ສະຖານທູດລັດເຊຍ ລະນຶກວັນປ້ອງກັນປິຕຸພູມ
ກປ.ອອນໄລ - ຕອນຄໍ່າວັນທີ 24 ກຸມພາ, ຢູ່ຮ່າໂນ້ຍ, ທ່ານ Gennady Stepanovich Bezdetko ເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ ແລະທ່ານພັນເອກ Belosludtsev Sergey Vladimirovich ທີ່ປຶກສາທູດປ້ອງກັນຊາດສະຫະພັນລັດເຊຍ ປະຈໍາ ຫວຽດນາມ ໄດ້ຈັດງານລ້ຽງເນື່ອງໃນໂອກາດລະນຶກວັນປ້ອງກັນປິຕຸພູມ ແຫ່ງສະຫະພັນລັດເຊຍ. ທ່ານພົນໂທ ຫງວຽນເຈື່ອງຖັງ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ ເຂົ້າຮ່ວມພິທີ.
ກ່າວຄຳເຫັນທີ່ພິທີ, ທ່ານພົນໂທ ຫງວຽນເຈື່ອງຖັງ ເນັ້ນໜັກວ່າ, ນີ້ແມ່ນໂອກາດເພື່ອໃຫ້ປະຊາຊົນ ລັດເຊຍ ທຸກຄົນອາໄລຫາ ແລະຮູ້ບຸນຄຸນເຖິງພະນັກງານ, ນັກຮົບລຸ້ນຕ່າງໆທີ່ໄດ້ຕໍ່ສູ້ຢ່າງພິລະອາດຫານ, ປະກອບສ່ວນສຳຄັນເຂົ້າໃນໄຊຊະນະອັນສະຫງ່າລາສີໃນສົງຄາມປ້ອງກັນປິຕຸພູມ (1941-1945). ຫວຽດນາມ ຍາມໃດກໍ່ນັບຖືຢ່າງສູງ ແລະຈົດຈໍາການໜູນຊ່ວຍຢ່າງມີປະສິດທິຜົນຂອງສະຫະພາບໂຊວຽດ ໃນເມື່ອກ່ອນ, ປະຈຸບັນແມ່ນ ສະຫະພັນລັດເຊຍ ທີ່ໄດ້ສະຫງວນໃຫ້ປະຊາຊົນ ແລະກອງທັບປະຊາຊົນຫວຽດນາມ ໃນການຕໍ່ສູ້ຍາດເອົາເອກະລາດ, ເສລີພາບ ແລະທ້ອນໂຮມປະເທດຊາດເປັນເອກະພາບ.
    |
 |
|
ທ່ານພົນໂທ ຫງວຽນເຈື່ອງຖັງ ຮອງລັດຖະມົນຕີກະຊວງປ້ອງກັນປະເທດ ແລະທ່ານ Gennady Stepanovich Bezdetko ເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ. ພາບ: ຮ່າເຟືອງ |
ທ່ານພົນໂທ ຫງວຽນເຈື່ອງຖັງ ຢືນຢັນວ່າ, ໃນໄລຍະຜ່ານມາ, ການພົວພັນຮ່ວມມືດ້ານປ້ອງກັນຊາດ ຫວຽດນາມ-ສະຫະພັນລັດເຊຍ ສືບຕໍ່ໄດ້ຮັບການປັບປຸງ ແລະເພີ່ມທະວີສອດຄ່ອງກັບຂອບເຂດການພົວພັນຄູ່ຮ່ວມມືຍຸດທະສາດຮອບດ້ານ. ກະຊວງປ້ອງກັນປະເທດສອງປະເທດ ໄດ້ປະຕິບັດສຳເລັດຫຼາຍການເຄື່ອນໄຫວພົວພັນຕ່າງປະເທດດ້ານປ້ອງກັນຊາດຂັ້ນສູງ, ຄື: ທ່ານລັດຖະມົນຕີກະຊວງປ້ອງກັນປະເທດຫວຽດນາມ ຕິດຕາມໄປນຳທ່ານເລຂາທິການໃຫຍ່ ໂຕເລິມ ຢ້ຽມຢາມສະຫະພັນລັດເຊຍ ຢ່າງເປັນທາງການ ແລະເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນໄຊຊະນະໃນສົງຄາມປ້ອງກັນປິຕຸພູມ; ເປັນປະທານຮ່ວມຄະນະກຳມະການລະຫວ່າງລັດຖະບານ ຫວຽດນາມ-ສະຫະພັນລັດເຊຍ ກ່ຽວກັບການຮ່ວມມືດ້ານເຕັກນິກການທະຫານ; ການເຈລະຈາຍຸດທະສາດດ້ານປ້ອງກັນຊາດຂັ້ນຮອງລັດຖະມົນຕີກະຊວງປ້ອງກັນປະເທດສອງປະເທດ...
|
|
 |
|
ບັນດາຜູ້ແທນຖ່າຍຮູບເປັນທີ່ລະນຶກ. ພາບ: ຮ່າເຟືອງ |
ປີ 2026 ແມ່ນປີທຳອິດຫວຽດນາມ ຜັນຂະຫຍາຍປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກ ແລະກໍ່ເປັນຂີດໝາຍຄົບຮອບ 25 ປີ ທີ່ຫວຽດນາມ ແລະສະຫະພັນລັດເຊຍ ສ້າງຕັ້ງການພົວພັນຄູ່ຮ່ວມມືຍຸດທະສາດ (2001-2026). ທ່ານພົນໂທ ຫງວຽນເຈື່ອງຖັງ ເຊື່ອໝັ້ນວ່າ, ການພົວພັນຮ່ວມມືດ້ານປ້ອງກັນຊາດລະຫວ່າງສອງປະເທດຈະສືບຕໍ່ໄດ້ຮັບການຜັນຂະຫຍາຍຢ່າງມີປະສິດທິຜົນກວ່າອີກ, ສົມກັບຂອບຂະໜາດຂອງການພົວພັນມິດຕະພາບທີ່ເປັນມູນເຊື້ອທີ່ມີມາແຕ່ດົນນານ, ຄູ່ຮ່ວມມືຍຸດທະສາດຮອບດ້ານ ຫວຽດນາມ-ສະຫະພັນລັດເຊຍ.
ໂດຍ: ເຈິ່ນຮວ່ຽນ