ຕອບສຳພາດຕໍ່ສື່ມວນຊົນ, ທ່ານ ເຢືອງຮວ່າງມີງ ທີ່ປຶກສາທູດການຄ້າ ສະຖານທູດຫວຽດນາມ ປະຈຳສະຫະພັນລັດເຊຍ ໄດ້ຍົກອອກບັນດາເນື້ອໃນຕົ້ນຕໍທີ່ SPIEF ຄັ້ງທີ 27, ຄວາມໝາຍກ່ຽວກັບເລື່ອງທ່ານຮອງນາຍົກລັດຖະມົນຕີ ເຈິ່ນລືວກວາງ ເຂົ້າຮ່ວມເຫດການນີ້ ແລະການຮ່ວມມືດ້ານເສດຖະກິດ-ການຄ້າ ຫວຽດນາມ-ສະຫະພັນລັດເຊຍ ໃນໄລຍະຜ່ານມາ.
ໃນຖານະເປັນໜຶ່ງໃນບັນດາເວທີປາໄສເສດຖະກິດແຖວໜ້າຂອງພາກພື້ນ ແລະໃນໂລກ, SPIEF ຄັ້ງທີ 27 ດຳເນີນໄປໃນສະພາບທີ່ພາກພື້ນ ແລະໂລກໄດ້ ແລະພວມຜ່ານການຜັນປ່ຽນຢ່າງເລິກເຊິ່ງ, ພື້ນຖານເສດຖະກິດລັດເຊຍ ສືບຕໍ່ບືນຕົວຂຶ້ນກາຍເປັນພື້ນຖານເສດຖະກິດໃຫຍ່ອັນດັບ 4 ທົ່ວໂລກ. ທ່ານສາມາດແບ່ງປັນກ່ຽວກັບສະພາບການຕື່ມອີກ ແລະເນື້ອໃນຕົ້ນຕໍທີ່ຄາດວ່າຈະໄດ້ຮັບການປຶກສາຫາລືໃນເວທີປາໄສໃນປີນີ້?
SPIEF ໂດຍສະຫະພັນລັດເຊຍ ຈັດຕັ້ງທຸກໆປີນັບແຕ່ປີ 1997 ເປັນຕົ້ນມາ, ໂດຍມີເປົ້າໝາຍຊຸກຍູ້ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ ລັດເຊຍ ແລະບັນດາປະເທດໃນທົ່ວໂລກ. ເວທີປາໄສແມ່ນໄດ້ຮັບການອຸປະຖໍາ ແລະເຂົ້າຮ່ວມໂດຍກົງຂອງປະທານາທິບໍດີລັດເຊຍ ນັບແຕ່ປີ 2006 ເປັນຕົ້ນມາ.
ຕາມການປະກາດຂອງຄະນະຈັດຕັ້ງ, SPIEF 2024 ຈະມີການເຂົ້າຮ່ວມຂອງຜູ້ແທນ 17.000 ກວ່າຄົນ ແລະນັກຂ່າວ 3.400 ກວ່າຄົນທີ່ມາຈາກ 136 ປະເທດ ແລະເຂດແຄວ້ນ.
    |
 |
|
ທ່ານ ເຢືອງຮວ່າງມີງ ເຮັດວຽກກັບວິສາຫະກິດລັດເຊຍ. ພາບ: ສະຖານທູດຫວຽດນາມ ປະຈໍາ ລັດເຊຍ |
ໃນສະພາບການດ້ານການເມືອງ, ເສດຖະກິດຂອງໂລກມີການປ່ຽນແປງຢ່າງເລິກເຊິ່ງ ແລະທ່າອ່ຽງຫຼາຍຂົ້ວນັບມື້ນັບດໍາເນີນໄປຢ່າງຈະແຈ້ງ, ລັດເຊຍ ໄດ້ສ້າງໂຄງການດຳເນີນງານ SPIEF 2024 ດ້ວຍຫົວຂໍ້ຕົ້ນຕໍແມ່ນ “ພື້ນຖານຂອງໂລກຫຼາຍຂົ້ວ-ການສ້າງຈຸດເຕີບໂຕໃໝ່”.
