ທ່າແຮງພິເສດ
ປະຈຸບັນ, ໃນເສັ້ນຊານແດນຫວຽດນາມ-ລາວ ພຽງແຕ່ມີເຂດດ່ານສາກົນລາວບ໊າວ (ເມືອງເຮື໊ອງຮ໊ວາ-ແດນສະຫວັນ (ເມືອງເຊໂປນ, ສະຫວັນນະເຂດ, ລາວ) ໄດ້ສ້າງຕັ້ງເຂດເສດຖະກິດທຽບຄູ່ກັນເທົ່ານັ້ນ. ຕາມນັ້ນແລ້ວ, ເຂດເສດຖະກິດພິເສດລາວບ໊າວ ໄດ້ຮັບການສ້າງຕັ້ງໃນປີ 1998, ເຂດການຄ້າຊາຍແດນແດນສະຫວັນ ກໍ່ໄດ້ຮັບການສ້າງຕັ້ງຫຼັງຈາກນັ້ນ 4 ປີ. ວິວັດທະນາການກໍ່ສ້າງ ແລະພັດທະນາ, ໄດ້ປະກອບສ່ວນເຮັດໃຫ້ໂສມໜ້າເຂດສອງຟາກຊາຍແດນປ່ຽນແປງ, ປະກອບສ່ວນສຳຄັນເຂົ້າໃນການພັດທະນາສອງແຂວງກວາງຈິ້ ແລະສະຫວັນນະເຂດ. ເຖິງຢ່າງໃດກໍ່ຕາມ, ຍ້ອນບັນດາເຫດຜົນພາວະວິໄສ ແລະອັດຕະວິໄສ ຄຽງຂ້າງບັນດາໝາກຜົນ, ເປົ້າໝາຍທີ່ບັນລຸໄດ້ນັ້ນຍັງມີຂໍ້ຈຳກັດບາງຢ່າງຢູ່; ບັນດາການເຄື່ອນໄຫວລົງທຶນ, ການຄ້າ, ການບໍລິການຢູ່ເຂດເສດຖະກິດການຄ້າພິເສດລາວບ໊າວ ແລະເຂດການຄ້າຊາຍແດນແດນສະຫວັນ ຍັງບໍ່ທັນບັນລຸໄດ້ຄວາມຄາດຫວັງເທົ່າທີ່ຄວນ. ເພື່ອເສີມຂະຫຍາຍຄວາມສາມາດບົ່ມຊ້ອນຂອງເຂດເສດຖະກິດການຄ້າພິເສດລາວບ໊າວ ແລະເຂດການຄ້າຊາຍແດນແດນສະຫວັນ, ປະກອບສ່ວນຊຸກຍູ້ການພັດທະນາເສດຖະກິດທ້ອງຖິ່ນ, ຍົກສູງປະສິດທິຜົນການຮ່ວມມືມິດຕະພາບຫວຽດນາມ-ລາວ, ແຕ່ປີ 2015 ຈົນຮອດປະຈຸບັນ, ແຂວງ ກວາງຈິ້ ໄດ້ເປັນເຈົ້າການສະເໜີຕໍ່ສູນກາງກ່ຽວກັບທິດທາງຄົ້ນຄວ້າ ສ້າງເຂດເສດຖະກິດການຄ້າຂ້າມຊາຍແດນຮ່ວມລາວບ໊າວ-ແດນສະຫວັນ. ຝ່າຍລາວ ແລະແຂວງສະຫວັນນະເຂດ ກໍ່ປາດຖະໜາຢາກຮ່ວມມືກັບຫວຽດນາມ ໃນການຄົ້ນຄວ້າສ້າງເຂດເສດຖະກິດການຄ້າຂ້າມຊາຍແດນດັ່ງກ່າວ.
