ຍູ້ໄວຄວາມຄືບໜ້າບັນດາໂຄງການຮ່ວມມືລະຫວ່າງຫວຽດນາມ ແລະ ADB

ທີ່ການຕ້ອນຮັບ, ທ່ານ ເຈີ່ນລືວກວາງ ໄດ້ສະແດງຄວາມຂອບໃຈ ແລະຕີລາຄາສູງຕໍ່ການໜູນຊ່ວຍ, ການຮ່ວມເດີນທາງຂອງ ADB ກັບຫວຽດນາມ ໃນຫຼາຍຂົງເຂດໃນ 30 ປີຜ່ານມາ, ພິເສດແມ່ນການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກຢູ່ເຂດຫ່າງໄກສອກຫຼີກ, ເຂດຊາຍແດນ, ໝູ່ເກາະທະເລ, ພັດທະນາສາທາລະນະສຸກ, ການສຶກສາ, ພື້ນຖານໂຄງລ່າງຄົມມະນາຄົມ..., ຮັບໃຊ້ຄວາມຕ້ອງການຟື້ນຟູ, ການພັດທະນາຢ່າງຮີບດ່ວນໃນຊຸມປີຫຼັງສົງຄາມ.

ທ່ານ ເຈີ່ນລືວກວາງ ຮອງນາຍົກລັດຖະມົນຕີຫວຽດນາມ ຕ້ອນຮັບທ່ານ Shantanu Chakraborty ຜູ້ອໍານວຍການແຫ່ງຊາດທະນາຄານພັດທະນາອາຊີ (ADB). ພາບ: ສໍານັກຂ່າວສານຫວຽດນາມ

ທ່ານຮອງນາຍົກລັດຖະມົນຕີ ສະເໜີໃຫ້ສອງຝ່າຍສົມທົບກັນຢ່າງແໜ້ນແຟ້ນເພື່ອຊຸກຍູ້ຄວາມຄືບໜ້າໃນການປະຕິບັດບັນດາໂຄງການທີ່ໄດ້ໃຫ້ຄໍາໝັ້ນສັນຍາ; ຕີລາຄາສູງຄວາມມານະພະຍາຍາມຂອງ ADB ໃນການລະດົມແຫຼ່ງກຳລັງໃຫ້ປະມານ 23 ໂຄງການຢູ່ ຫວຽດນາມ ໃນໄລຍະ 2023-2026. ຫວຽດນາມ ຈະສືບຕໍ່ກວດກາຄືນ ແລະປັບປຸງຂອບນິຕິກຳກ່ຽວກັບ ODA, ທຶນກູ້ຢຶມພິເສດຈາກຕ່າງປະເທດເພື່ອແນໃສ່ແກ້ໄຂສິ່ງກີດຂວາງ, ຫຼຸດຜ່ອນເວລາອະນຸມັດຜ່ານ, ຍູ້ໄວຄວາມຄືບໜ້າໃນການຜັນຂະຫຍາຍບັນດາໂຄງການ, ຮັບເອົາ ແລະນຳໃຊ້ແຫຼ່ງທຶນໜູນຊ່ວຍຂອງຄູ່ຮ່ວມມືອຸປະຖຳເວົ້າລວມ  ແລະຂອງ ADB ເວົ້າສະເພາະຢ່າງມີປະສິດທິຜົນ.

ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ

ທີ່ການຕ້ອນຮັບ, ທ່ານ Shantanu Chakraborty ຜູ້ອຳນວຍການແຫ່ງຊາດທະນາຄານ ADB ຊົມເຊີຍລັດຖະບານຫວຽດນາມ ຮັກສາລະດັບການເຕີບໂຕສູງໃນສະພາບຄວາມຫຍຸ້ງຍາກລວມໃນທົ່ວໂລກ, ທ່ານໃຫ້ຮູ້ວ່າ ADB ຄາດຄະເນວ່າ ລະດັບເຕີບໂຕຂອງຫວຽດນາມ ຈະບັນລຸ 6% ໃນປີ 2024 ແລະ 6,2% ໃນປີ 2025.

ທ່ານ Shantanu Chakraborty ເນັ້ນໜັກວ່າ: ຫວຽດນາມ ແມ່ນໜຶ່ງໃນບັນດາຄູ່ຮ່ວມມືສຳຄັນຂອງ ADB ແລະ ເປັນປະເທດນຳໃຊ້ແຫຼ່ງທຶນອຸປະຖຳດ້ານການຄ້າຫຼາຍທີ່ສຸດຂອງ ADB, ທ່ານປາດຖະໜາຢາກສົມທົບກັນຢ່າງແໜ້ນແຟ້ນກັບຫວຽດນາມ ເພື່ອເຮັດໃຫ້ລະບຽບການລະຫວ່າງສອງຝ່າຍກົມກຽວກັນ ແນໃສ່ຊຸກຍູ້ການເຄື່ອນໄຫວໃຫ້ກູ້ຢືມຢູ່ຫວຽດນາມ, ເປັນຕົ້ນແມ່ນສໍາລັບບັນດາໂຄງການຈຸດສຸມຂອງຊາດ; ການເຕີບໂຕສີຂຽວ, ການປະຕິບັດຄຳໝັ້ນສັນຍາຫຼຸດຜ່ອນການປ່ອຍອາຍພິດ...

ໂດຍ: ທູຈາງ