ການນໍານະຄອນດ່ານັ້ງ ຢ້ຽມຢາມ ແລະອວຍພອນວັນຊາດ ລາວ ຄົບຮອບ 46 ປີ
ກປ.ອອນໄລ - ຕອນເຊົ້າວັນທີ 29 ພະຈິກ, ທ່ານ ເລືອງຫງວຽນມິງຈ໊ຽດ ຮອງເລຂາຜູ້ປະຈໍາການຄະນະພັກນະຄອນ, ປະທານສະພາປະຊາຊົນນະຄອນດ່ານັ້ງ ໄດ້ນໍາໜ້າຄະນະການນໍານະຄອນໄປຢ້ຽມຢາມ ແລະອວຍພອນທ່ານ ວຽງໄຊ ພົມມະຈັນ ຫົວໜ້າສະຖານກົງສູນໃຫຍ່ ແຫ່ງ ສປປ ລາວ ປະຈໍາດ່ານັ້ງ ເນື່ອງໃນໂອກາດສະເຫຼີມສະຫຼອງ 46 ປີແຫ່ງວັນສະຖາປະນາປະເທດ ສປປ ລາວ (2-12-1975 / 2-12-2021) ແລະ 101 ປີແຫ່ງວັນຄ້າຍວັນເກີດປະທານ ໄກສອນ ພົມວິຫານ (13-12-1920 – 13-12-2021).
ທີ່ການຢ້ຽມຢາມ, ທ່ານ ເລືອງຫງວຽນມິງຈ໊ຽດ ໄດ້ສົ່ງຄໍາອວຍພອນອັນປະເສີດ ມາຍັງຫົວໜ້າສະຖານກົງສູນໃຫຍ່ ລາວ ປະຈໍາດ່ານັ້ງ ແລະປະຊາຊົນລາວ ທຸກຖ້ວນໜ້າເນື່ອງໃນໂອກາດສະເຫຼີມສະຫຼອງວັນຊາດລາວ ທີ 2 ທັນວາ ຄົບຮອບ 46 ປີ ແລະວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 101 ປີ.
|
|
ການນໍານະຄອນດ່ານັ້ງ ມອບດອກໄມ້ອວຍພອນຫົວໜ້າສະຖານກົງສູນໃຫຍ່ແຫ່ງ ສປປ ລາວ ປະຈໍາດ່ານັ້ງ. ພາບ: ແທງຖຸຍ. |
ທ່ານ ເລືອງຫງວຽນມິງຈ໊ຽດ ສະແດງຄວາມປິຕິຊົມຊື່ນຕໍ່ບັນດາຜົນງານ ເຊິ່ງປະຊາຊົນ ລາວ ບັນດາເຜົ່າ ບັນລຸໄດ້ພາຍໃຕ້ການນໍາພາອັນສະຫຼາດສ່ອງໃສຂອງພັກ ປະຊາຊົນ ປະຕິວັດ ລາວ, ປັດຈຸບັນ, ຖານະບົດບາດ ແລະທີ່ຕັ້ງຂອງລາວ ກໍາລັງນັບມື້ນັບໄດ້ຮັບການຍົກສູງຂຶ້ນ, ພາລະກິດພັດທະນາເສດຖະກິດ-ສັງຄົມ ໄດ້ ແລະກໍາລັງບັນລຸໄດ້ໝາກຜົນທີ່ເປັນໜ້າສົ່ງເສີມ.
ສ່ວນທ່ານ ວຽງໄຊ ພົມມະຈັນ ກໍ່ສະແດງຄວາມຂອບໃຈຢ່າງຈິງໃຈ ແລະເລິກເຊິ່ງ ດ້ວຍອາລົມຈິດອັນດີງາມ ແລະການຊ່ວຍເຫຼືອອັນໃຫຍ່ຫຼວງຂອງພັກ, ລັດ ແລະປະຊາຊົນຫວຽດນາມ ອ້າຍນ້ອງ ໄດ້ ແລະກໍາລັງສະຫງວນໃຫ້ແກ່ພັກ, ລັດ ແລະປະຊາຊົນລາວ, ພິເສດແມ່ນການສະໜັບສະໜູນ, ການຊ່ວຍເຫຼືອໃນການປ້ອງກັນ, ຕ້ານພະຍາດໂຄວິດ-19 ໃນໄລຍະຜ່ານມາ.
ທ່ານ ວົງໄຊ ພົມມະຈັນ ຢັ້ງຢືນວ່າ ທ່ານ ຈະພ້ອມກັບພະນັກງານ, ພາລະກອນ ສະຖານກົງສູນໃຫຍ່ແຫ່ງ ສປປ ລາວ ປະຈໍານະຄອນດ່ານັ້ງ ຈະມານະພະຍາຍາມ ຈົນສຸດຄວາມສາມາດຂອງຕົນ ເພື່ອສືບຕໍ່ຊຸກຍູ້ການພົວພັນມິດຕະພາບ, ການຮ່ວມມືລະຫວ່າງສອງຝ່າຍໃຫ້ຂຶ້ນສູ່ລະດັບສູງໃໝ່, ປະກອບສ່ວນເພີ່ມພູນຄູນສ້າງນໍ້າ ໃຈສາມັກຄີມິດຕະພາບພິເສດຫວຽດນາມ-ລາວ ໃຫ້ຂຽວສົດງົດງາມ, ໝັ້ນຄົງທະນົງແກ່ນໄປຊົ່ວກາລະນານ.
ໂດຍ: ໄຊຊະນະ