ກອງທັບປະຊາຊົນຫວຽດນາມ ພ້ອມກັບໂລກສ້າງສັນຕິພາບ

ຕັດແຖບຜ້າເປີດບັນດາກິດຈະການໂດຍກອງຊ່າງແສງຫວຽດນາມ ກໍ່ສ້າງມອບໃຫ້ໂຮງຮຽນມັດທະຍົມຕອນປາຍ  Abyei. ພາບ: qdnd.vn

ໃນ 80 ປີຜ່ານມາ, ຍາມໃດກອງທັບປະຊາຊົນຫວຽດນາມ ກໍ່ແມ່ນກຳລັງຫຼັກແຫຼ່ງພ້ອມກັບທົ່ວພັກ, ທົ່ວປວງຊົນສ້າງບັນດາວິລະກຳອັນສະຫງ່າອົງອາດໃນພາລະກິດຕໍ່ສູ້ປົດປ່ອຍຊາດ, ຍາດເອົາເອກະລາດ, ເສລີພາບ, ທ້ອນໂຮມປະເທດຊາດເປັນເອກະພາບ, ສ້າງສາ ແລະປົກປັກຮັກສາປະເທດຊາດ. ພ້ອມກັບການປົກປັກຮັກສາປະເທດຊາດ, ກອງທັບປະຊາຊົນຫວຽດນາມ ກໍ່ໄດ້ປະຕິບັດຫຼາຍພັນທະສາກົນ, ປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບຢ່າງໝັ້ນແກ່ນເພື່ອພັດທະນາ, ພ້ອມກັນສ້າງສັນຕິພາບ.

ປະຕິບັດພັນທະສາກົນ

ໂຮງຮຽນມັດທະຍົມຕອນປາຍ Abyei ຕັ້ງຢູ່ໃກ້ກັບຖານທີ່ໝັ້ນຂອງກອງຊ່າງແສງຫວຽດນາມ ຂຶ້ນກັບຄະນະປະຕິບັດງານຮັກສາສັນຕິພາບ ສປຊ ຢູ່ Abyei, ເຂດທີ່ມີຄວາມຂັດແຍ່ງກັນລະຫວ່າງ ສ.ຊູດັງ ແລະ ສ.ຊູດັງໃຕ້. ອາຈານ Satino, ຜູ້ອຳນວຍການໂຮງຮຽນ ໃຫ້ຮູ້ວ່າ ພວກຂ້າພະເຈົ້າ ບໍ່ມີຫໍສະໝຸດ ແລະຂາດໂຕະ, ຕັ່ງ. ມີບາງຫ້ອງຮຽນ, ນັກຮຽນຕ້ອງເອົາໂຕະ, ຕັ່ງມາຫ້ອງຮຽນ, ເລິກຮຽນກໍ່ເອົາເມືອບ້ານ. ຫ້ອງຮຽນກໍ່ຂາດເຊັ່ນດຽວກັນ. ພວກຂ້າພະເຈົ້າຢາກມີຫ້ອງຮຽນຕື່ມອີກ 3 ຫ້ອງ.

ໂດຍໄດ້ຮູ້ບັນດາຄວາມຫຍຸ້ງຍາກດັ່ງກ່າວ, ກອງທະຫານຊ່າງແສງເລກ 1 ຫວຽດນາມ ໄດ້ໃຊ້ແກັດໄມ້ທີ່ບັນຈຸເຄື່ຶອງເພື່ອເຮັດໂຕະ, ຕັ່ງໃຫ້ນັກຮຽນທ້ອງຖິ່ນ, ສະໜອງຊີແຕັກນ້ຳສະອາດ, ຂຸດນ້ຳສ້າງ, ສ້າງຫ້ອງຮຽນໃໝ່ຕື່ມອີກ. ນັກຮຽນຍິງຜູ້ໜຶ່ງໄດ້ແບ່ງປັນດ້ວຍຄວາມມ່ວນຊື່ນວ່າ: ຫ້ອງຮຽນງາມຫຼາຍ, ພວກຫຼານຂໍຂອບໃຈການຊ່ວຍເຫຼືອຂອງທະຫານຫວຽດນາມ. ພວກຫຼານ ມີຄວາມພາກພູມໃຈທີ່ສຸດເມື່ອໄດ້ຮຽນໃນຫ້ອງຮຽນໃໝ່ນີ້.

