ແຜນນະໂຍບາຍຖືກຕ້ອງ - ໝາກຜົນສູງ
ໃນຊຸມປີຜ່ານມາ, ໜ້າທີ່ສ້າງສາ ແລະພັດທະນາອຸດສາຫະກໍາປ້ອງກັນຊາດ ທີ່ຍາມໃດກໍ່ໄດ້ຮັບຄວາມເອົາໃຈໃສ່ຊີ້ນຳ, ນຳພາຈາກ ພັກ, ລັດ, ຄະນະພັກການທະຫານສູນກາງ, ກະຊວງປ້ອງກັນປະເທດ; ແມ່ນແຜນນະໂຍບາຍຍຸດທະສາດ, ຕະຫຼອດ. ແຕ່ກອງປະຊຸມໃຫຍ່ ຄັ້ງທີ IX, ພັກກອມມູນິດຫວຽດນາມ ໄດ້ກຳນົດໜ້າທີ່ສ້າງສາ, ພັດທະນາອຸດສາຫະກຳປ້ອງກັນຊາດຫວຽດນາມ ສ້າງຄວາມເຂັ້ມແຂງດ້ວຍຕົນເອງ, ທັນສະໄໝ, ໃຊ້ໄດ້ສອງໜ້າທີ່ ແມ່ນບັນຫາທີ່ມີຄວາມໝາຍຍຸດທະສາດໃຫ້ແກ່ພາລະກິດສ້າງສາ ແລະປົກປັກຮັກສາປະເທດຊາດ. ຈົນຮອດກອງປະຊຸມໃຫຍ່ ຄັ້ງທີ XIII ຂອງພັກ, ເນື້ອໃນນີ້ສືບຕໍ່ໄດ້ຮັບການຢັ້ງຢືນ ແລະຍົກສູງຂຶ້ນລະດັບສູງໃໝ່, ນັ້ນແມ່ນ: “ພັດທະນາອຸດສາຫະກໍາປ້ອງກັນຊາດ, ປ້ອງກັນຄວາມສະຫງົບຕາມທິດໃຊ້ໄດ້ສອງໜ້າທີ່, ນັບມື້ນັບທັນສະໄໝ, ມີລະດັບວິທະຍາສາດ-ເຕັກໂນໂລຢີສູງ, ແມ່ນພາກສ່ວນທີ່ສຳຄັນ ແລະກາຍເປັນປາຍແຫຼມຂອງອຸດສາຫະກຳແຫ່ງຊາດ...”. ວັນທີ 26 ມັງກອນ 2022, ກົມການເມືອງ ໄດ້ປະກາດໃຊ້ມະຕິສະບັບເລກທີ 08-NQ/TW ວ່າດ້ວຍ “ການຍູ້ແຮງການພັດທະນາອຸດສາຫະກຳປ້ອງກັນຊາດ ຈົນຮອດປີ 2030 ແລະຊຸມປີຕໍ່ໄປ”, ໃນນັ້ນສືບຕໍ່ກຳນົດການກໍ່ສ້າງພື້ນຖານອຸດສາຫະກຳປ້ອງກັນຊາດ ເປັນເຈົ້າການ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ໃຊ້ໄດ້ສອງໜ້າທີ່, ທັນສະໄໝ, ກາຍເປັນປາຍແຫຼມຂອງອຸດສາຫະກຳແຫ່ງຊາດ; ຮຽກຮ້ອງອຸດສາຫະກຳປ້ອງກັນຊາດ ຕ້ອງເປັນເຈົ້າຂອງເຕັກໂນໂລຢີກ້າວໜ້າ, ທັນສະໄໝ, ຕອບສະໜອງໜ້າທີ່ກໍ່ສ້າງກອງທັບທັນສະໄໝ, ປົກປັກຮັກສາປະເທດແຕ່ຫົວທີ, ແຕ່ໄກ.
