ຈະເລີນເຕີບໂຕນັບແຕ່ຕົ້ນປີ

ໃນເວລາ 15 ໂມງ 40 ນາທີ ຂອງວັນທີ 15 ມີນາ, ຖ້ຽວບິນການຄ້າຂອງ Sun PhuQuoc Airways ຈາກສະໜາມບິນສາກົນຝູກວກ (ແຂວງອານຢາງ) ໄດ້ລົງຈອດຢູ່ສະໜາມບິນສາກົນ ກາມແຣງ (ແຂວງແຄ໊ງຮວ່າ). ໃນດ້ານກົງກັນຂ້າມ, ຖ້ຽວບິນທີ່ເດີນທາງຈາກ ກາມແຣງ ກໍລົງຈອດ ຢູ່ ຝູກວກ ໃນເວລາ 18 ໂມງຂອງວັນດຽວກັນ, ສ້າງຕັ້ງສາຍການບິນໂດຍກົງທີ່ເຊື່ອມຕໍ່ສອງສູນກາງແຫ່ງການທ່ອງທ່ຽວຂະໜາດໃຫຍ່ຂອງຫວຽດນາມ ຢ່າງເປັນທາງການ. ສາຍການບິນນີ້ໄດ້ຂຸດຄົ້ນ  4 ຖ້ຽວ/ອາທິດ.

leftcenterrightdel
ການນໍາແຂວງແຄ໊ງຮວ່າ ພ້ອມກັບຜູ້ແທນຕ້ອນຮັບຖ້ຽວບິນທໍາອິດຈາກຝູກວກ ມາເຖິງກາມແຣງ, ໃນວັນທີ 15 ມີນາ. ພາບ: ມິງຢຸຍ.

ສະຫາຍ ເຈືອງວັນຕ໊ຽນ, ຜູ້ອໍານວຍການສູນສົ່ງເສີມການລົງທຶນ, ການຄ້າ ແລະການທ່ອງທ່ຽວແຂວງແຄ໊ງຮວ່າ ໃຫ້ຮູ້ວ່າ: “ໃນໄລຍະຍາວ, ເຖິງວ່າ ລ້ວນແຕ່ເປັນສະຖານທີ່ທ່ອງທ່ຽວທາງທະເລທີ່ມີຊື່ສຽງ ແຕ່ ຍາຈາງ ແລະຝູກວກ ຍັງຂາດສາຍການບິນໂດຍກົງຕາມປົກກະຕິ. ຜູ້ໂດຍສານ ເຄື່ອນຍ້າຍລະຫວ່າງສອງທ້ອງຖິ່ນ ຕ້ອງໄປຂຶ້ນຍົນຢູ່ຮ່າໂນ້ຍ ຫຼື ນະຄອນໂຮ່ຈີມິນ. ການເປີດບໍລິການສາຍການບິນນີ້ໄດ້ຕັ້ງຄວາມຫວັງໄວ້ວ່າ ຈະປະກອບສ່ວນເພີ່ມທະວີການເຊື່ອມຕໍ່ລະຫວ່າງເຂດແຄມທະເລທາງທິດໃຕ້ພາກກາງ ແລະທິດຕາເວັນຕົກພາກໃຕ້, ສ້າງຄວາມສະດວກໃຫ້ແກ່ຜູ້ໂດຍສານທັງສອງສົ້ນ ແລະຂະຫຍາຍຄວາມສາມາດເຂົ້າເຖິງຂອງແຂກທ່ອງທ່ຽວສາກົນ ໄປຍັງສອງສະຖານທີ່ນີ້. ພ້ອມກັນນັ້ນ, ການເຊື່ອມຕໍ່ສາຍການບິນໂດຍກົງ ກໍສ້າງເງື່ອນໄຂສະດວກ ເພື່ອໃຫ້ວິສາຫະກິດທ່ອງທ່ຽວພັດທະນາຜະລິດຕະພັນ ແລະການເດີນທາງທີ່ມີຫຼາຍສະຖານທີ່ທ່ອງທ່ຽວ”. 

