ສືບຕໍ່ເພີ່ມພູນຄູນສ້າງສາຍພົວພັນສາມັກຄີແບບພິເສດຫວຽດນາມ - ລາວ

ທີ່ການຕ້ອນຮັບ, ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ໄດ້ສະແດງຄວາມຊົມເຊີຍທີ່ທ່ານ ຫງວຽນມິງເຕິມ ໄດ້ຮັບຄວາມໄວ້ເນື້ອເຊື່ອໃຈຈາກພັກ ແລະລັດຫວຽດນາມ ແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ, ສະແດງໃຫ້ເຫັນການຖືເປັນສຳຄັນຂອງພັກ ແລະລັດຫວຽດນາມ ສໍາລັບສາຍພົວພັນແບບພິເສດລະຫວ່າງຫວຽດນາມ ແລະລາວ.

ທ່ານ ຫງວຽນມິງເຕິມ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ ຍື່ນສານຕາຕັ້ງຕໍ່ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ. ພາບ: ສໍານັກຂ່າວສານຫວຽດນາມ

ທ່ານ ທອງລຸນ ສີສຸລິດ ໄດ້ຕີລາຄາສູງວ່າ ທ່ານ ຫງວຽນມິງເຕິມ ເປັນພະນັກງານທີ່ມີຄວາມຮູ້ກ່ຽວກັບປະເທດລາວ, ເປັນຜູ້ຮັບຜິດຊອບໂດຍກົງກ່ຽວກັບສາຍພົວພັນຫວຽດນາມ-ລາວ ມາເປັນເວລາຫຼາຍປີ, ສະນັ້ນຈຶ່ງມີຄວາມສະດວກໃນການປະຕິບັດງານຂອງຕົນ; ສະແດງຄວາມເຊື່ອໝັ້ນວ່າ ດ້ວຍຄວາມສາມາດ ແລະປະສົບການຂອງຕົນ, ທ່ານ ຫງວຽນມິງເຕິມ ຈະປະຕິບັດສຳເລັດໜ້າທີ່ທີ່ໄດ້ຮັບມອບໝາຍເປັນຢ່າງດີ.

ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ຕ້ອນຮັບທ່ານ ຫງວຽນມິງເຕິມ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ. ພາບ: ສໍານັກຂ່າວສານຫວຽດນາມ

ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ສະແດງຄວາມເຊື່ອໝັ້ນວ່າ ໃນອາຍຸການປະຕິບັດງານຂອງຕົນ, ທ່ານ ຫງວຽນມິງເຕິມ ຈະສືບຕໍ່ປະຕິບັດວຽກງານເປັນເສນາທິການໃຫ້ແກ່ການນຳຂັ້ນສູງຂອງສອງພັກ, ສອງລັດ ໃນການພົວພັນລະຫວ່າງຫວຽດນາມ-ລາວ ໃຫ້ເປັນຢ່າງດີ, ປະກອບສ່ວນເຮັດໃຫ້ສາຍພົວພັນແບບພິເສດ, ຫາຍາກລະຫວ່າງຫວຽດນາມ-ລາວ ນັບມື້ນັບພັດທະນາ ແລະເກີດດອກອອກຜົນຢ່າງບໍ່ຢຸດຢັ້ງ, ໝັ້ນຄົງຂະໜົງແກ່ນໄປຊົ່ວກາລະນານ.

ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ  ແລະທ່ານ ຫງວຽນມິງເຕິມ ພ້ອມດ້ວຍຜູ້ແທນຖ່າຍຮູບເປັນທີ່ລະນຶກ. ພາບ: ສໍານັກຂ່າວສານຫວຽດນາມ

ໃນຖານະເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ, ທ່ານ ຫງວຽນມິງເຕິມ ໃຫ້ຮູ້ວ່າ ຈະພ້ອມກັບສະຖານທູດ ແລະອົງການຄຽງຂ້າງສະຖານທູດຫວຽດນາມ ປະຈຳ ລາວ ມານະພະຍາມຈົນສຸດຄວາມສາມາດຂອງຕົນ, ປະຕິບັດວຽກງານເປັນເສນາທິການໃຫ້ແກ່ການນຳພັກ ແລະລັດຫວຽດນາມ ໃນການພົວພັນກັບລາວ; ເປັນຂົວຕໍ່, ປະສານງານ, ຊ່ວຍເຫຼືອບັນດາກະຊວງ, ຂະແໜງການ, ທ້ອງຖິ່ນຍົກສູງປະສິດທິຜົນການຮ່ວມມືກັບບັນດາຄູ່ຮ່ວມມືຂອງລາວ. ສະຖານທູດຫວຽດນາມ ປະຈຳ ລາວ ຈະສືບຕໍ່ສົມທົບກັນຢ່າງແໜ້ນແຟ້ນກັບຝ່າຍລາວ ເພື່ອແນໃສ່ຊຸກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງປະເທດໃຫ້ນັບມື້ນັບພັດທະນາເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດ.

ໂດຍ: ທູຈາງ