|
|
ສິນຄ້າຈາກຫວຽດນາມ ທີ່ຂົນສົ່ງໄປຍັງລາວ ຜ່ານດ່ານຊາຍແດນສາກົນ ລາວບ໊າວ. ພາບ: ບາວຮ່າ |
ການກໍ່ສ້າງ ແລະພັດທະນາເຂດເສດຖະກິດຂ້າມຊາຍແດນຮ່ວມລາວບ໊າວ-ແດນສະຫວັນ ມີຄວາມໝາຍຍຸດທະສາດໃນການຊຸກຍູ້ການເຊື່ອມຕໍ່ເສດຖະກິດຫວຽດນາມ-ລາວ; ປະກອບສ່ວນສຳຄັນເຂົ້າໃນການຊຸກຍູ້ການພົວພັນຮ່ວມມືມິດຕະພາບຫວຽດນາມ-ລາວ ແລະຮັບປະກັນປ້ອງກັນຊາດ, ປ້ອງກັນຄວາມສະຫງົບໃຫ້ທັງສອງປະເທດ. ຄຽງຄູ່ກັນນັ້ນ, ເຂດເສດຖະກິດການຄ້ານີ້ຍັງມີແງ່ຫວັງນຳມາເຊິ່ງປະສິດທິຜົນເສດຖະກິດສູງໃຫ້ທັງສອງປະເທດ. ໃນໄລຍະມໍ່ໆມານີ້, ພັກ, ລັດຖະບານ ກໍ່ໄດ້ເອົາໃຈໃສ່ຊີ້ນຳການຄົ້ນຄວ້າສ້າງເຂດເສດຖະກິດການຄ້າດັ່ງກ່າວ. ວັນທີ 3 ພະຈິກ 2022, ກົມການເມືອງ ມີມະຕິສະບັບເລກທີ 26-NQ/TW ວ່າດ້ວຍການພັດທະນາເສດຖະກິດ-ສັງຄົມ ແລະຮັບປະກັນການປ້ອງກັນຊາດ, ປ້ອງກັນຄວາມສະຫງົບເຂດທິດເໜືອພາກກາງ ແລະເຂດແຄມທະເລພາກກາງ ຈົນຮອດປີ 2030, ວິໄສທັດເຖິງປີ 2045, ໃນນັ້ນລະບຸວ່າ: ຍູ້ແຮງການຮ່ວມມືເສດຖະກິດຜ່ານບັນດາດ່ານຊາຍແດນໃນເຂດຕິດພັນກັບແລວເສດຖະກິດຕາເວັນອອກ-ຕາເວັນຕົກ. ຄົ້ນຄວ້າທົດລອງຮູບແບບເຂດເສດຖະກິດດ່ານຊາຍແດນຜ່ານຊາຍແດນໃນລະບົບ EWEC”. ດ້ວຍແຜນນະໂຍບາຍທີ່ມີຄວາມໝາຍນີ້, ກວາງຈິ້ ໄດ້ຕັ້ງໜ້າສົມທົບກັນກໍ່ສ້າງແຜນຮ່າງ “ເຂດເສດຖະກິດການຄ້າຂ້າມຊາຍແດນຮ່ວມລາວບ໊າວ-ແດນສະຫວັນ”. ເພື່ອຜັນຂະຫຍາຍການປະຕິບັດ, ແຂວງກວາງຈິ້ ໄດ້ສ້າງຕັ້ງໜ່ວຍປະຕິບັດງານ 626 ສົມທົບກັບສອງແຂວງສະຫວັນນະເຂດ ແລະສາລາວັນ (ລາວ) ເພື່ອຄົ້ນຄວ້າບັນດາກົນໄກ, ນະໂຍບາຍຮ່ວມມືເສດຖະກິດສັງຄົມຈຳເພາະຂອງແຂວງກວາງຈິ້ ສົມທົບກັບ 2 ແຂວງສາລາວັນ, ສະຫວັນນະເຂດ (ລາວ), ໃນນັ້ນມີເນື້ອໃນສ້າງແຜນຮ່າງ “ເຂດເສດຖະກິດການຄ້າຂ້າມຊາຍແດນຮ່ວມລາວບ໊າວ-ແດນສະຫວັນ”.
