ນີ້ແມ່ນການຢ້ຽມຢາມ UAE ແລະ Qatar ຄັ້ງທໍາອິດຂອງທ່ານນາຍົກລັດຖະມົນຕີຫວຽດນາມ  ພາຍຫຼັງ 15 ປີ ແລະເປັນການຢ້ຽມຢາມ Saudi Arabia ຄັ້ງທີສອງ ໃນຮອບໜຶ່ງປີຂອງຜູ້ນໍາໜ້າລັດຖະບານຫວຽດນາມ. ຄັ້ງຫຼ້າສຸດ, ທ່ານນາຍົກລັດຖະມົນຕີ  ຟ້າມມິງຈີ້ງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມ  Saudi Arabia ແຕ່ວັນທີ 18 ຫາວັນທີ 20 ຕຸລາ 2023. ການຢ້ຽມຢາມ 3 ປະເທດຕາເວັນອອກກາງ ຄັ້ງນີ້ຂອງທ່ານນາຍົກລັດຖະມົນຕີ ເປັນການປະກອບສ່ວນຜັນຂະຫຍາຍແນວທາງການຕ່າງປະເທດຂອງພັກ ແລະແຜນຮ່າງ “ພັດທະນາການພົວພັນລະຫວ່າງຫວຽດນາມ ກັບບັນດາປະເທດຕາເວັນອອກກາງ-ອາຟຣິກາ ໄລຍະ 2016-2025”; ສະແດງໃຫ້ເຫັນການຖືເປັນສໍາຄັນ ແລະປາດຖະໜາຢາກພັດທະນາການພົວພັນກັບຄູ່ຮ່ວມມືສໍາຄັນຢູ່ຕາເວັນອອກກາງ, ເປີດໄລຍະການຮ່ວມມືໃໝ່ລະຫວ່າງ ຫວຽດນາມ ກັບ UAE, Qatar ແລະ Saudi Arabia.

ການຢ້ຽມຢາມ ໄດ້ຕັ້ງຄວາມຫວັງໄວ້ວ່າ ຈະສ້າງບຸກທະລຸໃນການດຶງດູດການລົງທຶນຂອງບັນດາປະເທດເຂົ້າຫວຽດນາມ, ຊຸກຍູ້ການຮ່ວມມືໃນບັນດາຂົງເຂດໃໝ່, ພ້ອມທັງເປີດປະຕູໃຫ້ແກ່ສິນຄ້າ, ການບໍລິການຂອງຫວຽດນາມ ໄດ້ເຂົ້າເຖິງຕະຫຼາດເຂດອ່າວ ທີ່ເຕັມໄປດ້ວຍຄວາມສາມາດບົ່ມຊ້ອນນີ້. UAE, Qatar ແລະ Saudi Arabia ມີທີ່ຕັ້ງແມ່ນປະເທດມະຫາອໍານາດດ້ານເສດຖະກິດ ແລະພະລັງງານຢູ່ຕາເວັນອອກກາງ, ສະພາບການດ້ານການເມືອງ-ສັງຄົມມີສະຖຽນລະພາບ ແລະມີບົດບາດ, ຜົນສະທ້ອນອັນສໍາຄັນຢູ່ພາກພື້ນ. UAE ແມ່ນປະເທດທີ່ເປັນເຈົ້າຂອງບັນດາກອງທຶນ FDI ທີ່ມີຂະໜາດໃຫຍ່ທີ່ສຸດໃນໂລກ. Qatar ແມ່ນໜຶ່ງໃນບັນດາປະເທດທີ່ມີລາຍຮັບສະເລ່ຍຕໍ່ຫົວຄົນສູງທີ່ສຸດໃນໂລກ, ແມ່ນສູນການເງິນ-ການຄ້າແຖວໜ້າຢູ່ຕາເວັນອອກກາງ ແລະກໍ່ແມ່ນປະເທດສົ່ງອອກອາຍແກັດແຫຼວ (LNG) ຂະໜາດໃຫຍ່ທີ່ສຸດໃນໂລກ. ສ່ວນ Saudi Arabia ແມ່ນປະເທດທີ່ມີຜົນສະທ້ອນສໍາຄັນທີ່ສຸດໃນໂລກອິດສະລາມ, ບັນດາປະເທດອາຣັບ ແລະບັນດາປະເທດສົ່ງອອກນໍ້າມັນເຊື້ອໄຟ (OPEC), ພ້ອມທັງເປັນປະເທດນໍາໜ້າໂລກ ກ່ຽວກັບການສົ່ງອອກນໍ້າມັນເຊື້ອໄຟ.

leftcenterrightdel
ທ່ານນາຍົກລັດຖະມົນຕີ ຟ້າມມິງຈີ້ງ ພົບປະກັບເຈົ້າຊາຍ Saudi Arabia Mohammed bin Salman ໃນວັນທີ 20 ຕຸລາ 2023, ໃນຂອບເຂດການຢ້ຽມຢາມ Saudi Arabia ແລະເຂົ້າຮ່ວມກອງປະຊຸມສຸດຍອດ ອາຊຽນ-GCC. ພາບ: VOV