    |
 |
|
ການນຳກະຊວງປ້ອງກັນປະເທດ ກວດກາຜະລິດຕະພັນບັ້ງມອດໄຟ ໂດຍໂຮງງານ Z183, ກົມໃຫຍ່ອຸດສາຫະກຳປ້ອງກັນຊາດ ຜະລິດ (ເດືອນພະຈິກ 2024) ພາບ: ມິງຕ໊ວນ. |
ໂດຍຊາບຊຶມບັນດາມະຕິ, ຄຳສັ່ງຂອງຂັ້ນເທິງ, ໃນຊຸມປີຜ່ານມາ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ສຸມໃສ່ຊີ້ນຳ, ນຳພາທົ່ວກອງທັບຈັດຕັ້ງປະຕິບັດບັນດາມາດຕະການພັດທະນາອຸດສາຫະກຳປ້ອງກັນຊາດຕາມທິດໃຊ້ໄດ້ສອງໜ້າທີ່, ທັນສະໄໝ, ຫັນເປັນທັນສະໄໝເທື່ອລະກ້າວ, ຍົກສູງກຳລັງແຮງ, ລະດັບຄວາມຮູ້ ແລະຄວາມສາມາດກຽມພ້ອມສູ້ຮົບຂອງກອງທັບ, ປະກອບສ່ວນຢ່າງຕັ້ງໜ້າ, ມີປະສິດທິຜົນເຂົ້າໃນວິວັດການສ້າງສາ, ພັດທະນາເສດຖະກິດຂອງປະເທດ. ຍ້ອນເຫດນັ້ນ, ກົນໄກ, ນະໂຍບາຍ, ແຜນຜັງ, ແຜນການກໍ່ສ້າງ ແລະພັດທະນາອຸດສາຫະກຳປ້ອງກັນຊາດ ນັບມື້ນັບໄດ້ຮັບຄວາມເອົາໃຈໃສ່, ປັບປຸງເທື່ອລະກ້າວ; ການຈັດຕັ້ງກຳລັງອຸດສາຫະກຳປ້ອງກັນຊາດ ໃນທົ່ວກອງທັບໄດ້ຮັບການປັບປຸງເໝາະສົມກັບຄວາມຮຽກຮ້ອງຂອງໜ້າທີ່, ມີຄວາມສະໜິດຕິດພັນ, ເຊື່ອມຕົວກັບອຸດສາຫະກຳແຫ່ງຊາດ. ຂະແໜງອຸດສາຫະກຳປ້ອງກັນຊາດ ໄດ້ຮັບຄວາມເອົາໃຈໃສ່ລົງທຶນທີ່ມີຈຸດສຸມ, ກຳນົດໄດ້ທິດທາງ, ຂະແໜງປາຍແຫຼມ; ວຽກງານລະດົມກຳລັງແຮງບົ່ມຊ້ອນດ້ານວິທະຍາສາດ-ເຕັກໂນໂລຢີ ແລະອຸດສາຫະກຳແຫ່ງຊາດໃນການສ້າງສາ, ພັດທະນາອຸດສາຫະກຳປ້ອງກັນຊາດ ທີ່ມີການຫັນປ່ຽນຢ່າງຕັ້ງໜ້າ; ການເຄື່ອນໄຫວຮ່ວມມືສາກົນກ່ຽວກັບອຸດສາຫະກຳປ້ອງກັນຊາດ ນັບມື້ນັບໄດ້ຮັບຄວາມເອົາໃຈໃສ່, ເປີດກວ້າງ.