ທ່ານ ຮ່າສີດົ່ງ ຮອງປະທານຜູ້ປະຈຳການຄະນະກຳມະການປະຊາຊົນແຂວງກວາງຈິ້, ຫົວໜ້າໜ່ວຍປະຕິບັດງານ 626 ໃຫ້ຮູ້ວ້າ ໃນປີ 2023 ໄດ້ສໍາເລັດ 3 ກຸ່ມໜ້າທີ່ຫຼັກ, ໃນນັ້ນມີການປັບປຸງແຜນຮ່າງເຂດເສດຖະກິດການຄ້າຂ້າມຊາຍແດນຮ່ວມລາວບ໊າວ-ແດນສະຫວັນ, ຜັນຂະຫຍາຍບົດບັນທຶກຂໍ້ຕົກລົງຂອງ 2 ລັດຖະບານຫວຽດນາມ-ລາວ; ໜູນຊ່ວຍບັນດາແຂວງຂອງລາວ ໃນການປະຕິບັດວຽກງານວາງແຜນຜັງ, ປັບປຸງການວາງແຜນຜັງເຂດເສດຖະກິດການຄ້າພິເສດ ລາວບ໊າວ ແລະເຂດເສດຖະກິດການຄ້າຊາຍແດນແດນສະຫວັນ. ແລະວຽກງານກະກຽມໃຫ້ກອງປະຊຸມສຳມະນາ ທີ່ຈະຈັດຂຶ້ນໃນກາງເດືອນມີນາ 2024 ແມ່ນໄດ້ຣຽບຣ້ອຍແລ້ວ.
ເຊື່ອມຕໍ່ເຂດ
ໄປຫາເຂດຊາຍແດນໃນເດືອນມີນາ ນີ້, ພວກຂ້າພະເຈົ້າຮູ້ສຶກໄດ້ບັນຍາກາດຄຶກຄັກ, ມ່ວນຊື່ນຂອງປະຊາຊົນຢູ່ສອງຟາກຊາຍແດນ. ເອື້ອຍ Peanui (ເມືອງເຊໂປນ, ສະຫວັນນະເຂດ) ເວົ້າວ່າ ເຂດເສດຖະກິດການຄ້າ ຈະສ້າງກາລະໂອກາດກ່ຽວກັບວຽກເຮັດງານທຳຫຼາຍກວ່າ, ຊີວິດການເປັນຢູ່ຂອງປະຊາຊົນຈະມີການປ່ຽນແປງຫຼາຍ. ເອື້ອຍ Peanui ປາດຖະໜາວ່າ ກອງປະຊຸມສຳມະນາ ຈະມາເຖິງຈະປະສົບຜົນສຳເລັດຢ່າງຈົບງາມ, ບັນລຸໄດ້ບັນດາເປົ້າໝາຍທີ່ໄດ້ວາງອອກ.
|
|
ຮ້ານອາຫານການກິນລາວ ຢູ່ຖະໜົນຍ່າງ ຫງວຽນເຫວ້ (ເທດສະບານເມືອງລາວບ໊າວ) ໄດ້ຈັດຕັ້ງໃນໂອກາດຕ້ອນຮັບປີໃໝ່ 2024. ພາບ: ບາວຮ່າ |
ຄາດວ່າຈະມີຜູ້ແທນກວ່າ 200 ຄົນເຂົ້າຮ່ວມກອງປະຊຸມສຳມະນາ ເພື່ອແລກປ່ຽນບັນດາເນື້ອໃນແຜນຮ່າງທົດລອງໃນການສ້າງເຂດເສດຖະກິດການຄ້າຂ້າມຊາຍແດນຮ່ວມລາວບ໊າວ-ແດນສະຫວັນ, ໃນນັ້ນສຸມໃສ່ໂຄສະນາເຜີຍແຜ່, ແນະນຳຄວາມເປັນໄປໄດ້ ແລະກົນໄກ, ນະໂຍບາຍບຸລິມະສິດສ້າງເງື່ອນໄຂສະດວກໃຫ້ວິສາຫະກິດລົງທຶນ, ດຳເນີນທຸລະກິດຢູ່ເຂດເສດຖະກິດການຄ້າຂ້າມຊາຍແດນຮ່ວມ. ພ້ອມທັງແນະນຳຄວາມສາມາດ, ທ່າແຮງ, ກາລະໂອກາດລົງທຶນ ເພື່ອແນໃສ່ດຶງດູດການລົງທຶນເຂົ້າເຂດເສດຖະກິດການຄ້າພິເສດລາວບ໊າວ ແລະເຂດການຄ້າຊາຍແດນແດນສະຫວັນ. ຜ່ານກອງປະຊຸມສຳມະນາ, ສ້າງຊ່ອງທາງພົບປະ, ພົບປະແລກປ່ຽນໂດຍກົງ, ຊຸກຍູ້ການພົວພັນຮ່ວມມືລະຫວ່າງແຂວງກວາງຈິ້ ກັບບັນດາອົງການຈັດຕັ້ງ, ວິສາຫະກິດ, ນັກລົງທຶນພາຍໃນປະເທດ ແລະສາກົນ, ພ້ອມທັງຮັບເອົາຄຳເຫັນຂອງວິສາຫະກິດກ່ຽວກັບກົນໄກ, ນະໂຍບາຍບຸລິມະສິດ ເຊິ່ງຄາດວ່າຈະໝູນໃຊ້ຢູ່ເຂດເສດຖະກິດການຄ້າຂ້າມຊາຍແດນຮ່ວມລາວບາວ-ແດນສະຫວັນ. ທ່ານ ຮ່າສີດົ່ງ ຮອງປະທານຜູ້ປະຈຳການຄະນະກຳມະການປະຊາຊົນແຂວງກວາງຈິ້ ເນັ້ນໜັກວ່າ ກອງປະຊຸມສຳມະນາໄດ້ຈັດຕັ້ງດ້ວຍລະດັບສາກົນ, ເພາະສະນັ້ນ, ຮຽກຮ້ອງໃຫ້ວຽກງານກະກຽມຕ້ອງຮອບຄອບຖີ່ຖ້ວນ, ລະອຽດລະອໍໃນທຸກວຽກງານ, ເນື້ອໃນຕ້ອງໄດ້ກວດກາຄືນ ເພື່ອຮັບປະກັນໃຫ້ກອງປະຊຸມສຳມະນາບັນລຸຄຸນນະພາບດີ.
ເມື່ອເຂດເສດຖະກິດການຄ້າຂ້າມຊາຍແດນປະກົດຜົນເປັນຈິງ, ນີ້ຈະແມ່ນເຂດເສດຖະກິດສ້າງກຳລັງໜູນ, ລະດັບເຕີບໂຕໃໝ່ໃຫ້ແຂວງກວາງຈິ້, ແຂວງສະຫວັນນະເຂດເວົ້າສະເພາະ, ເສັ້ນຊາຍແດນຫວຽດນາມ - ລາວ ເວົ້າລວມ. ໝັ້ນໝາຍວ່າ ນີ້ຈະແມ່ນບ່ອນປະກອບອັດຕາສ່ວນໃຫຍ່ກ່ຽວກັບຄຸນຄ່າຜະລິດຕະພັນໃຫ້ເສດຖະກິດສອງແຂວງ, ບ່ອນຜັນຂະຫຍາຍບາງຮູບແບບ, ໂຄງການຜະລິດໃໝ່. ພ້ອມນັ້ນ, ນີ້ກໍ່ແມ່ນເຂດຈຸດສຸມທີ່ໝູນໃຊ້ວິທະຍາສາດເຕັກໂນໂລຢີເຂົ້າໃນການຜະລິດ, ດຳເນີນທຸລະກິດ, ກໍ່ສ້າງອາຊີບ, ສ້າງວຽກເຮັດງານທຳ, ຍົກສູງລາຍຮັບໃຫ້ຄົນງານທ້ອງຖິ່ນ ແລະເຂດອ້ອມຂ້າງ.
ໂດຍ: ແສງເດືອນ