ສະຫະພັນລັດເຊຍ ແລະການາດາ ຊ່ວຍເຫຼືອຫວຽດນາມ ແກ້ໄຂຜົນຮ້າຍຢ້ອນຫຼັງຈາກພາຍຸ ລູກທີ 3
ກປ.ອອນໄລ - ຕອນຄໍ່າວັນທີ 20 ກັນຍາ, ເຮືອບິນພິເສດໝາຍເລກ SUM 9127 ຂອງກະຊວງປ້ອງກັນພົນລະເຮືອນ, ສະຖານະການສຸກເສີນ ແລະແກ້ໄຂຜົນຮ້າຍຢ້ອນຫຼັງຈາກໄພທໍາມະຊາດສະຫະພັນລັດເຊຍ ໄດ້ລົງຈອດຢູ່ສະໜາມບິນສາກົນໂນ້ຍບາຍ, ບັນທຸກສິນຄ້າ 35 ໂຕນເພື່ອຊ່ວຍຫວຽດນາມ ແກ້ໄຂຜົນຮ້າຍຢ້ອນຫຼັງຈາກພາຍຸລູກທີ 3. ຫຼັງຈາກນັ້ນ, ຕໍ່ໜ້າການເປັນສັກຂີພິຍານຂອງຜູ້ຕາງໜ້າກົມຄຸ້ມຄອງຄັນຄູ ແລະປ້ອງກັນ, ຕ້ານໄພທໍາມະຊາດ (ກະຊວງກະສິກໍາ ແລະພັດທະນາຊົນນະບົດຫວຽດນາມ), ທ່ານ Ivan Sergeevich Nesterov ອຸປະທູດຊົ່ວຄາວສະຫະພັນລັດເຊຍ ປະຈໍາ ຫວຽດນາມ ພ້ອມດ້ວຍຄະນະປະຕິບັດງານ ແລະບັນດາພະນັກງານສະຖານທູດລັດເຊຍ ປະຈໍາ ຫວຽດນາມ ໄດ້ຈັດຕັ້ງພິທີ ມອບ-ຮັບເຄື່ອງຊ່ວຍເຫຼືອ 35 ໂຕນໃຫ້ຝ່າຍຫວຽດນາມ.
ຕາງໜ້າລັດຖະບານ ແລະປະຊາຊົນສະຫະພັນລັດເຊຍ, ທ່ານ Ivan Sergeevich Nesterov ໄດ້ສົ່ງຄໍາແບ່ງເບົາຄວາມເສົ້າສະຫຼົດໃຈຕໍ່ຜົນຮ້າຍຂອງພາຍຸລູກທີ 3 ຢູ່ພາກເໜືອຫວຽດນາມ, ເຮັດໃຫ້ປະຊາຊົນເສຍຊີວິດ, ໄດ້ຮັບບາດເຈັບ ແລະທໍາລາຍເຮືອນຊານບ້ານຊ່ອງຢ່າງໜັກໜ່ວງ.
ການມອບ-ຮັບເຄື່ອງຊ່ວຍເຫຼືອມະນຸດສະທໍາ 35 ໂຕ່ນຂອງລັດເຊຍ ເພື່ອມອບໃຫ້ຜູ້ຖືກເຄາະຮ້າຍຈາກໄພທໍາມະຊາດແມ່ນສັນຍາລັກຂອງການພົວພັນມິດຕະພາບທີ່ເປັນມູນເຊື້ອລະຫວ່າງປະຊາຊົນສອງປະເທດໃນຕະຫຼອດ 75 ປີຜ່ານມາ. ທ່ານ Ivan Sergeevich Nesterov ເຊື່ອໝັ້ນວ່າ ດ້ວຍການຊ່ວຍເຫຼືອຂອງລັດຖະບານ ແລະປະຊາຊົນລັດເຊຍຈະຊ່ວຍໃຫ້ຊາວຫວຽດນາມ ທີ່ໄດ້ຮັບຜົນທະທ້ອນຈາກພາຍຸລູກທີ 3 ກັບຄືນສູ່ການດໍາລົງຊີວິດເປັນປົກກະຕິ.
