ຫວຽດນາມ-ກູບາ: ສອງຫົວໃຈເຕັ້ມຈັງຫວະດຽວ

ຜ່ານການທົດສອບທຸກຢ່າງຂອງສະຖານະການ, ຄວາມຫ່າງໄກກັນທາງດ້ານພູມສາດ ແລະຄວາມແຕກຕ່າງກັນດ້ານພາສາ, ຫວຽດນາມ ແລະກູບາ ຍາມໃດກໍ່ສະຫງວນນ້ຳໃຈອັນເລິກເຊິ່ງ, ຈິງໃຈ, ສາມັກຄີ ແລະບໍລິສຸດຜຸດຜ່ອງໃຫ້ກັນ.

ນັບແຕ່ວັນສ້າງຕັ້ງການພົວພັນທາງການທູດໃນວັນທີ 2 ທັນວາ 1960, ການພົວພັນ ຫວຽດນາມ-ກູບາ ໂດຍປະທານໂຮ່ຈີມິນ ແລະຜູ້ນຳ Fidel Castro ສ້າງພື້ນຖານ ເຊິ່ງຍາມໃດການນຳພັກ, ລັດ, ກອງທັບ ແລະປະຊາຊົນຮຸ່ນຕ່າງໆຂອງສອງປະເທດ ກໍ່ເພີ່ມພູນຄູນສ້າງຢ່າງບໍ່ຢຸດຢັ້ງ. ເພື່ອເກັບຮັກສາຄວາມຊົງຈຳກ່ຽວກັບປະຫວັດສາດ, ສຶກສາໃຫ້ປະຊາຊົນ, ກອງທັບຮຸ່ນຕ່າງໆຂອງສອງປະເທດ, ໂດຍສະເພາະແມ່ນຄົນຮຸ່ນໜຸ່ມ, ກ່ຽວກັບການພົວພັນຫວຽດນາມ-ກູບາ, ກະຊວງປ້ອງກັນປະເທດຫວຽດນາມ ແລະກະຊວງບັນດາກຳລັງປະກອບອາວຸດປະຕິວັດກູບາ ໄດ້ປະສານສົມທົບກັນກໍ່ສ້າງສຳເນົາເອກະສານປະຫວັດສາດກ່ຽວກັບ 60 ປີແຫ່ງວັນສ້າງຕັ້ງການພົວພັນດ້ານປ້ອງກັນຊາດຫວຽດນາມ-ກູບາ (1960-2020). “ສອງຫົວໃຈເຕັ້ນຈັງຫວະດຽວ” ແມ່ນຮູບເງົາເອກະສານຂອງສຳເນົາເອກະສານ ເຊິ່ງທ່ານພົນໂທ ຫງວຽນຈີວິ້ງ, ໄລຍະນັ້ນແມ່ນກຳມະການສູນກາງພັກ, ກຳມະການຄະນະພັກການທະຫານສູນກາງ, ຮອງລັດຖະມົນຕີກະຊວງປ້ອງກັນປະເທດ ໄດ້ມອບໜ້າທີ່ເປັນ ຫົວໜ້າຄະນະຊີ້ນຳການກໍ່ສ້າງ.

ທຸງຊາດສອງປະເທດຫວຽດນາມ ແລະກູບາ ຢູ່ ສວນສາທາລະນະ Fidel Castro, ນະຄອນດົງຮ່າ, ແຂວງກວາງຈິ້, ຫວຽດນາມ, ເດືອນມີຖຸນາ 2020. ພາບ: qdnd.vn

ໂດຍປະຕິບັດຕາມຂໍ້ຕົກລົງລະຫວ່າງກະຊວງປ້ອງກັນປະເທດຫວຽດນາມ ແລະກະຊວງບັນດາກຳລັງປະກອບອາວຸດປະຕິວັດກູບາ, ກົມໃຫຍ່ການເມືອງກອງທັບປະຊາຊົນຫວຽດນາມ ໄດ້ຊີ້ນຳກົມໂຄສະນາອົບຮົມ ແລະສະຖານີກະຈາຍສຽງ-ໂທລະພາບກອງທັບ ຈັດທີມງານສ້າງຮູບເງົາລວມມີຜູ້ກຳກັບ, ນັກຖ່າຍທຳຮູບເງົາ, ຜູ້ແຕ່ງຮູບເງົາເອກະສານແຖວໜ້າຂອງຮຸ່ນໜຸ່ມຫວຽດນາມ, ປະສານສົມທົບຢ່າງແໜ້ນແຟ້ນກັບບັນດາສະຫາຍຂອງກະຊວງບັນດາກຳລັງປະກອບອາວຸດປະຕິວັດກູບາ ເພື່ອຜະລິດຮູບເງົາ.

