ໃນປີ 2025, ຫວຽດນາມ ແລະ ໂປໂລຍ ໄດ້ສະເຫຼີມສະຫຼອງ 75 ປີ ແຫ່ງວັນການສ້າງຕັ້ງການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານ (4 ກຸມພາ 1950 / 4 ກຸມພາ 2025). ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະ ທ່ານ Donald Tusk ນາຍົກລັດຖະມົນຕີໂປໂລຍ ໄດ້ເນັ້ນໜັກວ່າ ສອງຝ່າຍຕ້ອງຊຸກຍູ້ການຮ່ວມມືດ້ານການເມືອງ, ເສດຖະກິດ, ຂະແໜງອາຊີບ, ທ້ອງຖິ່ນ ແລະການພົບປະແລກປ່ຽນປະຊາຊົນຢ່າງເລິກເຊິ່ງກວ້າງຂວາງ, ມີປະສິດທິຜົນກວ່າອີກ, ມຸ່ງໄປເຖິງການຍົກລະດັບການພົວພັນ ຫວຽດນາມ-ໂປໂລຍ ໃຫ້ຂຶ້ນສູ່ລະດັບຍຸດທະສາດໃນອະນາຄົດອັນໃກ້ນີ້.

ເນື່ອງໃນໂອກາດບຸນປີໃໝ່ ປີມະເມຍ 2026, ທ່ານນາງ Joanna Skoczek, ຫົວໜ້າຄະນະຜູ້ຕາງໜ້າສະຖານທູດໂປໂລຍ ປະຈຳ ຫວຽດນາມ, ໄດ້ໃຫ້ສຳພາດຕໍ່ນັກຂ່າວກ່ຽວກັບຄວາມສະໜິດຕິດພັນໃນດ້ານວັດທະນະທຳ ແລະການພົບປະແລກປ່ຽນປະຊາຊົນລະຫວ່າງສອງປະເທດ.

ນັກຂ່າວ: ບຸນປີໃໝ່ປະຈໍາຊາດຂອງຫວຽດນາມ ໃກ້ຈະວຽນມາຮອດແລ້ວ. ໃນທ່າມກາງບັນຍາກາດນີ້, ທ່ານນາງມີຄວາມຮູ້ສຶກຄືແນວໃດ?

ທ່ານນາງ Joanna Skoczek: ທຸກໆຄັ້ງທີ່ ຂ້າພະເຈົ້າ ໄດ້ເຫັນບັນຍາກາດຂອງການຕ້ອນຮັບບຸນປີໃໝ່ປະຈໍາຊາດ, ຂ້າພະເຈົ້າ ລ້ວນແຕ່ມີຄວາມແປກໃຈຕໍ່ຄວາມງາມ ແລະຈິດໃຈອັນເລິກເຊິ່ງຕໍ່ງານບຸນນີ້.

ຂ້າພະເຈົ້າ ຮູ້ສຶກດີໃຈຫຼາຍເມື່ອໄປຍ່າງຫຼິ້ນ ແລະຢ້ຽມຊົມຕາມຖະໜົນຫົນທາງທີ່ປະດັບປະດາຕົກແຕ່ງໃນໂອກາດບຸນເຕັດ, ທັງຢູ່ສະຖານທີ່ສາທາລະນະໂດຍອຳນາດການປົກຄອງທ້ອງຖິ່ນປະຕິບັດການປະດັບປະດາ, ຕົກແຕ່ງທັງຢູ່ໃນເຮືອນ, ຮ້ານຄ້າ ແລະເດີ່ນໜ້າບ້ານຂອງຊາວຮ່າໂນ້ຍ.

leftcenterrightdel
ທ່ານນາງ Joanna Skoczek, ຫົວໜ້າຄະນະຜູ້ຕາງໜ້າສະຖານທູດໂປໂລຍ ປະຈຳຫວຽດນາມ ເຂົ້າຮ່ວມເຫດການວັດທະນະທຳໃນຊຸດເສື້ອຍາວ. ພາບ: Vietnam+

ບັນດາວິຫານ, ວັດວາອາຮາມແຫ່ງຕ່າງໆ ກໍ່ເປັນຈຸດນັດພົບທີ່ຂາດບໍ່ໄດ້ໃນຊ່ວງເວລານີ້ຂອງປີ, ດ້ວຍການປະດັບປະດາ, ຕົກແຕ່ງເປັນພິເສດ ແລະຝູງຊົນທີ່ມາຂໍພອນ, ອະທິຖານເພື່ອໃຫ້ມີສຸຂະພາບເຂັ້ມແຂງ, ມີຄວາມໂຊກດີ ແລະມີຄວາມຜາສຸກ.

