ປີນີ້ແມ່ນປີທີ 4 ທີ່ທົ່ວປະເທດປະຕິບັດແຜນການພັດທະນາເສດຖະກິດ-ສັງຄົມ 5 ປີ (2021 – 2025). ເພື່ອປະຕິບັດເປົ້າໝາຍນີ້ໃຫ້ສຳເລັດ, ນັບແຕ່ຕົ້ນປີ, ຫຼາຍທ້ອງຖິ່ນໄດ້ຕັດສິນໃຈຜັນຂະຫຍາຍບັນດາມາດຕະການເພື່ອເສີມຂະຫຍາຍທ່່າແຮງຂອງທ້ອງຖິ່ນ. ສິ່ງນີ້ໄດ້ປະກອບສ່ວນເຂົ້າໃນຄວາມມານະພະຍາຍາມລວມຂອງລັດຖະບານເພື່ອຊຸກຍູ້ເສດຖະກິດປະເທດພັດທະນາ.
ປີ 2024, ຫວຽດນາມ ຕັ້ງເປົ້າໝາຍການເຕີບໂຕເສດຖະກິດແມ່ນ 6-6,5%. ເພື່ອປະກອບສ່ວນບັນລຸໄດ້ເປົ້າໝາຍນີ້, ບັນດາທ້ອງຖິ່ນຕ້ອງຍູ້ແຮງການປ່ອຍເງິນລົງທຶນສາທາລະນະ; ແກ້ໄຂຄວາມຫຍຸ້ງຍາກໃຫ້ແກ່ການຜະລິດ, ດໍາເນີນທຸລະກິດ; ຍົກສູງລັກສະນະກຸ້ມຕົນເອງ, ເປັນເຈົ້າຕົນເອງ, ປະດິດສ້າງ... ໃນການພັດທະນາເສດຖະກິດ-ສັງຄົມທ້ອງຖິ່ນ.
ເສີມຂະຫຍາຍຄວາມສາມາດບົ່ມຊ້ອນຂອງທ້ອງຖິ່ນ
ນະຄອນໂຮ່ຈີມິນ ແມ່ນໜຶ່ງໃນບັນດາບໍລິເວນມີທີ່ຕັ້ງສຳຄັນພິເສດໃນກິດຈະການຫັນເປັນປະເທດອຸດສາຫະກຳ, ທັນສະໄໝ, ຊຸກຍູ້ການພັດທະນາເສດຖະກິດ, ສັງຄົມຂອງຫວຽດນາມ. ປີ 2024, ນະຄອນວາງເປົ້າໝາຍການເຕີບໂຕແມ່ນ 7,5-8%. ນີ້ແມ່ນເປົ້າໝາຍໜຶ່ງທີ່ມີຄວາມທ້າທາຍທີ່ສຸດ. ດ້ວຍເປົ້າໝາຍນີ້, ນະຄອນໄດ້ກຳນົດແຜນການເຕີບໂຕເປັນງວດ ແລະໄດ້ຜັນຂະຫຍາຍ, ປະຕິບັດແຕ່ຕົ້ນປີ.
    |
 |
|
ທ່ານ ຟານວັນໝາຍ ປະທານຄະນະກຳມະການປະຊາຊົນນະຄອນໂຮ່ຈີມິນ. ພາບ: ຮ່າແຄ໊ງ. |
ທ່ານ ຟານວັນໝາຍ ປະທານຄະນະກຳມະການປະຊາຊົນນະຄອນໂຮ່ຈີມິນ, ໃຫ້ຮູ້ວ່າ: “ພວກຂ້າພະເຈົ້າ ສຸມໃສ່ຊຸກຍູ້ບັນດາກຳລັງໜູນການເຕີບໂຕດ້ານການລົງທຶນ, ການອຸປະໂພກ-ບໍລິໂພກ, ການສົ່ງອອກ ກໍ່ຄືຊອກຫາບັນດາກຳລັງໜູນການເຕີບໂຕໃໝ່, ທ່າອ່ຽງພັດທະນາໃໝ່, ບັນດາຮູບແບບດຳເນີນທຸລະກິດໃໝ່ເພື່ອດຶງດູດແຫຼ່ງກຳລັງການລົງທຶນຈາກສັງຄົມ, ເປີດກວ້າງຕະຫຼາດ ແລະຫັນບັນດາຮູບການການຄ້າເປັນຫຼາຍຮູບແບບ. ພວກຂ້າພະເຈົ້າ ກໍ່ຈະສືບຕໍ່ປັບປຸງບັນດາກຳລັງໜູນການເຕີບໂຕທີ່ມີຢູ່ແລ້ວ, ພ້ອມທັງພັດທະນາບັນດາກຳລັງໜູນໃໝ່ຕື່ມອີກ, ຄື: ເສດຖະກິດດີຈີຕອນ, ເສດຖະກິດສີຂຽວ, ພັດທະນາວິທະຍາສາດເຕັກໂນໂລຢີ, ປ່ຽນແປງໃໝ່ປະດິດສ້າງ ແລະລົງທຶນຍຸດທະສາດ”.