ໂດຍໄດ້ຮັບການປະຕິບັດຢ່າງລະອຽດ, ຮູບເງົາໄດ້ຮັບການສະໜັບສະໜູນ, ການຊ່ວຍເຫຼືອຈາກຫຼາຍຄົນທີ່ສະໜິດຕິດພັນກັບກູບາ ແລະມີການພົວພັນຫວຽດນາມ-ກູບາ ເປັນເວລາຍາວ. ທ່ານພັນເອກ ດັ້ງບາວຈູງ, ຫົວໜ້າທີມງານຮູບເງົາ ແບ່ງປັນວ່າ “ທ່ານພົນໂທ Álvaro López Miera, ກໍາມະການກົມການເມືອງພັກກອມມູນິດກູບາ, ລັດຖະມົນຕີກະຊວງບັນດາກຳລັງ ປະກອບອາວຸດປະຕິວັດ ກູບາ ແລະທ່ານພົນໂທ ຫງວຽນຈີວິ້ງ ແມ່ນຜູ້ທີ່ເອົາໃຈໃສ່ ແລະມີຄວາມສຸດອົກສຸດໃຈຕໍ່ຮູບເງົາ “ສອງຫົວໃຈເຕັ້ນຈັງຫວະດຽວ”. ເຖິງວ່າໄດ້ກິນບຳນານແລ້ວ, ແຕ່ທ່ານພົນໂທ ຫງວຽນຈີວິ້ງ ຍັງສືບຕໍ່ປະກອບຄຳເຫັນ, ໃຫ້ຄຳປຶກສາອັນລ້ຳຄ່າຕໍ່ກັບທີມຖ່າຍທຳຮູບເງົາ. ເມື່ອມາ ຮ່າໂນ້ຍ ເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024, ທ່ານພົນໂທ Álvaro López Miera ເອກອ້າງທະນົງໃຈແນະນຳວ່າພັນລະຍາຂອງທ່ານລັດຖະມົນຕີ ກໍ່ເຂົ້າຮ່ວມການຜະລິດຮູບເງົາເອກະສານ ແລະເນັ້ນໜັກວ່າ ທ່ານພົນໂທ ຫງວຽນຈີວິ້ງ ແມ່ນອ້າຍນ້ອງຂອງທ່ານ”.

ທີມຜະລິດຮູບເງົາຖ່າຍຮູບເປັນທີ່ລະນຶກຢູ່ກອງບັນຊາການ La Plata ຢູ່ຖານທີ່ໝັ້ນ Sierra Maestra, ກູບາ, ໃນເດືອນກໍລະກົດ 2024. ພາບ: qdnd.vn

ເດືອນມີນາ 2023, ທີ່ສຳນັກງານກະຊວງບັນດາກຳລັງປະກອບອາວຸດ ປະຕິວັດກູບາ ຢູ່ ລາຮາວານ, ຄະນະປະຕິບັດງານຂອງກະຊວງປ້ອງກັນປະເທດຫວຽດນາມ ໄດ້ດຳເນີນການມອບ-ຮັບ ຮູບເງົາພາກທີ 1. ໃນຂອບເຂດການຢ້ຽມຢາມ ກູບາ ຢ່າງເປັນທາງການ, ວັນທີ 9 ຕຸລາ 2024, ທ່ານພົນໂທ ຈິ້ງວັນກວຽດ, ເລຂາທິການສູນກາງພັກ, ກຳມະການຄະນະພັກການທະຫານສູນກາງ, ຫົວໜ້າກົມໃຫຍ່ການເມືອງກອງທັບປະຊາຊົນ ຫວຽດນາມ ພ້ອມດ້ວຍຄະນະຜູ້ແທນພະນັກງານການເມືອງຂັ້ນສູງກອງທັບປະຊາຊົນ ຫວຽດນາມ ໄດ້ໄປຢ້ຽມຢາມສະຖາບັນການທະຫານຂັ້ນສູງກະຊວງບັນດາກຳລັງປະກອບອາວຸດປະຕິວັດ ກູບາ ແລະເຂົ້າຮ່ວມພິທີສາຍຮູບເງົາ, ມອບ-ຮັບຮູບເງົາພາກທີ 2 ແລະພາກທີ 3. ທີ່ເຫດການ, ທ່ານພົນໂທ Álvaro López Miera ລ້ວນແຕ່ໃຫ້ຂໍ້ສັງເກດວ່າ ຮູບເງົາຈະສືບຕໍ່ປະກອບສ່ວນເຮັດໃຫ້ການພົວພັນລະຫວ່າງສອງປະເທດ, ສອງກອງທັບເລິກເຊິ່ງຕື່ມອີກ ແລະແມ່ນຂົວຕໍ່ເພື່ອຄົນຮຸ່ນຫຼັງສືບຕໍ່ກໍ່ສ້າງ ແລະພັດທະນານ້ຳໃຈສາມັກຄີແບບພິເສດ, ໜັກແໜ້ນ, ຫາຍາກ.

