ການນໍານະຄອນໂຮ່ຈີມິນ ອວຍພອນວັນຊາດແຫ່ງ ສປປ ລາວ
ກປ.ອອນໄລ - ວັນທີ 28 ພະຈິກ, ຄະນະຜູ້ແທນຄະນະພັກນະຄອນ, ສະພາປະຊາຊົນ, ຄະນະກໍາມະການປະຊາຊົນ, ຄະນະກໍາມະການແນວໂຮມປະເທດຊາດຫວຽດນາມ ນະຄອນໂຮ່ຈີມິນ ນໍາໂດຍ ທ່ານ ຫງວຽນໂຮ່ຫາຍ ຮອງເລຂາຜູ້ປະຈໍາການພັກນະຄອນໂຮ່ຈີມິນ ໄດ້ໄປອວຍພອນພະນັກງານ, ພາລະກອນສະຖານກົງສູນໃຫຍ່ລາວ ປະຈໍາ ນະຄອນໂຮ່ຈີມິນ ເນື່ອງໃນໂອກາດວັນຊາດແຫ່ງ ສປປ ລາວ ຄົບຮອບ 49 ປີ (2-12-1975 / 2-12-2024).
ຕາງໜ້າການນໍາ ແລະປະຊາຊົນນະຄອນ, ທ່ານ ຫງວຽນໂຮ່ຫາຍ ສະແດງຄວາມຊົມເຊີຍ ແລະອວຍພອນຜົນງານອັນໃຫຍ່ຫຼວງທາງດ້ານເສດຖະກິດ-ສັງຄົມ ເຊິ່ງປະຊາຊົນລາວ ໂດຍພາຍໃຕ້ການນໍາພາຂອງພັກປະຊາຊົນປະຕິວັດລາວ ຍາດມາໄດ້ໃນໄລຍະຜ່ານມາ; ສະແດງອາລົມຈິດສະໜິດຕິດພັນ, ຄວາມສາມັກຄີຂອງພະນັກງານ, ປະຊາຊົນນະຄອນໂຮ່ຈີມິນ ທີ່ມີຕໍ່ປະຊາຊົນລາວ ແລະປາດຖະໜາຢາກສືບຕໍ່ເພີ່ມທະວີບັນດາການເຄື່ອນໄຫວຮ່ວມມືເພື່ອໃຫ້ການພົວພັນຫວຽດນາມ ແລະລາວ ນັບມື້ມັບພັດທະນາຢ່າງເລິກເຊິ່ງ.
    |
 |
|
ການນໍານະຄອນໂຮ່ຈີມິນ ອວຍພອນວັນຊາດ ແຫ່ງ ສປປ ລາວ. ພາບ: ຊວນຢຸຍ |
ທ່ານ ຫງວຽນໂຮ່ຫາຍ ຖືວ່າ, ໃນໄລຍະຜ່ານມາ, ນະຄອນໂຮ່ຈີມິນ ແລະບັນດາທ້ອງຖິ່ນ, ຄູ່ຮ່ວມມືລາວ ໄດ້ມີການເຄື່ອນໄຫວມິດຕະພາບທີ່ເປັນມູນເຊື້ອ, ນຳມາເຊິ່ງບັນດາຜົນງານອັນດີງາມ. ເສີມຂະຫຍາຍໝາກຜົນນັ້ນ, ໃນໄລຍະຈະມາເຖິງສອງຝ່າຍຕ້ອງຄົ້ນຄວ້າຜັນຂະຫຍາຍຫຼາຍລາຍການເຄື່ອນໄຫວໃໝ່ອີງຕາມທ່າແຮງຂອງແຕ່ລະຝ່າຍ ເພື່ອເພີ່ມທະວີການພົບປະແລກປ່ຽນ, ຮ່ວມມືນໍາການພົວພັນລະຫວ່າງສອງຝ່າຍເຂົ້າສູ່ລວງເລິກ, ມີປະສິດທິຜົນກວ່າອີກ.
