ຫວຽດນາມ ແລະລາວ ເພີ່ມທະວີການຮ່ວມມືດ້ານວິທະຍາສາດ, ເຕັກໂນໂລຢີ ແລະປ່ຽນແປງໃໝ່ປະດິດສ້າງ

ທີ່ການຕ້ອນຮັບ, ທ່ານ ຮວິ່ງແທ່ງດາດ ໄດ້ແຈ້ງໃຫ້ຊາບຜົນຂອງການເຮັດວຽກລະຫວ່າງກະຊວງວິທະຍາສາດ ແລະເຕັກໂນໂລຢີຫວຽດນາມ ກັບບັນດາກະຊວງທີ່ກ່ຽວຂ້ອງຂອງຝ່າຍລາວ, ທ່ານ ຮວິ່ງແທ່ງດາດ ໄດ້ເນັ້ນໜັກເຖິງການພົວພັນຮ່ວມມືລະຫວ່າງສອງປະເທດ ໃນຂົງເຂດວິທະຍາສາດ ແລະເຕັກໂນໂລຢີ ພວມພັດທະນາຢ່າງບໍ່ຢຸດຢັ້ງທັງດ້ານຂະໜາດ ແລະລວງກວ້າງ, ດ້ວຍຮູບແບບທີ່ຫຼາກຫຼາຍ, ເຂົ້າສູ່ເນື້ອແທ້ ແລະຕອບສະໜອງຄວາມຮຽກຮ້ອງຕ້ອງການພັດທະນາ ເສດຖະກິດ - ສັງຄົມ ຂອງແຕ່ລະປະເທດໃຫ້ດີຂຶ້ນກວ່າເກົ່າ.

ທ່ານ ຮວິ່ງແທ່ງດາດ ລັດຖະມົນຕີກະຊວງວິທະຍາສາດ ແລະເຕັກໂນໂລຢີ ເຂົ້າຢ້ຽມຂໍ່ານັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: nhandan.vn

ທ່ານ ຮວິ່ງແທ່ງດາດ ກໍ່ສະເໜີທ່ານນາຍົກລັດຖະມົນຕີລາວ ສືບຕໍ່ເອົາໃຈໃສ່, ສ້າງເງື່ອນໄຂສະໜັບສະໜູນການເຄື່ອນໄຫວຮ່ວມມືໃນຂົງເຂດວິທະຍາສາດ, ເຕັກໂນໂລຢີ ແລະປ່ຽນແປງໃໝ່ປະດິດຄິດສ້າງລະຫວ່າງສອງປະເທດໃນໄລຍະຈະມາເຖິງ ເພື່ອປະກອບສ່ວນແທດຈິງ ແລະມີປະສິດທິຜົນກວ່າ ໃຫ້ເປົ້າໝາຍພັດທະນາ ເສດຖະກິດ - ສັງຄົມ ແບບຍືນຍົງຂອງທັງສອງປະເທດ; ສະໜັບສະໜູນບັນດາກະຊວງ ຄື: ເຕັກໂນໂລຢີ, ຖະແຫຼງຂ່າວ, ສຶກສາທິການ ແລະກິລາ, ອຸດສາຫະກຳ ແລະການຄ້າຂອງລາວ ຜັນຂະຫຍາຍບັນດາໂຄງການຮ່ວມມືກັບກະຊວງວິທະຍາສາດ ແລະເຕັກໂນໂລຢີຫວຽດນາມ.

ບັນຍາກາດທີ່ການຕ້ອນຮັບ. ພາບ: nhandan.vn

ສ່ວນທ່ານນາຍົກລັດຖະມົນຕີລາວ ສອນໄຊ ສີພັນດອນ ສະເໜີວ່າ ໃນໄລຍະຈະມາເຖິງ, ກະຊວງວິທະຍາສາດ ແລະເຕັກໂນໂລຢີຫວຽດນາມ ພ້ອມກັບບັນດາກະຊວງ, ຂະແໜງການທີ່ກ່ຽວຂ້ອງຂອງລາວ ສືບຕໍ່ເພີ່ມທະວີການຮ່ວມມືໂດຍຜ່ານການເຄື່ອນໄຫວຄື: ແລກປ່ຽນຄະນະຜູ້ແທນ, ແລກປ່ຽນບົດຮຽນ, ບຳລຸງສ້າງແຫຼ່ງຊັບພະຍາກອນມະນຸດ...; ພ້ອມກັນນັ້ນກໍຕັ້ງໜ້າຜັນຂະຫຍາຍ, ຈັດຕັ້ງປະຕິບັດບັນດາເນື້ອໃນຂໍ້ຕົກລົງທີ່ການນຳຂັ້ນສູງຂອງສອງປະເທດໄດ້ເຫັນດີເປັນເອກະສັນນໍາກັນ ກໍ່ຄືໝາກຜົນຂອງກອງປະຊຸມຄະນະກຳມະການລະຫວ່າງລັດຖະບານ ຄັ້ງທີ 46 ກ່ຽວກັບການຮ່ວມມືສອງຝ່າຍ ລາວ-ຫວຽດນາມ, ຫວຽດນາມ-ລາວ ໃຫ້ບັນລຸປະສິດທິຜົນ ແລະປະສົບຜົນສໍາເລັດກວ່າເກົ່າ.

ໂດຍ: ທູຈາງ