ເປີດຫ້ອງການຜູ້ຕາງໜ້າ Viettel ຢູ່ສິງກະໂປ

ກ່າວຄໍາເຫັນທີ່ພິທີ, ທ່ານພົນໂທ ຮວ່າງຊວນຈ໊ຽນ ເນັ້ນໜັກວ່າ ໃນໄລຍະຜ່ານມາ, ການພົວພັນມິດຕະພາບ ແລະຄູ່່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະສິງກະໂປ ໄດ້ຮັບການປັບປຸງ ແລະພັດທະນາເລິກເຊິ່ງ, ກວ້າງຂວາງຢ່າງບໍ່ຢຸດຢັ້ງ, ພິເສດໃນຂົງເຂດເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບ, ວິທະຍາສາດ, ເຕັກໂນໂລຢີ ແລະຫັນປ່ຽນດີຈີຕອນ. ພິທີເປີດຫ້ອງການຜູ້ຕາງໜ້າ Viettel ຢູ່ສິງກະໂປ ແມ່ນພິສູດໃຫ້ເຫັນການພັດທະນາຢ່າງແທ້ຈິງ, ມີປະສິດທິຜົນຂອງການພົວພັນອັນດີງາມນັ້ນ, ປະກອບສ່ວນຫັນຄໍາໝັ້ນສັນຍາການຮ່ວມມືລະຫວ່າງສອງປະເທດ ແລະກະຊວງປ້ອງກັນປະເທດສອງປະເທດໃຫ້ປະກົດຜົນເປັນຈິງ.

ທ່ານພົນໂທ ຮວ່າງຊວນຈ໊ຽນ ແລະຜູ້ແທນກົດປຸ່ມເປີດຫ້ອງການຜູ້ຕາງໜ້າ Viettel ຢູ່ສິງກະໂປ. ພາບ: ກ່ຽວຈິງ

ທ່ານພົນໂທ ຮວ່າງຊວນຈ໊ຽນ ເຊື່ອໝັ້ນວ່າ ດ້ວຍທ່າໄດ້ປຽບແມ່ນກຸ່ມບໍລິສັດເຕັກໂນໂລຢີທົ່ວໂລກ, ມີຄວາມສາດມາດໃນການຄົ້ນຄວ້າ-ພັດທະນາຢ່າງແຂງແຮງ, Viettel ຈະໝູນໃຊ້ສະພາບການທີ່ຂະຫຍັນຂັນເຄື່ອນ, ໂປ່ງໃສ ແລະມີຄວາມສາມາດບົ່ມຊ້ອນຫຼາຍຢ່າງຂອງສິງກະໂປ ໃຫ້ມີປະສິດທິຜົນ, ຄື: ໂທລະຄົມມະນາຄົມລຸ້ນໃໝ່, ປັນຍາປະດິດ, ຄວາມໝັ້ນຄົງທາງໄຊເບີ, ໂຄງລ່າງດີຈີຕອນ, ອຸດສາຫະກໍາປ້ອງກັນຊາດເຕັກໂນໂລຢີສູງ ແລະມາດຕະການດີຈີຕອນເພື່ອຮັບໃຊ້ການພັດທະນາແບບຍືນຍົງ. ກະຊວງປ້ອງກັນປະເທດຫວຽດນາມ ຍາມໃດກໍ່ເອົາໃຈ, ສະໜັບສະໜູນ ແລະສ້າງທຸກເງື່ອນໄຂສະດວກເພື່ອໃຫ້ Viettel ບຸກທະລຸ, ພັດທະນາຢ່າງແຂງແຮງ, ເປີດກວ້າງການຮ່ວມມືສາກົນບົນພື້ນຖານຍຸຕິທໍາ, ຕ່າງຝ່າຍຕ່າງມີຜົນປະໂຫຍດ, ເຄົາລົບກົດໝາຍສາກົນ ແລະສອດຄ່ອງກັບຜົນປະໂຫຍດຍຸດທະສາດຂອງແຕ່ລະປະເທດ.

ໂດຍ: ໄຊນີດາ