ມອບຫ້ອງຄອມພິວເຕີໃຫ້ນັກຮຽນຮ່າໂນ້ຍ
ກປ.ອອນໄລ - ໃນເຫດການສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ສ.ເກົາຫຼີ, ວັນທີ 20 ມັງກອນ, ສະຫະພັນບັນດາອົງການມິດຕະພາບນະຄອນຮ່າໂນ້ຍ ໄດ້ສົມທົບກັບອົງການ Global Civic Sharing (GCS)ສ.ເກົາຫຼີ ປະຈໍາ ຫວຽດນາມ ຈັດຕັ້ງພິທີມອບຫ້ອງຄອມພິວເຕີທັນສະໄໝ, ຄົບຊຸດທີ່ມີມູນຄ່າ 550 ລ້ານດົ່ງໃຫ້ໂຮງຮຽນມັດທະຍົມຕອນຕົ້ນລຽນເຈົາ (ເມືອງ ແທັງອວຍ).
ທ່ານ Choi Eui Gyo ຫົວໜ້າຜູ້ຕາງໜ້າອົງການຈັດຕັ້ງ GCS ສ.ເກົາຫຼີ ປະຈໍາ ຫວຽດນາມ ໃຫ້ຮູ້ວ່າ, ມີວິສາຫະກິດຂະໜາດນ້ອຍ ແລະກາງຢູ່ສ.ເກົາຫຼີ ມີຄວາມສົນໃຈ ແລະຢາກສະໜັບສະໜູນປະຊາຊົນຫວຽດນາມ. ທ່ານ ຕີລາຄາສູງບັນດາການເຄື່ອນໄຫວປຸກລະດົມການຊ່ວຍເຫຼືອຂອງສະຫະພັນບັນດາອົງການມິດຕະພາບນະຄອນຮ່າໂນ້ຍ. ຫຼາຍລະບຽບການໄດ້ຜັນຂະຫຍາຍຢ່າງສະດວກດ້ວຍການຮ່ວມມືຢ່າງມີຄວາມຮັບຜິດຊອບ, ມີການໜູນຊ່ວຍຫຼາຍສຸດຂອງສະຫະພັນບັນດາອົງການມິດຕະພາບນະຄອນຮ່າໂນ້ຍ.
|
|
ບັນຍາກາດທີ່ພິທີມອບຫ້ອງຄອມພິວເຕີໃຫ້ນັກຮຽນຮ່າໂນ້ຍ. ພາບ: ສໍານັກຂ່າວສານຫວຽດນາມ. |
ດ້ວຍທິດນໍາເປັນເຈົ້າການ, ມີໄຫວພິບ, ປະດິດສ້າງ, ມີປະສິດທິຜົນ, ເຖິງວ່າຖືກຜົນສະທ້ອນຈາກພະຍາດໂຄວິດ-19 ກໍ່ຕາມ, ສະຫະພັນ ບັນດາອົງການມິດຕະພາບນະຄອນຮ່າໂນ້ຍ ຍັງມານະພະຍາຍາມເຮັດວຽກງານຂົນຂວາຍເອົາການຊ່ວຍເຫຼືອນຳອົງການທີ່ບໍ່ຂຶ້ນກັບລັດຖະບານຕ່າງປະເທດຢູ່ ຫວຽດນາມ ຜ່ານໂຄງການຊ່ວຍເຫຼືອ SGI Dream Class - ໂຄງການກໍ່ສ້າງບັນດາຫ້ອງຄອມພິວເຕີຢູ່ໂຮງຮຽນແຫ່ງຕ່າງໆທີ່ກໍາລັງປະສົບກັບຄວາມຫຍຸ້ງຍາກຂອງຫວຽດນາມ. ຜ່ານນັ້ນ, ປະກອບສ່ວນຊ່ວຍໃຫ້ເດັກນ້ອຍໄດ້ເຂົ້າເຖິງຂໍ້ມູນຂ່າວສານ, ເຕັກໂນໂລຢີໃໝ່.
ປີ 2022, ຜ່ານສະຫະພັນບັນດາອົງການມິດຕະພາບນະຄອນຮ່າໂນ້ຍ, ອົງການສ.ເກົາຫຼີ ປະຈໍາ ຫວຽດນາມ ຈະສືບຕໍ່ມອບຫ້ອງຄອມພິວເຕີສອງຫ້ອງ ແລະຫໍສະໝຸດສອງແຫ່ງທີ່ມີມູນຄ່າທັງໝົດ 1,8 ຕື້ດົ່ງໃຫ້ໂຮງຮຽນບາງແຫ່ງຢູ່ເມືອງ ມີ໊ດຶກ ແລະເທດສະບານເມືອງ ເຊີນເຕິຍ.
ໂດຍ: ໄຊນີດາ