ຕະຫຼາດນັດຂ້າມຊາຍແດນ ຫວຽດນາມ-ລາວ

ຕະຫຼາດນັດຂ້າມຊາຍແດນໄດ້ດຳເນີນເນື່ອງໃນໂອກາດໃກ້ຈະຮອດບຸນເຕັດ, ປະຊາຊົນບໍ່ພຽງແຕ່ໄດ້ແລກປ່ຽນ, ຊື້ສິນຄ້າເທົ່ານັ້ນ ຫາກຍັງໄດ້ພົບປະ, ມ່ວນຊື່ນ, ແລກປ່ຽນວັດທະນະທຳບັນດາເຜົ່າຢູ່ສອງຟາກຊາຍແດນ ຫວຽດນາມ - ລາວ, ປະກອບສ່ວນອະນຸລັກຈຸດດີງາມທີ່ເປັນເອກະລັກ, ຈຸດພິເສດຂອງພໍ່ແມ່ປະຊາຊົນເຂດພູສູງ, ສະແດງໃຫ້ເຫັນຄວາມສາມັກຄີທີ່ມີຊີວິດຊີວາ, ສະໜິດຕິດພັນມາແຕ່ດົນນານຂອງປະຊາຊົນສອງປະເທດ.

ລາຍການສະແດງສິລະປະຂອງຊົນເຜົ່າລາວ. ພາບ: vov.vn

ເພື່ອໄປຕະຫຼາດໃຫ້ທັນແຕ່ເຊົ້າໆນັ້ນ, ນັບແຕ່ມື້ກ່ອນ, ນາງ ມຸກດາ, ຢູ່ເມືອງເຊໂປນ, ແຂວງສະຫວັນນະເຂດ, ລາວ ໄດ້ປະຕິບັດສຳເລັດລະບຽບການເຂົ້າເມືອງຜ່ານດ່ານສາກົນລາວບາວ. ມາຮອດຕະຫຼາດນັດຂ້າມຊາຍແດນ, ນາງ ມຸກດາ ໄດ້ນຳເອົາແພຝ້າຍພື້ນເມືອງຂອງປະຊາຊົນລາວບັນດາເຜົ່າມາວາງຂາຍຢູ່ຕະຫຼາດນັດ.

ນາງ ມຸກດາ ແບ່ງປັນວ່າ: ນີ້ແມ່ນຄັ້ງທຳອິດທີ່ນາງໄດ້ນຳເຄື່ອງມາຂາຍຢູ່ຕະຫຼາດນັດ, ຮ້ານຂອງຕົນໄດ້ດຶງດູດນັກທ່ອງທ່ຽວມາເບິ່ງ ແລະຊື້ເຄື່ອງເປັນຈຳນວນຫຼວງຫຼາຍ: “ນີ້ແມ່ນຄັ້ງທຳອິດທີ່ຂ້າພະເຈົ້າໄດ້ເຂົ້າຮ່ວມຕະຫຼາດນັດພິເສດຄືຕະຫຼາດນັດຊາຍແດນລາວບາວນີ້. ຂ້າພະເຈົ້າໄດ້ນຳເອົາຫຼາຍຜະລິດຕະພັນແພຝ້າຍພື້ນເມືອງ ແລະເຄື່ອງນຸ່ງທີ່ເປັນເອກະລັກຂອງຊາວລາວພວກຂ້າພະເຈົ້າໂຄສະນາ, ວາງສະແດງ, ແນະນຳເຖິງຊາວຫວຽດນາມ ເປັນຈຳນວນຫຼວງຫຼາຍ”