ສຳລັບແຂວງບັກຢາງ, ປີ 2024 ແມ່ນປີທີ່ເພີ່ມຄວາມໄວ ແລະບຸກທະລຸໃນການພັດທະນາດ້ວຍຜົນງານທີ່ເປັນໜ້າປະທັບໃຈໃນທຸກດ້ານໃນປີ 2023. ເພື່ອຂຸດຄົ້ນຄວາມສາມາດບົ່ມຊ້ອນ, ທ່າແຮງຂອງທ້ອງຖິ່ນໃຫ້ໄດ້, ແຂວງບັກຢາງ ໄດ້ວາງອອກ 12 ກຸ່ມໜ້າທີ່, ມາດຕະການລະອຽດ, ໃນນັ້ນ, ແກ້ໄຂ 3 ກຸ່ມບັນຫາໃຫຍ່ໄດ້ເປັນຢ່າງດີ, ລວມມີ: ປັບປຸງພື້ນຖານໂຄງລ່າງ, ກໍ່ສ້າງພື້ນຖານອຸດສາຫະກຳ, ປັບປຸງລະບອບລະບຽບການ.
ທ່ານ ມາຍເຊີນ, ຮອງປະທານຜູ້ປະຈຳການຄະນະກຳມະການປະຊາຊົນແຂວງບັກຢາງ ໃຫ້ຮູ້ວ່າ: “ພວກຂ້າພະເຈົ້າ ພວມສຸມໃສ່ສະເໜີຕໍ່ລັດຖະບານໃຫ້ແຜນນະໂຍບາຍສ້າງຕັ້ງເຂດອຸດສາຫະກຳໃໝ່ ເພື່ອຮັບໃຊ້ໃຫ້ແກ່ການດຶງດູດການລົງທຶນ, ຕັ້ງໜ້າກະຕຸກຊຸກຍູ້ບັນດາເຈົ້າຂອງໂຄງການສ້າງຕັ້ງເຂດອຸດສາຫະກຳ, ກຸ່ມອຸດສາຫະກຳເພື່ອດຶງດູດການລົງທຶນ. ພວກຂ້າພະເຈົ້າ ກໍ່ສຸມໃສ່ການຍົກສູງຄຸນນະພາບຂອງແຫຼ່ງຊັບພະຍາກອນມະນຸດ, ໃນນັ້ນມີກຸ່ມບຸກຄະລາກອນຮັບໃຊ້ຂະແໜງອຸດສາຫະກຳເຄິ່ງຊັກນຳໄຟຟ້າ. ພວກຂ້າພະເຈົ້າ ສູ້ຊົນເພື່ອໃຫ້ໄດ້ກາຍເປັນໜຶ່ງໃນບັນດາສູນບຳລຸງສ້າງແຫຼ່ງຊັບພະຍາກອນມະນຸດຮັບໃຊ້ຂະແໜງອຸດສາຫະກຳເຄິ່ງຊັກນຳໄຟຟ້າໃນອະນາຄົດ”.