ທ່ານ ຫງວຽນໂຮ່ຫາຍ ຢັ້ງຢືນວ່າ, ນະຄອນໂຮ່ຈີມິນ ຍາມໃດກໍ່ມານະພະຍາຍາມຈົນສຸດຄວາມສາມາດຂອງຕົນເພື່ອສືບຕໍ່ເພີ່ມທະວີການພົວພັນມິດຕະພາບຮ່ວມມືຫຼາຍດ້ານລະຫວ່າງນະຄອນໂຮ່ຈີມິນ ແລະບັນດາທ້ອງຖິ່ນຂອງລາວ ເພື່ອສືບຕໍ່, ຮັກສາ ແລະພັດທະນາການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງຫວຽດນາມ ແລະລາວ “ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ”.
ທ່ານ ອຳໄພ ສຸວັນນະແສງ ຮອງຫົວໜ້າສະຖານກົງສູນໃຫຍ່ລາວ ປະຈໍານະຄອນໂຮ່ຈີມິນ ສະແດງຄວາມຂອບໃຈຢ່າງຈິງໃຈຕໍ່ຄວາມເອົາໃຈໃສ່, ໜູນຊ່ວຍຢ່າງສຸດອົກສຸດໃຈຂອງລັດຖະບານ, ປະຊາຊົນຫວຽດນາມ ທີ່ມີຕໍ່ລັດຖະບານ, ປະຊາຊົນລາວ ໃນພາລະກິດສ້າງສາ ແລະພັດທະນາປະເທດ; ຂອບໃຈອາລົມຈິດ ແລະການຊ່ວຍເຫຼືອຢ່າງສຸດຈິດສຸດໃຈ, ມີປະສິດທິຜົນຂອງນະຄອນໂຮ່ຈີມິນ ທີ່ມີຕໍ່ບັນດາທ້ອງຖິ່ນຂອງລາວ ກໍ່ຄືຄວາມເອົາໃຈໃສ່, ສ້າງເງື່ອນໄຂດີທີ່ສຸດໃຫ້ປະຊາຄົມລາວ, ໂດຍສະເພາະແມ່ນນັກຮຽນ, ນັກສຶກສາລາວ ທີ່ພວມດໍາລົງຊີວິດ, ຮໍ່າຮຽນຢູ່ນະຄອນ.
ທ່ານ ອຳໄພ ສຸວັນນະແສງ ສະແດງຄວາມປາດຖະໜາວ່າ ປະຊາຊົນລາວ ແລະຫວຽດນາມ ລຸ້ນປະຈຸບັນ, ໂດຍສະເພາະແມ່່ນລຸ້ນໜຸ່ມ ຈະມານະພະຍາຍາມຫຼາຍກວ່າອີກເພື່ອພ້ອມກັນຮ່ວມມືເພີ່ມພູນຄູນສ້າງຄວາມສາມັກຄີອັນຍິ່ງໃຫຍ່ລະຫວ່າງສອງປະເທດ ລາວ ແລະຫວຽດນາມ ກໍ່ຄືລະຫວ່າງບັນດາທ້ອງຖິ່ນຂອງລາວ ກັບນະຄອນໂຮ່ຈີມິນ; ພ້ອມທັງ, ປາດຖະໜາຢາກສືບຕໍ່ໄດ້ຮັບຄວາມເອົາໃຈໃສ່, ການໜູນຊ່ວຍຂອງນະຄອນ ໃນການຈັດຕັ້ງບັນດາການເຄື່ອນໄຫວຮ່ວມມືດ້ານເສດຖະກິດ, ວັດທະນະທໍາຂອງລາວ ທີ່ຈັດຕັ້ງຢູ່ບໍລິເວນນະຄອນໃນປີ 2025, ກ່ອນອື່ນໝົດແມ່ນງານບຸນວັດທະນະທໍາ-ການທ່ອງທ່ຽວລາວ ຢູ່ນະຄອນໂຮ່ຈີມິນ.
ໂດຍ: ໄຊນີດາ