ແບ່ງປັນກ່ຽວກັບຮູບເງົາ, ທ່ານ ຮສຈ, ປອ ບຸ່ຍຈິ໊ຈູງ ເນັ້ນໜັກວ່າ “ມັນຖືກກັບຊື່ເອີ້ນຂອງຮູບເງົາ, ການພົວພັນແບບພິເສດຫວຽດນາມ-ກູບາ ປຽບເໝືອນເພື່ອນຜູ້ສະໜິດສະໜົມ ແລະເຂົ້າໃຈກັນ, ເຖິງວ່າຢູ່ຫ່າງໄກກັນເຄິ່ງໜ່ວຍພິພົບກໍ່ຕາມ, ແຕ່ຍາມໃດກໍ່ຄຽງບ່າຄຽງໄຫຼ່ກັນ. ພວກເຮົາຍາມໃດກໍ່ເອກອ້າງທະນົງໃຈຕໍ່ເພື່ອນຜູ້ທີ່ບໍລິສຸດຜຸດຜ່ອງ, ສະເໝີຕົ້ນສະເໝີປາຍ, ໃນໄລຍະປະສົບກັບຄວາມຫຍຸ້ງຍາກ, ລຳບາກກາກກຳ ກໍ່ຄືໃນວິວັດທະນາການກ້າວຂຶ້ນທາງໜ້າ. ຮູບເງົາສະແດງໃຫ້ເຫັນບຸກຄະລິກກະພາບຂອງຊາວຫວຽດນາມ ແລະກູບາ, ຢັ້ງຢືນການອຸທິສ່ວນຂອງຄົນຮຸ່ນກ່ອນ ແລະບຸກລຸກຄົນຮຸ່ນໜຸ່ມໃຫ້ມີຄວາມເອກອ້າງທະນົງໃຈ, ມີແນວຄວາມຄິດປ່ຽນແປງໃໝ່ປະດິດສ້າງເພື່ອພັດທະນາການພົວພັນຫວຽດນາມ-ກູບາ”.

ການພົວພັນຫວຽດນາມ-ກູບາ ໄດ້ຮັບຖືວ່າແມ່ນຊັບສົບບັດອັນລ້ຳຄ່າຂອງສອງຊາດ ແລະຕ້ອງຮັກສາແຕ່ຮຸ່ນນີ້ມາສູ່ຮຸ່ນຕໍ່ໄປ. ດ້ວຍເນື້ອໃນເລິກເຊິ່ງ, ມີກຳລັງແຜ່ຂະຫຍາຍ ແລະຮູບພາບຕົວຈິງ, ຮູບເງົາເອກະສານ “ສອງຫົວໃຈເຕັ້ນຈັງຫວະດຽວ” ຈະຊ່ວຍປະຊາຊົນສອງປະເທດ, ພິເສດແມ່ນຄົນຮຸ່ນໜຸ່ມເຂົ້າໃຈຢ່າງຈະແຈ້ງກ່ຽວກັບໄລຍະທາງພັດທະນາການພົວພັນສາມັກຄີທີ່ເປັນມູນເຊື້ອ, ມິດຕະພາບແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ, ໃນນັ້ນການຮ່ວມມືດ້ານປ້ອງກັນຊາດແມ່ນເສົາຄ້ຳສຳຄັນ.

ພາກທີ 4 ແລະພາກທີ 5 ຂອງຮູບເງົາເອກະສານ “ສອງຫົວໃຈເຕັ້ນຈັງຫວະດຽວ” ໄດ້ອອກອາກາດໃນເວລາ 20 ໂມງ 50 ນາທີຂອງວັນທີ 31 ທັນວາ 2024 ແລະ 1 ມັງກອນ 2025 ຢູ່ຊ່ອງໂທລະພາບປ້ອງກັນຊາດຫວຽດນາມ. ເນື່ອງໃນໂອກາດສະເຫຼີມສະຫຼອງ 66 ປີແຫ່ງວັນຊາດ ກູບາ (1-1-1959 / 1-1-2025) ແລະສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ກູບາ (1960-2025), ວັນທີ 1 ມັງກອນ 2025, ສະຖານທູດ ກູບາ ປະຈຳ ຮ່າໂນ້ຍ ຈັດຕັ້ງງານວາງສະແດງຢູ່ກາງແຈ້ງບັນດາຮູບພາບທີ່ໄດ້ຖ່າຍໃນວິວັດທະນາການຜະລິດຮູບເງົາເອກະສານ “ສອງຫົວໃຈເຕັ້ນຈັງຫວະດຽວ”.

ໂດຍ: ແສງເດືອນ