ທ່ານປະທານປະເທດ ເລືອງເກືອງ ໄປຢ້ຽມຢາມ ຈີເລ ຢ່າງເປັນທາງການໃນສະພາບການພົວພັນສອງຝ່າຍພັດທະນາຢ່າງຕັ້ງໜ້າ. ນີ້ແມ່ນການຢ້ຽມຢາມ ຈີເລ ຄັ້ງທຳອິດຂອງປະທານປະເທດຫວຽດນາມ ໃນ 15 ປີຜ່ານມາ. ຫວຽດນາມ ແລະ ຈີເລ ໄດ້ສ້າງຕັ້ງສາຍພົວພັນ ທາງການທູດໃນວັນທີ 25 ມີນາ ປີ 1971. ຮອດເດືອນພຶດສະພາ 2007, ສອງປະເທດໄດ້ສ້າງຕັ້ງສາຍພົວພັນຄູ່ຮ່ວມມືຮອບດ້ານ. ເຖິງວ່າຈະຫ່າງໄກກັນທາງດ້ານພູມສາດກໍ່ຕາມ, ສອງປະເທດຮັກສາການເຄື່ອນໄຫວແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງຢ່າງເປັນປະຈຳ. ຫວຽດນາມ ແລະ ຈີເລ ກໍ່ຮັກສາກົນໄກຮ່ວມມືຢ່າງມີປະສິດທິຜົນ; ສົມທົບກັນ ແລະຮ່ວມມືທີ່ດີຢູ່ບັນດາອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍ. ທາງດ້ານເສດຖະກິດ, ການຄ້າ, ປະຈຸບັນ ຈີເລ ເປັນຄູ່ຮ່ວມມືການຄ້າໃຫຍ່ອັນດັບ 4 ຂອງຫວຽດນາມ ຢູ່ອາເມລິກາລາຕິນ ແລະ ຫວຽດນາມ ເປັນຄູ່ຮ່ວມມືການຄ້າໃຫຍ່ທີ່ສຸດ ຂອງ ຈີເລ ໃນອາຊຽນ. ວົງເງິນການຄ້າລະຫວ່າງສອງປະເທດໃນປີ 2023 ບັນລຸ 1,5 ຕື້ USD; 9 ເດືອນຕົ້ນປີ 2024 ບັນລຸ 1,29 ຕື້ USD, ເພີ່ມຂຶ້ນ 5% ເມື່ອທຽບໃສ່ໄລຍະດຽວກັນຂອງປີກາຍ.
ການຢ້ຽມຢາມ ເປຣູ ຢ່າງເປັນທາງການຂອງທ່ານປະທານປະເທດ ເລືອງເກື່ອງ ແມ່ນການຢ້ຽມຢາມຢ່າງເປັນທາງການຄັ້ງທຳອິດ ຂອງການນຳຂັ້ນສູງຫວຽດນາມ ຢູ່ເປຣູ. ການຢ້ຽມຢາມໄດ້ດຳເນີນກົງກັບໂອກາດທີ່ສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງສາຍພົວພັນທາງການທູດ (14-11-1994 / 14-11-2024). ໃນໄລຍະຜ່ານມາ, ສາຍພົວພັນຫວຽດນາມ - ເປຣູ ໄດ້ພັດທະນາຢ່າງຕັ້ງໜ້າ. ການນຳຂັ້ນສູງຂອງສອງປະເທດໄດ້ພົບປະ, ແລກປ່ຽນ ຢ່າງເປັນປະຈຳເນື່ອງໃນໂອກາດເຂົ້າຮ່ວມກອງປະຊຸມສາກົນຕ່າງໆ. ສອງປະເທດຮັກສາກົນໄກປຶກສາຫາລືດ້ານການເມືອງ ແລະ ກອງປະຊຸມຄະນະກຳມະການລະຫວ່າງລັດຖະບານ ຢ່າງເປັນປະຈຳ. ທາງດ້ານເສດຖະກິດ, ການຄ້າ, ການລົງທຶນ, ເປຣູ ເປັນຄູ່ຮ່ວມມືການຄ້າໃຫຍ່ອັນດັບ 6 ຂອງຫວຽດນາມ ແລະ ເປັນປະເທດທີ່ມີເງິນລົງທຶນໂດຍກົງໃຫຍ່ທີ່ສຸດຂອງວິສາຫະກິດຫວຽດນາມ ຢູ່ ອາເມລິກາລາຕິນ. ວົງເງິນການຄ້າສອງຝ່າຍໃນປີ 2023 ລະຫວ່າງຫວຽດນາມ ແລະ ເປຣູ ບັນລຸ 486 ລ້ານ USD, ໃນ 7 ເດືອນຕົ້ນປີ 2024 ບັນລຸ 294 ລ້ານ USD. ກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບ (Viettel) ແລະ ກຸ່ມບໍລິສັດນ້ຳມັນອາຍແກັສ ຫວຽດນາມ ( Petrovietnam) ມີ 2 ໂຄງການລົງທຶນຢູ່ ເປຣູ ດ້ວຍເງິນລົງທຶນທັງໝົດແມ່ນ 1,24 ຕື້ USD.