ໂຄງການດໍາເນີນງານຂອງເວທີປາໄສປີນີ້ ຈະສຸມໃສ່ 4 ເນື້ອໃນ, ຄື: “ຫັນປ່ຽນເສດຖະກິດໂລກໄປສູ່ຮູບແບບຫຼາຍຂົ້ວ”, “ເສດຖະກິດລັດເຊຍ: ເປົ້າໝາຍ ແລະໜ້າທີ່ຂອງວົງຈອນໃໝ່”, “ເຕັກໂນໂລຊີຮັບປະກັນການນໍາໜ້າ” ແລະ “ສຸຂະພາບຂອງສັງຄົມ-ຄຸນຄ່າມູນເຊື້ອ ແລະການພັດທະນາສັງຄົມ-ບູລິມະສິດຂອງລັດ".
ໃນໄລຍະການເຮັດວຽກ 4 ວັນ, ບັນດາຜູ້ແທນຈະເຂົ້າຮ່ວມກອງປະຊຸມຫົວເລື່ອງສະເພາະ 150 ກວ່າຄັ້ງ. ບັນດາຜູ້ແທນຈະແລກປ່ຽນກ່ຽວກັບເງື່ອນໄຂທີ່ຈຳເປັນເພື່ອຊຸກຍູ້ ແລະພັດທະນາການພົວພັນເສດຖະກິດສາກົນ ແລະບົດບາດຂອງລັດເຊຍ ໃນໄລຍະຈະມາເຖິງ.
ທີ່ SPIEF ຄັ້ງທີ 27 ຈະດຳເນີນການສົນທະນາກ່ຽວກັບທຸລະກິດສາກົນກວ່າ 10 ວາລະ, ລວມມີ EAEU-ASEAN, ລັດເຊຍ-ອາຟະຣິກາ, ລັດເຊຍ-ອາເມລິກາລາຕິນ, ລັດເຊຍ-ຈີນ, ລັດເຊຍ-ອິນເດຍ, ລັດເຊຍ-UAE, ລັດເຊຍ-Oman, ລັດເຊຍ-Azerbaiajan... ແລະການພົບປະສອງຝ່າຍອື່ນອີກ...
ຂໍທ່ານໃຫ້ຮູ້ກ່ຽວກັບຂັ້ນຕອນທີ່ຫວຽດນາມ ເຂົ້າຮ່ວມເວທີປາໄສຄັ້ງນີ້ ແລະເລື່ອງທ່ານຮອງນາຍົກລັດຖະມົນຕີ ເຈິ່ນລືວກວາງ ເຂົ້າຮ່ວມ SPIEF ຄັ້ງທີ 27 ມີຄວາມໝາຍຄືແນວໃດ, ພິເສດແມ່ນໃນການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ 2 ປະເທດ?
ກ່ອນໜ້ານີ້, ຫວຽດນາມ ເຂົ້າຮ່ວມ SPIEF ໃນລະດັບການນຳຂັ້ນກະຊວງທີ່ຮັບຜິດຊອບດ້ານເສດຖະກິດ ແລະການຄ້າ. ໃນຊຸມປີມໍ່ໆມານີ້, ດ້ວຍການພົວພັນຮ່ວມມືລະຫວ່າງ 2 ປະເທດນັບມື້ນັບເລິກເຊິ່ງ ກວ້າງຂວາງ, ຫວຽດນາມ ໄດ້ສົ່ງຄະນະຜູ້ແທນຂັ້ນສູງເຂົ້າຮ່ວມ SPIEF ເປັນປະຈຳ ເພື່ອພົບປະ ແລະປຶກສາຫາລືກັບບັນດາການນຳລັດເຊຍ ແລະບັນດາປະເທດເຂົ້າຮ່ວມເວທີປາໄສກ່ຽວກັບສະພາບການ ແລະທ່າອ່ຽງພັດທະນາເສດຖະກິດລັດເຊຍ ແລະໂລກ, ແລກປ່ຽນບັນດາມາດຕະການຊຸກຍູ້ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງ ຫວຽດນາມ ກັບ ລັດເຊຍ ແລະບັນດາຄູ່ຮ່ວມມື.