ຮ້ານເຄື່ອງແພຝ້າຍພື້ນເມືອງ. ພາບ: vov.vn

ໃນຊຸມມື້ສຸດທ້າຍຂອງປີ 2024,  ຕາມຖະໜົນຫົນທາງ, ປະຊາຊົນ ແລະນັກທ່ອງທ່ຽວມາຕະຫຼາດນັດຊາຍແດນ ລາວບາວ ບໍ່ພຽງແຕ່ເພື່ອຊື້ສິນຄ້າເທົ່ານັ້ນ, ຫາກຍັງຄົ້ນຫາຈຸດທີ່ເປັນເອກະລັກສະເພາະຂອງຕະຫຼາດນັດເປັນຄັ້ງທຳອິດທີ່ຈັດຂຶ້ນຢູ່ທີ່ນີ້ອີກດ້ວຍ. ອາກາດມີແສງແດດສວຍງາມ, ຕະຫຼາດທີ່ຕັ້ງຢູ່ກາງຮ່ອມພູໃກ້ກັບຊາຍແດນຫວຽດນາມ - ລາວ ໄດ້ມີຄວາມຄຶກຄື້ນ, ດຶງດູດປະຊາຊົນນັບພັນຄົນມາຢ້ຽມຊົມ ແລະຊື້ເຄື່ອງ.

ຕະຫຼາດນັດຊາຍແດນທີ່ຈັດຂຶ້ນໃນວັນເສົາຂອງແຕ່ລະອາທິດ. ພາບ: vov.vn

ນາງ ຫງວຽນຈູກເຢືອງ, ຢູ່ເທດສະບານລາວບາວ, ເມືອງ ເຮື໊ອງຮວ໊າ, ແຂວງ ກວາງຈິ ໄດ້ແບ່ງປັນວ່າ: ມາຕະຫຼາດນັດຊາຍແດນ, ປະຊາຊົນ ແລະແຂກທ່ອງທ່ຽວໄດ້ປະສົບກັບສິ່ງໃໝ່ທີ່ໜ້າສົນໃຈກ່ຽວກັບສີສັນວັດທະນະທຳທ້ອງຖິ່ນຂອງພໍ່ແມ່ປະຊາຊົນເຜົ່າເວິນກ່ຽວ-ປາໂກ ແລະຈຸດທີ່ເປັນເອກະລັກໃນວັດທະນະທຳຂອງປະຊາຊົນປະເທດເພື່ອນລາວ. ຜະລິດຕະພັນທີ່ນຳມາວາງຂາຍແມ່ນປະຊາຊົນຢູ່ເຂດຊາຍແດນເຮັດເອງ, ຜະລິດຕະພັນເປັນເອກະລັກຂອງຊາວເຜົ່າເວິນກ່ຽວ, ປາໂກ ແລະປະຊາຊົນປະເທດເພື່ອນລາວ, ຜະລິດຕະພັນ OCOP ທີ່ເປັນເອກະລັກຂອງເຂດເມືອງພູດອຍ.

ຕາມນາງ ຫງວຽນຈູກເຢືອງ ແລ້ວ, ມາຕະຫຼາດແຫ່ງນີ້, ນັກທ່ອງທ່ຽວສາມາດເຊື່ອມຕົວເຂົ້າກັບບັນຍາກາດເຂດວັດທະນະທຳທີ່ເປັນເອກະລັກດ້ວຍບັນດາຄຸນຄ່າວັດທະນະທຳນາມມະທໍາທີ່ໄດ້ຮັບການຮັກສາໄວ້ເປັນເວລານັບພັນປີຂອງຊາວເຜົ່າ ເວິນກ່ຽວ, ປາໂກ ແລະປະຊາຊົນລາວບັນດາເຜົ່າອ້າຍນ້ອງໂດຍຜ່ານວາດຟ້ອນ ແລະສຽງເພງ ທີ່ເຕັມໄປດ້ວຍຈັ່ງຫວະ, ລົມຫາຍໃຈຂອງເຂດພູຜາປ່າໄມ້. “ຕະຫຼາດນັດຊາຍແດນລາວບາວແມ່ນຕະຫຼາດນັດທີ່ເປັນເອກະລັກຍ້ອນມີການປະສານດ້ານວັດທະນະທຳລະຫວ່າງສອງປະເທດຫວຽດນາມ ແລະລາວ, ໂຄສະນາວັດທະນະທຳ, ປະເພນີຂອງຊາວເຜົ່າສ່ວນໜ້ອຍຢູ່ເຂດພູສູງ ເຮື໊ອງຮວ໊າ. ເມື່ອໄປຕະຫຼາດນັດ, ຂ້າພະເຈົ້າໄດ້ພົບເຫັນບັນຍາກາດຟົດຟື້ນມ່ວນຊື່ນ. ຫວັງວ່າຕະຫຼາດນັດຈະດຳເນີນໄປທຸກອາທິດເພື່ອໂຄສະນາວັດທະນະທຳຂອງສອງປະເທດ.”