ພັນເອກພິເສດ ມາກຈ້ອງດຶກ, ຮອງຫົວໜ້າກົມຮັກສາສັນຕິພາບຫວຽດນາມ ພ້ອມກັບບັນດາສະມາຊິກກອງຊ່າງແສງເລກ 3 ມອບຂອງຂວັນໃຫ້ພວກຫຼານນັກຮຽນຢູ່ໂບດ Abyei. ພາບ: qdnd.vn

ມີຫ້ອງຮຽນໃໝ່ທີ່ໃຫຍ່ໂຕ ແລະສວຍງາມແຕ່ເສັ້ນທາງໄປໂຮຽງຮຽນຍັງເປັນຕົມເປັນບວກພາຍຫຼັງທີ່ຖືກນ້ຳຖ້ວມ. ສິ່ງດັ່ງກ່າວໄດ້ກະຕຸກຊຸກຍູ້ບັນດາທະຫານຂອງກອງທະຫານຊ່າງແສງຫວຽດນາມ ເປີດເສັ້ນທາງໄປໂຮງຮຽນໃຫ້ພວກນ້ອງ.

ຮ້ອຍເອກ ຫງວຽນຈີຢຸງ, ກອງຊ່າງແສງເລກ 1 ຫວຽດນາມ ຢູ່ Abyei, ແບ່ງປັນວ່າ: ເມື່ອພວກຂ້າພະເຈົ້າ ໄປຜ່ານເຂດຊຸມຊົນຕ່າງໆ ລ້ວນແຕ່ໄດ້ຮັບຮອຍຍີ້ມທີ່ເປັນມິດຂອງປະຊາຊົນ, ພວກຂ້າພະເຈົ້າຮູ້ສຶກມີຄວາມສຸກທີ່ສຸດ.

Abyei ແມ່ນໜຶ່ງໃນບັນດາແຫ່ງທີ່ບັນດານັກຮົບກອງທັບປະຊາຊົນຫວຽດນາມ ໄດ້ປະຕິບັດພັນທະສັນຕິພາບສາກົນໃນໄລຍະສັນຕິພາບ. ພາຍຫຼັງໄລຍະກວ່າ 10 ປີທີ່ໄດ້ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ, ມາຮອດປະຈຸບັນ, ຫວຽດນາມ ໄດ້ສົ່ງນາຍທະຫານ, ທະຫານອາຊີບເກືອບ 1.100 ເທື່ອຄົນ ໄປເຮັດໜ້າທີ່ຢູ່ບັນດາຄະນະຜູ້ຕາງໜ້າ. ນີ້ແມ່ນຫຼັກຖານສະແດງໃຫ້ເຫັນຄຳໝັ້ນສັນຍາ ແລະຄວາມຮັບຜິດຊອບຂອງຫວຽດນາມ ທີ່ມີຕໍ່ປະຊາຄົມສາກົນໃນການຮັກສາສັນຕິພາບ ແລະຄວາມໝັ້ນຄົງທົ່ວໂລກດ້ວຍຈິດໃຈ “ຫວຽດນາມ ຢາກເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງວົງຄະນາຍາດສາກົນ”.

ໂດຍໄດ້ຕັ້ງໜ້າເຂົ້າຮ່ວມໜ້າທີ່ຮັກສາສັນຕິພາບຂອງ ສປຊ, ບັນດານັກຮົບກອງທັບປະຊາຊົນຫວຽດນາມ ໄດ້ສະແດງໃຫ້ເຫັນຄຸນນະທາດອັນສູງສົ່ງສ້າງເປັນບຸກຄະລິກອັນດີງາມຂອງທະຫານລຸງໂຮ່ ແລະມູນເຊື້ອອັນສະຫງ່າລາສີຂອງກອງທັບປະຊາຊົນຫວຽດນາມ ເມື່ອພ້ອມແລ້ວທີ່ຈະປະກອບສ່ວນເຂົ້າໃນຊີວິດແຫ່ງສັນຕິພາບຂອງມວນມະນຸດ.