|
|
 |
|
ວັນທີ 3 ມິຖຸນານີ້, ທ່ານ ດັ້ງມິງຄອຍ ເອກອັກຄະລັດຖະທູດຫວຽດນາມ ປະຈຳ ສະຫະພັນລັດເຊຍ ແລະທ່ານທີ່ປຶກສາທູດ ເຢືອງຮວ່າງມີງ ຕ້ອນຮັບຄະນະຜູ້ແທນສະຫະສະມາຄົມຕໍ່າແຜ່ນຕັດຫຍິບ ຫວຽດນາມ ທີ່ໄປຢ້ຽມຢາມ ແລະເຮັດວຽກຢູ່ ລັດເຊຍ. ພາບ: ສະຖານທູດຫວຽດນາມ ປະຈໍາ ລັດເຊຍ |
ເລື່ອງທ່ານຮອງນາຍົກລັດຖະມົນຕີ ເຈິ່ນລືວກວາງ ເຂົ້າຮ່ວມກອງປະຊຸມ SPIEF ຄັ້ງທີ 27 ໄດ້ສະແດງໃຫ້ເຫັນການຖືເປັນສຳຄັນຂອງລັດຖະບານຫວຽດນາມ ທີ່ມີຕໍ່ການພັດທະນາສາຍພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ.
ປະຈຸບັນ, ເສດຖະກິດທົ່ວໂລກ ກໍ່ຄືພາກພື້ນພວມປະເຊີນໜ້າກັບສິ່ງທ້າທາຍຫຼາຍຢ່າງ. ສະພາບການດັ່ງກ່າວໄດ້ກະທົບຄືແນວໃດຕໍ່ການຮ່ວມມືດ້ານເສດຖະກິດ, ການຄ້າ ແລະການລົງທຶນລະຫວ່າງສອງປະເທດ? ສະຖານທູດ ແລະຫ້ອງການການຄ້າຫວຽດນາມ ປະຈຳ ລັດເຊຍ ໄດ້ ແລະພວມຜັນຂະຫຍາຍບັນດາມາດຕະການໃດ ເພື່ອສົ່ງເສີມ ແລະໜູນຊ່ວຍບັນດາວິສາຫະກິດສືບຕໍ່ຊຸກຍູ້ການຮ່ວມມື ແລະສົ່ງເສີມການຄ້າລະຫວ່າງ 2 ປະເທດ?
ພາຍຫຼັງ ທີ່ຫວຽດນາມ ແລະສະຫະພັນເສດຖະກິດອາຊີ-ເອີລົບ (EAEU) ລົງນາມໃນສັນຍາການຄ້າເສລີ (VN-EAEU FTA), ວົງເງິນການຄ້າລະຫວ່າງ ຫວຽດນາມ ແລະ ລັດເຊຍ ເພີ່ມຂຶ້ນຢ່າງວ່ອງໄວ, ບັນລຸ 5,5 ຕື້ໂດລາສະຫະລັດ ໃນປີ 2021, ເພີ່ມຂຶ້ນເກືອບ 90% ເມື່ອທຽບໃສ່ປີ 2016, ໃນນັ້ນການສົ່ງອອກຂອງຫວຽດນາມ ໄປຍັງລັດເຊຍ ບັນລຸ 3,2 ຕື້ໂດລາສະຫະລັດ, ເພີ່ມຂຶ້ນ 100% ເມື່ອທຽບໃສ່ປີ 2016.
