    |
 |
|
ທ່ານພົນເອກ ຟານວັນຢາງ ກ່າວຄໍາເຫັນເປີດການຝຶກຊ້ອມ. ພາບ: qdnd.vn |
ການຝຶກຊ້ອມໄດ້ຈັດຕັ້ງແຕ່ວັນທີ 1 ຫາວັນທີ 4 ທັນວາ, ດ້ວຍການເຂົ້າຮ່ວມຂອງບັນດາອົງການ, ກົມກອງກໍາລັງປະກອບອາວຸດ ແລະທ້ອງຖິ່ນໃນບໍລິເວນທະຫານເຂດ 7 ພ້ອມກັບບັນດາເຫຼົ່າທັບ, ເຫຼົ່າຮົບ, ອົງການ, ກົມກອງຂຶ້ນກັບກະຊວງປ້ອງກັນປະເທດ. ການຝຶກຊ້ອມ ດໍາເນີນຜ່ານ 3 ໄລຍະ: ການຫັນພາວະກຽມພ້ອມສູ້ຮົບ, ກະກຽມສູ້ຮົບປ້ອງກັນ ແລະປະຕິບັດການສູ້ຮົບປ້ອງກັນ ດ້ວຍ 7 ບັນຫາອົບຮົມຫັດແອບພື້ນຖານ. ນີ້ແມ່ນການເຄື່ອນໄຫວການທະຫານຂະໜາດໃຫຍ່ ເພື່ອກວດກາ, ຕີລາຄາຜົນການອົບຮົມຫັດແອບ, ກຽມພ້ອມສູ້ຮົບ, ກໍ່ສ້າງພື້ນຖານປ້ອງກັນຊາດທົ່ວປວງຊົນ; ກໍ່ສ້າງທ່າສະໜາມປ້ອງກັນຊາດທົ່ວປວງຊົນ ຕິດພັນກັບທ່າສະໜາມປ້ອງກັນຄວາມສະຫງົບປະຊາຊົນ ແລະກໍ່ສ້າງເຂດປ້ອງກັນໃນບໍລິເວນ; ຍົກສູງຄວາມສາມາດແກ້ໄຂກໍລະນີສູ້ຮົບໃນສະພາບຕົວຈິງ, ໝູນໃຊ້ເຕັກນິກ ແລະເຕັກໂນໂລຊີທັນສະໄໝ; ຝຶກຝົນຫຼໍ່ຫຼອມລະບຽບວິໄນ ແລະເພີ່ມທະວີກໍາລັງແຮງສູ້ຮົບຂອງກອງທັບ; ເປັນພື້ນຖານເພື່ອນໍາພາ, ຊີ້ນໍາກົມກອງ ອົບຮົມຫັດແອບ, ຝຶກຊ້ອມໃກ້ຊິດກັບຄວາມຮຽກຮ້ອງຕ້ອງການຂອງໜ້າທີ່...