ພ້ອມກັນນັ້ນ, ບັນດາໂຄງການລົງທຶນພັດທະນາອຸດສາຫະກຳປ້ອງກັນຊາດ, ເປັນຕົ້ນແມ່ນບັນດາໂຄງການຈຸດສຸມ, ເຕັກໂນໂລຢີສູງໄດ້ຮັບການຜັນຂະຫຍາຍຢ່າງຂ້ຽວຂາດ, ໃນເບື້ອງຕົ້ນນຳມາເຊິ່ງປະສິດທິຜົນຢ່າງຕັ້ງໜ້າ; ກຳລັງຄວາມສາມາດຄົ້ນຄວ້າ, ອອກແບບ, ຜະລິດ, ສ້ອມແປງອາວຸດຍຸດໂທປະກອນເຕັກນິກມີບາດກ້າວບຸກທະລຸ, ຈະເລີນເຕີບໂຕ. ປະຈຸບັນຂະແໜງອຸດສາຫະກຳປ້ອງກັນຊາດພວມເປັນເຈົ້າຂອງເຕັກໂນໂລຢີຜະລິດ, ສ້ອມແປງ, ນະວັດຕະກຳໃໝ່, ຫັນອາວຸດຍຸດໂທປະກອນເຕັກນິກລຸ້ນໃໝ່, ເຕັກໂນໂລຢີສູງ, ທັນສະໄໝເປັນດີຈີຕອນເທື່ອລະກ້າວ, ຕອບສະໜອງພາກສ່ວນໜຶ່ງຄວາມຕ້ອງການດ້ານອາວຸດຍຸດໂທປະກອນເຕັກນິກສະໜອງໃຫ້ທົ່ວກອງທັບ. ນອກຈາກນັ້ນຍັງຜະລິດໄດ້ຫຼາຍຜະລິດຕະພັນເສດຖະກິດທີ່ມີຄຸນນະພາບສູງໃຫ້ແກ່ຕະຫຼາດພາຍໃນ ແລະຕ່າງປະເທດ...
ເພື່ອໃຫ້ອຸດສາຫະກຳປ້ອງກັນຊາດບືນຕົວຂຶ້ນ
ຄາດຄະເນວ່າສະຖານະການໂລກ ແລະພາກພື້ນສືບຕໍ່ມີການຜັນແປຢ່າງສັບສົນ, ຊ້ອນແຝງຄວາມສ່ຽງຫຼາຍຢ່າງທີ່ຄາດເດົາໄດ້ຍາກ; ການປະຕິວັດອຸດສາຫະກຳ ຄັ້ງທີ 4 ຈະສົ່ງຜົນກະທົບຢ່າງແຮງ, ສົ່ງຜົນສະທ້ອນເຖິງທຸກຂົງເຂດຂອງຊີວິດສັງຄົມ, ໃນນັ້ນມີຂົງເຂດການທະຫານ, ການປ້ອງກັນຊາດ. ເພາະສະນັ້ນ, ການຍູ້ແຮງການສ້າງສາ, ພັດທະນາອຸດສາຫະກຳປ້ອງກັນຊາດ ເພື່ອແນໃສ່ຫັນເປັນທັນສະໄໝ, ຍົກສູງກຳລັງແຮງ, ຄວາມຮູ້ ແລະຄວາມສາມາດກຽມພ້ອມສູ້ຮົບຂອງກອງທັບ ແລະກຳລັງບົ່ມຊ້ອນດ້ານປ້ອງກັນຊາດ, ປ້ອງກັນຄວາມສະຫງົບຂອງປະເທດ, ສ້າງກຳລັງໜູນໃນການຊຸກຍູ້ການພັດທະນາເສດຖະກິດ-ສັງຄົມ ນັບມື້ນັບມີຄວາມຈຳເປັນ. ເພື່ອປະຕິບັດໜ້າທີ່ຍຸດທະສາດດັ່ງກ່າວໃຫ້ມີປະສິດທິຜົນຕ້ອງມີການເຂົ້າຮ່ວມຂອງທຸກຂັ້ນ, ທຸກຂະແໜງການ, ລະດົມກຳລັງແຮງສັງລວມຂອງທົ່ວພັກ, ທົ່ວປວງຊົນ, ທົ່ວກອງທັບຕໍ່ກັບໜ້າທີ່ສ້າງສາ, ພັດທະນາອຸດສາຫະກຳປ້ອງກັນຊາດໃນສະພາບການໃໝ່. ຍູ້ແຮງການໂຄສະນາ, ສຶກສາ; ຕັ້ງໜ້າປ່ຽນແປງໃໝ່ຈິດຕະນາການ, ຄວາມຮັບຮູ້ກ່ຽວກັບການພັດທະນາອຸດສາຫະກຳປ້ອງກັນຊາດ, ທັງຮັບປະກັນໃຫ້ເປົ້າໝາຍປ້ອງກັນຊາດ, ປ້ອງກັນຄວາມສະຫງົບ ທັງປະກອບສ່ວນຢ່າງຕັ້ງໜ້າເຂົ້າໃນການປະຕິບັດເປົ້າໝາຍຫັນເປັນປະເທດອຸດສາຫະກຳ, ທັນສະໄໝ, ຍົກສູງກຳລັງຄວາມສາມາດໃນການແກ່ງແຍ້ງຂອງພື້ນຖານເສດຖະກິດ.
