ການໄປປະຕິບັດງານໄດ້ດໍາເນີນໃນຊຸມມື້ຕົ້ນປີ 2025 ແມ່ນມີຄວາມໝາຍສຳຄັນຍິ່ງ ເມື່ອຫວຽດນາມ ແລະລາວ ພວມຕັ້ງໜ້າຜັນຂະຫຍາຍປະຕິບັດບັນດາມະຕິກອງປະຊຸມໃຫຍ່ຂອງແຕ່ລະພັກ, ແຜນພັດທະນາເສດຖະກິດ - ສັງຄົມຂອງແຕ່ລະປະເທດ ແລະພວມກະກຽມໃຫ້ແກ່ກອງປະຊຸມໃຫຍ່ ອົງຄະນະພັກທຸກຂັ້ນ ມຸ່ງໄປເຖິງກອງປະຊຸມໃຫຍ່ທົ່ວປະເທດ ຂອງແຕ່ລະພັກໃນຕົ້ນປີ 2026. ນີ້ແມ່ນການໄປປະຕິບັດງານຢູ່ຕ່າງປະເທດຄັ້ງທຳອິດຂອງການນຳຫວຽດນາມ ແລະທ່ານນາຍົກລັດຖະມົນຕີ ຟ້າມມິງຈິ໊ງ ກໍ່ແມ່ນການນໍາຕ່າງປະເທດຜູ້ທຳອິດທີ່ລາວ ຕ້ອນຮັບໃນປີ 2025, ສະແດງໃຫ້ເຫັນຄວາມສາມັກຄີແບບພິເສດລະຫວ່າງສອງປະເທດຢ່າງເລິກເຊິ່ງ, ແທດຈິງ ແລະມີຊີວິດຊີວາ.

leftcenterrightdel
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: vov.vn

ໃນຖານະເປັນສອງປະເທດບ້ານໃກ້ເຮືອນຄຽງທີ່ສະໜິດສະໜົມ, ມີແມ່ນ້ຳລຳເຊ ແລະສາຍພູຫຼວງຕິດຈອດກັນ, ຫວຽດນາມ ແລະລາວ ໄດ້ສ້າງຕັ້ງ ແລະເພີ່ມພູນຄູນສ້າງສາຍພົວພັນທີ່ສະໜິດຕິດພັນໃນປະຫວັດສາດນັບພັນປີແຫ່ງການສ້າງສາ ແລະປົກປັກຮັກສາປະເທດຊາດ. ນັບແຕ່ມີການກຳເນີດ ແລະນໍາພາຂອງພັກກອມມູນິດອິນດູຈີນ, ຫຼັງຈາກນັ້ນ ແມ່ນພັກກອມມູນິດຫວຽດນາມ ແລະພັກປະຊາຊົນປະຕິວັດລາວ, ການພົວພັນດັ່ງກ່າວນັບມື້ນັບພັດທະນາ, ໄດ້ຮັບການຍົກສູງຂຶ້ນທາງດ້ານຄຸນນະພາບ, ກາຍເປັນແບບພິເສດ, ສ້າງກຳລັງແຮງດ້ານຈິດໃຈ ແລະວັດຖຸ ເພື່ອໃຫ້ປະຊາຊົນຫວຽດນາມ ແລະລາວ ຜ່ານຜ່າທຸກຄວາມຫຍຸ້ງຍາກ ແລະສິ່ງທ້າທາຍ, ເອົາຊະນະສັດຕູທຸກໂຕ. ບັນດາຜົນງານອັນດີເດັ່ນຂອງການຮ່ວມສຳພັນສູ້ຮົບໃນເມື່ອກ່ອນໄດ້ກາຍເປັນບົດເພງໄຊອະມະຕະ, ເປັນສັນຍາລັກຂອງນ້ຳໃຈສາມັກຄີແບບພິເສດຫວຽດນາມ-ລາວ ໃນເມື່ອກ່ອນ, ປະຈຸບັນ ແລະອະນາຄົດ.

