ເນື່ອງໃນໂອກາດທ່ານເລຂາທິການໃຫຍ່, ປະທານປະເທດ ໂຕເລິມ ພ້ອມກັບຄະນະຜູ້ແທນຂັ້ນສູງຫວຽດນາມ ກະກຽມເຂົ້າຮ່ວມກອງປະຊຸມສຸດຍອດຝຣັ່ງໂກໂຟນີ ຄັ້ງທີ 19 ແລະຢ້ຽມຢາມ ສ ຝຣັ່ງ ຢ່າງເປັນທາງການຕາມຄຳເຊີນຂອງທ່ານ Emmanuel Macron ປະທານາທິບໍດີຝຣັ່ງ, ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ ປະຈໍາ ຝຣັ່ງ ແບ່ງປັນກັບໜັງສືພິມໂລກ ແລະຫວຽດນາມ ກ່ຽວກັບຄວາມໝາຍ ແລະການເຄື່ອນໄຫວ, ເນື້ອໃນພົ້ນເດັ່ນໃນຂອບເຂດການຢ້ຽມຢາມສຳຄັນຄັ້ງນີ້.
ນັກຂ່າວ: ຂໍທ່ານເອກອັກຄະລັດຖະທູດໃຫ້ຮູ້ຄວາມໝາຍຂອງການຢ້ຽມຢາມຫຼາຍຝ່າຍ ແລະສອງຝ່າຍຂອງທ່ານເລຂາທິການໃຫຍ່, ປະທານປະເທດ ໂຕເລິມ ຢູ່ ຝຣັ່ງ?
ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ: ການປະຕິບັດງານຂອງທ່ານເລຂາທິການໃຫຍ່, ປະທານປະເທດ ໂຕເລິມ ຢູ່ຝຣັ່ງ ມີຄວາມໝາຍສຳຄັນພິເສດ, ເພາະວ່ານີ້ແມ່ນຄັ້ງທຳອິດໃນຮອບ 22 ປີທີ່ປະທານປະເທດຫວຽດນາມ ມີການຢ້ຽມຢາມ ຝຣັ່ງ.
ການຢ້ຽມຢາມສົ່ງສານຢ່າງແຂງແຮງກ່ຽວກັບປະເທດຫວຽດນາມ ເອກະລາດ, ເປັນເຈົ້າຕົນເອງ, ແຜນນະໂຍບາຍຫັນການພົວພັນຕ່າງປະເທດເປັນຫຼາຍຝ່າຍ, ຫຼາຍຮູບຫຼາຍແບບເຊື່ອມໂຍງເຂົ້າກັບສາກົນຢ່າງຮອບດ້ານ ແລະເລິກເຊິ່ງກວ້າງຂວາງ, ຖືເປັນສໍາຄັນການປັບປຸງ ແລະເຮັດໃຫ້ການພົວພັນກັບບັນດາປະເທດໃຫຍ່, ປະເທດຄູ່ຮ່ວມມືທີ່ສຳຄັນ ແລະເພື່ອນມິດທີ່ເປັນມູນເຊື້ອ, ໃນນັ້ນມີ ຝຣັ່ງ ແລະພາກພື້ນເອີລົບ, ສະຫະພາບເອີລົບ (ອີຢູ), ພ້ອມທັງຢັ້ງຢືນການຖືເປັນສໍາຄັນ ແລະຄຳໝັ້ນສັນຍາຂອງຫວຽດນາມ ສໍາລັບລັດທິຫຼາຍຝ່າຍ ແລະການຮ່ວມມືສາກົນ...
    |
 |
|
ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ ປະຈໍາ ຝຣັ່ງ. ພາບ: ສະຖານທູດຫວຽດນາມ ປະຈໍາ ຝຣັ່ງ. |
ການເຂົ້າຮ່ວມກອງປະຊຸມສຸດຍອດຝຣັ່ງໂກໂຟນີ ຄັ້ງທີ 19 ກໍ່ສະແດງໃຫ້ເຫັນຄວາມມານະພະຍາຍາມຂອງຫວຽດນາມ ໃນການເພີ່ມທະວີຮູບພາບ ແລະການມີໜ້າຢູ່ໃນລະດັບສູງຂອງພາກພື້ນອາຊີ - ປາຊີຟິກຢູ່ ຝຣັ່ງໂກໂຟນີ. ຫວຽດນາມ ພ້ອມແລ້ວທີ່ຈະເປັນຂົວຕໍ່ຊຸກຍູ້ການພົວພັນລະຫວ່າງປະຊາຄົມຝຣັ່ງໂກໂຟນີ ກັບພາກພື້ນ, ຜ່ານນັ້ນໄດ້ຍົກສູງທີ່ຕັ້ງຂອງຫວຽດນາມ ກໍ່ຄື ທີ່ຕັ້ງຂອງປະຊາຄົມໃນເວທີສາກົນ.
