ພັກປະຊາທິປະໄຕສັງຄົມເຢຍລະມັນ ຖືເປັນສໍາຄັນການຮ່ວມມືດ້ານທິດສະດີ ກັບພັກກອມມູນິດຫວຽດນາມ

ສະຫາຍ ຫງວຽນຊວນຖັ໊ງ ຕ້ອນຮັບ ທ່ານ Achim Post. ພາບ: nhandan.vn

ທີ່ການຕ້ອນຮັບ, ສະຫາຍ ຫງວຽນຊວນຖັ໊ງ ຢືນຢັນວ່າ ພັກກອມມູນິດຫວຽດນາມ ຖືເປັນສຳຄັນການແລກປ່ຽນດ້ານທິດສະດີ, ນະໂຍບາຍກັບບັນດາພັກການເມືອງທີ່ມີອິດທິພົນຊື່ສຽງໃນໂລກ, ໃນນັ້ນມີພັກ SPD; ເນັ້ນໜັກວ່າ ຫົວຂໍ້ ແລະເນື້ອໃນຂອງການປຶກສາຫາລືຄັ້ງນີ້ ມີຄວາມໝາຍສຳຄັນຍິ່ງໃນສະພາບການທີ່ພັກກອມມູນິດຫວຽດນາມ ພວມປະຕິບັດສຳເລັດບັນດາເອກະສານໃຫ້ສົມບູນແບບ ເພື່ອກະກຽມໃຫ້ກອງປະຊຸມໃຫຍ່ ຄັ້ງທີ  XIV ຂອງພັກ, ຊ່ວຍຮັບຮູ້ການຫັນປ່ຽນຂອງສະຖານະການການເມືອງ, ຄວາມໝັ້ນຄົງ ແລະ ສີວິໄລຂອງມວນມະນຸດ, ປະກອບສ່ວນກຳນົດບັນດາບຸລິມະສິດຍຸດທະສາດ, ຍາດແຍ່ງກາລະໂອກາດ, ຜ່ານຜ່າສິ່ງທ້າທາຍ ເພື່ອພັດທະນາໃນໄລຍະປະຈຸບັນ;  ເຊື່ອໝັ້ນວ່າ ການປຶກສາຫາລືຈະປະກອບສ່ວນເຮັດໃຫ້ການພົວພັນລະຫວ່າງສອງພັກໃຫ້ເລິກເຊິ່ງກ່ວາອີກ, ຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ - ເຢຍລະມັນ ໃຫ້ພັດທະນາຢ່າງຮອບດ້ານ, ແທດຈິງ ແລະມີປະສິດທິຜົນ. ສະຫາຍ ຫງວຽນຊວນຖັ໊ງ ໄດ້ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ - ສັງຄົມຂອງຫວຽດນາມ ໃນໄລຍະຜ່ານມາ, ການກໍານົດທິດໃຫຍ່, ນະໂຍບາຍຊີ້ຂາດຍຸດທະສາດ ທີ່ພັກ, ລັດຫວຽດນາມ ໄດ້ປະກາດໃຊ້ ແລະຄວາມຕັດສິນໃຈປະຕິບັດ ເພື່ອບັນລຸເປົ້າໝາຍ 100 ປີແຫ່ງວັນສ້າງຕັ້ງພັກ ແລະ 100 ປີແຫ່ງວັນສະຖາປະນາປະເທດ.

ບັນຍາກາດທີ່ການຕ້ອນຮັບ. ພາບ: nhandan.vn

ທ່ານ Achim Post ຕີລາຄາສູງບັນດາຜົນງານທີ່ຫວຽດນາມ ບັນລຸໄດ້ໃນກິດຈະການປ່ຽນແປງໃໝ່, ພັດທະນາເສດຖະກິດ-ສັງຄົມ ແລະເຊື່ອມໂຍງເຂົ້າກັບສາກົນ; ຢືນຢັນວ່າ SPD ຖືເປັນສຳຄັນການພົວພັນຮ່ວມມືດ້ານທິດສະດີ ກັບພັກກອມມູນິດຫວຽດນາມ, ຖືນີ້ແມ່ນໜຶ່ງໃນບັນດາກົນໄກປຶກສາຫາລືສຳຄັນ, ຊ່ວຍໃຫ້ສອງພັກແບ່ງປັນບົດຮຽນປະສົບການໃນການວາງແຜນນະໂຍບາຍ, ພັດທະນາແບບຍືນຍົງ, ຄວາມຍຸຕິທຳທາງສັງຄົມ ແລະຮັບມືກັບບັນດາສິ່ງທ້າທາຍທົ່ວໂລກ, ປະກອບສ່ວນຂຸດຄົ້ນຄວາມສາມາດບົ່ມຊ້ອນ ເພື່ອຊຸກຍູ້ການພົວພັນລະຫວ່າງສອງປະເທດຢ່າງແຂງແຮງ.

ໂດຍ: ທູຈາງ