ຊຸກຍູ້ການຮ່ວມມື ແລະເຊື່ອມໂຍງເພື່ອພ້ອມກັນສ້າງສັນຕິພາບ

ເພື່ອຮັກສາສະພາບແວດລ້ອມແຫ່ງສັນຕິພາບຮັບໃຊ້ເປົ້າໝາຍພັດທະນາປະເທດຊາດ, ກອງທັບປະຊາຊົນຫວຽດນາມ ບໍ່ພຽງແຕ່ເຮັດໜ້າທີ່ສ້າງສາ ແລະປົກປັກຮັກສາປະເທດເປັນຢ່າງດີເທົ່ານັ້ນ, ຫາກຍັງຕັ້ງໜ້າຜັນຂະຫຍາຍບັນດາການເຄື່ອນໄຫວຮ່ວມມືກັບກອງທັບປະເທດຕ່າງໆອີກດ້ວຍ.

ພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ແລະພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ກັບບັນດາພະນັກງານ, ນັກຮົບຄ້າຍທະຫານຊາຍແດນລ໊ອງເຊິບ (ວັນທີ 22  ຕຸລາ 2024). ພາບ: qdnd.vn

ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ລາວ ຄັ້ງທີ 2 ຈັດຂຶ້ນໃນທ້າຍເດືອນຕຸລາຜ່ານມາດ້ວຍຫຼາຍກິດຈະກຳ, ຄື: ເຄົາລົບ, ທາສີເສົາຫຼັກໝາຍອະທິປະໄຕ, ປູກຕົ້ນໄມ້ມິດຕະພາບ, ລາດຕະເວນຮ່ວມ, ເປີດນຳໃຊ້ບັນດາກິດຈະກຳມິດຕະພາບ… ບັນດາກິດຈະກຳໄດ້ສ້າງຄວາມປະທັບໃຈກ່ຽວກັບນ້ຳໃຈມິດຕະພາບ, ຄວາມສາມັກຄີລະຫວ່າງກອງທັບ ແລະປະຊາຊົນສອງປະເທດ. ທ່ານພັນເອກ ວຽງໄຊ ສຸລິວົງ, ທີ່ປຶກສາທູດປ້ອງກັນຊາດລາວ ປະຈຳ ຫວຽດນາມ ຢືນຢັນວ່າ ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ແມ່ນໜຶ່ງໃນບັນດາການເຄື່ອນໄຫວພົວພັນຕ່າງປະເທດປ້ອງກັນຊາດສອງຝ່າຍທີ່ສຳຄັນແຖວໜ້າຂອງສອງປະເທດໃນປີນີ້, ມີຄວາມໝາຍສຳຄັນທີ່ສຸດເພື່ອສືບຕໍ່ຈັດຕັ້ງ ແລະຜັນຂະຫຍາຍການປະຕິບັດເນື້ອໃນຂອງແຜນການຮ່ວມມືລະຫວ່າງສອງກະຊວງປ້ອງກັນປະເທດ. ພ້ອມທັງສືບຕໍ່ເສີມຂະຫຍາຍມູນເຊື້ອສາມັກຄີ ແລະການຮ່ວມມືຮອບດ້ານລະຫວ່າງ ສອງພັກ, ສອງກອງທັບ ຫວຽດນາມ-ລາວ ໃຫ້ນັບມື້ນັບໜັກແໜ້ນ ແລະພັດທະນາຢ່າງແຮງ.

ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ໄດ້ຈັດຂຶ້ນເປັນປະຈຳກາຍເປັນຮູບແບບຮ່ວມມືຢ່າງມີປະສິດທິຜົນລະຫວ່າງຫວຽດນາມ ກັບບັນດາປະເທດບ້ານໃກ້ເຮືອນຄຽງ. ທ່ານພົນໂທ ຮວ່າງຊວນຈ໊ຽນ ຮອງລັດຖະມົນຕີກະຊວງປ້ອງກັນປະເທດຫວຽດນາມ ຢືນຢັນວ່າ ຜົນສຳເລັດຂອງການພົບປະແລກປ່ຽນຄັ້ງຕ່າງໆໄດ້ສະແດງໃຫ້ເຫັນຄວາມຕັດສິນໃຈດ້ານການເມືອງຂອງຄະນະພັກການທະຫານສູນກາງ ແລະກະຊວງປ້ອງກັນປະເທດຫວຽດນາມ, ບັນດາທ້ອງຖິ່ນ, ເປັນຕົ້ນແມ່ນ ປະຊາຊົນ ແລະກຳລັງປ້ອງກັນຊາຍແດນຂອງຫວຽດນາມ ກັບປະເທດບ້ານໃກ້ເຮືອນຄຽງທີ່ຮ່ວມເສັ້ນຊາຍແດນທາງບົກ, ໃນການເພີ່ມທະວີນ້ຳໃຈສາມັກຄີມິດຕະພາບ, ຊຸກຍູ້ການຮ່ວມມືຢ່າງແທດຈິງ, ພ້ອມກັນສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະພັດທະນາ.

ນະໂຍບາຍປ້ອງກັນຊາດ ເພື່ອເປົ້າໝາຍສັນຕິພາບ

ດ້ວຍແນວທາງອັນຖືກຕ້ອງ ແລະບາກກ້າວເດີນທີ່ເໝາະສົມ, ການທູດປ້ອງກັນຊາດ ໄດ້ສ້າງບັນດາກົນໄກເພື່ອໃຫ້ກອງທັບປະຊາຊົນຫວຽດນາມ ແລະບັນດາປະເທດທີ່ກ່ຽວຂ້ອງສາມາດແກ້ໄຂສິ່ງທ້າທາຍ, ຮັດແຄບຄວາມແຕກຕ່າງກັນບົນຈິດໃຈແກ້ໄຂບັນຫາໂດຍສັນຕິວິທີ, ດ້ວຍການເຈລະຈາ ແລະຄວາມເຂົ້າອົກເຂົ້າໃຈຊື່ງກັນ ແລະກັນ.

ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ຢືນຢັນວ່າ ຫວຽດນາມ ໄດ້ປະຕິບັດນະໂຍບາຍປ້ອງກັນຊາດ 4 ບໍ່: ບໍ່ຮ່ວມສຳພັນດ້ານການທະຫານ, ບໍ່ຮ່ວມກັບປະເທດນີ້ເພື່ອຕ້ານຄືນປະເທດອື່ນ, ບໍ່ແກ້ໄຂບັນຫາດ້ວຍມາດຕະການທະຫານ ແລະບໍ່ໃຫ້ບັນດາອົງການທະຫານຂອງປະເທດຕ່າງໆຕັ້ງຖານທີ່ໝັ້ນໃນປະເທດຂອງຕົນ. ນີ້ແມ່ນແນວທາງທີ່ຖືກຕ້ອງເພື່ອໃຫ້ຫວຽດນາມ ຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດ.

ການຝຶກຊ້ອມກະກຽມໃຫ້ງານວາງສະແດງປ້ອງກັນຊາດສາກົນຫວຽດນາມ ປີ 2024. ພາບ: qdnd.vn

ກ່າວຄຳເຫັນທີ່ສູນຄົ້ນຄວ້າຍຸດທະສາດ ແລະສາກົນອາເມລິກາ ປີ 2022, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກໍ່ຊີ້ແຈ້ງວ່າ: ລະຫວ່າງການເຈລະຈາ ແລະການສູ້ຢັນກັນ, ພວກຂ້າພະເຈົ້າ ເລືອກເອົາການເຈລະຈາ. ລະຫວ່າງການໂອ້ລົມສົນທະນາ ແລະການປະທະກັນ, ພວກຂ້າພະເຈົ້າ ເລືອກເອົາການໂອ້ລົມສົນທະນາ. ລະຫວ່າງສັນຕິພາບ ແລະສົງຄາມ, ພວກຂ້າພະເຈົ້າ ເລືອກເອົາສັນຕິພາບ. ໃນໂລກທີ່ເຕັມໄປດ້ວຍການຜັນແປ, ແກ້ງແຍ້ງຍຸດທະສາດ ແລະການເລືອກເຟັ້ນຫຼາຍຢ່າງນັ້ນ, ຫວຽດນາມ ຈະບໍ່ເລືອກຝ່າຍ, ຫາກເລືອກຄວາມເປັນທຳ, ຄວາມຍຸດຕິທຳ, ສະເໝີພາບ, ຄວາມຖືກຕ້ອງ, ບົນພື້ນຖານບັນດາຫຼັກການຂອງກົດໝາຍສາກົນ.