    |
 |
|
ພິທີສ່ົງທ່ານປະທານປະເທດ ເລືອງເກືອງ ທີ່ສະໜາມບິນສາກົນ ໂນ້ຍບ່າຍ. ພາບ: ສໍານັກຂ່າວສານຫວຽດນາມ |
ຢູ່ປະເທດເປຣູ, ທ່ານປະທານປະເທດ ເລືອງເກືອງ ຈະນຳໜ້າຄະນະຜູ້ແທນຂັ້ນສູງຫວຽດນາມ ເຂົ້າຮ່ວມສັບປະດາຂັ້ນສູງ APEC 2024 ຢູ່ນະຄອນຫຼວງ ລີມາ. ນັບແຕ່ໄດ້ຮັບການສ້າງຕັ້ງໃນປີ 1989 ມາຮອດປະຈຸບັນ, APEC ດ້ວຍ 21 ພື້ນຖານເສດຖະກິດສະມາຊິກ ໄດ້ຢັ້ງຢືນທີ່ຕັ້ງຂອງຕົນ ເປັນກົນໄກຮ່ວມມືດ້ານເສດຖະກິດແຖວໜ້າລະຫວ່າງພາກພື້ນ ດ້ວຍເນື້ອໃນຮ່ວມມືເປັນຫຼາຍຮູບຫຼາຍແບບ ແລະ ຮອບດ້ານ. ປີ 2024 ແມ່ນປີທີ່ມີຄວາມໝາຍສຳຄັນ, ສະເຫຼີມສະຫຼອງ 35 ປີແຫ່ງວັນສ້າງຕັ້ງ APEC, ແມ່ນໂອກາດເພື່ອໃຫ້ບັນດາພື້ນຖານເສດຖະກິດສະມາຊິກ ກວດກາ, ຕີລາຄາໝາກຜົນ, ກຳນົດທິດທາງ ຮ່ວມມືໃນໄລຍະໃໝ່ ໃນສະພາບການໂລກ ແລະພາກພື້ນສືບຕໍ່ມີການຜັນແປຢ່າງສັບສົນ, ຄາດຄະເນລ່ວງໜ້າໄດ້ຍາກຄືໃນປະຈຸບັນ. ດ້ວຍຫົວຂໍ້ “ມອບສິດ. ກວມລວມ. ເຕີບໂຕ”, ປະເທດເຈົ້າພາບ ເປຣູ ຊຸກຍູ້ 3 ບຸລິມະສິດຕົ້ນຕໍ, ລວມມີ: ການຄ້າ ແລະການລົງທຶນ ເພື່ອການເຕີບໂຕກວມລວມ, ການເຊື່ອມຕໍ່, ນະວັດຕະກໍາ ແລະ ການຫັນເປັນດີຈີຕອນ ເພື່ອແນໃສ່ຊຸກຍູ້ການຫັນປ່ຽນຈາກເສດຖະກິດບໍ່ເປັນທາງການ ໄປສູ່ເສດຖະກິດທາງການ ແລະທົ່ວໂລກ, ການເຕີບໂຕແບບຍືນຍົງ ເພື່ອການພັດທະນາສ້າງຄວາມເຂັ້ມແຂງດ້ວຍຕົນເອງ.
