆຢູ່ແຕ່ລະປະເທດ ໃນໄລຍະຈະມາເຖິງ ໃຫ້ເປັນຢ່າງດີ.

ໂດຍ: ໄຊຊະນະ