ຕໍາຫຼວດທະເລຫວຽດນາມ ເລີ່ມເດີນທາງໄປລາດຕະເວນຮ່ວມ ກັບຕໍາຫຼວດທະເລຈີນ
ກປ.ອອນໄລ - ຕອນບ່າຍວັນທີ 20 ເມສາ, ກອງກຳປັ່ນຕໍາຫຼວດທະເລ 8004 ແລະ 8003 ຂຶ້ນກັບກອງພັນເຮືອ 11, ກອງບັນຊາການຕໍາຫຼວດທະເລເຂດ 1, ຕໍາຫຼວດທະເລຫວຽດນາມ ນຳໂດຍທ່ານພັນເອກພິເສດ ເລືອງກາວຂາຍ, ຮອງຜູ້ບັນຊາການ, ຫົວໜ້າເສນາທິການຕໍາຫຼວດທະເລເຂດ 1, ໄດ້ເລີ່ມອອກຈາກທ່າກໍາປັ່ນເດີນທາງໄປຍັງປະຕິບັດໜ້າທີ່ການລາດຕະເວນຮ່ວມຢູ່ເຂດທະເລ ຕິດກັບເສັ້ນຊາຍແດນຢູ່ອ່າວພາກເໜືອ ລະຫວ່າງກໍາລັງຕໍາຫຼວດທະເລຫວຽດນາມ ກັບຕໍາຫຼວດທະເລຈີນ ຄັ້ງທີ 1 ປີ 2026.
ການລາດຕະເວນຮ່ວມລະຫວ່າງຕໍາຫຼວດທະເລຫວຽດນາມ ກັບຕໍາຫຼວດທະເລຈີນ ຄັ້ງທີ 1 ປີ 2026 ດຳເນີນໃນລະຫວ່າງວັນທີ 20-25 ເມສາ, ເຂດລາດຕະເວນມີ 13 ຈຸດ ດ້ວຍໄລຍະທາງຍາວ 255,5 ໄມທະເລ.
    |
 |
|
ຕໍາຫຼວດທະເລຫວຽດນາມ ປະຕິບັດພິທີເຄົາລົບທ່າກໍາປັ່ນ. ພາບ: qdnd.vn |
ໃນວິວັດການປະຕິບັດໜ້າທີ່, ກໍາລັງຕໍາຫຼວດທະເລສອງປະເທດຈະດຳເນີນການພົບປະສອງຝ່າຍເພື່ອແລກປ່ຽນ, ປຽບທຽບແຜນການເຄື່ອນໄຫວຢູ່ທະເລ; ຈັດຕັ້ງການພົບປະແລກປ່ຽນວິຊາການດ້ານກົດໝາຍລະຫວ່າງສອງກໍາລັງ.
ຝ່າຍຕໍາຫຼວດທະເລຫວຽດນາມ ຈະສ້າງຕັ້ງໜ່ວຍກວດກາລະຫວ່າງຂະແໜງການ ເພື່ອດໍາເນີນການກວດກາ, ຕິດຕາມກວດກາກໍາປັ່ນ, ເຮືອຂອງຊາວປະມົງທີ່ຂຸດຄົ້ນສິນໃນນ້ຳ, ສິນທະເລຢູ່ເຂດທະເລຕິດກັບເສັ້ນຊາຍແດນ; ໂຄສະນາກ່ຽວກັບກົດລະບຽບການເຄື່ອນໄຫວ, ປະພຶດ ແລະໂຄສະນາເຜີຍແຜ່ກົດໝາຍໃຫ້ແກຊາວປະມົງ...
ນີ້ແມ່ນຄັ້ງທີ 11 ດຳເນີນການເຄື່ອນໄຫວລາດຕະເວນຢູ່ເຂດທະເລ ຕິດກັບເສັ້ນຊາຍແດນຢູ່ອ່າວພາກເໜືອ ລະຫວ່າງຕໍາຫຼວດທະເລຫວຽດນາມ ກັບຕໍາຫຼວດທະເລຈີນ. ຜ່ານການລາດຕະເວນປະກອບສ່ວນຮັກສາຄວາມເປັນລະບຽບຮຽບຮ້ອຍ, ຄວາມໝັ້ນຄົງໃນເຂດທະເລອ່າວພາກເໜືອ, ເພີ່ມທະວີການພົວພັນຮ່ວມມື ແລະຄວາມເຂົ້າໃຈເຊິ່ງກັນ ແລະກັນລະຫວ່າງກໍາລັງຕໍາຫຼວດທະເລ ແລະປະຊາຊົນສອງປະເທດ ຫວຽດນາມ-ຈີນ.
ໂດຍ: ຈອນນີ ສະເຫຼີມສັກ