|
|
ເຄື່ອງຊ່ວຍເຫຼືອມະນຸດສະທໍາ 35 ໂຕນຂອງລັດເຊຍ ຊ່ວຍເຫຼືອຫວຽດນາມ ແກ້ໄຂຜົນຮ້າຍຢ້ອນຫຼັງຈາກພາຍຸລູກທີ 3. ພາບ: ສໍານັກຂ່າວສານຫວຽດນາມ |
ໃນວັນດຽວກັນ, ສະຖານທູດການາດາ ປະຈໍາ ຫວຽດນາມ ອອກແຈ້ງການວ່າການາດາໄດ້ໜູນຊ່ວຍ 560.000 ໂດລາການາດາ (ກວ່າ 10 ຕື້ດົ່ງ) ເພື່ອຊ່ວຍເຫຼືອຊາວຫວຽດນາມ ທີ່ໄດ້ຮັບຜົນສະທ້ອນຈາກນໍ້າຖ້ວມ ແລະດິນເຊາະເຈື່ອນຍ້ອນພາຍຸລູກທີ 3 ກໍ່ຂຶ້ນ. ການາດາໄດ້ຈັດແບ່ງ 350.000 ໂດລາການາດາ ເພື່ອໜູນຊ່ວຍ Oxfam Canada ສະໜອງນໍ້າ, ບໍລິການທຳຄວາມສະອາດ, ຊຸດທຳຄວາມສະອາດ ກໍ່ຄືບັນດາການບໍລິການການແພດ ແລະອຸປະກາລະທີ່ມີລັກສະນະລໍ່ແຫຼມທາງເພດໃຫ້ວົງຄະນະຍາດທີ່ມີຄວາມສ່ຽງງ່າຍ, ໄດ້ຮັບຜົນສະທ້ອນຈາກພາຍຸ ແລະດິນເຊາະເຈື່ອນພາຍຫຼັງພາຍຸ.
ການາດາ ກໍ່ອຸປະຖຳ 160.000 ໂດລາການາດາ ໃຫ້ສະພາກາແດງການາດາ ໂດຍຜ່ານກອງທຶນໜູນຊ່ວຍໄພພິບັດສຸກເສີນ (EDAF) ເພື່ອສະໜອງສະບຽງອາຫານ, ນໍ້າ, ການບໍລິການທຳຄວາມສະອາດ, ການແພດ, ບ່ອນຢູ່ບ່ອນກິນ ແລະໜູນຊ່ວຍເງິນສົດ. ນອກຈາກນັ້ນ, 50.000 ໂດລາການາດາ ໄດ້ຈັດແບ່ງໃຫ້ສະຖາບັນຄຸ້ມຄອງ ແລະພັດທະນາອາຊີ (AMDI) ຢູ່ຫວຽດນາມ ຜ່ານກອງທຶນຂໍ້ລິເລີ່ມທ້ອງຖິ່ນການາດາ (CFLI) ເພື່ອກູ້ຊ່ວຍສຸກເສີນ ແລະຊ່ວຍຟື້ນຟູ, ກໍ່ຄືຍົກສູງກຳລັງຄວາມສາມາດຂອງວົງຄະນະຍາດທ້ອງຖິ່ນຢູ່ແຂວງລາວກາຍ ແລະແຂວງກາວບັ່ງ, ເພື່ອຮັບມືກັບໄພທໍາມະຊາດໃນອະນາຄົດ.
ຕາມທ່ານ Shawn Steil ເອກອັກຄະລັດຖະທູດການາດາ ປະຈໍາ ຫວຽດນາມ ແລ້ວ ບ້ວງເງິນໜູນຊ່ວຍນີ້ລວມມີການໜູນຊ່ວຍບັນດາອົງການຈັດຕັ້ງບໍ່ຂຶ້ນກັບລັດຖະບານພາຍໃນປະເທດ ແລະສາກົນກໍ່ຄືສະພາກາແດງເພື່ອຕອບສະໜອງຄວາມຕ້ອງການທີ່ຈໍາເປັນທີ່ສຸດ. ການາດາສືບຕໍ່ຕິດຕາມສະພາບການຢ່າງໃກ້ຊິດ ແລະກຽມພ້ອມໃຫ້ການຊ່ວຍເຫຼືອສາມັກຄີກັບຊາວຫວຽດນາມ.
ໂດຍ: ໄຊນີດາ