ແນະນຳຜະລິດຕະພັນກະເສດຢູ່ຕະຫຼາດນັດຂ້າມຊາຍແດນ. ພາບ: vov.vn

ຕະຫຼາດນັດຂ້າມຊາຍແດນຈັດຂຶ້ນໃນຊຸມມື້ສຸດທ້າຍຂອງປີ 2024, ຕ້ອນຮັບລະດູບານໃໝ່ປີ 2025. ເພື່ອນລາວບໍ່ພຽງແຕ່ນຳເອົາບັນດາຜະລິດຕະພັນ, ສິນຄ້າຂອງປະເທດຕົນມາວາງຂາຍຢູ່ຕະຫຼາດນັດເທົ່ານັ້ນ, ຫາກຍັງເປີດຕະຫຼາດນັດດ້ວຍບັນດາລາຍການສະແດງສິລະປະທີ່ເຕັມໄປດ້ວຍສີສັນວັດທະນະທຳ.

ຊາວລາວທີ່ອາໄສຢູ່ບ້ານແດນສະຫວັນ, ແຂວງສະຫວັນນະເຂດໄດ້ມາສະແດງລາຍການຟ້ອນສາຍໃຈລາວ-ຫວຽດ ໃນມື້ເປີດຕະຫຼາດນັດ,... ຕອບແທນອາລົມຈິດຂອງປະຊາຊົນລາວບັນດາເຜົ່າ, ຊາວເຜົ່າເວິນກ່ຽວ, ປາໂກ ທີ່ດຳລົງຊີວິດຢູ່ຕາມເສັ້ນພູຫຼວງ (ເຈື່ອງເຊີນ) ໄດ້ສະແດງການຂັບລຳ, ຟ້ອນເພງພື້ນເມືອງ ເພື່ອຕອບແທນ ຄໍາເຊື້ອເຊີນ ແລະຮັກແພງແຂກຄົນ.

ພວກນ້ອງນ້ອຍນັກຮຽນລາວ ສະແດງລາຍການຟ້ອນກ່ຽວກັບສາຍໃຈມິດຕະພາບຫວຽດນາມ-ລາວ. ພາບ: vov.vn

ເພື່ອກະກຽມໃຫ້ຕະຫຼາດນັດ, ນາງ ໂຮ່ຮວ້າມີ, ຢູ່ຕາແສງ ອາບຸງ, ເມືອງ ດັກຣົງ, ແຂວງ ກວາງຈິ ໄດ້ໃຊ້ເວລາຫຼາຍເພື່ອໄປຊອກຫາເຄື່ອງປຸງ ແລະມາປຸງແຕ່ງເຍື່ອງອາຫານທີ່ເປັນເອກະລັກຂອງຊົນເຜົ່າຕົນເອງ. ກ່ອນໜ້າຕະຫຼາດນັດຈະດຳເນີນມື້ໜຶ່ງ, ນາງມີ່ກໍໄດ້ຕັ້ງຮ້ານຂາຍເຄື່ອງ ແລະອາຫານ ທີ່ໄດ້ກະກຽມໄວ້ກ່ອນແລ້ວຢ່າງຄົບຖ້ວນ. ຜູ້ຂາຍດີໃຈເພາະວ່າຈາກນີ້ໄປທຸກໆວັນເສົາໃນແຕ່ລະອາທິດ ພວກເຂົາເຈົ້າຈະມີບ່ອນຂາຍເຄື່ອງທີ່ສະດວກເພີ່ມອີກບ່ອນໜຶ່ງ. ນາງ ໂຮ່ຮວ້າມີ ໃຫ້ຮູ້ວ່າ: ຕະຫຼາດນັດໄດ້ດຳເນີນໃນທ້າຍປີ ແລະໃກ້ຈະຮອດບຸນເຕັດ, ສະນັ້ນ ບັນດາສິນຄ້າທີ່ນຳມາວາງຂາຍຕົ້ນຕໍແມ່ນເພື່ອຮັບໃຊ້ໃຫ້ປະຊາຊົນໄປຊື້ເຄື່ອງຂອງເພື່ອຮັບຕ້ອນບຸນເຕັດ.

