ການຢ້ຽມຢາມສະແດງໃຫ້ເຫັນຄວາມຮັກແພງອັນພິເສດຂອງເຈົ້າຊີວິດ Philippe ແລະພະລາຊີນີ Mathilde ທີ່ມີຕໍ່ຫວຽດນາມ ເມື່ອກ່ອນນັ້ນເຈົ້າຊີວິດ ໄດ້ມາຢ້ຽມຢາມຫວຽດນາມ 3 ຄັ້ງໃນຖານະເປັນອົງມົງກຸດລາຊະກຸມມານໃນປີ 1994, 2003 ແລະ 2012. ພະລາຊີນີ Mathilde ໄດ້ມາຢ້ຽມຢາມຫວຽດນາມ ໃນປີ 2023 ໃນຖານະຕໍາແໜ່ງເປັນປະທານກິດຕິມະສັກຂອງອົງການ UNICEF ຢູ່ແບນຊິກ.

ປະເທດແບນຊິກ ເປັນສະມາຊິກຜູ້ສ້າງຕັ້ງສະຫະພາບເອີຣົບ (ອີຢູ), ຕັ້ງຢູ່ໃຈກາງຂອງເອີຣົບ, ເປັນບ່ອນສ້າງຕັ້ງສໍານັກງານຂອງ 1.100 ອົງການຈັດຕັ້ງສາກົນ, 600 ອົງການຂ່າວສາກົນ, 400 ອົງການຕາງໜ້າການທູດ, ແລະ 1.700 ຫ້ອງການຕາງໜ້າຂອງບໍລິສັດສາກົນ ແລະເອີຣົບ. ແບນຊິກ ຢືນອັນດັບທີ 24 ຂອງໂລກ ແລະ ອັນດັບ 8 ຂອງສະຫະພາບເອີຣົບ ກ່ຽວກັບຍອດຜະລິດຕະພັນພາຍໃນ (GDP), ທັງເປັນສູນກາງຈໍາໜ່າຍ ແລະຂົນສົ່ງສິນຄ້າຂອງເອີຣົບ. ບັນດາທ່າໄດ້ປຽບດັ່ງກ່າວໄດ້ປັບປຸງບົດບາດ ແລະທີ່ຕັ້ງຂອງແບນຊິກ ໃນ ອີຢູ ກໍ່ຄືໃນເວທີສາກົນ.

leftcenterrightdel
ພາບປະກອບຈາກສໍານັກຂ່າວສານຫວຽດນາມ.

ຫວຽດນາມ ແລະ ແບນຊິກ ໄດ້ສ້າງຕັ້ງການພົວພັນທາງການທູດໃນວັນທີ 22 ມີນາ 1973. ໃນໄລຍະກວ່າເຄິ່ງສະຕະວັດຜ່ານມາ, ການພົວພັນມິດຕະພາບ ແລະການຮ່ວມມືສອງຝ່າຍສືບຕໍ່ພັດທະນາຢ່າງດີງາມ. ໃນດ້ານການເມືອງ ແລະການທູດ, ສອງປະເທດໄດ້ຮັກສາການແລກປ່ຽນຄະນະຜູ້ແທນ ແລະການພົວພັນຂັ້ນສູງ ແລະທຸກຂັ້ນເປັນປະຈຳ. ສອງປະເທດໄດ້ຜັນຂະຫຍາຍບັນດາຂອບເຂດ, ກົນໄກການຮ່ວມມືຢ່າງມີປະສິດທິຜົນ, ໃນນັ້ນມີຄະນະກຳມະການປະສົມເສດຖະກິດ ຫວຽດນາມ-ແບນຊິກ; ຄະນະກໍາມະການປະສົມປະຈຳການຫວຽດນາມ - Wallonie - Brussels; ການປຶກສາຫາລືດ້ານການເມືອງຂັ້ນຮອງລັດຖະມົນຕີການຕ່າງປະເທດ, ຄະນະກຳມະການປະສົມ ຫວຽດນາມ-ແບນຊິກ ກ່ຽວກັບວິທະຍາສາດ ແລະເຕັກໂນໂລຢີ.

ສອງປະເທດກໍ່ໄດ້ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສ, ກົນໄກຫຼາຍຝ່າຍ, ໃນນັ້ນມີສະຫະປະຊາຊາດ. ເດືອນຕຸລາ ປີ 2023, ສະພາຕໍ່າແບນຊິກ ໄດ້ຮັບຮອງເອົາມະຕິກ່ຽວກັບການໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຊາວຫວຽດນາມ. ນີ້ແມ່ນຄັ້ງທຳອິດທີ່ລັດຖະສະພາຕ່າງປະເທດໄດ້ຮັບຮອງເອົາມະຕິສະບັບນີ້, ຜ່ານນັ້ນປະກອບສ່ວນຊຸກຍູ້ຄວາມສົນໃຈຂອງປະຊາຄົມສາກົນ ແລະຮຽກຮ້ອງໃຫ້ບັນດາປະເທດໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ.

