ສືບຕໍ່ຢືນຢັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດລະຫວ່າງສອງປະເທດຫວຽດນາມ - ລາວ

ທ່ານພົນໂທ ຝຸ່ງຊີ້ເຕິນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຕາງໜ້າໃຫ້ຄະນະປະທານ, ກ່າວຄໍາເຫັນຊີ້ນໍາກອງປະຊຸມສໍາມະນາ. ພາບ: qdnd.vn

ນີ້ແມ່ນກອງປະຊຸມສໍາມະນາຂັ້ນກະຊວງປ້ອງກັນປະເທດ ເຊິ່ງໄດ້ຈັດຕັ້ງເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນມູນເຊື້ອທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ ຊ່ວຍເຫຼືອການປະຕິວັດລາວ (30-10-1949 / 30-10-2024), ມຸ່ງໄປເຖິງເຫດການສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນທົ່ວປວງຊົນປ້ອງກັນຊາດ.

ສະເໜີຄຳແນະນຳທີ່ກອງປະຊຸມສຳມະນາ, ທ່ານພົນຕີ ເຈືອງທຽນໂຕ, ຮອງຫົວໜ້າກົມໃຫຍ່ການເມືອງ ກອງທັບປະຊາຊົນຫວຽດນາມ ໄດ້ຢືນຢັນວ່າ: 75 ປີກ່ອນນີ້, ວັນທີ 30 ຕຸລາ 1949, ໂດຍຕອບສະໜອງຄວາມຮຽກຮ້ອງຕ້ອງການຄວາມສາມັກຄີ, ການຮ່ວມມືລະຫວ່າງການປະຕິວັດຫວຽດນາມ ກັບການປະຕິວັດລາວ, ຄະນະປະຈຳສູນກາງພັກກອມມູນິດອິນດູຈີນ ໄດ້ຕົກລົງສົ່ງກຳລັງທະຫານຫວຽດນາມ ໄປເຂົ້າຮ່ວມການສູ້ຮົບ ແລະວຽກງານຊ່ວຍເຫຼືອລາວ, ໄດ້ຈັດຕັ້ງຢ່າງເປັນລະບົບຕ່າງຫາກ ແລະໃສ່ຊື່ວ່າ “ທະຫານອາສາສະໝັກ”.

ທ່ານນາງ ຄຳເພົາ ເອີນທະວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຫວຽດນາມ, ກ່າວຄຳເຫັນທີ່ກອງປະຊຸມສໍາມະນາ. ພາບ: qdnd.vn

ນີ້ແມ່ນຂີດໝາຍປະຫວັດສາດທີ່ມີຄວາມໝາຍສຳຄັນທີ່ສຸດໃນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ - ລາວ, ລາວ - ຫວຽດນາມ, ເປັນຂີດໝາຍແຫ່ງການເຕີບໃຫຍ່ຂອງກອງທັບປະຊາຊົນຫວຽດນາມ ໃນການປະຕິບັດໜ້າທີ່ສາກົນອັນສູງສົ່ງ; ພ້ອມກັນນັ້ນ ກໍຢືນຢັນແນວທາງຍຸດທະສາດອັນຖືກຕ້ອງຂອງພັກກອມມູນິດຫວຽດນາມ ໃນການປະຕິບັດໜ້າທີ່ສາກົນໃນການຊ່ວຍເຫຼືອການປະຕິວັດລາວ.

ຕາມບົດລາຍງານຂອງຄະນະຈັດຕັ້ງ, ກອງປະຊຸມສໍາມະນາໄດ້ຮັບບົດລາຍງານ, ບົດປະກອບຄຳເຫັນຫຼາຍກວ່າ 80 ບົດ; ບົດລາຍງານ, ບົດປະກອບຄຳເຫັນແຕ່ລະບົດແມ່ນກິດຈະກຳຄົ້ນຄວ້າວິທະຍາສາດເອກະລາດທີ່ມີຄຸນຄ່າທາງປະຫວັດສາດ ແລະວິທະຍາສາດ.

ບັນຍາກາດທີ່ກອງປະຊຸມສໍາມະນາ. ພາບ: qdnd.vn

ທີ່ກອງປະຊຸມສໍາມະນາ, ບັນດາຄຳເຫັນໄດ້ສຸມໃສ່ຢືນຢັນຄວາມຖືກຕ້ອງ ແລະມີຫົວຄິດປະດິດສ້າງໃນທັດສະນະ, ແນວທາງສາກົນກຳມາຊີບຂອງສູນກາງພັກ ແລະປະທານ ໂຮ່ຈີມິນ ກ່ຽວກັບການຊ່ວຍເຫຼືອການປະຕິວັດລາວ; ສືບຕໍ່ຢືນຢັນວິໄສທັດຍຸດທະສາດຂອງພັກໃນການສ້າງຕັ້ງທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ; ຢືນຢັນ ແລະເຮັດໃຫ້ເລິກເຊິ່ງຕື່ມອີກກ່ຽວກັບບົດບາດຂອງກຳລັງຫຼັກແຫຼ່ງຂອງທະຫານອາສາສະໝັກ ແລະນັກຊ່ຽວຊານທະຫານຫວຽດນາມ ສາມັກຄີກັບກອງທັບ ແລະປະຊາຊົນລາວ ສູ້ຮົບ, ສ້າງວິລະກຳທີ່ດີເລີດ, ປະກອບສ່ວນຢ່າງໃຫຍ່ຫຼວງເຂົ້າໃນໄຊຊະນະຂອງການປະຕິວັດລາວ ກໍ່ຄືໃນການປະກອບສ່ວນກໍ່ສ້າງ ແລະພັດທະນາການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ - ລາວ, ລາວ - ຫວຽດນາມ.

ໂດຍ: ຈາງຫງວຽນ