ກ່ອນໜ້ານັ້ນ, ທ່າກຳປັ່ນສາກົນ ກາມແຣງ ຫາກໍ່ຕ້ອນຮັບແຂກທ່ອງທ່ຽວຈໍານວນ 2.200 ຄົນຂອງກໍາປັ່ນ Adora Mediterranea (ສັນຊາດ Bahamas). ນີ້ເປັນຄັ້ງທີ 6 ທີ່ກໍາປັ່ນ Adora Mediterranea ມາທ່ຽວແຂວງແຄ໊ງຮວ່າ ໃນປີ 2026. ສະນັ້ນ, ນັບແຕ່ຕົ້ນປີ 2026 ມາຮອດປັດຈຸບັນ, ແຂວງແຄ໊ງຮວ່າ ໄດ້ຕ້ອນຮັບກໍາປັ່ນທ່ອງທ່ຽວສາກົນ ຈໍານວນ 21 ຖ້ຽວ ມີແຂກທ່ອງທ່ຽວທັງໝົດກວ່າ 37.300 ເທື່ອຄົນ ທີ່ຂຶ້ນຝັ່ງມາຢ້ຽມຊົມແຂວງແຄ໊ງຮວ່າ. ຄາດວ່າໃນປີນີ້ທ້ອງຖິ່ນ ຈະສືບຕໍ່ຕ້ອນຮັບ 27 ຖ້ຽວກໍາປັ່ນຕື່ມອີກ.

leftcenterrightdel
ຜູ້ຕາງໜ້າການນໍາບໍລິສັດໃຫຍ່ ເຕິນກາງ ໄຊງ່ອນ ຕ້ອນຮັບແຂກທ່ອງທ່ຽວຜູ້ທໍາອິດ ຢູ່ ທ່າກໍາປັ່ນສາກົນ ກາມແຣງ ໃນໂອກາດຕົ້ນປີໃໝ່. ພາບ: ນາມຮ່າ.

ບໍ່ພຽງແຕ່ສ້າງຂີດໝາຍໃນຂົງເຂດການບິນ ແລະທາງທະເລເທົ່ານັ້ນ, ພື້ນຖານໂຄງລ່າງຄົມມະນາຄົມທາງບົກ ກໍພວມເຫັນປະຈັກຕາການບຸກທະລຸຢ່າງແຂງແຮງ. ການເປີດນໍາໃຊ້ເສັ້ນທາງຄວາມໄວສູງ ເໜືອ-ໃຕ້ ຢ່າງຄົບຊຸດ, ເຊັ່ນ: ຕອນ ຍາຈາງ-ກາມເລິມ, ກາມເລິມ-ວິ້ງຫາວ ແລະເວິນຟອງ-ຍາຈາງ, ໄດ້ສ້າງຄວາມສະດວກອັນໃຫຍ່ຫຼວງໃຫ້ແກ່ການເຄື່ອນໄຫວໄປມາ. ມາບັດນີ້, ເວລາທີ່ເຄື່ອນຍ້າຍຈາກນະຄອນໂຮ່ຈີມິນ ໄປເຖິງແຂວງແຄ໊ງຮວ່າ ໄດ້ຫຼຸດລົງຍັງເຫຼືອປະມານ 4-5 ຊົ່ວໂມງເທົ່ານັ້ນ. ສິ່ງນີ້ໄດ້ກະຕຸ້ນທ່າອ່ຽງການທ່ອງທ່ຽວ ດ້ວຍລົດສ່ວນຕົວຢ່າງແຂງແຮງ, ດຶງດູດແຂກທ່ອງທ່ຽວໄດ້ຫຼາຍຈາກເຂດທິດຕາເວັນອອກພາກໃຕ້ທີ່ເລືອກເອົາແຂວງແຄ໊ງຮວ່າ ເປັນສະຖານທີ່ທ່ອງທ່ຽວໃຫ້ແກ່ວັນພັກໄລຍະສັ້ນ.