ໃນຊຸມປີມໍ່ໆມານີ້, UAE ໄດ້ຕັ້ງໜ້າຜັນຂະຫຍາຍນະໂຍບາຍ “ຫັນໄປສູ່ທິດຕາເວັນອອກ”, ຖືເປັນສໍາຄັນການພົວພັນກັບບັນດາປະເທດອາຊີ, ໃນນັ້ນມີຫວຽດນາມ. Qatar ພວມຊຸກຍູ້ເປົ້າໝາຍກາຍເປັນປະເທດພັດທະນາ ດ້ວຍພື້ນຖານໂຄງລ່າງທາງສັງຄົມທີ່ກ້າວໜ້າ, ຄຸນນະພາບການດໍາລົງຊີວິດສູງຜ່ານການປະຕິບັດ 4 ເສົາຄໍ້ານະໂຍບາຍກ່ຽວກັບເສດຖະກິດ-ສັງຄົມ, ມະນຸດ ແລະສິ່ງແວດລ້ອມ; ຍູ້ໄວການຫັນພື້ນຖານເສດຖະກິດເປັນຫຼາຍຮູບຫຼາຍແບບ, ນໍາ Qatar ກາຍເປັນສະຖານທີ່ລົງທຶນທີ່ສໍາຄັນຂອງນັກລົງທຶນ. Saudi Arabia ພວມສຸມໃສ່ການລົງທຶນເຂົ້າເສດຖະກິດສີຂຽວ, ຫັນເປັນດີຈີຕອນ,  ປະດິດສ້າງປ່ຽນແປງໃໝ່ ແລະມີຄວາມຕ້ອງການສູງກ່ຽວກັບນັກຊ່ຽວຊານ ໃນຂະແໜງອາຊີບນີ້.

ສາມາດເຫັນໄດ້ວ່າ ຫວຽດນາມ ກັບ UAE, Qatar ແລະ Saudi Arabia ມີຫຼາຍຈຸດທີ່ຄ້າຍ, ຄື: ກັນທາງດ້ານຍຸດທະສາດພັດທະນາເສດຖະກິດ-ສັງຄົມ ກໍຄືແບ່ງປັນວິໄສທັດລວມກ່ຽວກັບເປົ້າໝາຍພັດທະນາ. ດ້ວຍກໍາລັງບົ່ມຊ້ອນຂອງ 3 ປະເທດມະຫາອໍານາດຢູ່ພາກພື້ນ, ຄວາມສາມາດບົ່ມຊ້ອນຂອງຫວຽດນາມ, ຫວຽດນາມ ແລະບັນດາປະເທດຍັງມີຄວາມສາມາດບົ່ມຊ້ອນຫຼາຍຢ່າງ ເພື່ອຊຸກຍູ້ການຮ່ວມມືຫຼາຍດ້ານ, ເປັນຕົ້ນແມ່ນໃນຂົງເຂດເສດຖະກິດ, ການຄ້າ ແລະການລົງທຶນ. ພິເສດ, ເລື່ອງຫວຽດນາມ ປະກາດໃຊ້ແຜນຮ່າງ “ເພີ່ມທະວີການຮ່ວມມືສາກົນ ເພື່ອກໍ່ສ້າງ ແລະພັດທະນາຂະແໜງ Halal ຫວຽດນາມ ຮອດປີ 2030”, ເຊິ່ງແມ່ນແຜນຮ່າງທໍາອິດທີ່ຍົກອອກການກໍານົດທິດໃຫຍ່ລະດັບຊາດເພື່ອເປີດຕະຫຼາດ Halal ທີ່ເຕັມໄປດ້ວຍຄວາມສາມາດບົ່ມຊ້ອນ, ຍິ່ງສ້າງໂອກາດຊຸກຍູ້ການຮ່ວມມືກັບບັນດາປະເທດຕາເວັນອອກກາງ-ອາຟຣິກາ ຕື່ມອີກ, ໃນນັ້ນ UAE, Qatar ແລະ Saudi Arabia ແມ່ນບັນດາຄູ່ຮ່ວມມື ແລະຕະຫຼາດບຸລິມະສິດຂອງຫວຽດນາມ ກ່ຽວກັບ Halal.

