ການພັດທະນາພື້ນຖານໂຄງລ່າງຢ່າງຄົບຊຸດ, ທັນສະໄໝແມ່ນໜຶ່ງໃນສາມບຸກທະລຸຍຸດທະສາດ, ໃນນັ້ນ, ການພັດທະນາພື້ນຖານໂຄງລ່າງຄົມມະນາຄົມແມ່ນເສົາຄໍ້າສຳຄັນ, ສ້າງການພັດທະນາໃໝ່, ກຳລັງໜູນຊຸກຍູ້ການພັດທະນາເສດຖະກິດ-ສັງຄົມ, ຮັບປະກັນປ້ອງກັນຊາດ-ປ້ອງກັນຄວາມສະຫງົບ. ໃນອາທິດຜ່ານມາ, ທ່ານ ຟ້າມມີງຈີ໊ງ ນາຍົກລັດຖະມົນຕີ ມີການປະຊຸມຄັ້ງທີ 3 ກັບບັນດາກະຊວງ, ຂະແໜງການ, ການນຳຂອງ 13 ທ້ອງຖິ່ນເພື່ອຊຸກຍູ້ພື້ນຖານໂຄງລ່າງຄົມມະນາຄົມຢູ່ເຂດທົ່ງພຽງແມ່ນໍ້າຂອງ. ທ່ານນາຍົກລັດຖະມົນຕີ ກໍ່ເປັນປະທານກອງປະຊຸມຂອງຄະນະປະຈຳລັດຖະບານກ່ຽວກັບແຜນຮ່າງແຜນນະໂຍບາຍລົງທຶນກໍ່ສ້າງທາງລົດໄຟຄວາມໄວສູງເໜືອ-ໃຕ້ ເພື່ອຍື່ນສະເໜີຕໍ່ ຂັ້ນທີ່ມີສິດອຳນາດພິຈາລະນາ.

ກອງປະຊຸມໃຫຍ່ທົ່ວປະເທດ ຄັ້ງທີ XIII ຂອງພັກ ຢັ້ງຢືນວ່າ, ການພັດທະນາພື້ນຖານໂຄງລ່າງແມ່ນໜຶ່ງໃນສາມບຸກທະລຸຍຸດທະສາດເພື່ອພັດທະນາເສດຖະກິດ-ສັງຄົມ, ຮັບປະກັນປ້ອງກັນຊາດ-ປ້ອງກັນຄວາມສະຫງົບ. ສະນັ້ນ, ການກໍ່ສ້າງພື້ນຖານໂຄງລ່າງຄົມມະນາຄົມຂົນສົ່ງດ້ວຍທິດນຳ “ໄປກ່ອນເພື່ອເປີດທາງ” ໄດ້ຮັບຖືວ່າແມ່ນປາຍແຫຼມບຸກທະລຸ.

ການຊີ້ນຳລະອຽດສຳລັບຄົມມະນາຄົມເຂດທົ່ງພຽງແມ່ນໍ້າຂອງ

ເຂດທົ່ງພຽງແມ່ນໍ້າຂອງພວມຜັນຂະຫຍາຍ 5 ໂຄງການຄົມມະນາຄົມສໍາຄັນລະດັບຊາດ, ຈຸດສຸມ. ມາຮອດປະຈຸບັນ, ມີ 4/5 ໂຄງການໄດ້ສໍາເລັດລະບຽບການລົງທຶນແລ້ວ, ພວມຈັດຕັ້ງຜັນຂະຫຍາຍການກໍ່ສ້າງ. ນັ້ນແມ່ນ: ເສັ້ນທາງຄວາມໄວສູງ ເກິ່ນເທີ-ກ່າເມົາ; ເສັ້ນທາງຄວາມໄວສູງ ເຈົາດົ໊ກ-ເກິ່ນເທີ-ຊອ໊ກຈັງ; ເສັ້ນທາງຄວາມໄວສູງກາວແລ້ງ-ອານຮື໋ວ; ເສັ້ນທາງຄວາມໄວສູງ ມີ້ອານ-ກາວແລ້ງ; ໂຄງການເສັ້ນທາງໂຮ່ຈີມິນ ຕອນແຣັກສອຍ-ເບັ໊ນເຍີ໊ດ, ກໍ່ກາວ-ວິ້ງທ້ວນ.

