ການຮ່ວມມືດ້ານປ້ອງກັນຊາດ ແມ່ນເສົາຄໍ້າສຳຄັນໃນການພົວພັນ ຫວຽດນາມ-ສະຫະພັນ ລັດເຊຍ

ທ່ານພົນເອກ ຫງວຽນເຕິນເກືອງ ຮອງລັດຖະມົນຕີກະຊວງປ້ອງກັນປະເທດ ຕ້ອນຮັບທ່ານ Aleksandr Kurenkov ລັດຖະມົນຕີກະຊວງສະຖານະການສຸກເສີນສະຫະພັນລັດເຊຍ. ພາບ: ຮວ່າງຫວູ

ຕາມທ່ານພົນເອກ ຫງວຽນເຕິນເກືອງ ແລ້ວ, ການຮ່ວມມືດ້ານປ້ອງກັນຊາດສອງຝ່າຍໃນໄລຍະຜ່ານມາສືບຕໍ່ຜັນຂະຫຍາຍຢ່າງມີປະສິດທິຜົນບົນຈິດໃຈຄວາມໄວ້ເນື້ອເຊື່ອໃຈ, ແທດຈິງ, ຮອບດ້ານ, ສົມເປັນເສົາຄໍ້າສຳຄັນໃນການພົວພັນ ຫວຽດນາມ-ສະຫະພັນລັດເຊຍ, ບັນລຸໄດ້ໝາກຜົນອັນດີງາມໃນຫຼາຍຂົງເຂດ, ຄື: ແລກປ່ຽນຄະນະຜູ້ແທນ, ເປັນຕົ້ນແມ່ນຂັ້ນສູງ; ການບໍາລຸງສ້າງ, ການຝຶກແອບ; ການຮ່ວມມືເຫຼົ່າທັບ-ເຫຼົ່າຮົບ; ຄົ້ນຄວ້າວິທະຍາສາດໃນຂອບເຂດຂອງສູນເຂດຮ້ອນ ຫວຽດນາມ-ລັດເຊຍ...

ທ່ານພົນເອກ ຫງວຽນເຕິນເກືອງ ປາດຖະໜາວ່າ ໃນໄລຍະຈະມາເຖິງ, ສອງຝ່າຍຈະສືບຕໍ່ຊຸກຍູ້ການຮ່ວມມື, ສຸມໃສ່ແລກປ່ຽນຄະນະຜູ້ແທນທຸກຂັ້ນ, ການບໍາລຸງສ້າງ, ແບ່ງປັນ, ແລກປ່ຽນບົດຮຽນກ່ຽວກັບການປ້ອງກັນພົນລະເຮືອນ, ສະກັດກັ້ນ, ຮັບມື, ຄຸ້ມຄອງສະພາວະສຸກເສີນ, ສຳຫຼວດ, ຊອກຮູ້ກ່ຽວກັບອຸປະກອນຊອກຫາກູ້ຊີບກູ້ໄພ… ເນື່ອງໃນໂອກາດນີ້, ທ່ານພົນເອກ ຫງວຽນເຕິນເກືອງ ໄດ້ເຊື້ອເຊີນຄະນະຜູ້ແທນຂັ້ນສູງ ແລະວິສາຫະກິດອຸດສາຫະກຳປ້ອງກັນຊາດຂອງສະຫະພັນລັດເຊຍ ເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2026.

ທ່ານພົນເອກ ຫງວຽນເຕິນເກືອງ ຮອງລັດຖະມົນຕີກະຊວງປ້ອງກັນປະເທດ ມອບຂອງຂວັນໃຫ້ແກ່ທ່ານ Aleksandr Kurenkov ລັດຖະມົນຕີກະຊວງສະຖານະການສຸກເສີນສະຫະພັນລັດເຊຍ. ພາບ: ຮວ່າງຫວູ

ສ່ວນທ່ານລັດຖະມົນຕີ Aleksandr Kurenkov ໄດ້ຕີລາຄາສູງຜົນການຮ່ວມມືຢ່າງຕັ້້ງໜ້າໃນໄລຍະຜ່ານມາລະຫວ່າງສະຫະພັນລັດເຊຍ ແລະຫວຽດນາມ ກ່ຽວກັບການປ້ອງກັນພົນລະເຮືອນ, ສະກັດກັ້ນ, ຮັບມື, ຄຸ້ມຄອງສະພາວະສຸກເສີນ, ຊອກຫາກູ້ຊີບກູ້ໄພ; ຢືນຢັນວ່າສອງປະເທດຍັງມີຄວາມສາມາດບົ່ມຊ້ອນຮ່ວມມືຫຼາຍຢ່າງໃນຂົງເຂດນີ້; ເຫັນດີຕໍ່ເນື້ອໃນຮ່ວມມື ເຊິ່ງກະຊວງປ້ອງກັນປະເທດຫວຽດນາມ ສະເໜີ; ສະແດງຄວາມປາດຖະໜາຢາກໃນໄລຍະຈະມາເຖິງ, ສອງຝ່າຍຈະສືບຕໍ່ສົມທົບກັນ, ເປີດກວ້າງການຮ່ວມມືຕາມຄວາມຮຽກຮ້ອງຕ້ອງການ ແລະຜົນປະໂຫຍດຂອງແຕ່ລະຝ່າຍ, ໃນນັ້ນສຸມໃສ່ແບ່ງປັນບົດຮຽນໃນການຜັນຂະຫຍາຍກຳລັງແພດທະຫານໃນການເຄື່ອນໄຫວກູ້ຊີບກູ້ໄພ, ຜ່ານນັ້ນປະກອບສ່ວນຊຸກຍູ້ການພົວພັນສອງຝ່າຍນັບມື້ນັບພັດທະນາຢ່າງດີງາມ.

ໂດຍ: ເຈິ່ນຮວ່ຽນ