ດ່ານັ້ງ ແລະຈໍາປາສັກ ເພີ່ມທະວີການຮ່ວມມືໃນຂົງເຂດຕ່າງໆ

ທ່ານ ເລຈຸງຈິງ ປະທານຄະນະກໍາມະການປະຊາຊົນນະຄອນດ່ານັ້ງ ຕ້ອນຮັບທ່ານ ອາລຸນໄຊ ສູນນະລາດ ເລຂາພັກແຂວງ, ເຈົ້າແຂວງໆຈໍາປາສັກ. ພາບ: ສໍານັກຂ່າວສານຫວຽດນາມ.

ທີ່ການຕ້ອນຮັບ, ທ່ານ ເລຈຸງຈິງ ປະທານຄະນະກໍາມະການປະຊາຊົນນະຄອນດ່ານັ້ງ ໃຫ້ຮູ້ວ່າ ບົນພື້ນຖານການພົວພັນພິເສດ ຫວຽດນາມ-ລາວ, ນະຄອນດ່ານັ້ງ ຍາມໃດກໍເອົາໃຈໃສ່, ຍູ້ແຮງການຮ່ວມມືກັບບັນດາທ້ອງຖິ່ນຂອງລາວ, ໃນນັ້ນມີແຂວງຈໍາປາສັກ.

ທ່ານ ອາລຸນໄຊ ສູນນະລາດ ເລຂາພັກແຂວງ, ເຈົ້າແຂວງໆຈໍາປາສັກ ທີ່ການເຮັດວຽກກັບການນໍານະຄອນດ່ານັ້ງ. ພາບ: ສໍານັກຂ່າວສານຫວຽດນາມ.

ທ່ານ ເລຈຸງຈິງ ແບ່ງປັນກ່ຽວກັບສະພາບການພັດທະນາເສດຖະກິດ-ສັງຄົມຂອງດ່ານັ້ງ ແລະທິດທາງ, ເປົ້າໝາຍຂອງນະຄອນໃນຕໍ່ໜ້າ. ໃນປີ 2024, ນະຄອນຈະສືບຕໍ່ມອບທຶນການສຶກສາໃຫ້ແກ່ພະນັກງານ, ນັກຮຽນຂອງແຂວງຈໍາປາສັກ ມາຮຽນຢູ່ມະຫາວິທະຍາໄລດ່ານັ້ງ; ສົ່ງຄູອາຈານໄປສອນພາສາຫວຽດ ຢູ່ສູນພາສາຫວຽດ ທີ່ແຂວງຈໍາປາສັກ ໃນສົກຮຽນ 2024-2025; ຜັນຂະຫຍາຍໂຄງການສູນພາສາຫວຽດ (ຫຼັງໃໝ່). ພ້ອມກັນນັ້ນ, ນະຄອນ ຍັງໄດ້ຈັດຕັ້ງບັນດາລາຍການແນະນໍາ, ເຊື່ອມຕໍ່, ສົ່ງເສີມການເຄື່ອນໄຫວລົງທຶນ, ການຄ້າ, ການທ່ອງທ່ຽວ ແລະສົ່ງອອກຂອງວິສາຫະກິດດ່ານັ້ງ ໄປຍັງບັນດາແຂວງພາກໃຕ້, ພາກກາງຂອງລາວ, ໃນນັ້ນມີແຂວງຈໍາປາສັກ.

ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ.

ສ່ວນທ່ານ ອາລຸນໄຊ ສູນນະລາດ ສະແດງຄວາມປິຕິຊົມຊື່ນເມື່ອເຫັນວ່າ ນະຄອນດ່ານັ້ງ ນັບມື້ນັບພັດທະນາຢ່າງແຂງແຮງ; ພ້ອມທັງໃຫ້ຮູ້ວ່າ ແຂວງຈໍາປາສັກ ມີທ່າແຮງດ້ານກະສິກໍາ, ການທ່ອງທ່ຽວ, ໂລຈິດສະຕິກ, ພະລັງງານສະອາດ. ຈໍາປາສັກ ພວມພະຍາຍາມແກ້ໄຂຄວາມຫຍຸ້ງຍາກ ແລະໜູນຊ່ວຍບັນດານັກລົງທຶນ ເພື່ອດຶງດູດວິສາຫະກິດມາຊອກຮູ້, ລົງທຶນດໍາເນີນທຸລະກິດຢູ່ທ້ອງຖິ່ນ. ທ່ານ ອາລຸນໄຊ ສູນນະລາດ ຫວັງວ່າ ນະຄອນດ່ານັ້ງ ຈະສືບຕໍ່ໜູນຊ່ວຍແຂວງຈໍາປາສັກ ໃນການບຳລຸງສ້າງພະນັກງານ, ເຮັດທຸລະກິດການທ່ອງທ່ຽວ, ໂລຈິດສະຕິກ; ໜູນຊ່ວຍກໍ່ສ້າງສູນວິຊາຊີບ, ສອນພາສາຫວຽດ ແລະຮຽກຮ້ອງໃຫ້ນັກລົງທຶນດ່ານັ້ງ ມາຊອກຮູ້ ແລະລົງທຶນ, ດໍາເນີນທຸລະກິດຢູ່ແຂວງຈໍາປາສັກ. ທ່ານເລຂາພັກແຂວງ, ເຈົ້າແຂວງໆ ຈໍາປາສັກ ສະແດງຄວາມຫວັງວ່າ ຈະມີເສັ້ນທາງການບິນທີ່ເຊື່ອມຕໍ່ສອງທ້ອງຖິ່ນໂດຍໄວເພື່ອປະກອບສ່ວນຍູ້ແຮງບັນດາການເຄື່ອນໄຫວແລກປ່ຽນຄະນະ ແລະເພີ່ມທະວີການຮ່ວມມືມິດຕະພາບລະຫວ່າງສອງປະເທດ.

ໂດຍ: ໄຊຊະນະ