ຫວຽດນາມ ຍົກອອກ 3 ຂໍ້ສະເໜີແນະນະໂຍບາຍທີ່ກອງປະຊຸມລັດຖະມົນຕີ UNCTAD
ວັນທີ 21 ຕຸລາ, ກອງປະຊຸມລັດຖະມົນຕີ ຄັ້ງທີ 16 ຂອງອົງການສະຫະປະຊາຊາດ ກ່ຽວກັບການຄ້າ ແລະ ການພັດທະນາ (UNCTAD 16) ສືບຕໍ່ດໍາເນີນໄປດ້ວຍບັນດາວາລະປຶກສາຫາລືລວມ ກ່ຽວກັບຫົວຂໍ້ “ກຳນົດທິດອະນາຄົດ: ຊຸກຍູ້ການຫັນປ່ຽນເສດຖະກິດ ມຸ່ງໄປເຖິງການພັດທະນາຢ່າງສະເໝີພາບ, ກວມລວມ ແລະ ຍືນຍົງ”.
ກ່າວຄຳເຫັນຢູ່ທີ່ນີ້, ທ່ານນາງ ຫງວຽນມິງຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ຕີລາຄາວ່າ ໂລກພວມຢືນຢູ່ຕໍ່ໜ້າບັນດາການຫັນປ່ຽນທີ່ມີລັກສະນະບາດລ້ຽວດ້ານເສດຖະກິດ, ເຕັກໂນໂລຊີ ແລະ ພູມສາດການເມືອງ… ໃນສະພາບການນັ້ນ, ເສດຖະກິດຫວຽດນາມ ໄດ້ສະແດງໃຫ້ເຫັນຄວາມຕ້ານທານທີ່ດີຕໍ່ການກະທົບຈາກພາຍນອກ, ຮັກສາລະດັບການເຕີບໂຕສູງ, ຄາດວ່າຈະບັນລຸປະມານ 8%, ນອນໃນລະດັບສູງສຸດໃນພາກພື້ນ ແລະ ໃນໂລກ; ປະຈຸບັນພວມສືບຕໍ່ຊຸກຍູ້ການປະຕິຮູບ, ສຸມໃສ່ປະຕິຮູບລະບົບກົດໝາຍ, ສົ່ງເສີມການພັດທະນາເສດຖະກິດເອກະຊົນ, ຊຸກຍູ້ການພັດທະນາວິທະຍາສາດ-ເຕັກໂນໂລຢີ, ນະວັດຕະກຳ, ການຫັນເປັນດີຈີຕອນ ແລະ ເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.
    |
 |
|
ບັນດາຜູ້ແທນຫວຽດນາມ ເຂົ້າຮ່ວມກອງປະຊຸມ. ພາບ: ສໍານັກຂ່າວສານຫວຽດນາມ |
ທ່ານນາງ ຫງວຽນມິງຮັ່ງ ສະເໜີ 3 ຂໍ້ສະເໜີແນະດ້ານນະໂຍບາຍ, ລວມມີ: ເພີ່ມທະວີການຮ່ວມມື ແລະ ການປະຕິຮູບຢ່າງແຂງແຮງບັນດາລະບອບລະບຽບການທົ່ວໂລກກ່ຽວກັບການຄ້າ ແລະການເງິນຕາມທິດເປີດ, ຍຸຕິທຳ ແລະ ຮັບມືກັບບັນດາການປ່ຽນແປງ; ຍົກສູງກຳລັງຄວາມສາມາດສ້າງຄວາມເຂັ້ມແຂງດ້ວຍຕົນເອງໃຫ້ແກ່ບັນດາປະເທດກໍາລັງພັດທະນາ ຜ່ານການໜູນຊ່ວຍດ້ານການເງິນ, ເຕັກໂນໂລຊີ, ຊຸກຍູ້ຄວາມສະເໝີພາບລະຫວ່າງຍິງ - ຊາຍ ແລະ ເປີດກວ້າງການເຂົ້າຮ່ວມຂອງວິສາຫະກິດຂະໜາດໜ້ອຍ ແລະ ກາງໃນລະບົບມູນຄ່າທົ່ວໂລກ; ຊຸກຍູ້ການຫັນປ່ຽນຄູ່, ຖືເສດຖະກິດສີຂຽວ ແລະ ເສດຖະກິດດີຈີຕອນເປັນຈຸດສຸມ, ຖືການຄ້າ ແລະ ການລົງທຶນແມ່ນກຳລັງໜູນຊຸກຍູ້ການຫຼຸດຜ່ອນການປ່ອຍອາຍພິດ, ເສດຖະກິດໝູນວຽນ ແລະນະວັດຕະກຳ.
ຂ່າວ: ວິທະຍຸກະຈາຍສຽງຫວຽດນາມ