|
|
 |
|
ຕ່ອງໂສ້ການຜະລິດປ້ອງກັນຊາດຢູ່ໂຮງງານ Z115, ກົມໃຫຍ່ອຸດສາຫະກຳປ້ອງກັນຊາດ. ພາບ: ມິງຕ໊ວນ. |
ກະຊວງປ້ອງກັນປະເທດ ສືບຕໍ່ສົມທົບກັບບັນດາກະຊວງ, ຂະແໜງການຢ່າງແໜ້ນແຟ້ນໃນການຄົ້ນຄວ້າ, ສະເໜີການສ້າງ, ປັບປຸງລະບອບລະບຽບການດ້ານອຸດສາຫະກຳປ້ອງກັນຊາດ ໃຫ້ສົມບູນແບບ; ເອົາໃຈໃສ່ລົງທຶນພັດທະນາຊັບພະຍາກອນມະນຸດ, ຍູ້ແຮງການສ້າງແຜນຜັງ, ແຜນການ, ຍຸດທະສາດພັດທະນາອຸດສາຫະກຳປ້ອງກັນຊາດໃນແຕ່ລະໄລຍະພັດທະນາລະອຽດ, ລະດົມກຳລັງແຮງບົ່ມຊ້ອນຂອງປະເທດໃນການສ້າງສາ, ພັດທະນາຂົງເຂດນີ້. ສືບຕໍ່ຄົ້ນຄວ້າ, ສ້າງແຜນການ, ຂັ້ນຕອນ, ປັບປຸງລະບົບເອກະສານນິຕິກຳກ່ຽວກັບອຸດສາຫະກຳປ້ອງກັນຊາດ, ຮັບປະກັນຄວາມສະດວກໃນວິວັດທະນາການປ່ຽນແປງໃໝ່, ເຊື່ອມໂຍງ; ຍົກສູງປະສິດທິພາບ, ປະສິດທິຜົນໃນການຄຸ້ມຄອງລັດ, ພ້ອມທັງແກ້ໄຂບັນດາຮົ້ວກີດຂວາງ ເພື່ອສົ່ງເສີມ, ດຶງດູດບັນດາແຫຼ່ງກຳລັງລົງທຶນໃຫ້ການພັດທະນາອຸດສາຫະກຳປ້ອງກັນຊາດຕາມທິດໃຊ້ໄດ້ສອງໜ້າທີ່.