ໄປລັດໜ້າທ່າອ່ຽງໃໝ່
ພ້ອມກັບການພັດທະນາຕາມຮູບການເສດຖະກິດທີ່ເປັນມູນເຊື້ອ, ນະຄອນໂຮ່ຈີມິນ ກຳນົດວ່າ ຕ້ອງຫັນໄປສູ່ທ່າອ່ຽງເສດຖະກິດໝູນວຽນ ແລະເພີ່ມຄວາມໄວໃຫ້ໄລຍະໃໝ່, ໄລຍະເຕີບໂຕສີຂຽວ ເພື່ອມຸ່ງໄປເຖິງອະນາຄົດແບບຍືນຍົງ.
ປະຈຸບັນ, ນະຄອນໄດ້ປັບປຸງກອບຍຸດທະສາດເສດຖະກິດສີຂຽວ ເພື່ອຫັນເສດຖະກິດນະຄອນເຖິງປີ 2030 ຕາມທິດສີຂຽວ, ຍືນຍົງ, ພ້ອມທັງຍົກສູງລັກສະນະແກ່ງແຍ້ງຂອງພື້ນຖານເສດຖະກິດ, ເຊື່ອມຕໍ່ກັບບັນດາທ້ອງຖິ່ນ ແລະໃນໂລກ. ນະຄອນ ກໍ່ປະກາດໃຊ້ແຜນການລວມມີ 56 ລາຍການ ແລະ 30 ໂຄງການເພື່ອປະຕິບັດເປົ້າໝາຍນີ້, ມຸ່ງໄປເຖິງການຫຼຸດຜ່ອນການປ່ອຍອາຍພິດຂອງນະຄອນ.
|
|
 |
|
ກອງປະຊຸມທົ່ວປະເທດສະຫຼຸບວຽກງານປີ 2023, ຜັນຂະຫຍາຍໜ້າທີ່ປີ 2024 ຂອງລັດຖະບານ ແລະອຳນາດການປົກຄອງທ້ອງຖິ່ນໄດ້ດຳເນີນໃນຕົ້ນເດືອນມັງກອນ 2024 ຜ່ານທາງອອນລາຍ. ພາບ: baochinhphu.vn |
ທ່ານ ຟານວັນໝາຍ ປະທານຄະນະກຳມະການປະຊາຊົນນະຄອນໂຮ່ຈີມິນ ແບ່ງປັນວ່າ: “ພວກຂ້າພະເຈົ້າ ຈະສຸມໃສ່ການຫຼຸດຜ່ອນການປ່ອຍອາຍພິດຜ່ານການຄົມມະນາຄົມ, ໝາຍຄວາມວ່າ ສົ່ງເສີມການນຳໃຊ້ການຄົມມະນາຄົມສາທາລະນະ, ຫັນປ່ຽນບັນດາພາຫະນະຄົມມະນາຄົມທີ່ປ່ອຍມົນລະພິດອອກສູ່ສະພາບແວດລ້ອມ. ພວກຂ້າພະເຈົ້າ ຈະຫຼຸດຜ່ອນການປ່ອຍອາຍພິດຜ່ານການຜະລິດ, ຫັນປ່ຽນເຕັກໂນໂລຢີການຜະລິດດ້ວຍວິທີໝູນໃຊ້ເສດຖະກິດໝູນວຽນ. ຫຼຸດຜ່ອນການປ່ອຍອາຍພິດຜ່ານບັນດາພຶດຕິກຳ, ຄື: ການກໍ່ສ້າງສີຂຽວ, ການທ່ອງທ່ຽວສີຂຽວ, ການອຸປະໂພກ-ບໍລິໂພກສີຂຽວ ແລະນະຄອນກໍ່ຈະສຸມໃສ່ການຫັນປ່ຽນພະລັງງານມຸ່ງໄປສູ່ການນຳໃຊ້ພະລັງງານທີ່ສະອາດ ແລະນຳໃຊ້ພະລັງງານຢ່າງປະ ຢັດ”.
ຢູ່ຫາຍຟ່ອງ, ກ້າວເຂົ້າສູ່ປີ 2024, ການນຳນະຄອນ ໄດ້ກຳນົດປີນີ້ວ່າ ແມ່ນປີທີ່ນະຄອນຢືນຢູ່ຕໍ່ໜ້າກາລະໂອກາດຮັບທ່າອ່ຽງການຍົກຍ້າຍເງິນທຶນ ແລະຮັບເອົາເຕັກໂນໂລຢີຈາກບັນດາປະເທດໃນໂລກ. ເພາະສະນັ້ນ, ນະຄອນໄດ້ວາງອອກບັນດາເປົ້າໝາຍ, ໜ້າທີ່ລະອຽດເພື່ອສ້າງຄວາມບຸກທະລຸໃນປີນີ້.