ເຖິງຢ່າງໃດກໍ່ຕາມ, ນັບແຕ່ລັດເຊຍ-ຢູແກຼນ ປະທະກັນ (ເດືອນກຸມພາ 2022), ສະພາບການດ້ານພູມສາດການເມືອງ ແລະເສດຖະກິດບໍ່ສະດວກໄດ້ສົ່ງຜົນກະທົບຫຍໍ້ທໍ້ເຖິງການຄ້າສອງຝ່າຍຫວຽດນາມ-ລັດເຊຍ. ວົງເງິນສົ່ງອອກຂອງຫວຽດນາມ ໄປຍັງລັດເຊຍໃນປີ 2022 ຫຼຸດລົງກວ່າ 51%.
ໃນສະພາບການນັ້ນ, ສະຖານທູດຫວຽດນາມ ປະຈຳ ລັດເຊຍ ໄດ້ລາຍງານສະພາບການຢ່າງທັນການ, ສະເໜີບັນດາຂໍ້ສະເໜີແນະເຖິງອົງການເຈົ້າໜ້າທີ່; ສົມທົບກັບບັນດາຫົວໜ່ວຍທີ່ກ່ຽວຂ້ອງຂອງທັງສອງປະເທດຜັນຂະຫຍາຍຫຼາຍມາດຕະການໜູນຊ່ວຍ, ແກ້ໄຂສິ່ງກີດຂວາງດ້ານການຄ້າລະຫວ່າງສອງປະເທດ, ໃນນັ້ນໄດ້ສຸມໃສ່ບັນຫາການຊຳລະເງິນ, ການຂົນສົ່ງ, ການໄປມາຂອງປະຊາຊົນ ແລະນັກທຸລະກິດຂອງສອງປະເທດ.
ໃນຂອບເຂດງານບຸນວັນຫວຽດນາມ ຢູ່ລັດເຊຍ ເດືອນ ຕຸລາ 2023, ສະຖານທູດຫວຽດນາມ ໄດ້ສົມທົບກັບກະຊວງອຸດສາຫະກຳ ແລະ ການຄ້າ ຈັດຕັ້ງງານວາງສະແດງສິນຄ້າຫວຽດນາມ ຄຸນນະພາບສູງຢູ່ສູນວາງສະແດງ ຮ່າໂນ້ຍ-ມົດສະກູ ມີວິສາຫະກິດ 50 ກວ່າແຫ່ງເຂົ້າຮ່ວມ ແລະເວທີປາໄສແລກປ່ຽນການຄ້າວິສາຫະກິດຫວຽດນາມ-ລັດເຊຍ ໂດຍມີຜູ້ແທນ 200 ກວ່າຄົນເຂົ້າຮ່ວມ, ຜ່ານນັ້ນຕັ້ງໜ້າປະກອບສ່ວນໂຄສະນາຜະລິດຕະພັນຫວຽດນາມ ຢູ່ຕະຫຼາດລັດເຊຍ.
|
|
 |
|
ໄຂງານວາງສະແດງສິນຄ້າຫວຽດນາມ ຄຸນນະພາບສູງໃນຂອບເຂດວັນຫວຽດນາມ ຢູ່ລັດເຊຍ, ເດືອນຕຸລາ 2023. ພາບ: ສະຖານທູດຫວຽດນາມ ປະຈໍາ ລັດເຊຍ |
ມາຮອດປະຈຸບັນ, ດ້ວຍຄວາມມານະພະຍາຍາມຮ່ວມຂອງທັງສອງຝ່າຍ, ບັນດາອຸປະສັກດ້ານການຊຳລະເງິນ ແລະການຂົນສົ່ງໄດ້ຮັບການແກ້ໄຂເທື່ອລະກ້າວ, ວົງເງິນການຄ້າສອງຝ່າຍພາຍຫຼັງທີ່ຫຼຸດລົງຢ່າງແຮງໃນປີ 2022 ໄດ້ຟື້ນຟູໃນເບື້ອງຕົ້ນ.