|
|
 |
|
ບັນດາຜູ້ແທນ ເຂົ້າຮ່ວມພິທີເປີດການຝຶກຊ້ອມ. ພາບ: qdnd.vn |
ກ່າວຄໍາເຫັນຊີ້ນໍາທີ່ພິທີເປີດການຝຶກຊ້ອມ, ທ່ານພົນເອກ ຟານວັນຢາງ ເນັ້ນໜັກວ່າ ການສູ້ຮົບປ້ອງກັນທະຫານເຂດມີທີ່ຕັ້ງສໍາຄັນຍິ່ງໃນສົງຄາມປະຊາຊົນປົກປັກຮັກສາປະເທດຊາດ ໂດຍອີງໃສ່ພື້ນຖານເຂດປ້ອງກັນແຂວງ, ນະຄອນ ທີ່ໄດ້ຮັບການກໍ່ສ້າງ ແລະກະກຽມໃນສະໄໝສັນຕິພາບ. ການເຄື່ອນໄຫວສູ້ຮົບປ້ອງກັນທະຫານເຂດມີລັກສະນະສັງລວມສູງໂດຍທະຫານເຂດຈັດຕັ້ງດ້ວຍການເຂົ້າຮ່ວມຂອງທະຫານ ແລະປະຊາຊົນໃນບໍລິເວນທະຫານເຂດ, ຖືກໍາລັງປະກອບອາວຸດທະຫານເຂດ ເປັນແກ່ນນໍາ ແລະບັນດາອົງການ, ກົມກອງ, ວິທະຍາຄານ, ໂຮງຮຽນຂຶ້ນກັບກະຊວງປ້ອງກັນປະເທດ ທີ່ຕັ້ງທັບໃນບໍລິເວນທະຫານເຂດ, ສ້າງທ່າສະໜາມປ້ອງກັນໃນແຕ່ລະທິດຍຸດທະສາດຂອງປະເທດ, ໃນສະໜາມຮົບທີ່ໄດ້ກໍານົດໃນການຕັດສິນໃຈປົກປັກຮັກສາ ປະເທດຊາດ.
|
|
 |
|
ບັນຍາກາດທີ່ພິທີເປີດການຝຶກຊ້ອມ. ພາບ: qdnd.vn |
ເພື່ອໃຫ້ການຝຶກຊ້ອມປະສົບຜົນສໍາເລັດຢ່າງຈົບງາມ, ທ່ານລັດຖະມົນຕີກະຊວງປ້ອງກັນປະເທດ ໃສ່ໃຈວ່າ, ຄະນະຊີ້ນໍາ, ອົງການຄະນະຊີ້ນໍາ ຄວນບໍລິຫານການຝຶກຊ້ອມໃຫ້ມີຄວາມໜັກແໜ້ນ, ບັນລຸຈຸດປະສົງ, ຄວາມຕ້ອງການທີ່ວາງອອກ; ຕິດຕາມ, ຊີ້ນໍາປະຕິບັດຖືກຕາມເນື້ອໃນແຜນການວາງອອກ; ຖອດຖອນບົດຮຽນຢ່າງທັນການເພື່ອຊີ້ນໍາການຝຶກຊ້ອມຄັ້ງຕໍ່ໄປດ້ວຍຄວາມຮຽກຮ້ອງຕ້ອງການທີ່ນັບມື້ນັບສູງຂຶ້ນ... ວຽກງານນໍາພາ, ຊີ້ນໍາ, ປະສານສົມທົບສູ້ຮົບຢ່າງແໜ້ນແຟ້ນລະຫວ່າງບັນດາກໍາລັງໃນເຂດປ້ອງກັນກັບບັນດາກໍາລັງຂອງກະຊວງ ໃນບໍລິເວນ ແລະຮັບ ປະກັນພະລາທິການ, ເຕັກນິກໃຫ້ແກ່ການສູ້ຮົບໃນເງື່ອນໄຂສັດຕູນໍາໃຊ້ອາວຸດເຕັກໂນໂລຊີສູງ; ເປັນເຈົ້າການມີວິທີການນໍາໃຊ້ກໍາລັງຮັບມືກັບສົງຄາມທັນສະໄໝ.
ທ່ານພົນເອກ ຟານວັນຢາງ ຮຽກຮ້ອງວ່າ, ໃນວິວັດການຝຶກຊ້ອມ, ບັນດາອົງການ, ກົມກອງ, ໝູ່ຄະນະ, ບຸກຄົນ ຕ້ອງປະຕິບັດຂໍ້ກໍານົດຮັກສາຄວາມລັບຢ່າງເຂັ້ມງວດ, ເດັດຂາດບໍ່ໃຫ້ເປີດເຜີຍຂໍ້ມູນ, ລະເມີດຂໍ້ກໍານົດກ່ຽວກັບຄວາມລັບດ້ານການທະຫານ...
ໂດຍ: ໄຊຊະນະ