leftcenterrightdel
ພາບປະກອບຄັດຈາກ: tapchitaichinh.vn

ນັບແຕ່ຕົ້ນອາຍຸການ (ປີ 2021) ມາຮອດປະຈຸບັນ, ທ່ານນາຍົກລັດຖະມົນຕີ ໄດ້ໄປກວດກາສະຖານທີ່ກໍ່ສ້າງ, ຊຸກຍູ້, ຢ້ຽມຢາມຖາມຂ່າວ, ລະດົມກຳລັງໃຈພະນັກງານ, ກຳມະກອນ, ຜູ້ຮັບເໝົາກໍ່ສ້າງ 5 ຄັ້ງແລ້ວເພື່ອແກ້ໄຂຄວາມຫຍຸ້ງຍາກ, ຍູ້ໄວຄວາມຄືບໜ້າໃນການກໍ່ສ້າງ; ຊີ້ນຳໃຫ້ຮອງນາຍົກລັດຖະມົນຕີ ແລະບັນດາລັດຖະມົນຕີເຮັດວຽກໂດຍກົງ 3 ຄັ້ງເພື່ອແກ້ໄຂຄວາມຫຍຸ້ງຍາກດ້ານວັດສະດຸເພື່ອຍູ້ໄວຄວາມຄືບໜ້າໃນການກໍ່ສ້າງກິດຈະກຳ.

ຍ້ອນເຫດນັ້ນ, ວຽກງານບຸກເບີກໜ້າພຽງຢູ່ໂຄງການໄດ້ຕອບສະໜອງຄວາມຄືບໜ້າໃນການຜັນຂະຫຍາຍການກໍ່ສ້າງໂດຍພື້ນຖານ, ປະລິມານບຸກເບີກໜ້າພຽງທີ່ຍັງເຫຼືອບໍ່ຫຼາຍ. ເຖິງຢ່າງໃດກໍ່ຕາມ, ການບຸກເບີກໜ້າພຽງຄວນໄດ້ຮັບການແກ້ໄຂໃຫ້ສໍາເລັດໃນເດືອນກໍລະກົດນີ້ເພື່ອສໍາເລັດໂຄງການດັ່ງກ່າວ.

ທ່ານນາຍົກລັດຖະມົນຕີ ຟ້າມມີງຈີ໊ງ ຊົມເຊີຍ 13 ແຂວງ, ນະຄອນໃນເຂດທົ່ງພຽງແມ່ນໍ້າຂອງພາຍຫຼັງ 3 ປີຕັ້ງໜ້າຜັນຂະຫຍາຍໃນເບື້ອງຕົ້ນໄດ້ສ້າງຕາໜ່າງເສັ້ນທາງຄວາມໄວສູງຖືກຕ້ອງຕາມເນື້ອໃນຈິດໃຈບຸກທະລຸຍຸດທະສາດຂອງມະຕິກອງປະຊຸມໃຫຍ່ ຄັ້ງທີ XIII ຂອງ ພັກ.