ຢູ່ຕະຫຼາດໃກ້ກັບບ່ອນທີ່ຂ້າພະເຈົ້າອາໄສຢູ່, ຂ້າພະເຈົ້າກໍ່ສັງເກດເຫັນວ່າ ມີການປ່ຽນແປງຫຼາຍກ່ຽວກັບເຄື່ອງຊື້ຂອງຂາຍ, ໝາກໄມ້ ແລະອາຫານການກິນໃນຊ່ວງບຸນເຕັດ. ຂ້າພະເຈົ້າ ກຳລັງພະຍາຍາມຮຽນຮູ້ໃຫ້ຫຼາຍເທົ່າທີ່ຈະຫຼາຍໄດ້ກ່ຽວກັບຮີດຄອງປະເພນີທີ່ໄດ້ຮັກສາໄວ້ໃນຊ່ວງໂອກາດນີ້.

ນັກຂ່າວ: ທ່ານນາງມີແຜນການຈັດຕັ້ງ ຫຼືເຂົ້າຮ່ວມການເຄື່ອນໄຫວໃດເນື່ອງໃນໂອກາດບຸນປີໃໝ່ປະຈໍາຊາດປີນີ້?

ທ່ານນາງ Joanna Skoczek: ຂ້າພະເຈົ້າ ຮູ້ສຶກເປັນກຽດທີ່ສຸດທີ່ໄດ້ຮັບຄຳເຊື້ອເຊີນຈາກເພື່ອນມິດຫວຽດນາມ ຫຼາຍຄົນໃຫ້ເຂົ້າຮ່ວມງານສະແດງຄອນເສີດ ແລະການພົບປະ, ຍາມໃດຂ້າພະເຈົ້າກໍ່ເຂົ້າຮ່ວມດ້ວຍຄວາມເບີກບານມ່ວນຊື່ນ ແລະຮູ້ບຸນຄຸນ. ເນື່ອງໃນໂອກາດດັ່ງກ່າວນີ້ໄດ້ເຮັດໃຫ້ຄົນຕ່າງປະເທດມີມູມມອງທີ່ດີເລີດກ່ຽວກັບວັດທະນະທຳ ແລະມູນເຊື້ອຫວຽດນາມ, ຊ່ວຍໃຫ້ພວກຂ້າພະເຈົ້າ ເຂົ້າໃຈປະເທດ ແລະປະຊາຊົນຫວຽດນາມ ຢ່າງເລິກເຊິ່ງກວ່າເກົ່າ.

ກ່ອນໜ້ານັ້ນ, ກໍ່ເຊັ່ນດຽວກັບທຸກໆປີ, ພວກຂ້າພະເຈົ້າມີການພົບປະກັບເພື່ອນຮ່ວມງານຢູ່ສະຖານທູດເພື່ອຂອບໃຈເຊິ່ງກັນ ແລະກັນ ຍ້ອນວ່າຍາມໃດກໍ່ຮ່ວມເດີນທາງ ແລະອວຍພອນໃຫ້ທຸກຄົນໂຊກດີ, ມີສຸຂະພາບແຂງແຮງ, ຈະເລີນຮຸ່ງເຮືອງ ແລະມີຄວາມຜາສຸກ. ແນ່ນອນວ່າ ຂ້າພະເຈົ້າຈະມີດອກໄມ້ສົດຢູ່ໃນເຮືອນຂອງຂ້າພະເຈົ້າເພື່ອນຳເອົາລະດູບານໃໝ່ມາສູ່ຂົງເຂດດຳລົງຊີວິດຂອງຂ້າພະເຈົ້າ, ບໍ່ວ່າສະພາບອາກາດຈະເປັນແນວໃດກໍຕາມ.

