ຫວຽດນາມ-ລາວ ສະຫຼຸບຕີລາຄາການຮ່ວມມື, ແລກປ່ຽນທິດສະດີ ແລະກໍ່ສ້າງ, ບໍາລຸງພະນັກງານ
ກປ.ອອນໄລ - ໂດຍປະຕິບັດແຜນການພົວພັນຕ່າງປະເທດຂອງສອງພັກ, ຕອນບ່າຍວັນທີ 17 ກັນຍາ, ພັກກອມມູນິດຫວຽດນາມ ແລະພັກປະຊາຊົນ ປະຕິວັດລາວ ໄດ້ຈັດຕັ້ງກອງປະຊຸມທາງໄກສະຫຼຸບຕີລາຄາການຮ່ວມມື, ແລກປ່ຽນທິດສະດີ ແລະກໍ່ສ້າງ, ບໍາລຸງໃຫ້ພະນັກງານລະຫວ່າງພັກກອມມູນິດຫວຽດນາມ ແລະພັກປະຊາຊົນ ປະຕິບັດລາວ ໄລຍະ 2016-2021, ທິດທາງຮ່ວມມື ໄລຍະ 2021-2026 ຢູ່ທີ່ຮ່າໂນ້ຍ ແລະວຽງຈັນ, ພາຍໃຕ້ການເປັນປະທານຮ່ວມຂອງທ່ານ ຫງວຽນຊວນຖ໊ັງ ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງ ພັກກອມມູນິດ ຫວຽດນາມ ແລະທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງ, ປະທານສະພາທິດສະດີສູນກາງພັກ ປະຊາຊົນ ປະຕິວັດລາວ.
|
|
ບັນຍາກາດທີ່ກອງປະຊຸມ. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນທີ່ກອງປະຊຸມ, ທ່ານ ຫງວຽນຊວນຖ໊ັງ ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງພັກກອມມູນິດຫວຽດນາມ ຢັ້ງຢືນວ່າ ບົດຮຽນ ແລະຄໍາເຫັນປະກອບທີ່ກອງປະຊຸມສໍາມະນາແລກປ່ຽນທິດສະດີແມ່ນແທດຈິງທີ່ສຸດ, ຢັ້ງຢືນບົດບາດນໍາພາ, ແຜນນະໂຍບາຍ, ແນວທາງທີ່ຖືກຕ້ອງຂອງສອງພັກ, ສອງລັດ, ປະກອບສ່ວນປ່ຽນແປງໃໝ່ຄວາມຮັບຮູ້ແນວຄິດ, ທິດສະດີ, ເຮັດແຈ້ງບັນຫາທິດສະດີ ແລະພຶດຕິກໍາຕົວຈິງອັນຮີບດ່ວນທີ່ກໍາລັງວາງອອກໃນກິດຈະການປ່ຽນແປງໃໝ່ຢູ່ແຕ່ລະປະເທດ. ໃນໄລຍະ 2016-2021, ສອງພັກໄດ້ສົມທົບກັນຈັດຕັ້ງສໍາເລັດຫຼາຍຊຸດບໍາລຸງ-ກໍ່ສ້າງໃຫ້ພະນັກງານການນໍາ, ຄຸ້ມຄອງໃຫ້ລະບົບການເມືອງຂອງລາວ.
ສ່ວນທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງ, ປະທານສະພາທິດສະດີສູນກາງພັກ ປະຊາຊົນ ປະຕິວັດລາວ ຕີລາຄາວ່າ ວິວັດການຈັດຕັ້ງປະຕິບັດແຜນການຮ່ວມມືລະຫວ່າງສອງຝ່າຍໄລຍະ 2016-2021 ມີຄວາມແໜ້ນແຟ້ນ, ທັນການ; ເປັນເອກະພາບກ່ຽວກັບທິດທາງການຮ່ວມມືຂອງສອງພັກ ໃນໄລຍະ 2021-2026 ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ.
ໂດຍ: ດັ້ງເກື່ອງ