ຕາມທ່ານນາຍົກລັດຖະມົນຕີ ຟ້າມມີງຈີ໊ງ ແລ້ວ, ເປົ້າໝາຍຮອດປີ 2025, ເຂດທົ່ງພຽງແມ່ນໍ້າຂອງຕ້ອງມີເສັ້ນທາງຄວາມໄວສູງຍາວ 600 ກິໂລແມັດ ແລະຮອດປີ 2030 ມີ 1.200 ກິໂລແມັດ ແລະມອບເປົ້າໝາຍຄວາມຄືບໜ້າໃຫ້ແຕ່ລະໂຄງການ, ໃນນັ້ນ, ສຸມໃສ່ 2 ເສັ້ນທາງຄວາມໄວສູງເໜືອ-ໃຕ້ ແລະທິດຕາເວັນອອກ-ຕາເວັນຕົກ: “ໜ້າທີ່ສຳຄັນຂອງອາຍຸການນີ້ແມ່ນພັດທະນາບຸກທະລຸກ່ຽວກັບພື້ນຖານໂຄງລ່າງ. ພວກຂ້າພະເຈົ້າ ຕ້ອງເຮັດ, ທ້ອງຖິ່ນຕ້ອງປະຕິບັດ, ດ້ວຍຈິດໃຈແມ່ນຮ່ວມກຳລັງ. ພວກເຮົາຈະຕ້ອງສ້າງຄວາມຄືບໜ້າຄືນໃໝ່ ແລະລື່ນຄວາມຄືບໜ້າ. ຄຽງຄູ່ກັບຄວາມຄືບໜ້ານັ້ນແມ່ນຕ້ອງຮັບປະກັນຄຸນນະພາບ, ຄຽງຄູ່ກັບຄຸນນະພາບແມ່ນການເບິ່ງແຍງດູແລຊີວິດການເປັນຢູ່ຂອງປະຊາຊົນ”.

ກ່ຽວກັບແຫຼ່ງທຶນ, ທ່ານນາຍົກລັດຖະມົນຕີ ຮຽກຮ້ອງໃຫ້ບັນດາກະຊວງ, ຂະແໜງການສົມທົບກັບທ້ອງຖິ່ນຄິດໄລ່ຢ່າງລະອຽດເພື່ອລາຍງານຕໍ່ຂັ້ນທີ່ມີສິດອຳນາດ. ກ່ຽວກັບການບຸກເບີກໜ້າພຽງ, ທ່ານນາຍົກລັດຖະມົນຕີ ຮຽກຮ້ອງການນໍາບັນດາທ້ອງຖິ່ນພ້ອມກັນຮ່ວມແຮງຮ່ວມໃຈໜູນຊ່ວຍການຜັນຂະຫຍາຍໂຄງການ, ພິເສດແມ່ນການຍົກຍ້າຍບັນດາກິດຈະກຳພື້ນຖານໂຄງລ່າງດ້ານເຕັກນິກ; ສຸມໃສ່ແກ້ໄຂເພື່ອສໍາເລັດວຽກງານບຸກເບີກໜ້າພຽງເພື່ອມີເນື້ອທີ່ດິນຮັບໃຊ້ໃຫ້ການກໍ່ສ້າງບັນດາໂຄງການ.

ກໍ່ສ້າງເສັ້ນທາງລົດໄຟຄວາມໄວສູງ ເໜືອ-ໃຕ້ ຕ້ອງທັນສະໄໝ, ມີປະສິດທິຜົນ

ປະຈຸບັນເສັ້ນທາງຄົມມະນາຄົມເໜືອ-ໃຕ້ຂອງຫວຽດນາມ ມີ 3 ເສັ້ນ (ຄື: ທາງຫຼວງເລກ 1, ເສັ້ນທາງໂຮ່ຈີມິນ, ເສັ້ນທາງຄວາມໄວສູງທີ່ພວມໄດ້ຮັບການກໍ່ສ້າງ), ພ້ອມກັບບັນດາເສັ້ນທາງທະເລ, ທາງການບິນ, ທາງລົດໄຟ. ຕາມທ່ານນາຍົກລັດຖະມົນຕີ ຟ້າມມີງຈີ໊ງ ແລ້ວ, ຕ້ອງຄົ້ນຄວ້າກໍ່ສ້າງທາງລົດໄຟຄວາມໄວສູງດ້ວຍລັກສະນະພິເສດທີ່ເໝາະສົມເພື່ອເສີມຂະຫຍາຍທ່າແຮງເພີ່ມເຕີມການຂົນສົ່ງປະເພດຕ່າງໆ, ຄົ້ນຄວ້າຕາມທິດຂົນສົ່ງຜູ້ໂດຍສານແມ່ນຕົ້ນຕໍ, ສົມທົບກັບການຂົນສົ່ງສິນຄ້າໄວ ແລະຮັບໃຊ້ການປ້ອງກັນຊາດ-ປ້ອງກັນຄວາມສະຫງົບເມື່ອມີຄວາມຕ້ອງການ, ພ້ອມທັງສືບຕໍ່ປັບປຸງ, ຍົກລະດັບທາງລົດໄຟທີ່ມີຢູ່ແລ້ວເພື່ອຂົນສົ່ງສິນຄ້າ.     