ນັກຂ່າວ: ໃນຂະນະທີ່ເຮັດວຽກຢູ່ຫວຽດນາມ, ທ່ານນາງມີຄວາມຮູ້ສຶກຄືແນວໃດຕໍ່ວັດທະນະທຳ ແລະຮີດຄອງປະເພນີຢູ່ທີ່ນີ້? ມາຮອດປະຈຸບັນ, ສິ່ງໃດທີ່ເຮັດໃຫ້ທ່ານນາງສົນໃຈຫຼາຍທີ່ສຸດກ່ຽວກັບວັດທະນະທຳ ແລະວິຖີຊີວິດຂອງຫວຽດນາມ?

ທ່ານນາງ Joanna Skoczek: ຍາມໃດຂ້າພະເຈົ້າ ກໍ່ມີຄວາມປະຫຼາດໃຈຕໍ່ວິທີທີ່ຫວຽດນາມ ສົມທົບການເຄົາລົບນັບຖືທີ່ເປັນມູນເຊື້ອກັບຄວາມທັນສະໄໝ. ຂ້າພະເຈົ້າ ເຊື່ອໝັ້ນວ່າ ນີ້ກໍ່ແມ່ນຈຸດທີ່ຄ້າຍຄືກັນກັບໂປໂລຍ.

ສິ່ງທີ່ຂ້າພະເຈົ້າ ມັກເປັນພິເສດແມ່ນແມ່ຍິງຫວຽດນາມ ຍັງມັກໃສ່ຊຸດເສື້ອຍາວ ແລະສືບຕໍ່ປະດິດສ້າງຊຸດເສື້ອຍາວນີ້. ຂ້າພະເຈົ້າ ເຫັນວ່າ ມັນເປັນການສະແດງຄວາມເຄົາລົບນັບຖືຕໍ່ຄຸນຄ່າທີ່ເປັນມູນເຊື້ອອັນດີງາມທີ່ສຸດ, ພ້ອມທັງເປັນການສົ່ງສານທີ່ເຂັ້ມແຂງຂອງຄວາມໝັ້ນໃຈ. ສຳລັບຂ້າພະເຈົ້າແລ້ວ, ຊຸດເສື້ອຍາວແມ່ນການສະແດງອອກຂອງແມ່ຍິງຫວຽດນາມ: ເຂັ້ມແຂງ, ເອກະລາດ, ສະຫງ່າງາມ ແລະເປັນແມ່ຍິງທີ່ອ່ອນໂຍນໃນເວລາດຽວກັນ.

ນອກຈາກຊຸດເສື້ອຍາວແລ້ວ, ມັນເປັນສິ່ງທີ່ໜ້າຊື່ນຊົມເມື່ອໄດ້ເຫັນລວດລາຍພື້ນເມືອງ, ຊົນເຜົ່າຕ່າງໆນັບມື້ນັບໄດ້ຮັບການນຳໃຊ້ເຂົ້າໃນການອອກແບບທີ່ທັນສະໄໝຫຼາຍຂຶ້ນ.

ຂ້າພະເຈົ້າ ຫວັງວ່າຈະໄປທ່ອງທ່ຽວໃຫ້ຫຼາຍຂຶ້ນເພື່ອເຂົ້າໃຈເຂດພາກຕ່າງໆຂອງຫວຽດນາມ ຢ່າງຈະແຈ້ງກວ່າ ແລະຊອກຮູ້ເພີ່ມເຕີມກ່ຽວກັບຈຸດພິເສດຂອງທ້ອງຖິ່ນ, ຮີດຄອງປະເພນີ, ດົນຕີ. ໜຶ່ງໃນຈຸດພົ້ນເດັ່ນຂອງປີກາຍນີ້ແມ່ນງານບຸນດົນຕີພື້ນເມືອງທີ່ຂ້າພະເຈົ້າມີໂອກາດໄດ້ເຂົ້າຮ່ວມຢູ່ ວັນໝຽວ-ກວກຕື້ຢາມ ໃນຕົ້ນເດືອນພະຈິກ. ສຽງຂອງພູຜາປ່າໄມ້ຍັງຢູ່ກັບຂ້າພະເຈົ້າຕະຫຼອດເວລາຫຼາຍປີຕັ້ງແຕ່ນັ້ນມາ.

ນັກຂ່າວ: ຂໍຂອບໃຈທ່ານນາງ.

ໂດຍ: ຈາງຫງວຽນ