ບ່ອນອີງອັນອົບອຸ່ນໃຫ້ຜູ້ທີ່ດ້ອຍໂອກາດ
ຢູ່ໂຮງຮຽນປະຖົມສຶກສາ ຈູງລີ I, ຕາແສງເມືອງລາດ, ມີນັກຮຽນ 2 ຄົນທີ່ພວມໄດ້ຮັບການໜູນຊ່ວຍຈາກຄ້າຍທະຫານຊາຍແດນຈູງລີ.
ອ້າຍຄູ ຟ້າມງອກຕ໊ຽນ, ຮອງຜູ້ອຳນວຍການໂຮງຮຽນ ໄດ້ແບ່ງປັນວ່າ: ໂຄງການ “ຊ່ວຍນ້ອງໄປໂຮງຮຽນ” ມີມະນຸດສະທຳຢ່າງແທ້ຈິງ, ໄດ້ຫຼຸດຜ່ອນພາລະແບກຫາບໃຫ້ພໍ່ແມ່, ຊ່ວຍໃຫ້ພວກນ້ອງມີຄວາມອຸ່ນອ່ຽນໃຈໄປໂຮງຮຽນ. ພາບພົດຂອງທະຫານຊາຍແດນຊ່ວຍເຫຼືອນັກຮຽນ ຢ່າງສຸດຈິດສຸດໃຈ ໄດ້ປັບປຸງຄວາມໄວ້ເນື້ອເຊື່ອໃຈຂອງປະຊາຊົນຢູ່ເຂດພູດອຍຕື່ມອີກ.
ທ່ານພັນຕີ ກ໋ວານດິ່ງທາວ, ຮອງຫົວໜ້າການເມືອງຄ້າຍທະຫານຊາຍແດນຈູງລີ ໃຫ້ຮູ້ວ່າ ເພື່ອຜັນຂະຫຍາຍໂຄງການຢ່າງມີປະສິດທິຜົນ, ທາງກົມກອງໄດ້ມອບໝາຍໃຫ້ພະນັກງານລົງໄປແຕ່ລະບ້ານ, ແຕ່ລະໂຮງຮຽນເພື່ອກວດກາ, ເກັບກຳຂໍ້ມູນນັກຮຽນທີ່ປະສົບກັບຄວາມຫຍຸ້ງຍາກເປັນພິເສດ.
    |
 |
|
ທ່ານພັນຕີ ກ໋ວານດິ່ງທາວ ຮອງຫົວໜ້າການເມືອງຄ້າຍທະຫານຊາຍແດນຈູງລີ ມອບຂອງຂວັນໃຫ້ນັກຮຽນໂຮງຮຽນມັດທະຍົມຕອນຕົ້ນເຄິ່ງກິນນອນຊົນເຜົ່າ ຈູງລີ, ແຂວງແທງຮວ໋າ. ພາບ: vov.vn |
ຍ້ອນມີການຮ່ວມແຮງຮ່ວມໃຈນັ້ນ, ສະເພາະໃນສົກຮຽນ 2024-2025 ຄ້າຍທະຫານຊາຍແດນຈູງລີ ໄດ້ຮັບນັກຮຽນທີ່ທຸກຍາກ ມາເປັນລູກຮັກ 5 ຄົນ, ໃນນັ້ນ ມີນັກຮຽນ 1 ຄົນ ຢູ່ບ້ານນາຮ່າມ, ກຸ່ມບ້ານນ້ຳງ່າ, ເມືອງວຽງໄຊ, ແຂວງຫົວພັນ, ປະເທດລາວ ແລະ 1 ຄົນ ມາຢູ່ນໍາກົມກອງ ແລະນັກຮຽນ 18 ຄົນ ໃນໂຄງການຂອງທະຫານຊາຍແດນແຂວງແທງຮວ໋າ ດ້ວຍຈໍານວນເງິນໜູນຊ່ວຍ 7,4 ລ້ານດົ່ງ/ຄົນ/ປີ.
ບໍ່ພຽງແຕ່ໜູນຊ່ວຍນັກຮຽນເທົ່ານັ້ນ, ພະນັກງານ, ນັກຮົບຄ້າຍທະຫານຊາຍແດນຈູງລີ ຍັງໄດ້ສ້ອມແປງໂຮງຮຽນ, ຕິດຕັ້ງໄຟຟ້າ, ຕິດຕັ້ງພັດລົມ, ມຸງຫຼັງຄາສະໜາມເດັກຫຼີ້ນ, ມອບອຸປະກອນການຮຽນໃຫ້ນັກຮຽນຢູ່ບ້ານຫ່າງໄກສອກຫຼີກຫຼາຍແຫ່ງ. ບັນດາການເຄື່ອນໄຫວນ້ອຍໆ ແຕ່ມີຄວາມອົດທົນເຫຼົ່ານັ້ນໄດ້ປະກອບສ່ວນປະກາຍແສງສະຫວ່າງແຫ່ງສະຕິປັນຍາໃຫ້ແກ່ພວກນ້ອງນ້ອຍຢູ່ເຂດຊາຍແດນທີ່ຫຍຸ້ງຍາກ.