ຕາມຕົວເລກສະຖິຕິຂອງກົມພາສີຫວຽດນາມ, ວົງເງິນສົ່ງອອກສິນຄ້າລະຫວ່າງຫວຽດນາມ-ລັດເຊຍ ໃນປີ 2023 ບັນລຸ 3,6 ຕື້ໂດລາສະຫະລັດ, ເພີ່ມຂຶ້ນ 2,3% ເມື່ອທຽບໃສ່ປີ 2022. ໃນ 4 ເດືອນຕົ້ນປີ 2024, ວົງເງິນການຄ້າສອງຝ່າຍເພີ່ມຂຶ້ນ 55,9% ເມື່ອທຽບໃສ່ໄລຍະດຽວກັນຂອງປີ 2023, ບັນລຸ 1,57 ຕື້ໂດລາສະຫະລັດ. ໃນນັ້ນການສົ່ງອອກບັນລຸ 761,9 ລ້ານໂດລາສະຫະລັດ (ເພີ່ມຂຶ້ນ 49%), ການນໍາເຂົ້າບັນລຸ 806,7 ລ້ານໂດລາສະຫະລັດ (ເພີ່ມຂຶ້ນ 62,6%).
ຫວຽດນາມ ແລະລັດເຊຍ ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານນັບແຕ່ປີ 2012 ເປັນຕົ້ນມາ. ໃນເດືອນ ພຶດສະພາ 2015, ຫວຽດນາມ ແລະ EAEU, ໃນນັ້ນ ມີລັດເຊຍ ແມ່ນສະມາຊິກໄດ້ລົງນາມໃນສັນຍາ VN-EAEU FTA. ປະຈຸບັນ, ພາຍຫຼັງ 8 ປີແຫ່ງການປະຕິບັດ, ເກືອບ 90% ຂອງສິນຄ້າສົ່ງອອກຈາກທັງສອງຝ່າຍ ລ້ວນແຕ່ມີອັດຕາເສຍພາສີນຳເຂົ້າ 0% ຫຼື ໃນລະດັບຕ່ຳທີ່ສຸດ. ນີ້ແມ່ນເງື່ອນໄຂສະດວກທີ່ສຸດເພື່ອໃຫ້ບັນດາວິສາຫະກິດຂອງ 2 ປະເທດເພີ່ມທະວີການຮ່ວມມືດ້ານເສດຖະກິດ, ການຄ້າ ແລະການລົງທຶນ.
ເພື່ອນໍາໃຊ້ບູລິມະສິດຈາກສັນຍາ VN-EAEU FTA ນໍາມາໃຫ້, ພ້ອມທັງສືບຕໍ່ຮັກສາລະດັບການເຕີບໂຕດ້ານການຄ້າສອງຝ່າຍສູງໃນປີນີ້ ແລະໃນໄລຍະຈະມາເຖິງ, ສະຖານທູດ ແລະຫ້ອງການການຄ້າຫວຽດນາມ ປະຈຳ ລັດເຊຍ ຮຽກຮ້ອງໃຫ້ບັນດາວິສາຫະກິດ 2 ປະເທດ, ພິເສດແມ່ນວິສາຫະກິດຫວຽດນາມ, ເພີ່ມທະວີການເຄື່ອນໄຫວສົ່ງເສີມການຄ້າ, ໂດຍສະເພາະແມ່ນການເຂົ້າຮ່ວມງານວາງສະແດງລົງເລິກຂະແໜງການຢູ່ຕະຫຼາດຂອງກັນ, ຜ່ານນັ້ນຊອກຮູ້ຕະຫຼາດ ແລະຊອກຫາລູກຄ້າເພື່ອສ້າງຕັ້ງການພົວພັນດຳເນີນທຸລະກິດ. ບັນດາອົງການຜູ້ຕາງໜ້າຢູ່ລັດເຊຍ ຍາມໃດກໍ່ພ້ອມແລ້ວທີ່ຈະສົມທົບ, ໃຫ້ຄໍາປຶກສາ ແລະໜູນຊ່ວຍການເຊື່ອມຕໍ່ການຮ່ວມມືດຳເນີນທຸລະກິດ ແລະການລົງທຶນໃຫ້ບັນດາວິສາຫະກິດຂອງ 2 ປະເທດ.
ຂໍຂອບໃຈທ່ານ!
ໂດຍ: ທະນາພອນ