ທັດສະນະຂອງຫວຽດນາມ ໄດ້ຮັບການສະໜັບສະໜູນ ແລະຕີລາຄາສູງຈາກປະເທດຕ່າງໆ. ທ່ານພັນເອກ Thomas Stevenson, ອະດີດທີ່ປຶກສາປ້ອງກັນຊາດອາເມລິກາ ປະຈຳ ຫວຽດນາມ ຖືວ່າ: ການປະຕິບັດນະໂຍບາຍການທູດປ້ອງກັນຊາດ 4 ບໍ່ ໄດ້ຊ່ວຍໃຫ້ຫວຽດນາມ ພັດທະນາຢ່າງແຮງ. ມາຮອດປະຈຸບັນ, ຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານກັບເກືອບທຸກປະເທດມະຫາອຳນາດ, ມີການພົວພັນທີ່ດີກັບບັນດາປະເທດມະຫາອຳນາດ ແລະພື້ນຖານເສດຖະກິດພວມເຕີບໂຕກັບລະດັບ ຊື່ງຫຼາຍປະເທດຕ້ອງເຄົາລົບນັບຖື. ບັນດານະໂຍບາຍຂອງຫວຽດນາມ ພວມ ເຄື່ອນໄຫວຢ່າງມີປະສິດທິຜົນ ແລະພັດທະນາຢ່າງແຮງ.

ຜ່ານໄລຍະປະຫວັດສາດ, ຫວຽດນາມ ຕ້ອງຜ່ານສົງຄາມຍາດເອົາເອກະລາດຫຼາຍຄັ້ງ, ຫວຽດນາມ ເຂົ້າໃຈເລິກຄຸນຄ່າຂອງສັນຕິພາບ, ປາດຖະໜາຢາກຮັກສາ ແລະຕັດສິນໃຈຮັກສາສັນຕິພາບຂອງປະເທດ, ຕັດສິນໃຈຮັກສາເອກະລາດ, ເສລີພາບ, ອະທິປະໄຕ, ຜືນແຜ່ນດິນອັນຄົບຖ້ວນ, ຜົນປະໂຫຍດຂອງປະເທດຊາດ, ຊົນຊາດ. ຫວຽດນາມ ກໍ່ມີຄວາມມຸ່ງຫວັງວ່າ ໂລກ, ພາກພື້ນ, ທຸກປະເທດ, ທຸກຊົນຊາດ ຈະລ້ວນແຕ່ໄດ້ຊົມໃຊ້ສັນຕິພາບ, ເສລີພາບ, ຄວາມອີ່ມໜຳສຳລານ, ສົມບູນພູນສຸກ.

ພ້ອມກັບໂລກສ້າງສັນຕິພາບແມ່ນນະໂຍບາຍສະເໝີຕົ້ນສະເໝີປາຍຂອງກອງທັບປະຊາຊົນຫວຽດນາມ. ຄວາມມານະພະຍາຍາມຮັບປະກັນສະພາບແວດລ້ອມແຫ່ງສັນຕິພາບພາຍໃນປະເທດ, ປະຕິບັດບັນດາພັນທະສາກົນ, ເຂົ້າຮ່ວມກຳລັງຮັກສາສັນຕິພາບ ສປຊ, ໄດ້ ແລະພວມແມ່ນພື້ນຖານເພື່ອໃຫ້ຫວຽດນາມ ສືບຕໍ່ປະຕິບັດນະໂຍບາຍປ້ອງກັນຊາດ ສັນຕິພາບ, ປ້ອງກັນຕົວເອງ, ເຂົ້າຮ່ວມຊຸກຍູ້ການຮ່ວມມືມິດຕະພາບກັບບັນດາປະເທດເພື່ອໂລກແຫ່ງສັນຕິພາບ.

ໂດຍ: ທະນາພອນ