ເປັນປະທານກອງປະຊຸມຂອງຄະນະປະຈຳລັດຖະບານກ່ຽວກັບແຜນຮ່າງແຜນນະໂຍບາຍລົງທຶນທາງລົດໄຟຄວາມໄວສູງ ເໜືອ-ໃຕ້ ເພື່ອກະກຽມຍື່ນສະເໜີຕໍ່ຂັ້ນທີ່ມີສິດອຳນາດພິຈາລະນາ, ຕົກລົງ, ວັນທີ 11 ກໍລະກົດຜ່ານມາ, ທ່ານນາຍົກລັດຖະມົນຕີ ຟ້າມມີງຈີ໊ງ ເນັ້ນໜັກທັດສະນະ, ຫຼັກການ, ວິທີການຄົ້ນຄວ້າແມ່ນຕ້ອງບຸກທະລຸ, ປ່ຽນແປງໃໝ່ດ້ວຍວິໄສທັດຍຸດທະສາດ, ທັນສະໄໝ, ມີປະສິດທິຜົນ. ເປົ້າໝາຍ, ຄວາມຮຽກຮ້ອງຕ້ອງການແມ່ນຕ້ອງກໍ່ສ້າງເສັ້ນທາງລົດໄຟຄວາມໄວສູງ ເໜືອ-ໃຕ້ ທີ່ແລ່ນຜ່ານ 20 ແຂວງ, ນະຄອນໃຫ້ສໍາເລັດປະມານ 1.541 ກິໂລແມັດ; ເວລາປະຕິບັດໃນປະມານ 10 ປີ, ສູ້ຊົນໃຫ້ກໍ່ສ້າງສຳເລັດໃນປີ 2035.

ໃນທ່າອ່ຽງເຊື່ອມໂຍງເຂົ້າກັບສາກົນ, ພື້ນຖານໂຄງລ່າງຄົມມະນາຄົມຄົບຊຸດ, ການພັດທະນາສວມບົດບາດສຳຄັນໃນການເຊື່ອມຕໍ່ການຜະລິດກັບການຈຳໜ່າຍ, ຂົນສົ່ງສິນຄ້າ, ຊຸກຍູ້ການແລກປ່ຽນເສດຖະກິດລະຫວ່າງບັນດາເຂດ, ປະເທດ, ສ້າງເງື່ອນໄຂໃຫ້ການພັດທະນາເສດຖະກິດ-ສັງຄົມ. ເລື່ອງລັດຖະບານຫວຽດນາມ ເດັດດ່ຽວຜັນຂະຫຍາຍບັນດາໂຄງການເສັ້ນທາງຄວາມໄວສູງ, ຄົ້ນຄວ້າການກໍ່ສ້າງທາງລົດໄຟຄວາມໄວສູງຈະເປີດໂອກາດ, ການພັດທະນາຢ່າງກວ້າງໃຫຍ່ໃຫ້ບັນດາເຂດເວົ້າສະເພາະ ແລະທົ່ວປະເທດເວົ້າລວມ.

ໂດຍ: ເຈິ່ນຮວ່ຽນ