ກອງປະຊຸມປະຈຳປີ ຄັ້ງທີ 6 ລະຫວ່າງກອງບັນຊາການທະຫານຊາຍແດນນະຄອນດ່າໜັງ ກັບກອງບັນຊາການປ້ອງກັນຄວາມສະຫງົບແຂວງເຊກອງ

ທ່ານພັນເອກພິເສດ ເຈີ່ນຕ໊ຽນຮ່ຽນ ແລະ ທ່ານພົນຈັດຕະວາ ຄໍາບານ ພົມມະນີວົງ ລົງນາມບົດບັນທຶກກອງປະຊຸມ ຄັ້ງທີ 6. ພາບ: qdnd.vn

ທີ່ກອງປະຊຸມ, ສອງຝ່າຍໄດ້ແລກປ່ຽນ, ຕີລາຄາສະພາບການ, ໝາກຜົນຂອງວຽກງານປະສານສົມທົບໃນການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຢູ່ເຂດຊາຍແດນຂອງສອງຝ່າຍ ໃນໄລຍະຜ່ານມາ; ພ້ອມທັງເຫັນດີເປັນເອກະສັນກັນບາງເນື້ອໃນ ແລະລົງນາມບົດບັນທຶກກອງປະຊຸມພົບປະສອງຝ່າຍ ຄັ້ງທີ 6, ເປັນພື້ນຖານດ້ານນິຕິກໍາເພື່ອຜັນຂະຫຍາຍປະຕິບັດວຽກງານສົມທົບກັນໃນການຄຸ້ມຄອງ, ປົກປັກຮັກສາອະທິປະໄຕ, ຄວາມສະຫງົບປອດໄພຢູ່ເຂດຊາຍແດນຂອງແຕ່ລະຝ່າຍ, ປະກອບສ່ວນກໍ່ສ້າງເສັ້ນຊາຍແດນລະຫວ່າງນະຄອນດ່າໜັງ-ເຊກອງ ໃຫ້ສັນຕິພາບ, ມິດຕະພາບ, ສະຖຽນລະພາບ ແລະພັດທະນາ.

ກອງບັນຊາການທະຫານຊາຍແດນນະຄອນດ່າໜັງ ມອບຂອງຂວັນ ໃຫ້ກອງບັນຊາການປ້ອງກັນຄວາມສະຫງົບແຂວງເຊກອງ. ພາບ: qdnd.vn

ທ່ານພົນຈັດຕະວາ ຄໍາບານ ພົມມະນີວົງ ມອບຂອງຂວັນໃຫ້ທ່ານພັນເອກພິເສດ ເຈີ່ນຕ໊ຽນຮ່ຽນ. ພາບ: qdnd.vn

ກອງບັນຊາການທະຫານຊາຍແດນນະຄອນດ່າໜັງ ແລະ ກອງບັນຊາການ ປກສ ແຂວງເຊກອງ ໄດ້ເຫັນດີເປັນເອກະພາບ ແລະລົງນາມຫຼາຍເນື້ອໃນສຳຄັນ ຄື: ສືບຕໍ່ຊາບຊຶມ, ຜັນຂະຫຍາຍປະຕິບັດບັນດາເນື້ອໃນທີ່ໄດ້ຕົກລົງໃນບົດບັນທຶກຊ່ວຍຈໍາ ທີ່ໄດ້ລົງນາມໃນວັນທີ 2 ສິງຫາ 2017 ຢູ່ນະຄອນຕາມກີ່, ແຂວງກວາງນາມ (ເກົ່າ), (ປະຈຸບັນແມ່ນຕາແສງຕາມກີ່, ນະຄອນດ່າໜັງ) ແລະບົດບັນທຶກກອງປະຊຸມປະຈໍາປີ ສະບັບຕ່າງໆ ທີ່ໄດ້ລົງນາມ ຢ່າງມີປະສິດທິຜົນ; ສືບຕໍ່ເພີ່ມທະວີການສົມທົມກັນແລກປ່ຽນຂໍ້ມູນຂ່າວສານ, ສະພາບການກ່ຽວກັບການເຄື່ອນໄຫວຂອງອາດຊະຍາກໍາ ຢູ່ເຂດຊາຍແດນ; ສົມທົບກັນປະຕິບັດການເຄື່ອນໄຫວວິຊາສະເພາະ, ສືບສວນບັນດາບໍລິເວນຈຸດສຸມທີ່ມີການສັບສົນກ່ຽວກັບຄວາມເປັນລະບຽບຮຽບຮ້ອຍໃນສັງຄົມ; ເພີ່ມທະວີການສົມທົບກັນສືບສວນ, ກວດກາ ແລະຢັ້ງຢືນຂໍ້ມູນຂ່າວສານກ່ຽວກັບອາດຊະຍາກໍາ,  ສ້າງຄະດີຮ່ວມເພື່ອຕໍ່ສູ້ ແລະມ້າງຄະດີເຄືອຂ່າຍອາດຊະຍາກຳຂ້າມຊາດ; ຍູ້ແຮງການໂຄສະນາເຜີຍແຜ່, ຂົນຂວາຍປະຊາຊົນສອງຟາກຊາຍແດນປະຕິບັດຕາມກົດໝາຍ, ຕັ້ງໜ້າເຂົ້າຮ່ວມໃນການຕ້ານ, ສະກັດກັ້ນ ແລະກ່າວຟ້ອງອາດຊະຍາກຳ ແລະການກະທໍາລະເມີດກົດໝາຍ...

ສອງຝ່າຍຍັງເຫັນດີເປັນເອກະພາບກັນວ່າ ກອງປະຊຸມປະຈໍາປີ ຄັ້ງທີ 7 ຈະໄດ້ຈັດຕັ້ງໃນປີ 2026 ທີ່ກອງບັນຊາການ ປກສ ແຂວງເຊກອງ.

ໂດຍ: ທູຈາງ