ເລີ່ມຕົ້ນການເຄື່ອນໄຫວພົບປະແລກປ່ຽນ ຢູ່ ສປ ຈີນ

ໃນມື້ນີ້16:23

ກປ.ອອນໄລ - ໃນຂອບເຂດງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ຈີນ ຄັ້ງທີ 10, ຕອນເຊົ້າວັນທີ 19 ມີນາ, ພາຍຫຼັງພິທີຕ້ອນຮັບທີ່ດ່ານສາກົນ ດົງຊິງ, ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານພົນໂທ ຕົງ ຈຸ່ນ, ລັດຖະມົນຕີກະຊວງປ້ອງກັນປະເທດຈີນ ພ້ອມດ້ວຍຄະນະຜູ້ແທນສອງປະເທດ ໄດ້ເລີ່ມຕົ້ນການເຂົ້າຮ່ວມບັນດາການເຄື່ອນໄຫວພົບປະແລກປ່ຽນ ຢູ່ເຂດປົກຄອງຕົນເອງ ເຜົ່າ ຈ້ວງ, ແຂວງກວາງຊີ, ສປ ຈີນ.

ທ່ານພົນໂທ ຕົງ ຈຸ່ນ ເປັນປະທານພິທີຕ້ອນຮັບທ່ານພົນເອກ ຟານວັນຢາງ ແລະຄະນະຜູ້ແທນຫວຽດນາມ ເຂົ້າຮ່ວມງານພົບປະແລກປ່ຽນ ຢູ່ ຈີນ

ທ່ານພົນເອກ ຟານວັນຢາງ ພ້ອມດ້ວຍຄະນະຜູ້ແທນຫວຽດນາມ ເຂົ້າຮ່ວມງານພົບປະແລກປ່ຽນ ຢູ່ ຈີນ

ເປີດສາກການເຄື່ອນໄຫວພົບປະແລກປ່ຽນທີ່ມີຄວາມໝາຍ ຢູ່ ສປ ຈີນ, ທ່ານພົນເອກ ຟານວັນຢາງ ແລະທ່ານພົນໂທ ຕົງ ຈຸ່ນ ພ້ອມດ້ວຍຄະນະຜູ້ແທນສອງປະເທດ ໄດ້ໄປຢ້ຽມຢາມກອງຮ້ອຍທະຫານຊາຍແດນດົງຊິງ.

ກອງຮ້ອຍທະຫານຊາຍແດນ ດົງຊິງ ໄດ້ຮັບການສ້າງຕັ້ງໃນເດືອນກັນຍາ ປີ 1969, ຮັບຜິດຊອບຄຸ້ມຄອງ ແລະຄວບຄຸມເສັ້ນຊາຍແດນ ທີ່ມີລວງຍາວປະມານ 30 ກິໂລແມັດ. ຄ້າຍທະຫານຂອງກອງຮ້ອຍທະຫານຊາຍແດນ ດົງຊິງ ມີເນື້ອທີ່ປະມານ 46.700 ຕາແມັດ, ປະກອບດ້ວຍ 4 ອາຄານຄ້າຍທະຫານ, ໄດ້ຮັບການບັນຈຸ 3 ໝວດທະຫານ. ນອກຈາກນັ້ນຍັງໄດ້ຮັບການກໍ່ສ້າງພື້ນຖານໂຄງລ່າງ, ຄື: ສະໜາມຝຶກແອບຍຸດທະວິທີ ແລະ ສະໜາມຝຶກແອບກໍາລັງກາຍ.

ນະທີ່ນີ້, ທ່ານພົນເອກ ຟານວັນຢາງ ແລະທ່ານພົນໂທ ຕົງ ຈຸ່ນ ໄດ້ພ້ອມກັນປູກຕົ້ນໄມ້ມິດຕະພາບ, ຊົມການແຂ່ງຂັນກິລາມິດຕະພາບ. ເນື່ອງໃນໂອກາດນີ້, ທ່ານພົນເອກ ຟານວັນຢາງ ໄດ້ມອບຂອງຂວັນຂອງກະຊວງປ້ອງກັນປະເທດຫວຽດນາມ ໃຫ້ແກ່ກອງຮ້ອຍທະຫານຊາຍແດນ ດົງຊິງ.