ປິດຊຸດຝຶກອົບຮົມວຽກງານປະຫວັດສາດການທະຫານໃຫ້ແກ່ກອງທັບປະຊາຊົນລາວ

ທ່ານພົນຈັດຕະວາ ຫງວຽນຮວ່າງຍຽນ ກ່າວຄໍາເຫັນປິດຊຸດຝຶກອົບຮົມ. ພາບ: ເຈິ່ນຮວ່ຽນ

ກ່າວຄໍາເຫັນທີ່ພິທີປິດ, ທ່ານພົນຈັດຕະວາ ຫງວຽນຮວ່າງຍຽນ, ຫົວໜ້າສະຖາບັນປະຫວັດສາດການທະຫານ ເນັ້ນໜັກວ່າ ໃນເວລາດໍາເນີນຊຸດຝຶກອົບຮົມ, ບັນດາພະນັກງານກອງທັບປະຊາຊົນລາວ ໄດ້ປະກອບຄວາມຮູ້ໂດຍພື້ນຖານກ່ຽວກັບວິທີການຄົ້ນຄວ້າປະຫວັດສາດການທະຫານ ພ້ອມດ້ວຍບາງບົດຮຽນຕົວຈິງອັນລໍ້າຄ່າກ່ຽວກັບວຽກງານຄົ້ນຄວ້າ ແລະຄຸ້ມຄອງວິທະຍາສາດປະຫວັດສາດການທະຫານຂອງກອງທັບປະຊາຊົນຫວຽດນາມ.

ບັນຍາກາດທີ່ພິທີປິດ. ພາບ: ເຈິ່ນຮວ່ຽນ

ທ່ານພົນຈັດຕະວາ ຫງວຽນຮວ່າງຍຽນ ຕີລາຄາວ່າເຖິງວ່າເວລາຝຶກອົບຮົມບໍ່ຫຼາຍ, ຄວາມຮູ້ທີ່ໄດ້ແນະນໍາໃນແຕ່ລະຫົວເລື່ອງສະເພາະແມ່ນຫຼາຍພໍສົມຄວນແຕ່ດ້ວຍຈິດໃຈຮໍ່າຮຽນທີ່ຈູບຈ້າວຫ້າວຫັນຂອງພະນັກງານກອງທັບປະຊາຊົນລາວ, ຄວາມສຸດໃຈຂອງຖັນແຖວຄູອາຈານພ້ອມກັບວິທີສິດສອນທີ່ທັນສະໄໝ, ຕັ້ງໜ້າ, ຊຸດຝຶກອົບຮົມໄດ້ປະຕິບັດສໍາເລັດໜ້າທີ່ວາງອອກຢ່າງດີເລີດ. ທ່ານພົນຈັດຕະວາ ຫງວຽນຮວ່າງຍຽນ ສະແດງຄວາມຫວັງວ່າ ເມື່ອກັບຄືນປະເທດ, ບັນດາພະນັກງານກອງທັບປະຊາຊົນລາວ ຈະໝູນໃຊ້ຄວາມຮູ້ທີ່ໄດ້ປະກອບຢ່າງມີຫົວຄິດປະດິດສ້າງ, ສອດຄ່ອງກັບພຶດຕິກໍາຕົວຈິງຂອງວຽກງານ, ຜ່ານນັ້ນປະກອບສ່ວນເຂົ້າໃນການກໍ່ສ້າງກອງທັບປະຊາຊົນລາວ ໃຫ້ນັບມື້ນັບໝັ້ນຄົງເຂັ້ມແຂງ, ກໍ່ຄືປະກອບສ່ວນຊຸກຍູ້ການພົວພັນສາມັກຄີແບບພິເສດລະຫວ່າງກອງທັບປະຊາຊົນລາວ ແລະກອງທັບປະຊາຊົນຫວຽດນາມ.

ທ່ານພັນຕີ ລານໄຊ ປະຫວັດໄຊ ຫົວໜ້າຄະນະພະນັກງານ ຂອງກອງທັບປະຊາຊົນລາວ ກ່າວຄໍາເຫັນທີ່ພິທີປິດ. ພາບ: ເຈິ່ນຮວ່ຽນ

ກ່າວຄໍາເຫັນທີ່ພິທີປິດ, ທ່ານພັນຕີ ລານໄຊ ປະຫວັດໄຊ, ຫົວໜ້າຄະນະພະນັກງານຂອງກອງທັບປະຊາຊົນລາວ ໄດ້ສະແດງຄວາມຂອບໃຈຕໍ່ການແນະນໍາ, ສິດສອນຢ່າງສຸດໃຈຂອງຄູອາຈານ, ພະນັກງານ, ພາລະກອນ ສະຖາບັນປະຫວັດສາດການທະຫານ, ກອງ 871 ແລະບັນດາອົງການທີ່ກ່ຽວຂ້ອງຂອງກະຊວງປ້ອງກັນປະເທດຫວຽດນາມ ທີ່ໄດ້ສ້າງເງື່ອນໄຂດີທີ່ສຸດເພື່ອໃຫ້ຄະນະພະນັກງານກອງທັບປະຊາຊົນລາວ ປະຕິບັດສໍາເລັດຕາມເນື້ອໃນ, ລາຍການຝຶກອົບຮົມ. ພ້ອມທັງເນັ້ນໜັກວ່າ ໝາກຜົນຂອງຊຸດຝຶກອົບຮົມແມ່ນໜຶ່ງໃນບັນດາການເຄື່ອນໄຫວສໍາຄັນປະກອບສ່ວນກໍ່ສ້າງ ແລະພັດທະນາຂະແໜງປະຫວັດສາດການທະຫານ ຂອງກອງທັບປະຊາຊົນລາວ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃນໄລຍະໃໝ່.

ໂດຍ: ໄຊນີດາ