ປະຈຸບັນ, ເມື່ອຍາດໄດ້ “ຜົນງານ” ໃນພາລະກິດສ້າງສາ ແລະພັດທະນາປະເທດຊາດ, ສາຍພົວພັນ ຫວຽດນາມ - ລາວ ໂດຍປະທານ ໂຮ່ຈີມິນ, ປະທານ ໄກສອນ ພົມວິຫານ, ປະທານ ສຸພານຸວົງ ສ້າງພື້ນຖານ, ໄດ້ຮັບການເພີ່ມພູນຄູນສ້າງດ້ວຍເລືອດເນື້ອ, ເຫື່ອແຮງຂອງຫຼາຍລຸ້ນຄົນ, ໄດ້ຫຼໍ່ຫຼອມຜ່ານຄວາມຫຍຸ້ງຍາກລຳບາກ ແລະສິ່ງທ້າທາຍເພື່ອເອກະລາດ, ອິດສະຫຼະພາບ ແລະຄວາມຜາສຸກຂອງສອງປະເທດ, ສືບຕໍ່ “ເກີດດອກອອກຜົນ”. ໃນສະພາບການຂອງໂລກ ແລະພາກພື້ນມີການຜັນປ່ຽນຢ່າງວ່ອງໄວ ແລະສັບສົນ, ບົນພື້ນຖານການເສີມຂະຫຍາຍຈິດໃຈອິດສະຫຼະພາບ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະຕ່າງຝ່າຍຕ່າງມີຜົນປະໂຫຍດ, ສົມທົບຢ່າງແທດເໝາະລັກສະນະແບບພິເສດຂອງການພົວພັນຫວຽດນາມ - ລາວ ກັບທຳນຽມສາກົນ, ສອງຝ່າຍຍາມໃດກໍ່ໃຫ້ບຸລິມະສິດແກ່ກັນ, ສະໜັບສະໜູນ ແລະສ້າງເງື່ອນໄຂສະດວກ ໃຫ້ກັນພ້ອມກັນພັດທະນາ, ເພື່ອຄວາມຈະເລີນຮຸ່ງເຮືອງຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.

ໃນໄລຍະຜ່ານມາ, ໂດຍຊາບຊຶມການຊີ້ນໍາຂອງສອງກົມການເມືອງຢ່າງເລິກເຊິ່ງ, ພ້ອມກັບຄວາມມານະພະຍາຍາມ ແລະຄວາມຕັດສິນໃຈສູງຂອງລັດ, ລັດຖະບານ, ບັນດາຄະນະ, ກະຊວງ, ຂະແໜງການ, ທ້ອງຖິ່ນ, ສອງປະເທດໄດ້ຜັນຂະຫຍາຍບັນດາຂໍ້ຕົກລົງຂັ້ນສູງຢ່າງເຂັ້ມງວດ ແລະມີປະສິດທິຜົນ, ນຳມາເຊິ່ງຜົນສຳເລັດຫຼາຍຢ່າງ ໃນການຮ່ວມມືໃນທຸກຂົງເຂດ. ຕາມນັ້ນແລ້ວ, ການພົວພັນດ້ານການເມືອງນັບມື້ນັບໄດ້ຮັບຄວາມໄວ້ເນື້ອເຊື່ອໃຈ ແລະໃກ້ຊິດຕິດແທດ, ຮັກສາບົດບາດເປັນແກ່ນສານ ແລະກໍານົດທິດລວມການພົວພັນສອງຝ່າຍ. ສອງຝ່າຍໄດ້ຈັດຕັ້ງກອງປະຊຸມ ຄັ້ງທີ 46 ຂອງຄະນະກຳການຮ່ວມມືທະວີພາຄີລະຫວ່າງລັດຖະບານຫວຽດນາມ - ລາວ (ເດືອນມັງກອນ ປີ 2024) ແລະກອງປະຊຸມຂັ້ນສູງລະຫວ່າງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ (ເດືອນກຸມພາ ແລະເດືອນກັນຍາ 2024). ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ໄດ້ຮັບການເພີ່ມທະວີທັງດ້ານຄຸນນະພາບ ແລະປະລິມານ, ປະຕິບັດການຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມຂອງແຕ່ລະປະເທດເປັນຢ່າງດີ, ກໍ່ສ້າງເຂດຊາຍແດນ ຫວຽດນາມ - ລາວ ແຫ່ງສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະພັດທະນາ.