ເຍື່ອງອາຫານປະເພດປີ້ງ ເຊັ່ນ: ປີ້ງໄກ່, ປີ້ງຊີ້ນໝູ, ປີ້ງຊີ້ນງົວແມ່ນໄດ້ຮັບຄວາມນິຍົມຈາກນັກທ່ອງທ່ຽວ. ພາບ: vov.vn

ຕະຫຼາດນັດຊາຍແດນລາວບາວແມ່ນນໍາມາເຊິ່ງຄວາມຫວັງກ່ຽວກັບການກຳເນີດ ແລະ ພັດທະນາຮູບແບບວັດທະນະທຳ, ຄວາມງາມທີ່ເປັນເອກະລັກຈັບໃຈ, ເປັນເອກະລັກຂອງເຂດພູສູງທາງທິດຕາເວັນຕົກຂອງແຂວງກວາງຈິ. ທ່ານ ເລບາຮຸ່ງ, ປະທານຄະນະກຳມະການປະຊາຊົນເມືອງລາວບາວ, ແຂວງກວາງຈິ ໃຫ້ຮູ້ວ່າ: ທ້ອງຖິ່ນປາດຖະໜາຢາກສ້າງ ແລະ ຮັກສາຕະຫຼາດນັດໃຫ້ກາຍເປັນສະຖານທີ່ໃນການເດີນທາງເຊື່ອມຕໍ່ບັນດາສະຖານທີ່ທ່ອງທ່ຽວ, ປະກອບສ່ວນດຶງດູດນັກທ່ອງທ່ຽວ, ຫັນບັນດາຜະລິດຕະພັນການທ່ອງທ່ຽວເປັນ ຫຼາຍຮູບຫຼາຍແບບເທື່ອລະກ້າວ.

ນີ້ກໍ່ແມ່ນໂອກາດເພື່ອໃຫ້ປະຊາຊົນທີ່ຢູ່ສອງຟາກຊາຍແດນໄດ້ພົບປະແລກປ່ຽນ, ຄ້າຂາຍ, ແລກປ່ຽນຜະລິດຕະພັນກະເສດ, ເຄື່ອງປ່າຂອງດົງ, ສ້າງວຽກເຮັດງານທຳ, ສ້າງລາຍຮັບໃຫ້ແກ່ປະຊາຊົນ, ປະກອບສ່ວນພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດຢູ່ເຂດຊາຍແດນ.

ຕາມທ່ານ ເລບາຮຸ່ງ ແລ້ວ, ອົງການເຈົ້າໜ້າທີ່ຂອງທັງສອງຝ່າຍຫວຽດນາມ - ລາວ ໄດ້ ແລະພວມອຳນວຍຄວາມສະດວກໃຫ້ແກ່ການເຄື່ອນໄຫວຂອງປະຊາຊົນສອງປະເທດຢູ່ຕະຫຼາດນັດ.

ໂດຍ: ທະນາພອນ