ຕາມບົດລາຍງານຂອງພະແນກວັດທະນະທໍາ, ກິລາ ແລະທ່ອງທ່ຽວແຂວງແຄ໊ງຮວ່າ ໃຫ້ຮູ້ວ່າ ໃນເດືອນກຸມພາ ປີ 2026, ບັນດາສະຖານທີ່ພັກເຊົາໃນບໍລິເວນແຂວງ ໄດ້ຮັບໃຊ້ແຂກທ່ອງທ່ຽວຈໍານວນ 951.000 ເທື່ອຄົນ, ເພີ່ມຂຶ້ນ 30,7% ເມື່ອທຽບໃສ່ໄລຍະດຽວກັນ. ໃນນັ້ນ, ແຂກສາກົນ ຄາດວ່າບັນລຸ 371.000 ເທື່ອຄົນ, ເພີ່ມຂຶ້ນ 41% ເມື່ອທຽບໃສ່ໄລຍະດຽວກັນ; ແຂກພາຍໃນປະເທດ ຄາດວ່າ ບັນລຸ 580.000 ເທື່ອຄົນ, ເພີ່ມຂຶ້ນ 24,8%. ລວມລາຍຮັບທີ່ໄດ້ຈາກການທ່ອງທ່ຽວໃນເດືອນກຸມພາ ຄາດວ່າ ບັນລຸ 7.570,7 ຕື້ດົ່ງ, ເພີ່ມຂຶ້ນ 45,2% ເມື່ອທຽບໃສ່ໄລຍະດຽວກັນຂອງປີກາຍ...

ການວາງແຜນກຳນົດຍຸດທະສາດພັດທະນາການທ່ອງທ່ຽວແບບຍືນຍົງ

ສະຫາຍ ຫງວຽນລອງບຽນ, ຮອງປະທານຜູ້ປະຈໍາການຄະນະກໍາມະການປະຊາຊົນແຂວງແຄ໊ງຮວ່າ ໃຫ້ຮູ້ວ່າ ໃນເດືອນກຸມພາ ປີ 2026, ຄະນະກໍາມະການປະຊາຊົນແຂວງແຄ໊ງຮວ່າ ໄດ້ອະນຸມັດຜ່ານຍຸດທະສາດພັດທະນາການທ່ອງທ່ຽວແຂວງ ໄລຍະ 2026-2030, ກໍານົດທິດຮອດປີ 2045. ນີ້ແມ່ນການຫັນເປົ້າໝາຍໃນມະຕິເລກທີ 01-NQ/TU ລົງວັນທີ 14 ກໍລະກົດ 2025 ຂອງຄະນະພັກແຂວງແຄ໊ງຮວ່າ ກ່ຽວກັບການກໍານົດສຸມໃສ່ 4 ເສົາຄໍ້າທີ່ຊຸກຍູ້ການເຕີບໂຕເສດຖະກິດເປັນລະອຽດ, ລວມມີ: ອຸດສາຫະກໍາ; ພະລັງງານ; ການທ່ອງທ່ຽວ, ການບໍລິການ; ຕົວເມືອງ, ການກໍ່ສ້າງ. ຕາມນັ້ນແລ້ວ, ເປົ້າໝາຍຂອງຍຸດທະສາດຮອດປີ 2030, ແມ່ນກໍ່ສ້າງແຂວງແຄ໊ງຮວ່າ ໃຫ້ກາຍເປັນສູນກາງແຫ່ງການບໍລິການ, ການທ່ອງທ່ຽວທະເລສາກົນ, ຂຸດຄົ້ນ ແລະເສີມຂະຫຍາຍທ່າແຮງບົ່ມຊ້ອນໃຫ້ແກ່ການພັດທະນາ ດ້ວຍເສດຖະກິດທະເລ ທີ່ເປັນພື້ນຖານຢ່າງສຸດຂີດ, ການທ່ອງທ່ຽວແມ່ນຂະແໜງເສດຖະກິດປາຍແຫຼມ, ນອນໃນ 5 ແຂວງ, ນະຄອນນໍາໜ້າໃນທົ່ວປະເທດ ກ່ຽວກັບການພັດທະນາການທ່ອງທ່ຽວ, ປັບປຸງຖານະບົດບາດເປັນສະຖານທີ່ທ່ອງທ່ຽວທີ່ພົ້ນເດັ່ນຂອງອາຊີຕາເວັນອອກສ່ຽງໃຕ້ ເທື່ອລະກ້າວ.

