ການຮ່ວມມືດ້ານປ້ອງກັນຊາດ ຫວຽດນາມ-ອິນເດຍ ໄດ້ຮັບການເປີດກວ້າງຢ່າງບໍ່ຢຸດຢັ້ງ ແລະເຂົ້າສູ່ລວງເລິກ
ກປ.ອອນໄລ - ຕອນບ່າຍວັນທີ 10 ພະຈິກ, ຢູ່ສໍານັກງານກະຊວງປ້ອງກັນປະເທດ, ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ຕ້ອນຮັບທ່ານ Rajesh Kumar Singh ເລຂານຸການປ້ອງກັນຊາດອິນເດຍ ຢ້ຽມຢາມຫວຽດນາມ ແລະເປັນປະທານຮ່ວມການເຈລະຈານະໂຍບາຍປ້ອງກັນຊາດ ຫວຽດນາມ-ອິນເດຍ ຄັ້ງທີ 15.
    |
 |
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບທ່ານ Rajesh Kumar Singh ເລຂານຸການປ້ອງກັນຊາດອິນເດຍ. ພາບ: qdnd.vn |
ທີ່ການຕ້ອນຮັບ, ທ່ານພົນເອກ ຟານວັນຢາງ ໃຫ້ຮູ້ວ່າ ໃນໄລຍະຜ່ານມາ, ການຮ່ວມມືດ້ານປ້ອງກັນຊາດສອງຝ່າຍ ຫວຽດນາມ-ອິນເດຍ ໄດ້ຮັບການເປີດກວ້າງຢ່າງບໍ່ຢຸດຢັ້ງ, ເຂົ້າສູ່ລວງເລິກ ແລະນັບມື້ນັບນໍາມາເຊິ່ງປະສິດທິຜົນທີ່ແທດຈິງ, ໃນນັ້ນສອງຝ່າຍໄດ້ຕັ້ງໜ້າຜັນຂະຫຍາຍບັນດາເນື້ອໃນການຮ່ວມມືຕາມຂໍ້ຕົກລົງທີ່ໄດ້ລົງນາມ; ຮັກສາກົນໄກປຶກສາຫາລື, ເຈລະຈາ, ພົບປະແລກປ່ຽນນາຍທະຫານໜຸ່ມ; ປະຕິບັດການຮ່ວມມືອົບຮົມຝຶກແອບ, ບໍາລຸງກໍ່ສ້າງຢ່າງມີປະສິດທິຜົນ; ເພີ່ມທະວີການຮ່ວມມືເຫຼົ່າທັບ, ເຫຼົ່າຮົບ; ຮັກສາສັນຕິພາບສະຫະປະຊາຊາດ, ປະສານສົມທົບ ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ...
ທ່ານພົນເອກ ຟານວັນຢາງ ຊົມເຊີຍຜົນການເຈລະຈານະໂຍບາຍປ້ອງກັນຊາດລະຫວ່າງສອງຄະນະ. ຢືນຢັນຄວາມສາມາດບົ່ມຊ້ອນການຮ່ວມມືລະຫວ່າງສອງຝ່າຍແມ່ນໃຫຍ່ຫຼວງ, ທ່ານພົນເອກ ຟານວັນຢາງ ສະເໜີກະຊວງປ້ອງກັນປະເທດສອງປະເທດສຸມໃສ່ຊຸກຍູ້ການພົວພັນມິດຕະພາບ, ຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນກວ່າອີກ, ນໍາການຮ່ວມມືເຂົ້າສູ່ລວງເລິກ, ບັນລຸໄດ້ປະສິດທິຜົນຢ່າງແທດຈິງ.
|
|
 |
|
ບັນດາຜູ້ແທນຖ່າຍຮູບລວມ. ພາບ: qdnd.vn |
ສ່ວນທ່ານ Rajesh Kumar Singh ຢືນຢັນວ່າ ອິນເດຍ ແລະຫວຽດນາມ ມີຫຼາຍຈຸດຄ້າຍຄືກັນທາງດ້ານວັດທະນະທໍາ, ປະຊາຊົນ ແລະປະຫວັດສາດ. ພ້ອມທັງເນັ້ນໜັກວ່າ, ການຮ່ວມມືດ້ານປ້ອງກັນຊາດແມ່ນກຳລັງໜູນອັນສໍາຄັນໃນການພັດທະນາການພົວພັນລະຫວ່າງສອງປະເທດ.
ທ່ານ Rajesh Kumar Singh ເຊື່ອໝັ້ນວ່າ, ການເຈລະຈານະໂຍບາຍປ້ອງກັນຊາດຈະແມ່ນພື້ນຖານອັນສໍາຄັນເພື່ອໃຫ້ສອງປະເທດສືບຕໍ່ຊຸກຍູ້ການພົວພັນຮ່ວມມືສອງຝ່າຍໃຫ້ພັດທະນາຢ່າງແຂງແຮງກວ່າອີກໃນໄລຍະຈະມາເຖິງ.
ໂດຍ: ເຈິ່ນຮວ່ຽນ