ແຜ່ຂະຫຍາຍນ້ຳໃຈສາມັກຄີຢູ່ສອງຟາກຊາຍແດນ
ເມື່ອແບ່ງປັນກັບນັກຂ່າວວິທະຍຸກະຈາຍສຽງຫວຽດນາມ, ບັນດານັກຮົບຄ້າຍທະຫານຊາຍແດນຈູງລີ ໃຫ້ຮູ້ວ່າ: ປະຈຸບັນ, ກົມກອງພວມໜູນຊ່ວຍນັກຮຽນລາວ 1 ຄົນ ມາແຕ່ປີ 2021. ນັ້ນແມ່ນນ້ອງ ທ້າວໂອ, ຢູ່ບ້ານນາຮາມ, ກຸ່ມບ້ານນ້ຳງາ, ເມືອງວຽງໄຊ, ແຂວງຫົວພັນ (ລາວ), ເປັນນັກຮຽນປະຖົມສຶກສາ.
ຄອບຄົວຂອງ ທ້າວໂອ ປະສົບກັບຄວາມຫຍຸ້ງຍາກຫຼາຍ, ແຕ່ຫຼານເປັນຄົນຄໍາຮູ້ ແລະມີສະຕິໃນການຮ່ຳຮຽນ. ໃນໄລຍະຜ່ານມາ, ເພື່ອລະດົມກໍາລັງໃຈຕໍ່ຜົນການຮ່ຳຮຽນຂອງ ທ້າວໂອ ໃຫ້ທັນການ, ນອກຈາກການໜູນຊ່ວຍດ້ານການເງິນ 4,5 ລ້ານດົ່ງຕໍ່ປີແລ້ວ, ຄ້າຍທະຫານຊາຍແດນຈູງລີ ຍັງໄດ້ຈັດຕັ້ງການພົບປະກັບອຳນາດການປົກຄອງບ້ານນາຮາມ, ໝວດທະຫານຊາຍແດນຄໍ່ານ່າງ ເພື່ອແລກປ່ຽນ, ກໍາແໜ້ນສະພາບການ, ຈາກນັ້ນມີການເຄື່ອນໄຫວໜູນຊ່ວຍລະດົມກໍາລັງໃຈໃຫ້ຫຼານ ແລະຄອບຄົວ.
|
|
 |
|
ຄ້າຍທະຫານຊາຍແດນຈູງລີ, ແຂວງແທງຮວ໋າ ຮັບລ້ຽງດູລູກຫຼານຂອງພໍ່ແມ່ປະຊາຊົນລາວບັນດາເຜົ່າ ຢູ່ເຂດຊາຍແດນ. ພາບ: vov.vn |
ແຂວງແທງຮວ໋າ ແລະແຂວງຫົວພັນ (ລາວ) ມີເສັ້ນຊາຍແດນຕິດຈອດກັນຍາວພໍສົມຄວນ, ປະຊາຊົນທີ່ຢູ່ສອງຟາກຊາຍແດນມີຄວາມຜູກພັນກັນມາເປັນເວລາດົນນານ. ຢູ່ຟາກເພື່ອນລາວມີຫຼາຍບ້ານ, ຊີວິດການເປັນຢູ່ຂອງປະຊາຊົນຍັງປະສົບກັບຄວາມຫຍຸ້ງຍາກຫຼາຍ, ເຮັດໃຫ້ນັກຮຽນຫຼາຍຄົນຢືນຢູ່ຕໍ່ໜ້າຄວາມສ່ຽງອາດຈະປະລະການຮຽນ. ນັບແຕ່ຜັນຂະຫຍາຍໂຄງການ “ຊ່ວຍນ້ອງໄປໂຮງຮຽນ” ແລະ ຮູບແບບ “ລູກຮັກຂອງຄ້າຍທະຫານຊາຍແດນ”, ກອງບັນຊາການທະຫານຊາຍແດນແຂວງແທງຮວ໋າ ໄດ້ຊີ້ນຳບັນດາກົມກອງເປີດກວ້າງການໜູນຊ່ວຍລູກຫຼານຂອງປະຊາຊົນລາວບັນດາເຜົ່າທີ່ດໍາລົງຊີວິດ ຢູ່ລຽບຕາມເສັ້ນຊາຍແດນ.