leftcenterrightdel
ການນໍາແຂວງແຄ໊ງຮວ່າ ພ້ອມກັບຜູ້ແທນຕ້ອນຮັບຖ້ຽວບິນທໍາອິດຈາກຝູກວກ ມາເຖິງກາມແຣງ, ໃນວັນທີ 15 ມີນາ. ພາບ: ມິງຢຸຍ.

ກຸ່ມໜ້າທີ່ ໄລຍະ 2026-2030 ຕ້ອງສ້າງຂັ້ນຕອນລະອຽດຕາມແຕ່ລະຈຸດເວລາ, ກໍານົດໜ້າທີ່, ຜະລິດຕະພັນສົ້ນອອກ ແລະຄວາມຮັບຜິດຊອບຂອງແຕ່ລະກົມກອງໃຫ້ຈະແຈ້ງ; ຮັບປະກັນຫຼັກການ “6 ແຈ້ງ” (ແຈ້ງຄົນ, ແຈ້ງວຽກ, ແຈ້ງເວລາ, ແຈ້ງຄວາມຮັບຜິດຊອບ, ແຈ້ງຜະລິດຕະພັນ, ແຈ້ງສິດອໍານາດ) ເພື່ອຈັດຕັ້ງປະຕິບັດຍຸດທະສາດພັດທະນາການທ່ອງທ່ຽວຂອງແຂວງ ໃຫ້ມີປະສິດທິພາບ, ປະກອບສ່ວນນໍາແຂວງແຄ໊ງຮວ່າ ກາຍເປັນເປັນສະຖານທີ່ທ່ອງທ່ຽວທີ່ມີຄຸນນະພາບສູງ, ມີກໍາລັງແກ່ງແຍ້ງໃນພາກພື້ນ ແລະສາກົນ.

ຕາມຍຸດທະສາດແລ້ວ, ຮອດປີ 2030, ແຂວງແຄ໊ງຮວ່າ ສູ້ຊົນຕ້ອນຮັບແຂກທ່ອງທ່ຽວໃຫ້ໄດ້ປະມານ 33 ລ້ານເທື່ອຄົນ, ໃນນັ້ນແຂກສາກົນກວມເອົາ 40-45%; ລວມລາຍຮັບທີ່ໄດ້ຈາກການທ່ອງທ່ຽວແມ່ນໃຫ້ບັນລຸປະມານ 9 ຕື້ໂດລາສະຫະລັດ, ປະກອບສ່ວນເຂົ້າລວມຍອດຜະລິດຕະພັນໃນບໍລິເວນ (GRDP) ຂອງແຂວງ ປະມານ 20%. ກໍານົດທິດຮອດປີ 2045, ການທ່ອງທ່ຽວແຂວງແຄ໊ງຮວ່າ ໃຫ້ໄດ້ຮັບການຍອມຮັບຈາກທົ່ວໂລກວ່າ ເປັນໜຶ່ງໃນບັນດາແຫຼ່ງທ່ອງທ່ຽວທະເລຊັ້ນນຳຂອງທະວີບອາຊີ; ພັດທະນາບັນດາຜະລິດຕະພັນ, ບໍລິການທີ່ມີມູນຄ່າເພີ່ມສູງຢ່າງແຂງແຮງ, ປະກອບສ່ວນຍົກສູງມາດຕາຖ່ວງຂະແໜງການບໍລິການໃນໂຄງປະກອບເສດຖະກິດຂອງແຂວງ. ຕົວເລກຄາດໝາຍກ່ຽວກັບການທ່ອງທ່ຽວ ໄລຍະ 2030-2045 ຈະໄດ້ຄິດໄລ່, ດັດແປງ ແລະອັບເດດບົນພື້ນຖານຮູບແບບການຄາດຄະເນ, ຂໍ້ມູນຕົວຈິງ ແລະຜົນການຜັນຂະຫຍາຍປະຕິບັດຢ່າງມີປະສິດທິພາບໃນໄລຍະ 2026-2030, ຮັບປະກັນໃຫ້ຂະແໜງການ ທ່ອງທ່ຽວ ມີລະດັບເຕີບໂຕສອງຕົວເລກ. 

