ຕໍາຫຼວດທະເລຫວຽດນາມ ປະຕິບັດລາຍການ “ບຸນເຕັດຢູ່ໝູ່ເກາະທະເລ”
ກປ.ອອນໄລ - ວັນທີ 20 ມັງກອນ, ຄະນະປະຕິບັດງານຂອງກອງບັນຊາການຕໍາຫຼວດທະເລຫວຽດນາມ ນໍາໂດຍທ່ານພັນເອກພິເສດ ເຈິ່ນວັນຊວນ, ຮອງຫົວໜ້າການເມືອງກອງບັນຊາການຕໍາຫຼວດທະເລ ໄດ້ໄປຮອດຕາແສງກວານລ້ານ, ເມືອງເວິນໂດ່ນ, ແຂວງກວ໋າງນິງ ເພື່ອຈັດຕັ້ງລາຍການ “ບຸນເຕັດຢູ່ໝູ່ເກາະທະເລ”.
|
|
ກອງບັນຊາການຕໍາຫຼວດທະເລຫວຽດນາມ ມອບທຸງຊາດໃຫ້ແກ່ຊາວປະມົງ. ພາບ: qdnd.vn. |
ຢູ່ທີ່ນີ້, ຄະນະປະຕິບັດງານໄດ້ຜັນຂະຫຍາຍປະຕິບັດບັນດາກິດຈະກໍາຄື: ຖະຫວາຍທູບທຽນ, ດອກໄມ້ອາໄລຫາວິລະຊົນ, ນັກຮົບທີ່ເສຍສະຫຼະຊີວິດເພື່ອຊາດ ແລະບຸລຸດຜູ້ມີຊື່ສຽງ; ຢ້ຽມຢາມ, ມອບຂອງຂວັນ, ອວຍພອນປີໃໝ່ຢູ່ບາງກົມກອງ, ທ້ອງຖິ່ນ ແລະ 50 ຄອບຄົວນະໂຍບາຍດີເດັ່ນ; ມອບທຸງຊາດໃຫ້ແກ່ຊາວປະມົງ; ຈັດຕັ້ງການແຂ່ງຂັນຫໍ່ເຂົ້າຕົ້ມ; ມອບລົດຖີບໃຫ້ແກ່ນັກຮຽນທຸກຍາກແຕ່ຮຽນເກັ່ງ 30 ຄັນ ແລະຈັດຕັ້ງ “ງານຕະຫຼາດ 0 ດົ່ງ” ເພື່ອໜູນຊ່ວຍບັນດາຄອບຄົວທຸກຍາກ...
“ບຸນເຕັດຢູ່ໝູ່ເກາະທະເລ” ແມ່ນກິດຈະກໍາປະຈໍາປີຂອງກອງບັນຊາການຕໍາຫຼວດທະເລຫວຽດນາມ, ເຊິ່ງແມ່ນໜຶ່ງໃນບັນດາເນື້ອໃນຈຸດສຸມຂອງລາຍການ “ຕໍາຫຼວດທະເລຮ່ວມເດີນທາງພ້ອມກັບຊາວປະມົງ”.
ໂດຍ: ທູຈາງ