ນັກຂ່າວ: ບັນດາການເຄື່ອນໄຫວ, ເນື້ອໃນພົ້ນເດັ່ນໃນການຢ້ຽມຢາມຄັ້ງນີ້ແມ່ນຫຍັງແດ່? ທ່ານເລຂາທິການໃຫຍ່, ປະທານປະເທດ ໂຕເລິມ ຄາດວ່າຈະເຂົ້າຮ່ວມ, ປະກອບສ່ວນຄືແນວໃດທີ່ກອງປະຊຸມສຸດຍອດຝຣັ່ງໂກໂຟນີ ຄັ້ງທີ 19, ຂໍຮຽນທ່ານເອກອັກຄະລັດຖະທູດ?
ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ: ໃນຂອບເຂດການເຄື່ອນໄຫວສອງຝ່າຍຢູ່ຝຣັ່ງ, ທ່ານເລຂາທິການໃຫຍ່, ປະທານປະເທດ ໂຕເລິມ ຈະພົບປະເຈລະຈາກັບທ່ານປະທານາທິບໍດີຝຣັ່ງ Emmanuel Macron, ພົບປະກັບທ່ານປະທານສະພາແຫ່ງຊາດ, ທ່ານປະທານສະພາສູງຝຣັ່ງ, ທ່ານຜູ້ອຳນວຍການໃຫຍ່ອົງການສະຫະປະຊາຊາດ ເພື່ອການສຶກສາ, ວິທະຍາສາດ ແລະວັດທະນະທໍາ (UNESCO), ພົບປະກັບເລຂາທິການທົ່ວປະເທດພັກກອມມູນິດຝຣັ່ງ ແລະບັນດາເພື່ອນມິດ, ຄູ່ຮ່ວມມື, ປະຊາຄົມຫວຽດນາມ ອາໄສຢູ່່ຝຣັ່ງ.
ຜ່ານການຢ້ຽມຢາມ, ສອງຝ່າຍຈະກຳນົດທິດທາງ, ຂອບເຂດໃຫ້ແກ່ການພົວພັນ ຫວຽດນາມ-ຝຣັ່ງ ໃນໄລຍະຈະມາເຖິງ, ໃນນັ້ນສຸມໃສ່ຍົກສູງປະສິດທິຜົນ, ເປີດກວ້າງ ແລະຍົກລະດັບກົນໄກຮ່ວມມືສອງຝ່າຍ; ເຮັດໃຫ້ການຮ່ວມມືດ້ານການເມືອງ, ການປ້ອງກັນຊາດ - ປ້ອງກັນຄວາມສະຫງົບ, ເສດຖະກິດ-ການຄ້າ-ການລົງທຶນ ເລິກເຊິ່ງກວ່າ; ທັງເປີດກວ້າງ ແລະເພີ່ມທະວີການຮ່ວມມືໃນຂົງເຂດໃໝ່, ຄື: ວິທະຍາສາດເຕັກໂນໂລຊີ ແລະປ່ຽນແປງໃໝ່ປະດິດສ້າງ, ຮັບມືກັບການປ່ຽນແປງຂອງດິນຟ້າອາກາດ ແລະພັດທະນາເສດຖະກິດສີຂຽວ, ເສດຖະກິດທະເລ...
|
|
 |
|
ກອງປະຊຸມ ຄັ້ງທີ 8 ການເຈລະຈາຂັ້ນສູງປະຈຳປີກ່ຽວກັບເສດຖະກິດ ຫວຽດນາມ-ຝຣັ່ງ ຢູ່ ນະຄອນຫຼວງປາຣີ, ວັນທີ 17 ພຶດສະພາ 2024. ພາບ: ສໍານັກຂ່າວສານຫວຽດນາມ |
ນັກຂ່າວ: ປະຈຸບັນ ຝຣັ່ງ ແມ່ນຄູ່ຮ່ວມມືການຄ້າໃຫຍ່ອັນດັບທີ 4 ຂອງຫວຽດນາມ ຢູ່ ອີຢູ ແລະແມ່ນນັກລົງທຶນໃຫຍ່ອັນດັບທີ 2 ຂອງ ອີຢູ ຢູ່ຫວຽດນາມ. ຕາມທ່ານເອກອັກຄະລັດຖະທູດແລ້ວ, ສອງປະເທດຕ້ອງເຮັດຫຍັງແດ່ເພື່ອຊຸກຍູ້ການພົວພັນດ້ານເສດຖະກິດ-ການຄ້າ-ການລົງທຶນ, ພິເສດແມ່ນໃນບັນດາຂົງເຂດໃໝ່ມີຄວາມສາມາດບົ່ມຊ້ອນ, ຄື: ການຫັນປ່ຽນດີຈີຕອນ, ການຫັນປ່ຽນສີຂຽວ...?
ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ: ຝຣັ່ງ ຍາມໃດກໍ່ແມ່ນໜຶ່ງໃນບັນດາຄູ່ຮ່ວມມືເສດຖະກິດແຖວໜ້າຂອງຫວຽດນາມ ຢູ່ເອີລົບ ແລະອີຢູ, ດ້ວຍການພົວພັນຮ່ວມມືດ້ານເສດຖະກິດຫຼາຍຮູບຫຼາຍແບບ ແລະຍາວນານ. ການແລກປ່ຽນດ້ານການຄ້າລະຫວ່າງສອງປະເທດຍາມໃດກໍ່ສະດວກດີຍ້ອນມີການໜູນຊ່ວຍ ເຊິ່ງກັນ ແລະກັນ.
ໃນການຢ້ຽມຢາມຂອງທ່ານເລຂາທິການໃຫຍ່, ປະທານປະເທດ ໂຕເລິມ, ສອງຝ່າຍຈະພ້ອມກັນກຳນົດແຜນນະໂຍບາຍ, ທິດທາງໃຫຍ່, ມີລັກສະນະຍຸດທະສາດເພື່ອເຮັດໃຫ້ການຮ່ວມມືດ້ານເສດຖະກິດ, ການຄ້າ ແລະການລົງທຶນ, ໃນນັ້ນມີວິທະຍາສາດເຕັກໂນໂລຊີ, ການປ່ຽນແປງໃໝ່ປະດິດສ້າງ, ການຮ່ວມມືນຳໃຊ້ເຕັກໂນໂລຢີສູງ, ຖ່າຍທອດເຕັກໂນໂລຢີຈະໄດ້ຮັບຄວາມເອົາໃຈໃສ່ເປັນພິເສດ.
ການຫັນປ່ຽນສີຂຽວ, ຫັນປ່ຽນດີຈີຕອນ ແລະປ່ຽນແປງໃໝ່ປະດິດສ້າງແມ່ນການເລືອກເຟັ້ນຍຸດທະສາດ, ບຸລິມະສິດແຖວໜ້າຂອງຫວຽດນາມ ແລະແມ່ນບັນດາຂົງເຂດເຊິ່ງຫວຽດນາມ ປາດຖະໜາຢາກຍູ້ແຮງການຮ່ວມມືກັບບັນດາຄູ່ຮ່ວມມືສາກົນໃນໄລຍະປະຈຸບັນ ແລະຈະມາເຖິງ, ໃນຂະນະທີ່ ຝຣັ່ງ ມີທ່າແຮງກ່ຽວກັບການຄົ້ນຄວ້າວິທະຍາສາດ ແລະແມ່ນໜຶ່ງໃນບັນດາປະເທດປ່ຽນແປງໃໝ່ປະດິດສ້າງແຖວໜ້າໂລກ.
ບັນດາກະຊວງ, ຂະແໜງການ, ຄູ່ຮ່ວມມືສອງຝ່າຍຄວນຕັ້ງໜ້າສົມທົບກັນເພື່ອຜັນຂະຫຍາຍແຜນນະໂຍບາຍຂອງການນໍາຂັ້ນສູງສອງປະເທດດ້ວຍໂຄງການຮ່ວມມືລະອຽດໃນຂົງເຂດດັ່ງກ່າວແນໃສ່ຕອບສະໜອງຄວາມຮຽກຮ້ອງຕ້ອງການອັນຮີບດ່ວນຂອງແຕ່ລະຝ່າຍ.