ພ້ອມກັນນັ້ນ, ການຮ່ວມມືດ້ານເສດຖະກິດ - ການຄ້າ - ການລົງທຶນ ລະຫວ່າງຫວຽດນາມ - ລາວ ໄດ້ມີການປ່ຽນແປງຢ່າງຕັ້ງໜ້າ. ນັບແຕ່ຕົ້ນປີຮອດ ທ້າຍເດືອນຕຸລາ 2024, ວົງເງິນການຄ້າສອງສົ້ນບັນລຸ 1,7 ຕື້ໂດລາສະຫະລັດ, ເພີ່ມຂຶ້ນ 28,2% ເມື່ອທຽບໃສ່ໄລຍະດຽວກັນຂອງປີ 2023. ການພົວພັນຮ່ວມມືລະຫວ່າງບັນດາທ້ອງຖິ່ນຂອງສອງປະເທດ, ພິເສດແມ່ນບັນດາທ້ອງຖິ່ນທີ່ຢູ່ເຂດຊາຍແດນ, ສືບຕໍ່ບັນລຸໄດ້ປະສິດທິຜົນ, ປະກອບສ່ວນເຂົ້າໃນການຮ່ວມມືລວມລະຫວ່າງຫວຽດນາມ - ລາວ. ສອງຝ່າຍສະໜັບສະໜູນ ແລະຊ່ວຍເຫຼືອເຊິ່ງກັນ ແລະກັນຢ່າງມີປະສິດທິຜົນ ຢູ່ບັນດາເວທີປາໄສຮ່ວມມືຫຼາຍຝ່າຍສາກົນ ແລະພາກພື້ນ; ຕັ້ງໜ້າສະໜັບສະໜູນ ແລະສົມທົບກັນຢ່າງແໜ້ນແຟ້ນກັບ ສປປ ລາວ ເພື່ອດໍາລົງຕໍາແໜ່ງເປັນປະທານອາຊຽນ 2024 ແລະ ປະທານສະມັດຊາໃຫຍ່ລັດຖະສະພາ ອາຊຽນ ຄັ້ງທີ 45 (AIPA) ສໍາເລັດຜົນ.

ໃນຄວາມເອກອ້າງທະນົງໃຈ, ພາກພູມໃຈຕໍ່ບາດກ້າວພັດທະນາອັນດີງາມຂອງການພົວພັນລະຫວ່າງສອງຝ່າຍ, ການປະຕິບັດງານຂອງທ່ານນາຍົກລັດຖະມົນຕີ  ສືບຕໍ່ຢືນຢັນແຜນນະໂຍບາຍ, ນະໂຍບາຍທີ່ສະເໝີຕົ້ນສະເໝີປາຍຂອງຫວຽດນາມ ຍາມໃດກໍ່ຖືເປັນສຳຄັນ, ສະຫງວນບຸລິມະສິດແຖວໜ້າໃຫ້ຄວາມສາມັກຄີແບບພິເສດ, ເປັນແບບຢ່າງ, ບໍລິສຸດຜຸດຜ່ອງລະຫວ່າງຫວຽດນາມ ແລະລາວ. ໃນສະພາບການປະຈຸບັນທີ່ພວມວາງສອງປະເທດພວກເຮົາໃຫ້ຢືນຢູ່ຕໍ່ໜ້າກາລະໂອກາດພັດທະນາຫຼາຍຢ່າງ, ແຕ່ກໍ່ຕ້ອງປະເຊີນໜ້າກັບສິ່ງທ້າທາຍໃໝ່ຫຼາຍຢ່າງ. ສອງພັກ, ສອງລັດ ແລະປະຊາຊົນສອງປະເທດມີຄວາມຕັດສິນໃຈປົກປັກຮັກສາ ແລະເພີ່ມພູນຄູນສ້າງສາຍພົວພັນທີ່ຫາຍາກໃນໂລກ ຫວຽດນາມ-ລາວ, ຍາມໃດກໍ່ສົມເປັນຊັບສົນບັດອັນລໍ້າຄ່າ, ສືບທອດໃຫ້ຄົນລຸ້ນຫຼັງ.

ອວຍພອນໃຫ້ການໄປປະຕິບັດງານຂອງທ່ານນາຍົກລັດຖະມົນຕີ ປະສົບຜົນສຳເລັດຢ່າງຈົບງາມ, ສ້າງກຳລັງດັນໃໝ່ເພື່ອປະກອບສ່ວນຊຸກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ ໃຫ້ພັດທະນາຢ່າງເລິກເຊິ່ງ ແລະ ກວ້າງຂວາງຢ່າງບໍ່ຢຸດຢັ້ງ.

ໂດຍ: ທະນາພອນ