ໃນດ້ານເສດຖະກິດ, ການຄ້າ ແລະການລົງທຶນ, ແບນຊິກ ແມ່ນຕະຫຼາດສົ່ງອອກໃຫຍ່ອັນດັບ 6 ຂອງຫວຽດນາມ ຢູ່ເອີລົບ, ຫວຽດນາມ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງແບນຊິກໃນອາຊຽນ. ວົງເງິນການຄ້າສອງຝ່າຍໃນປີ 2024 ບັນລຸ 4,45 ຕື້ ໂດລາສະຫະລັດ, ເພີ່ມຂຶ້ນ 15% ເມື່ອທຽບໃສ່ປີ 2023. ປະຈຸບັນ ແບນຊິກ ມີ 100 ໂຄງການລົງທຶນຢູ່ຫວຽດນາມ ດ້ວຍຍອດຈຳນວນທຶນຈົດທະບຽນ 1,1 ຕື້ ໂດລາສະຫະລັດ, ສຸມໃສ່ບັນດາຂົງເຂດການຂົນສົ່ງທາງທະເລ, ການບໍລິການພະລາທິການ ແລະພະລັງງານທົດແທນ, ຢືນອັນດັບ 23/139 ປະເທດ ແລະເຂດແຄວ້ນທີ່ມີການລົງທຶນຢູ່ຫວຽດນາມ ແລະຢູ່ອັນດັບທີ່ 6/27 ປະເທດສະມາຊິກອີຢູ ທີ່ມີການລົງທຶນຢູ່ຫວຽດນາມ. ປະຈຸບັນ ຫວຽດນາມ ມີ 4 ໂຄງການລົງທຶນໃນຂົງເຂດອຸດສາຫະກຳປຸງແຕ່ງ ແລະຜະລິດຢູ່ແບນຊິກ ດ້ວຍເງິນລົງທຶນທັງໝົດ 12,6 ລ້ານ ໂດລາສະຫະລັດ.

ໃນຂອບເຂດຄູ່ຮ່ວມມືຍຸດທະສາດກ່ຽວກັບກະສິກຳທີ່ໄດ້ຮັບການສ້າງຕັ້ງໃນປີ 2018, ສອງປະເທດພວມຜັນຂະຫຍາຍຫຼາຍໂຄງການຮ່ວມມືດ້ານເຕັກນິກລະຫວ່າງບັນດາໂຮງຮຽນ, ສະຖາບັນຄົ້ນຄວ້າກະສິກຳ; ພັດທະນາລະບົບການຂົນສົ່ງທາງນ້ຳ ເພື່ອຮັບໃຊ້ການສົ່ງອອກຜະລິດຕະພັນກະເສດຈາກຫວຽດນາມ ໄປເອີຣົບ; ຊຸກຍູ້ການຜັນຂະຫຍາຍລະບົບ logistics ເຄື່ອງເຢັນທີ່ສະຫຼາດ, ຮ່ວມມືພັດທະນາຂະແໜງໂກໂກ້ ແລະໃນຂົງເຂດຄວາມປອດໄພດ້ານອາຫານ. ການຮ່ວມມືໃນຂົງເຂດອື່ນໆ, ຄື: ການປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ, ການສຶກສາ - ບໍາລຸງສ້າງ ແລະການຮ່ວມມືຢູ່ທ້ອງຖິ່ນໄດ້ຮັບການຊຸກຍູ້ຢ່າງຕັ້ງໜ້າຈາກສອງຝ່າຍ ແລະບັນລຸໄດ້ໝາກຜົນຫຼາຍຢ່າງ.

ບົນພື້ນຖານການພົວພັນມິດຕະພາບ ແລະການຮ່ວມມືອັນດີງາມລະຫວ່າງສອງປະເທດ, ການຢ້ຽມຢາມຫວຽດນາມ ຂອງເຈົ້າຊີວິດ ແລະພະລາຊີນີ ແບນຊິກ ໄດ້ສະແດງໃຫ້ເຫັນຄວາມເຄົາລົບນັບຖືເປັນພິເສດຂອງແບນຊິກ ທີ່ມີຕໍ່ບົດບາດ ແລະທີ່ຕັ້ງຂອງຫວຽດນາມ ໃນພາກພື້ນ ອາຊີ-ປາຊີຟິກ. ການຢ້ຽມຢາມກໍ່ແມ່ນກາລະໂອກາດ ເພື່ອໃຫ້ ຫວຽດນາມ ຢັ້ງຢືນແນວທາງການພົວພັນຕ່າງປະເທດເອກະລາດ, ເປັນເຈົ້າຕົນເອງ, ຫັນການພົວພັນຕ່າງປະເທດເປັນຫຼາຍຝ່າຍ, ຫຼາຍຮູບຫຼາຍແບບ, ເຊື່ອມໂຍງເຂົ້າກັບສາກົນຢ່າງຕັ້ງໜ້າ; ສະແດງໃຫ້ເຫັນຄວາມເຄົາລົບນັບຖືຂອງຫວຽດນາມ ຕໍ່ແບນຊິກ - ຄູ່ຮ່ວມມືສຳຄັນຂອງຫວຽດນາມ ໃນ ອີຢູ.

ພວກເຮົາລ້ວນແຕ່ມີຄວາມເຊື່ອໝັ້ນວ່າ ການຢ້ຽມຢາມທາງລັດຖະກິດຢູ່ຫວຽດນາມ ຂອງເຈົ້າຊີວິດ Philippe ແລະພະລາຊີນີ Mathilde ຈະປະສົບຜົນສຳເລັດຢ່າງຈົບງາມ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ຊຸກຍູ້ການຮ່ວມມືສອງຝ່າຍຢ່າງແຂງແຮງ, ນຳການພົວພັນຫວຽດນາມ - ແບນຊິກ ກ້າວເຂົ້າສູ່ໄລຍະພັດທະນາໃໝ່.

ໂດຍ: ຈາງຫງວຽນ