ຄຽງຂ້າງກັນນັ້ນ, ຕ້ອງສຸມໃສ່ວາງແຜນຜັງ, ກຳນົດທິດຜະລິດບັນດາຜະລິດຕະພັນໃຊ້ໄດ້ສອງໜ້າທີ່ເໝາະສົມກັບທ່າແຮງ, ມີຄວາມສາມາດແກ່ງແຍ້ງ. ພ້ອມກັບການເຮັດວຽກງານວາງແຜນຜັງ, ກຳນົດທິດພັດທະນາຜະລິດຕະພັນຕາມທິດໃຊ້ໄດ້ສອງໜ້າທີ່, ຂະແໜງອຸດສາຫະກຳປ້ອງກັນຊາດ ສືບຕໍ່ສັບຊ້ອນຮູບແບບກົງຈັກການຈັດຕັ້ງ, ການເຄື່ອນໄຫວຂອງບັນດາຮາກຖານການຜະລິດ, ສ້ອມແປງຕາມທິດສະໜິດຕິດພັນຢ່າງແໜ້ນແຟ້ນລະຫວ່າງການຄົ້ນຄວ້າ, ອອກແບບ ແລະຜະລິດ, ຮັບປະກັນອຸດສາຫະກຳປ້ອງກັນຊາດ ເຊື່ອມຕົວ ແລະກາຍເປັນປາຍແຫຼມອຸດສາຫະກຳແຫ່ງຊາດ, ຍົກສູງປະສິດທິຜົນການສົມທົບການປ້ອງກັນຊາດກັບເສດຖະກິດ. ນອກຈາກນັ້ນ, ຕ້ອງຈັດຕັ້ງ, ສັບຊ້ອນບັນດາຫົວໜ່ວຍອຸດສາຫະກຳປ້ອງກັນຊາດຕາມທິດຫຼຸດຈຳນວນ, ເພີ່ມຂອບຂະໜາດ, ມີຄວາມສະໜິດຕິດພັນກັບອຸດສາຫະກຳຮັບໃຊ້ຊີວິດທາງດ້ານວັດຖຸ ແລະຈິດໃຈຂອງປະຊາຊົນພ້ອມທັງສືບຕໍ່ເປີດກວ້າງການພົວພັນຮ່ວມມື, ຮ່ວມທຸລະກິດກັບຕ່າງປະເທດໃນບາງຂົງເຂດ, ຄື: ວັດສະດຸໃໝ່, ເອເລັກໂຕນິກໂທລະຄົມມະນາຄົມ...
|
|
 |
|
ພະນັກງານ, ນັກຮົບຢ້ຽມຊົມຜະລິດຕະພັນໂດຍຂະແໜງອຸດສາຫະກຳປ້ອງກັນຊາດຜະລິດ. ພາບ: ມິງຕ໊ວນ. |
ນອກຈາກນັ້ນ, ຕ້ອງເອົາໃຈໃສ່ຄົ້ນຄວ້າກໍ່ສ້າງ, ພັດທະນາຊັບພະຍາກອນມະນຸດທີ່ມີຄຸນນະພາບສູງໃຫ້ແກ່ອຸດສາຫະກຳປ້ອງກັນຊາດ; ໃນສະເພາະໜ້າຕ້ອງສ້າງຖັນແຖວພະນັກງານຄຸ້ມຄອງ, ພະນັກງານວິທະຍາສາດທີ່ມີຄວາມຮູ້ຄວາມສາມາດສູງ, ບັນດາກຸ່ມຄົ້ນຄວ້າເຂັ້ມແຂງ, ລົງເລິກສົມທົບກັບການບຳລຸງສ້າງ, ສັບຊ້ອນ, ນຳໃຊ້ຊັບພະຍາກອນມະນຸດທີ່ມີຢູ່. ພ້ອມທັງສືບຕໍ່ຍົກສູງກຳລັງຄວາມສາມາດໃນການບໍລິຫານວິສາຫະກິດ, ເອົາໃຈໃສ່ໝູນໃຊ້ບັນດາມາດຕະຖານສາກົນໃນການຄຸ້ມຄອງ, ບໍລິຫານວິສາຫະກິດ ກໍ່ຄືໃນການຄຸ້ມຄອງຄຸນນະພາບຜະລິດຕະພັນ; ຍູ້ແຮງການຄົ້ນຄວ້າ, ເປີດກວ້າງຕະຫຼາດ, ຕັ້ງໜ້າເຂົ້າຮ່ວມບັນດາການເຄື່ອນໄຫວສົ່ງເສີມການຄ້າ, ການລົງທຶນ, ເປີດກວ້າງການພົວພັນກັບຄູ່ຮ່ວມມືທັງພາຍໃນ ແລະຕ່າງປະເທດເພື່ອຊຸກຍູ້ການຜະລິດ, ດຳເນີນທຸລະກິດ, ປະກອບສ່ວນເຂົ້າໃນທ່າເຕີບໂຕເສດຖະກິດລວມຂອງປະເທດ.
ໂດຍ: ແສງເດືອນ