ທ່ານ Lovrenc Kessler ຊ່ຽວຊານຂອງບໍລິສັດ Simon Kucher (ມາຈາກ Dubai, UAE) - ຫົວໜ່ວຍໃຫ້ຄໍາປຶກສາກ່ຽວກັບການສ້າງຍຸດທະສາດການທ່ອງທ່ຽວແຂວງແຄ໊ງຮວ່າ, ໄດ້ຊີ້ແຈ້ງຍຸດທະສາດກໍານົດ 6 ກຸ່ມຍຸດທະສາດຫຼັກແຫຼ່ງ ໃນໄລຍະ 2026-2030, ກໍານົດທິດຮອດປີ 2045, ລວມມີ: ພັດທະນາການທ່ອງທ່ຽວແຂວງແຄ໊ງຮວ່າ ໃຫ້ບືນຕົວຂຶ້ນກາຍເປັນແຫຼ່ງທ່ອງທ່ຽວຊັ້ນນໍາທີ່ໂດດເດັ່ນ; ສ້າງເຄື່ອງໝາຍການຄ້າແຫຼ່ງທ່ອງທ່ຽວ; ຍົກສູງຄວາມສາມາດເຊື່ອມຕໍ່ ແລະເຂົ້າເຖິງ; ຍົກລະດັບການຄົ້ນຫາໃຫ້ແກ່ແຂກທ່ອງທ່ຽວ; ຮັບປະກັນແຫຼ່ງກໍາລັງດ້ານການເງິນ; ເພີ່ມທະວີການ ບໍລິຫານອັດສະລິຍະ.

ຍຸດທະສາດດັ່ງກ່າວ ໄດ້ເນັ້ນໜັກເຖິງບົດບາດຂອງການຫັນເປັນດີຈີຕອນ, ຫັນເປັນສີຂຽວ, ບໍລິຫານແຫຼ່ງທ່ອງທ່ຽວທີ່ທັນສະໄໝ, ພັດທະນາເສດຖະກິດກາງຄືນ, ພ້ອມກັບບັນດາຜະລິດຕະພັນການທ່ອງທ່ຽວ ທີ່ເປັນສັນຍາລັກ ຕິດພັນກັບຄຸນຄ່າທາງດ້ານວັດທະນະທໍາ-ມໍລະດົກ ຄື: ຮັງນົກແອ່ນ, ໄມ້ເກດສະໜາ, ວັດທະນະທໍາ ຈໍາ, ເທດສະການ Katé, ປະກອບສ່ວນສ້າງສີສັນສະເພາະ, ສ້າງຄວາມແຕກຕ່າງໃຫ້ແກ່ການທ່ອງ ທ່ຽວຂອງແຂວງແຄ໊ງຮວ່າ. 

ໂດຍ: ໄຊຊະນະ