ຈາກແຜນນະໂຍບາຍດັ່ງກ່າວ, ບັນດາຄ້າຍທະຫານຊາຍແດນ ຈຶ່ງໄດ້ສົມທົບກັບອຳນາດການປົກຄອງບ້ານນາຮ່າມ, ນໍ້າງາ ແລະ ກໍາລັງທະຫານຊາຍແດນແຂວງຫົວພັນ ເພື່ອລົງສຳຫຼວດ ແລະ ຄັດເລືອກເອົານັກຮຽນທີ່ປະສົບກັບຄວາມຫຍຸ້ງຍາກເປັນພິເສດມາເປັນລູກຮັກ. ການຊ່ວຍເຫຼືອທີ່ແທດຈິງດັ່ງກ່າວ ບໍ່ພຽງແຕ່ຊ່ວຍໃຫ້ພວກນ້ອງນັກຮຽນສືບຕໍ່ໄດ້ຮ່ຳຮຽນເທົ່ານັ້ນ, ຫາກຍັງຮັດແໜ້ນນ້ຳໃຈສາມັກຄີ, ມິດຕະພາບລະຫວ່າງປະຊາຊົນທີ່ຢູ່ສອງຟາກຊາຍແດນອີກດ້ວຍ.
ສືບຕໍ່ມູນເຊື້ອອັນດີງາມຂອງທະຫານລຸງໂຮ່
ບໍ່ພຽງແຕ່ມີຄ້າຍທະຫານຊາຍແດນຈູງລີ ເທົ່ານັ້ນ, ຄ້າຍທະຫານຊາຍແດນຕາມຈູງ, ຕາແສງຕາມຈູງ, ແຂວງແທງຮວ໋າ ກໍ່ເປັນຈຸດທີ່ພົ້ນເດັ່ນ ໃນການລໍ່ລ້ຽງຄວາມໃຝ່ຝັນໃຫ້ນັກຮຽນ. ໂດຍຄຸ້ມຄອງເສັ້ນຊາຍແດນມີລວງຍາວ 7,347 ກິໂລແມັດ ມີ 4 ຫຼັກໝາຍຊາຍແດນແຫ່ງຊາດ, ບໍລິເວນຕາແສງຕາມຈູງ ມີ 8 ບ້ານ ດ້ວຍ 6 ຊົນເຜົ່າດຳລົງຊີວິດຢູ່ຮ່ວມກັນ. ຢູ່ບ່ອນທີ່ຫຍຸ້ງຍາກນັ້ນ, ທະຫານຊາຍແດນບໍ່ພຽງແຕ່ປະຕິບັດໜ້າທີ່ປົກປັກຮັກສາຊາຍແດນເທົ່ານັ້ນ, ຫາກຍັງກາຍເປັນ “ພໍ່ແມ່ຜູ້ທີສອງ” ຂອງນັກຮຽນທີ່ທຸກຍາກອີກດ້ວຍ.
ປະຈຸບັນ, ຄ້າຍທະຫານຊາຍແດນຕາມຈູງ ໄດ້ຮັບນັກຮຽນ 28 ຄົນ ມາເປັນລູກຮັກໃນໂຄງການ “ພະນັກງານ, ນັກຮົບກອງທັບຊ່ວຍນ້ອງໄປໂຮງຮຽນ”, ໜູນຊ່ວຍ 7,4 ລ້ານດົ່ງ/ຄົນ/ປີ; ພ້ອມດຽວກັນນັ້ນ ຍັງໄດ້ລະດົມບັນດາຜູ້ໃຈບຸນໃຈກຸສົນຊ່ວຍເຫຼືອນັກຮຽນ 10 ຄົນ ດ້ວຍຈຳນວນເງິນ 5 ລ້ານດົ່ງ/ຄົນ/ປີ. ທີ່ພິທີປິດສົກຮຽນ 2024-2025, ກົມກອງໄດ້ມອບເງິນ 177,6 ລ້ານດົ່ງໃຫ້ນັກຮຽນ 24 ຄົນ ທີ່ປະສົບກັບຄວາມຫຍຸ້ງຍາກ. ໄລ່ມາຮອດປະຈຸບັນ, ທະຫານຊາຍແຂວງແທງຮວ໋າ ໄດ້ໜູນຊ່ວຍນັກຮຽນຫຼາຍກວ່າ 100 ຄົນ, ດ້ວຍຍອດຈຳນວນເງິນເກືອບ 3 ຕື້ດົ່ງ.
ພວກນ້ອງທີ່ປະເຊີນກັບທາງຕັນໃນຊີວິດ, ປັດຈຸບັນໄດ້ມີໂອກາດໄປໂຮງຮຽນ ແລະມີຄວາມຫວັງຢູ່ໃນຄ້າຍທະຫານຊາຍແດນທີ່ຢູ່ເທິງພູ. ຢູ່ທີ່ນັ້ນ, ທະຫານຊາຍແດນບໍ່ພຽງແຕ່ປົກປັກຮັກສາຊາຍແດນເທົ່ານັ້ນ, ຫາກຍັງໄດ້ສ້າງອະນາຄົດໃຫ້ພວກນ້ອງນ້ອຍຫຼາຍຄົນ, ສືບຕໍ່ມູນເຊື້ອ “ເສຍສະຫຼະເພື່ອປະຊາຊົນ” ຂອງທະຫານລຸງໂຮ່.
ໂດຍ: ທູຈາງ