ທ່ານ ເລຕ໊ຽນເຈົາ ເລຂາພັກນະຄອນຫາຍຟ່ອງ ໃຫ້ຮູ້ວ່າ: “ສຸມໃສ່ບຸລິມະສິດຜັນຂະຫຍາຍບັນດາໜ້າທີ່ຈຸດສຸມ, ຈຳເປັນຕ້ອງໃຫ້ສຳເລັດແຕ່ນີ້ຈົນຮອດໝົດອາຍຸການ, ຈຸດສຸມແມ່ນ: ນະຄອນສ້າງຕັ້ງເຂດເສດຖະກິດທີ 2 ແລະເຂດການຄ້າເສລີຢູ່ເຂດທິດໃຕ້ຂອງນະຄອນ, ເພື່ອເສີມຂະຫຍາຍທ່າແຮງກ່ຽວກັບຄວາມສາມາດບົ່ມຊ້ອນການພັດທະນາ, ທີ່ດິນ, ເສັ້ນທາງດ່ວນແຄມທະເລ. ພວກຂ້າພະເຈົ້າ ສູ້ຊົນເພື່ອເຮັດໃຫ້ຫາຍຟ່ອງ ກາຍເປັນທ້ອງຖິ່ນນຳໜ້າໃນທົ່ວປະເທດດ້ວຍ 3 ລັກສະນະສະເພາະດີທີ່ສຸດທາງດ້ານ “ທີ່ຕັ້ງ, ຄຸນນະພາບ, ລາຄາ”.
ທີ່ກອງປະຊຸມທົ່ວປະເທດສະຫຼຸບວຽກງານປີ 2023, ຜັນຂະຫຍາຍໜ້າທີ່ປີ 2024 ຂອງລັດຖະບານ ແລະອຳນາດການປົກຄອງທ້ອງຖິ່ນໄດ້ດຳເນີນໃນຕົ້ນເດືອນມັງກອນ 2024 ຜ່ານທາງອອນລາຍ, ທ່ານນາຍົກລັດຖະມົນຕີ ຟ້າມມິງຈິ໊ງ ເນັ້ນໜັກວ່າ ໜ້າທີ່ວາງອອກສຳລັບປີ 2024 ແມ່ນໜັກໜ່ວງທີ່ສຸດ, ແຕ່ວ່າກໍ່ມີຄວາມໝາຍສຳຄັນຕໍ່ກັບການປະຕິບັດບັນດາເປົ້າໝາຍ, ໜ້າທີ່ວາງອອກຕາມມະຕິກອງປະຊຸມໃຫຍ່ຂອງພັກ ຄັ້ງທີ XIII.
ລັດຖະບານ, ນາຍົກລັດຖະມົນຕີ ພ້ອມແລ້ວທີ່ຈະໜູນຊ່ວຍ, ຮ່ວມເດີນທາງພ້ອມກັບບັນດາກະຊວງ, ຂະແໜງການ, ທ້ອງຖິ່ນເພື່ອປະຕິບັດໜ້າທີ່ທີ່ໄດ້ຮັບການມອບໝາຍໃຫ້ເປັນຢ່າງດີ. ການຮ່ວມເດີນທາງ, ຊີ້ນຳຢ່າງໃກ້ຊິດຂອງລັດຖະບານ, ການເປັນເຈົ້າການຂອງແຕ່ລະທ້ອງຖິ່ນແມ່ນປັດໄຈຕັດສິນເຖິງການພັດທະນາເສດຖະກິດຈາກນັ້ນປະກອບສ່ວນເຂົ້າໃນການປະຕິບັດເປົ້າໝາຍພັດທະນາຂອງປະເທດໃນໄລຍະຈະມາເຖິງໃຫ້ສຳເລັດ.
ໂດຍ: ແສງເດືອນ