ການປັບປຸງເງື່ອນໄຂຕ່າງໆເພື່ອດຶງດູດການລົງທຶນຕ່າງປະເທດຂອງຫວຽດນາມ ໄດ້ຮັບການຕີລາຄາສູງ
ກປ.ອອນໄລ - ຕາມນັກຂ່າວສໍານັກຂ່າວສານຫວຽດນາມ ປະຈໍາ Praha ແລ້ວ, ນັກການທູດດ້ານເສດຖະກິດ David Jarkulisch ຂອງ ສ.ເຊັກໂກ ຫວ່າງແລ້ວນີ້ ໄດ້ມີບົດຂຽນກ່ຽວກັບການໃຫ້ຂໍ້ສັງເກດບັນດາການປ່ຽນແປງທີ່ຕັ້ງໜ້າໃນນະໂຍບາຍຂອງລັດຫວຽດນາມ ທີ່ສະແດງອອກຜ່ານກົດໝາຍວ່າດ້ວຍການລົງທຶນສະບັບປັບປຸງ, ເພື່ອແນໃສ່ສ້າງເງື່ອນໄຂດຶງດູດ ແລະເພີ່ມທະວີຢ່າງມີປະສິດທິຜົນຂອງການລົງທຶນຕ່າງປະເທດໃນການພັດທະນາເສດຖະກິດ.
ບົດຂຽນໄດ້ເອົາລົງຢູ່ໃນເວັບໄຊຂອງກະຊວງການຕ່າງປະເທດເຊັກໂກ (mzv.cz) ໃນວັນທີ 31 ກໍລະກົດ ໂດຍຊີ້ແຈ້ງວ່າສະພາແຫ່ງຊາດຫວຽດນາມ ໄດ້ໃຫ້ສັດຕະຍາບັນກົດໝາຍວ່າດ້ວຍການລົງທຶນ (ສະບັບປັບປຸງ) ເຊິ່ງຄາດຄະເນວ່າຈະມີຜົນສັກສິດນັບແຕ່ ວັນທີ 1 ມັງກອນ 2021, ຜ່ານນັ້ນໄດ້ປັບປຸງເງື່ອນໄຂໃຫ້ແກ່ບັນດານັກລົງທຶນຕ່າງປະເທດເຂົ້າມາລົງທຶນຢູ່ຫວຽດນາມ ຫຼາຍພໍສົມຄວນ. ເປົ້າໝາຍຕົ້ນຕໍຂອງການປັບປຸງກົດໝາຍສະບັບດັ່ງກ່າວແມ່ນເຮັດໃຫ້ສະພາບແວດລ້ອມແຫ່ງການດໍາເນີນທຸລະກິດຢູ່ຫວຽດນາມ ມີຄວາມດຶງດູດກວ່າຕໍ່ບັນດານັກລົງທຶນຕ່າງປະເທດ ແລະດຶງດູດແຫຼ່ງເງິນລົງທຶນໃໝ່ເຂົ້າມາລົງທຶນໃນຂົງເຂດເຕັກໂນໂລຢີສູງ.
|
|
ພາບປະກອບຄັດຈາກ: ສໍານັກຂ່າວສານຫວຽດນາມ. |
ຕາມນັກຂຽນແລ້ວ ຫວຽດນາມ ແມ່ນໜຶ່ງໃນບັນດາສະຖານທີ່ລົງທຶນທີ່ດຶງດູດທີ່ສຸດຢູ່ອາຊີ, ແຕ່ວ່າມາຮອດປະຈຸບັນສ່ວນຫຼາຍການລົງທຶນຕ່າງປະເທດເຂົ້າຫວຽດນາມ ຕົ້ນຕໍແມ່ນແນໃສ່ຂົງເຂດນໍາໃຊ້ແຮງງານທີ່ມີລາຄາຕໍ່າດ້ວຍວິວັດການເຕັກໂນໂລຢີຕໍ່າ. ສະນັ້ນ ໃນປີ 2019, ລັດຖະບານຫວຽດນາມ ໄດ້ຕັດສິນໃຈປ່ຽນແປງຍຸດທະສາດດຶງດູດການລົງທຶນຕ່າງປະເທດເພື່ອໜູນຊ່ວຍການປ່ຽນແປງໃໝ່ຂອງບັນດາຂະແໜງອຸດສາຫະກໍາ ແລະອຸດສາຫະກໍາເຕັກໂນໂລຢີສູງ.
ໃນບົດຂຽນໄດ້ເນັ້ນໜັກວ່າເຖິງວ່າຕ້ອງປະເຊີນໜ້າກັບຜົນຮ້າຍ, ສິ່ງຫຍໍ້ທໍ້ຈາກພະຍາດໂຄວິດ-19 ກໍ່ຕາມ, ແຕ່ຫວຽດນາມ ຍັງມີຄວາມດຶງດູດສໍາລັບບັນດານັກລົງທຶນຕ່າງປະເທດ ແລະໃນ 7 ເດືອນຕົ້ນປີ 2020 ລວມຍອດເງິນລົງທຶນຕ່າງປະເທດເຂົ້າຫວຽດນາມ ແມ່ນ 18,8 ຕື້ໂດລາສະຫະລັດ, ຫຼຸດລົງພຽງແຕ່ປະມານ 7% ເທົ່ານັ້ນເມື່ອທຽບໃສ່ໄລຍະດຽວກັນຂອງປີກາຍ.
ໂດຍ: ເກື່ອງດັ້ງ