ໃນໄລຍະ 26 ປີແຫ່ງການເຂົ້າຮ່ວມ APEC, ຫວຽດນາມ ໄດ້ປະກອບສ່ວນຢ່າງຕັ້ງໜ້າ, ເປັນເຈົ້າການ, ປະກອບສ່ວນຊຸກຍູ້ສັນຕິພາບ, ສະຖຽນລະພາບ, ການຮ່ວມມື, ການຮ່ວມສໍາພັນເສດຖະກິດໃນພາກພື້ນ, ຮັກສາບົດບາດຂອງ APEC. ຫວຽດນາມ ແມ່ນໜຶ່ງໃນຈຳນວນສະມາຊິກທີ່ໄດ້ດໍາລົງບົດບາດເປັນປະເທດເຈົ້າພາບຈັດຕັ້ງ APEC 2 ຄັ້ງ ສໍາເລັດຜົນ; ແມ່ນໜຶ່ງໃນບັນດາສະມາຊິກຕັ້ງໜ້າທີ່ສຸດໃນການສະເໜີຂໍ້ລິເລີ່ມ ແລະ ໂຄງການຂອງ APEC. ຫວຽດນາມ ຍັງມີການປະກອບສ່ວນຫຼາຍຢ່າງໃນວຽກງານນບໍລິຫານການເຄື່ອນໄຫວຂອງ APEC ຜ່ານການດໍາລົງບັນດາຕຳແໜ່ງສຳຄັນ. ນັບແຕ່ຕົ້ນປີ 2024 ມາຮອດປະຈຸບັນ, ຫວຽດນາມ ໄດ້ມີການປະກອບສ່ວນຫຼາຍຢ່າງເຂົ້າໃນວິວັດທະນາການຮ່ວມມື APEC, ຜັນຂະຫຍາຍຫຼາຍຂໍ້ລິເລີ່ມ, ໂຄງການກ່ຽວກັບການປະຕິຮູບໂຄງປະກອບການເງິນ, ວິທະຍາສາດ-ເຕັກໂນໂລຢີ, ນະວັດຕະກຳ, ພັດທະນາແຫຼ່ງຊັບພະຍາກອນມະນຸດ, ການທ່ອງທ່ຽວ, ກະສິກຳ, ການຮັບມືກັບການປ່ຽນແປງຂອງດິນຟ້າອາກາດ, ການເຕີບໂຕແບບຍືນຍົງ ແລະກວມລວມ. ປະຈຸບັນ ຫວຽດນາມ ແມ່ນຫົວໜ້າກຸ່ມສ້າງໂຄງການດໍາເນີນງານ APEC ກ່ຽວກັບການປະຕິຮູບໂຄງປະກອບ ໄລຍະ 2026-2030, ເປັນປະທານການສ້າງບົດລາຍງານນະໂຍບາຍເສດຖະກິດ APEC 2025, ໄດ້ຮັບການຕີລາຄາສູງຈາກບັນດາສະມາຊິກ. ຄາດວ່າ, ຫວຽດນາມ ຈະເປັນເຈົ້າພາບຈັດຕັ້ງ APEC 2027.
ການຢ້ຽມຢາມຂອງທ່ານປະທານປະເທດ ເລືອງເກື່ອງ ໃນຄັ້ງນີ້ ແນໃສ່ສືບຕໍ່ຜັນຂະຫຍາຍແນວທາງພົວພັນຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ, ຫຼາຍຝ່າຍ, ເປັນເຈົ້າການ, ຕັ້ງໜ້າເຊື່ອມໂຍງຢ່າງຮອບດ້ານ, ເລິກເຊິ່ງກວ້າງຂວາງເຂົ້າກັບສາກົນ, ຍົກລະດັບການພົວພັນຕ່າງປະເທດຫຼາຍຝ່າຍ ຕາມເນື້ອໃນຈິດໃຈ ກອງປະຊຸມໃຫຍ່ ຄັ້ງທີ 13 ຂອງພັກ; ປະກອບສ່ວນຊຸກຍູ້ສັນຕິພາບ, ການຮ່ວມມື, ການຮ່ວມສໍາພັນເສດຖະກິດ ແລະ ການເຊື່ອມຕໍ່ພາກພື້ນ; ສະແດງໃຫ້ເຫັນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍ່ຖືເປັນສໍາຄັນ ແລະ ປາດຖະໜາຢາກປັບປຸງ, ຊຸກຍູ້ສາຍພົວພັນກັບ ຈີເລ ແລະ ເປຣູ ໃຫ້ສືບຕໍ່ເຂົ້າສູ່ລວງເລິກ, ແທດຈິງ, ມີປະສິດທິຜົນ.
ພວກຂ້າພະເຈົ້າເຊື່ອໝັ້ນວ່າ ການໄປປະຕິບັດງານຂອງທ່ານປະທານປະເທດ ເລືອງເກື່ອງ ຈະປະສົບຜົນສຳເລັດຢ່າງຈົບງາມ, ສ້າງກຳລັງໜູນໃໝ່ເພື່ອຊຸກຍູ້ ແລະເຮັດໃຫ້ສາຍພົວພັນກັບ ຈີເລ ແລະ ເປຣູ ເລິກເຊິ່ງກ່ວາອີກ. ການເຂົ້າຮ່ວມຂອງທ່ານປະທານປະເທດ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໃນສັບປະດາຂັ້ນສູງ APEC 2024 ແມ່ນໂອກາດເພື່ອໃຫ້ຫວຽດນາມ ສືບຕໍ່ຢືນຢັນບົດບາດ ແລະ ມີການປະກອບສ່ວນຢ່າງຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບໃຫ້ APEC ກໍຄືເປີດກວ້າງການພົວພັນກັບບັນດາພື້ນຖານເສດຖະກິດສະມາຊີກອື່ນໆ.
ໂດຍ: ທູຈາງ