ການຢ້ຽມຢາມຂອງທ່ານນາຍົກລັດຖະມົນຕີ ໄດ້ດໍາເນີນໄປໃນສະພາບທີ່ການພົວພັນລະຫວ່າງຫວຽດນາມ ກັບ 3 ປະເທດ ລ້ວນແຕ່ພວມຢູ່ໃນທ່າພັດທະນາອັນດີງາມ, ນັບມື້ນັບຢັ້ງຢືນແມ່ນບັນດາຄູ່ຮ່ວມມືສໍາຄັນ ແລະແຖວໜ້າຢູ່ພາກພື້ນ. ການພົວພັນຮ່ວມມື ຫວຽດນາມ ແລະUAE ບັນລຸໝາກຜົນແທດຈິງຫຼາຍຢ່າງ ແລະກາຍເປັນຄູ່ຮ່ວມມືສໍາຄັນຢູ່ພາກພື້ນ. UAE ແມ່ນປະເທດທໍາອິດຢູ່ພາກພື້ນຕາເວັນອອກກາງ-ອາຟຣິກາ ທີ່ ຫວຽດນາມ ໄດ້ປຶກສາຫາລືກ່ຽວກັບການຍົກລະດັບການພົວພັນຂຶ້ນສູ່ລະດັບສູງໃໝ່. UAE ກໍ່ແມ່ນຕະຫຼາດສົ່ງອອກໃຫຍ່ສຸດຂອງຫວຽດນາມ ຢູ່ພາກພື້ນຕາເວັນອອກກາງ- ອາຟຣິກາ.

ການພົວພັນ ຫວຽດນາມ-Qatar ກໍບັນລຸໄດ້ບາດກ້າວພັດທະນາທີ່ຕັ້ງໜ້າຫຼາຍຢ່າງໃນ 30 ປີຜ່ານມາ. ພິເສດ, ບັນດາການເຄື່ອນໄຫວສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-Qatar ໃນປີ 2023 ໄດ້ສ້າງກໍາລັງແຮງ, ເປີດທິດພັດທະນາໃໝ່ໃຫ້ແກ່ການພົວພັນສອງປະເທດ. ໂອກາດນີ້, ສອງຝ່າຍໄດ້ແລກປ່ຽນ ແລະສະເໜີມາດຕະການລະອຽດ ເພື່ອເພີ່ມທະວີການຮ່ວມມືສອງຝ່າຍ, ໂດຍສະເພາະແມ່ນໃນຂົງເຂດການເມືອງ-ການທູດ, ການລົງທຶນ, ການຄ້າ, ນໍ້າມັນອາຍແກັດ, ແຮງງານ...

ການພົວພັນ ຫວຽດນາມ-Saudi Arabia ກໍພວມໄດ້ຮັບການປັບປຸງ ແລະພັດທະນາ ຢ່າງບໍ່ຢຸດຢັ້ງໃນຫຼາຍຂົງເຂດໃນຕະຫຼອດໄລຍະ 25 ປີຜ່ານມາ, ນັບແຕ່ສອງປະເທດໄດ້ສ້າງຕັ້ງການພົວພັນທາງການທູດໃນປີ 1999. ໃນຂົງເຂດການເມືອງ-ການທູດ, ສອງປະເທດໄດ້ສ້າງການພົວພັນທີ່ໄວ້ເນື້ອເຊື່ອໃຈ ແລະກາຍເປັນຄູ່ຮ່ວມມືແຖວໜ້າຂອງກັນຢູ່ພາກພື້ນ. ການຮ່ວມມືດ້ານເສດຖະກິດ-ການຄ້າ ໄດ້ຮັບຖືວ່າແມ່ນຈຸດພົ້ນເດັ່ນໃນການພົວພັນສອງປະເທດ. ຫຼາຍວິສາຫະກິດ Saudi Arabia ປາດຖະໜາຢາກເປີດກວ້າງການດໍາເນີນທຸລະກິດຢູ່ຫວຽດນາມ, ໃນຂະນະນັ້ນຫຼາຍກອງທຶນການລົງທຶນຂະໜາດໃຫຍ່ຂອງ Saudi Arabia ໄດ້ ແລະພວມຜັນຂະຫຍາຍ ຫຼາຍໂຄງການລົງທຶນເຂົ້າຫວຽດນາມ ໂດຍກົງ ກໍຄືທາງອ້ອມໃນບັນດາຂົງເຂດອະສັງຫາລິມະຊັບ, ພະລັງງານ ແລະເຫຼັກກ້າ.

ດ້ວຍພື້ນຖານທີ່ນັບມື້ນັບໜັກແໜ້ນ ໂດຍ ຫວຽດນາມ, UAE, Qatar ແລະ Saudi Arabia ກໍ່ສ້າງ ໂດຍອີງໃສ່ທ່າແຮງ ແລະຄວາມສາມາດບົ່ມຊ້ອນຂອງແຕ່ລະປະເທດ, ການຢ້ຽມຢາມຂອງທ່ານນາຍົກລັດຖະມົນຕີ  ໄດ້ຮັບຄວາມເຊື່ອໝັ້ນວ່າ ຈະນໍາການພົວພັນ ຫວຽດນາມ-UAE, ຫວຽດນາມ-Qatar ແລະຫວຽດນາມ-Saudi Arabia ຂຶ້ນສູ່ລະດັບສູງໃໝ່, ຕອບສະໜອງຄວາມມຸ່ງມາດປາດຖະໜາ ແລະຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.

ໂດຍ: ໄຊຊະນະ