ນັກຂ່າວ: ຂໍຮຽນທ່ານເອກອັກຄະລັດຖະທູດ, ການພົບປະແລກປ່ຽນວັດທະນະທຳ, ການພົບປະແລກປ່ຽນປະຊາຊົນ ຍາມໃດກໍ່ແມ່ນເສົາຄໍ້າສຳຄັນໃນການພົວພັນ ຫວຽດນາມ-ຝຣັ່ງ. ໃນໄລຍະຜ່ານມາ, ສະຖານທູດຫວຽດນາມ ປະຈຳ ຝຣັ່ງ ໄດ້ຜັນຂະຫຍາຍບັນດາການເຄື່ອນໄຫວ, ເຫດການຫຍັງແດ່ເພື່ອແນໃສ່ເພີ່ມພູນຄູນສ້າງນໍ້າໃຈມິດຕະພາບ, ຊຸກຍູ້ການພົບປະແລກປ່ຽນວັດທະນະທຳ, ເພີ່ມທະວີຄວາມເຂົ້າໃຈລະຫວ່າງປະຊາຊົນສອງປະເທດ?
ທ່ານ ດິງຕວ່ານທັ໊ງ ເອກອັກຄະລັດຖະທູດຫວຽດນາມ: ການຮ່ວມມືດ້ານວັດທະນະທຳ, ການພົບປະແລກປ່ຽນປະຊາຊົນ ຍາມໃດກໍ່ແມ່ນຈຸດພົ້ນເດັ່ນ ແລະແມ່ນເສົາຄໍ້າສຳຄັນໃນການພົວພັນລະຫວ່າງ ຫວຽດນາມ ແລະຝຣັ່ງ. ຮັບຮູ້ຢ່າງເລິກເຊິ່ງກ່ຽວກັບຄວາມສຳຄັນຂອງການທູດວັດທະນະທຳ ແລະປະຊາຊົນສອງປະເທດແມ່ນປັດໄຈສຳຄັນປະກອບສ່ວນນໍາການພົວພັນມິດຕະພາບ, ການຮ່ວມມືທີ່ເປັນມູນເຊື້ອລະຫວ່າງສອງຝ່າຍເຂົ້າສູ່ລວງເລິກ, ແທດຈິງກວ່າອີກ, ສະຖານທູດຫວຽດນາມ ປະຈໍາ ຝຣັ່ງ ໄດ້ ແລະພວມຜັນຂະຫຍາຍບັນດາການເຄື່ອນໄຫວພົບປະແລກປ່ຽນວັດທະນາທໍາ, ພົບປະແລກປ່ຽນປະຊາຊົນດ້ວຍຫຼາຍຮູບຫຼາຍແບບ, ອຸດົມສົມບູນເພື່ອໂຄສະນາວັດທະນະທໍາ, ກິລາ ແລະການທ່ອງທ່ຽວຫວຽດນາມ ເຖິງເພື່ອນມິດຝຣັ່ງ ແລະເອີລົບ, ພິເສດແມ່ນໃນຂອບເຂດບັນດາການເຄື່ອນໄຫວສະເຫຼີມສະຫຼອງ ແລະບັນດາເຫດການໃຫຍ່.
ໃນຂອບເຂດການຢ້ຽມຢາມ ຝຣັ່ງ ຄັ້ງນີ້ຂອງທ່ານເລຂາທິການໃຫຍ່, ປະທານປະເທດ ໂຕເລິມ, ບັນດາໂຄງການໂຄສະນາ ແລະພົບປະແລກປ່ຽນຈະໄດ້ຮັບການຜັນຂະຫຍາຍ, ພົ້ນເດັ່ນແມ່ນ, ຄະນະຜູ້ແທນນະຄອນຮ່າໂນ້ຍ ເຂົ້າຮ່ວມໝູ່ບ້ານຝຣັ່ງໂກໂຟນີ ດ້ວຍບັນດາການເຄື່ອນໄຫວວາງສະແດງ ແລະການສະແດງທີ່ເປັນເອກະລັກສະເພາະ, ກໍ່ຄືການພົບປະກັບຄູ່ຮ່ວມມື, ທ້ອງຖິ່ນສໍາຄັນຂອງຝຣັ່ງ. ນີ້ແມ່ນບັນດາຫຼັກຖານທີ່ມີຊີວິດຊີວາ, ສ່ອງແສງຢ່າງຈະແຈ້ງເຖິງການເຄື່ອນໄຫວ ແລະການຮ່ວມມືສຳຄັນທີ່ກ່າວມາຂ້າງເທິງນີ້ຢູ່ຝຣັ່ງ.
ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!
ໂດຍ: ເຈິ່ນຮວ່ຽນ