ທະເລຕາເວັນອອກ: ຮ່ວມມືເພື່ອຄວາມໝັ້ນຄົງ ແລະການພັດທະນາພາກພື້ນ
ກປ.ອອນໄລ - ຕອນເຊົ້າວັນທີ 6 ພະຈິກ, ຢູ່ຮ່າໂນ້ຍ, ກອງປະຊຸມສໍາມະນາວິທະຍາສາດສາກົນກ່ຽວກັບທະເລຕາເວັນອອກ ຄັ້ງທີ 11 ດ້ວຍຫົວຂໍ້ “ທະເລຕາເວັນອອກ: ຮ່ວມມືເພື່ອຄວາມໝັ້ນຄົງ ແລະການພັດທະນາພາກພື້ນ” ໂດຍສະຖາບັນພົວພັນຕ່າງປະເທດ (DAV), ກອງທຶນໜູນຊ່ວຍການຄົ້ນຄວ້າທະເລຕາເວັນອອກ (FESS) ແລະສະມາຄົມທະນາຍຄວາມຫວຽດນາມ (VLA) ສົມທົບກັນຈັດຕັ້ງຂຶ້ນ. ເຂົ້າຮ່ວມກອງປະຊຸມສໍາມະນາມີຜູ້ແທນປະມານ 280 ຄົນ ເຊິ່ງແມ່ນບັນດາເຈົ້າໜ້າທີ່, ນັກວິທະຍາສາດ, ນັກຮຽນຮູ້ພາຍໃນ ແລະຕ່າງປະເທດ.
ກ່າວຄໍາເຫັນທີ່ພິທີໄຂກອງປະຊຸມສໍາມະນາ, ທ່ານ ເລຮວ່າຍຈູງ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ຢັ້ງຢືນເຖິງບົດບາດສໍາຄັນຂອງທະເລຕາເວັນອອກ, ຂອບເຂດຂອງເສັ້ນທາງການເດີນທະເລສໍາຄັນ ແລະແຖວໜ້າໃນໂລກ, ຂົວເຊື່ອມຕໍ່ການຄ້າລະຫວ່າງມະຫາສະໝຸດອິນເດຍ ແລະມະຫາສະໝຸດປາຊີຟິກ, ລະຫວ່າງອາຊີ ແລະທະວີບໂອເຊອານີ ແມ່ນໂຄງປະກອບຂອງຫຼາຍຂໍ້ລິເລີ່ມຂອງພາກພື້ນສໍາຄັນ, ຍ້ອນເຫດນັ້ນການຮັກສາສັນຕິພາບ, ສະຖຽນລະພາບ, ການຮ່ວມມື, ການພັດທະນາຢູ່ທະເລຕາເວັນອອກແມ່ນມີປະໂຫຍດ ແລະມີຄວາມຮັບຜິດຊອບລວມຂອງປະຊາຄົມສາກົນ.
|
|
ບັນຍາກາດທີ່ກອງປະຊຸມສໍາມະນາ. ພາບ: ສໍານັກຂ່າວສານຫວຽດນາມ. |
ຈຸດສຸມຂອງກອງປະຊຸມສໍາມະນາໃນວັນທໍາອິດແມ່ນວາລະສະເຫຼີມສະຫຼອງ 25 ປີແຫ່ງວັນເຊັນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982 ມີຜົນສັກສິດ. ບັນດາຜູ້ແທນຕີລາຄາວ່າ, ພາຍຫຼັງ 25 ປີທີ່ມີຜົນສັກສິດ, ສົນທິສັນຍາໄດ້ຜ່ານຜ່າສິ່ງທ້າທາຍຂອງການເວລາ, ພິສູດໄດ້ປະສິດທິຜົນໃນການສ້າງຄວາມເປັນລະບຽບຮຽບຮ້ອຍທາງທະເລ, ສ້າງກອບລະບົບນິຕິກໍາຮອບດ້ານກ່ຽວກັບການຄຸ້ມຄອງທະເລ ແລະສົມເປັນກົດບັດມະຫາສະໝຸດ.
ຄໍາຄິດເຫັນສ່ວນຫຼາຍກໍ່ເນັ້ນໜັກເຖິງບົດບາດສໍາຄັນຂອງອາຊຽນໃນການຊຸກຍູ້ການຮ່ວມມືທາງທະເລ ແລະສ້າງບັນດາກົດແຫ່ງການປະພຶດຕາມກົດໝາຍສາກົນ ແລະສ້າງຄວາມເປັນລະບຽບຮຽບຮ້ອຍໃນການເຄົາລົບກົດໝາຍຢູ່ທະເລຕາເວັນອອກ. ອາຊຽນຕັ້ງໜ້າຊຸກຍູ້ຈີນ ຜັນຂະຫຍາຍຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ໃຫ້ຄົບຖ້ວນ ແລະມີປະສິດທິຜົນ ແລະເຈລະຈາກົດແຫ່ງການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ, ມີປະສິດທິພາບ ແລະຮອບດ້ານ. ອາຊຽນກໍ່ສະໜັບສະໜູນການເຄົາລົບລະບຽບກົດໝາຍ ເພື່ອແນໃສ່ຊອກຫາມາດຕະການສັນຕິພາບ, ຍາວນານ ແລະຮອບດ້ານໃຫ້ແກ່ການຂັດແຍ້ງຢູ່ທະເລຕາເວັນອອກຕາມຂໍ້ກຳນົດຂອງກົດໝາຍສາກົນ, ພິເສດແມ່ນ UNCLOS ປີ 1982...
ໂດຍ: ກວຽດເຕິມ