ຫວຽດນາມ ມີນາຍທະຫານໄດ້ຮັບເລືອກເຂົ້າເຮັດວຽກຢູ່ສຳນັກງານ ສປຊ ຕື່ມອີກ
ກປ.ອອນໄລ - ຕອນເຊົ້າວັນທີ 12 ມິຖຸນາ, ຢູ່ ຮ່າໂນ້ຍ, ກະຊວງປ້ອງກັນປະເທດຫວຽດນາມ ໄດ້ຈັດພິທີມອບຂໍ້ຕົກລົງຂອງປະທານປະເທດໃຫ້ນາຍທະຫານ ໄປປະຕິບັດໜ້າທີ່ຮັກສາສັນຕິພາບສະຫະປະຊາຊາດ ຢູ່ສຳນັກງານສະຫະປະຊາຊາດ.
ທ່ານພົນໂທ ຮວ່າງຊວນຈ໊ຽນ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ຫົວໜ້າໜ່ວຍປະຕິບັດງານລະຫວ່າງຂະແໜງການ, ຫົວໜ້າຄະນະຊີ້ນໍາກະຊວງປ້ອງກັນ ປະເທດກ່ຽວກັບການເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ເປັນປະທານພິທີ ແລະມອບໝາຍໜ້າທີ່ໃຫ້ນາຍທະຫານ.
ທີ່ພິທີ, ທ່ານພັນເອກ ເຈືອງແອງຕ໊ວນ, ຮອງຫົວໜ້າສູນຝຶກແອບ, ກົມຮັກສາສັນຕິພາບຫວຽດນາມ, ໄດ້ຮັບຂໍ້ຕົກລົງໄປປະຕິບັດໜ້າທີ່ຮັກສາສັນຕິພາບ, ດຳລົງຕຳແໜ່ງນາຍທະຫານຮັບຜິດຊອບກ່ຽວກັບວຽກງານການທະຫານ, ຫ້ອງການບັນດາບັນຫາກ່ຽວກັບວຽກງານການທະຫານ, ກົມເຄື່ອນໄຫວຮັກສາສັນຕິພາບຢູ່ສຳນັກງານສະຫະປະຊາຊາດ (ທີ່ ນິວຢອກ, ອາເມລິກາ).
ທ່ານພັນເອກ ເຈືອງແອງຕ໊ວນ ເປັນກຽດນາຍທະຫານຜູ້ທີ 4 ຂອງກອງທັບປະຊາຊົນຫວຽດນາມ ໄດ້ຮັບເຂົ້າເຮັດວຽກຢູ່ສຳນັກງານສະຫະປະຊາຊາດ.
|
|
ທ່ານພົນໂທ ຮວ່າງຊວນຈ໊ຽນ ກ່າວຄໍາເຫັນມອບໝາຍໜ້າທີ່. ພາບ: qdnd.vn |
|
|
ທ່ານພົນໂທ ຮວ່າງຊວນຈ໊ຽນ ມອບດອກໄມ້ຊົມເຊີຍທ່ານພັນເອກ ເຈືອງແອງຕ໊ວນ. ພາບ: qdnd.vn |
ກ່າວຄໍາເຫັນມອບໝາຍໜ້າທີ່, ທ່ານພົນໂທ ຮວ່າງຊວນຈ໊ຽນ ຮຽກຮ້ອງໃຫ້ທ່ານພັນເອກ ເຈືອງແອງຕ໊ວນ ຊາບຊຶມ, ປະຕິບັດບັນດາທັດສະນະ, ແນວທາງການຕ່າງປະເທດຂອງພັກ, ລັດ, ກອງທັບຢ່າງເຂັ້ມງວດ; ປະຕິບັດລະບຽບວິໄນຂອງກອງທັບ, ຂໍ້ກໍານົດຂອງ ສປຊ, ກົດໝາຍຂອງປະເທດປະຈໍາຖິ່ນ, ຄຳແນະນໍາຂອງອົງການເຈົ້າໜ້າທີ່ຢ່າງເຂັ້ມງວດ; ຮັບປະກັນຄວາມປອດໄພທາງດ້ານຊີວິດ ແລະອຸປະກອນຢ່າງເດັດຂາດ; ຍົກສູງຈິດໃຈຄວາມຮັບຜິດຊອບ, ຈິດໃຈສາມັກຄີສາກົນ, ເປັນເຈົ້າການຜ່ານຜ່າທຸກຄວາມຫຍຸ້ງຍາກ, ກໍາແໜ້ນສະພາບການໃນບໍລິເວນ, ຜັນຂະຫຍາຍປະຕິບັດພາລະບົດບາດ, ໜ້າທີ່ທີ່ໄດ້ຮັບການມອບໝາຍຢ່າງວ່ອງໄວ;...
|
|
ບັນດາຜູ້ແທນຖ່າຍຮູບເປັນທີ່ລະນຶກ. ພາບ: qdnd.vn |
ຕາມທ່ານພັນເອກພິເສດ ຫງວຽນຍືແກ໋ງ ຮອງຫົວໜ້າກົມຮັກສາສັນຕິພາບຫວຽດນາມ ແລ້ວ, ທ່ານພັນເອກ ເຈືອງແອງຕ໊ວນ ໄດ້ຄັດເລືອກ (ພ້ອມກັບປາກິດສະຖານ) ຊະນະການເລືອກຕັ້ງຜ່ານ 193 ປະເທດທີ່ລົງສະໜັກໄດ້ເຂົ້າໄປປະຕິບັດວຽກງານການທະຫານ. ນີ້ເປັນການພິສູດໃຫ້ເຫັນຄວາມສາມາດໃນການເຮັດວຽກຂອງພະນັກງານກອງທັບປະຊາຊົນຫວຽດນາມ ໃນສະພາບແວດລ້ອມສາກົນເວົ້າລວມ, ແລະສະພາບແວດລ້ອມທີ່ມີຄວາມຮຽກຮ້ອງຕ້ອງການຫຼາຍຢ່າງ ແລະມາດຕະຖານສູງຂອງສະຫະປະຊາຊາດເວົ້າສະເພາະ.
ໂດຍ: ທະນາພອນ