ການພົບປະແລກປ່ຽນບົດຮຽນໃນຄັ້ງນີ້ ທ່ານ ລໍ່ມີງຮູ່ງ ໄດ້ຕີລາຄາສູງຕໍ່ຄະນະຜູ້ແທນສູນກາງແນວລາວສ້າງຊາດ ແລະຜູ້ແທນແຂວງຫົວພັນ ທີ່ມາຢ້ຽມຢາມ ແລະເຮັດວຽກຢູ່ແຂວງເຊີນລາ ເພື່ອເປັນການເພີ່ມທະວີການຮ່ວມມື, ແລກປ່ຽນບົດຮຽນດ້ານວິຊາການ, ການສະໜັບສະໜູນເຊິ່ງກັນ ແລະ ກັນ ໃນຂົງເຂດວຽກງານຕ່າງໆທີ່ມີການພົວພັນ ແລະຮ່ວມມືກັນໃຫ້ເປັນຮູບປະທໍາ. ພ້ອມກັນນັ້ນ, ສອງຝ່າຍຈະສືບຕໍ່ປະສານສົມທົບກັນ ໃນການຊ່ວຍເຫຼືອຊຶ່ງກັນ ແລະກັນ ເປັນຕົ້ນການຮ່ວມມືທາງດ້ານເສດຖະກິດ, ຄວາມຮູ້-ບົດຮຽນຕ່າງໆທີ່ສໍາຄັນ ແລະໜ້າສົນໃຈລະຫວ່າງແຂວງຫົວພັນ ກັບ ແຂວງເຊີນລາ.

leftcenterrightdel
ບັນຍາກາດທີ່ການເຮັດວຽກ. ພາບ: sonoivu.sonla.gov.vn.

ທ່ານຮອງປະທານ ສນຊ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ທ່ານຮອງເຈົ້າແຂວງໆເຊີນລາ ທີ່ໄດ້ໃຫ້ການຕ້ອນຮັບຢ່າງອົບອຸ່ນ. ພ້ອມດຽວກັນນັ້ນ, ກໍໄດ້ລາຍງານຈຸດປະສົງໃນການມາຢ້ຽມຢາມ ແລະເຮັດວຽກໃນຄັ້ງນີ້ ເພື່ອເປັນການເພີ່ມທະວີການຮ່ວມມື ການຈັດຕັ້ງປະຕິບັດບັນດາສັນຍາ ແລະຂໍ້ຕົກລົງຕ່າງໆທີ່ຄະນະຜູ້ແທນແຂວງຫົວພັນ ແລະແຂວງເຊີນລາ ໄດ້ເຊັນຮ່ວມກັນໃຫ້ເກີດດອກອອກຜົນ. ນອກຈາກນີ້, ທັງສອງຝ່າຍຍັງໄດ້ຍົກບາງບັນຫາ ເພື່ອປຶກສາຫາລື ແລະແລກປ່ຽນບົດຮຽນນໍາກັນ ໂດຍສະເພາະແມ່ນວຽກງານທາງດ້ານກະສິກໍາ, ການຝຶກອົບຮົມທາງດ້ານວິຊາການໃນການປຸງແຕ່ງ, ການນໍາໃຊ້ປຸ໋ຍ, ການປູກຝັງ-ລ້ຽງສັດ, ການສ້າງໂຮງງານອົບແຫ້ງໝາກລໍາໃຍ, ໂຮງງານເຮັດກະປ໋ອງໝາກມ່ວງ, ໝາກນັດ, ປຸຍ ແລະ ຢາວັກຊິນປ້ອງກັນພະຍາດຂອງສັດລ້ຽງ. ພ້ອມກັນນັ້ນ, ສອງຝ່າຍໄດ້ປຶກສາຫາລືຄວາມເປັນໄປໄດ້ໃນການເຮັດທົດລອງດ້ານກະສິກໍາ ຢູ່ແຂວງຫົວພັນ ກັບແຂວງເຊີນລາ ເພື່ອເປັນຕົວແບບໃນການປູກຝັງລ້ຽງສັດຫັນເປັນທັນສະໄໝ.

ພ້ອມດຽວກັນນັ້ນ, ພາຍຫຼັງສັງລວມບັນດາເນື້ອໃນຕ່າງໆໃນການປຶກສາຫາລືກັນແລ້ວ ທັງສອງຝ່າຍຈະຮ່າງເປັນບົດບັນທຶກຮ່ວມມືລະຫວ່າງສອງແຂວງຫົວພັນ-ເຊີນລາ ຄາດວ່າຈະໄດ້ເຊັນສັນຍາຮ່ວມມືທຸລະກິດໃນເດືອນສິງຫາ ປີ 2022 ນີ້ ຊຶ່ງໄລຍະການຮ່ວມມື ແລະດໍາເນີນການແມ່ນປີ 2022-2024 ເພື່ອຮັບປະກັນໃນການຈັດຕັ້ງປະຕິບັດບັນດາໜ້າວຽກໃຫ້ບັນລຸຕາມຄາດໝາຍ.

ຂ່າວ: ປຊຊ